ကျိုက်ထီးရိုးစေတီတော်

December 23, 2020

ကျိုက်ထီးရိုးစေတီတော် ခြေလျင်တောင်တက်လမ်းကို ယာယီပိတ်

မွန်ပြည်နယ်၊ ကျိုက်ထိုမြို့နယ်ရှိ  သမိုင်းဝင်ဆံတော်ရှင်ကျိုက်ထီးရိုးစေတီတော် ခြေလျင်တောင်တက်လမ်းကို ဒီဇင်ဘာ ၂၂ ရက်နေ့က စတင်ကာ ယာယီပိတ်ထားလိုက်တယ်လို့ သိရပါတယ်။ ကိုဗစ်-၁၉ ရောဂါစတင်ဖြစ်ပွားချိန်ကစပြီး တောင်တက်မော်တော်ယာဥ်လိုင်းနဲ့ ကေဗယ်ကားလိုင်းတွေကို ပိတ်ထားခဲ့ပြီး အခု ခြေလျင်တောင်တက်လမ်းကိုလည်း ယာယီပိတ်လိုက်တာပါ။ ခရစ္စမတ်ပိတ်ရက်နဲ့ နှစ်သစ်ကူးပိတ်ရက်တွေမှာ ကျိုက်ထီးရိုးစေတီတော်ကို အနယ်နယ် အရပ်ရပ်က ဘုရားဖူးတွေလာရောက်ကြဖို့ မေးမြန်းစုံစမ်းနေမှုတွေ ရှိနေတဲ့အတွက် ဒီဇင်ဘာလ ၂၂ ရက်နေ့က စတင်ကာ ကျိုက်ထီးရိုးစေတီ ခြေလျင်တောင်တက်လမ်းကို ခေတ္တပိတ်လိုက်တာဖြစ်ပြီး ပြန်လည်ဖွင့်လှစ်မယ့်အချိန်ကို အသိပေးကြေညာသွားမယ်လို့ ဘဏ္ဍာတော်ထိန်းဂေါပကအဖွဲ့က ဗွီနိုင်းချိတ်ဆွဲထုတ်ပြန်ထားပါတယ်။ ကျိုက်ထီးရိုးစေတီတော် ဘဏ္ဍာတော်ထိန်းဂေါပကအဖွဲ့ဝင် ဦးအေးမြင့်သိန်းက “ခြေလျင်တောင်တက်လမ်းကို မနေ့ကစပြီး ပိတ်လိုက်တာပါ။ ရန်ကုန်မှာလည်း အင်းယားကောင်ဘောင်တို့ ဘာတို့မှာ နှစ်သစ်ကူးနဲ့ ခရစ္စမတ်တို့အတွက် ရည်ရွယ်ပြီး ပိတ်လိုက်တယ်ဆိုတော့ ကျနော်တို့ဆီကို လူစုလူဝေးနဲ့စုပုံပြီး လာကြမှာစိုးလို့ အခုလို တားမြစ်လိုက်တဲ့ သဘောပါ။ နှစ်သစ်ကူးတို့ ခရစ္စမတ်တို့ပြီးသွားရင်တော့ ခြေလျင်တက်လမ်းကို ပုံမှန်အတိုင်းပြန်ဖွင့်သွားမှာပါ။ လက်ရှိတောင်ပေါ်မှာက ကိုဗစ်ကင်းစင်နယ်မြေဖြစ်နေတဲ့အတွက် ဒါကို ဆက်ပြီးထိန်းတဲ့သဘောပါ။ ကျနော့်အနေနဲ့ကတော့ ကိုဗစ်ကြီး မြန်မြန်ပျောက်ပြီး ဘုရားဖူးတွေ နဲ့ အရင်အတိုင်း ပြန်လည်စည်ကားစေချင်ပါတယ်” လို့ DVB ကို ပြောပါတယ်။ အသက်ရှူလမ်းကြောင်းဆိုင်ရာ ကိုဗစ်-၁၉ ရောဂါကြောင့် ကျိုက်ထီးရိုးစေတီတော် ပွဲတော်ကာလကို ပြီးခဲ့တဲ့မတ်လ ၂၁ ရက်နေ့ကစပြီး ရပ်ဆိုင်းခဲ့တာပါ။ လက်ရှိမှာတော့ ကျိုက်ထီးရိုးတောင်ပေါ်မှာ ဒေသခံမိသားစုပေါင်း ၁၀၀၀ ကျော် နေထိုင်နေပြီး စားဝတ်နေရေးအတွက် အခက်အခဲဖြစ်နေကြပါတယ်။  မိသားစုဝင်တွေအနေနဲ့ တောင်ခြေဆင်းပြီး ကျပန်းအလုပ်လုပ်ကိုင်တာ၊ စျေးဝယ်တာနဲ့ ကျန်းမာရေးအခြေအနေတွေကြောင့်  ခြေလျင်လမ်းကို အတက်အဆင်းပြုလုပ်နိုင်ဖို့ ခြွင်းချက်အနေနဲ့တော့ ခွင့်ပြုပေးထားတယ်လို့ ကျိုက်ထီးရိုးစေတီရင်ပြင်တော် အုပ်ချုပ်ရေးအဖွဲ့ရုံးက သိရပါတယ်။ သမိုင်းဝင်ဆံတော်ရှင်ကျိုက်ထီးရိုးစေတီတော်ကြီးကို နှစ်စဉ် ပြည်တွင်း၊ ပြည်ပခရီးသည် ၁၀ သန်းကျော် လာရောက်လေ့ရှိပြီး ဘုရားဖူးပြည်သူတွေကို အမှီပြုကာ ပျံကျဈေးရောင်းချတာတွေ၊ စားသောက် ဆိုင်လုပ်ငန်း၊ ဟိုတယ်၊ တည်းခိုခန်းလုပ်ငန်းတွေ၊ တောင်တက်ကား ပြေးဆွဲတဲ့ လုပ်ငန်းတွေအပြင် တခြားလုပ်ငန်းတွေကိုလည်း လုပ်ကိုင်နေကြတယ်လို့ သိရပါတယ်။ သတင်း - ယူမင်းစိုး၊ Photo - YNI
5 months Ago

June 28, 2020

ကျိုက်ထီးရိုးစေတီတော် နိုင်ငံခြားသား ဇုန်ဝင်ကြေး ကောက်ခံရရှိမှု ထက်ဝက်ခန့် ကျဆင်း

သမိုင်းဝင် ဆံတော်ရှင်ကျိုက်ထီးရိုးစေတီတော်ရဲ့ ၂၀၁၉-၂၀ ခုနှစ်အတွက် နိုင်ငံခြားသား ဇုန်ဝင်ကြေး ကောက်ခံရရှိမှုဟာ အရင်နှစ်တွေထက် ထက်ဝက်နီးပါး ကျဆင်းခဲ့တယ်လို့ ကျိုက်ထိုမြို့နယ် စည်ပင်သာယာရေးအဖွဲ့ရုံးက ပြောပါတယ်။ ဆံတော်ရှင် ကျိုက်ထီးရိုးစေတီတော်ကို နိုင်ငံခြားသား လာရောက်မှုမှာ ထိုင်းနိုင်ငံက အများဆုံးဖြစ်ပြီး တရုတ်၊ ဗီယက်နမ်နဲ့ ကမ္ဘောဒီယားနိုင်ငံတွေအပြင် ဥရောပနိုင်ငံတွေက ကမ္ဘာ့လှည့်ခရီးသွားတွေလည်း လာရောက်လေ့လာလည်ပတ်လေ့ရှိပါတယ်။ အခုနှစ် ဘုရားပွဲရာသီကို အသက်ရှူလမ်းကြောင်းဆိုင်ရာ ကိုဗစ်-၁၉ ကပ်ရောဂါကြောင့် ပိတ်သိမ်းလိုက်ရတဲ့အတွက် အခုလို လျော့ကျခဲ့တာလို့ ကျိုက်ထိုမြို့နယ် စည်ပင်သာယာရေးအဖွဲ့ရုံးမှ ဦးစီးအရာရှိ ဦးဝဏ္ဏအောင်က DVB ကို ပြောပါတယ်။ “အရင်နှစ်တွေက ကျိုက်ထီးရိုးကို နိုင်ငံခြားသားဝင်ရောက်မှုက တစ်သိန်းအထက်မှာ ရှိပါတယ်။ ကိုဗစ်-၁၉ ကြောင့် နိုင်ငံခြားသားတွေလည်းလာလို့ မရတော့ ဇုန်ဝင်ကြေး ကောက်ခံရရှိမှုကလည်း ကျဆင်းသွားတာပါ။ ကျနော်တို့ကတော့ ကျိုက်ထီးရိုးကိုလာတဲ့ နိုင်ငံခြားသားတွေအတွက် စည်ကမ်းစနစ်တကျဖြစ်အောင်လို့ သူတို့ ကျန်းမာရေး၊ လုံခြုံရေး ကိစ္စတစ်ခုခု ဖြစ်လာရင် သက်ဆိုင်ရာဌာနတွေနဲ့ ချိတ်ဆက်ပေးတာတွေကိုလည်း လုပ်ဆောင်ပေးထားပါတယ်။”  ကျိုက်ထီးရိုးစေတီတော်ကို နိုင်ငံခြားသား လာရောက်လည်ပတ်မှုအတွက် ဇုန်ဝင်ကြေး ကောက်ခံမှုကို မွန်ပြည်နယ်အစိုးရအဖွဲ့ အစီအစဉ်နဲ့ ကျိုက်ထို မြို့နယ်စည်ပင်သာယာရေးအဖွဲ့က ကောက်ခံနေပြီး ရရှိလာတဲ့ဝင်ငွေတွေကို စည်ပင်သာယာရေးအဖွဲ့ ရန်ပုံငွေအဖြစ် ထားရှိ အသုံးပြုထားတယ်လို့ သိရပါတယ်။ ကျိုက်ထီးရိုးစေတီတော်ကို နိုင်ငံခြားသား ဇုန်ဝင်ကြေးအဖြစ် ၂၀၁၈ ခုနှစ် မတိုင်ခင်ကာလထိ တစ်ဦးကို ကျပ် ၆၀၀၀ နှုန်းနဲ့ ကောက်ခံခဲ့ပြီး ၂၀၁၈ ခုနှစ်နောက်ပိုင်းမှစကာ တစ်ဦးကို ကျပ် ၁၀,၀၀၀ နှုန်း တိုးမြှင့်ကောက်ခံခဲ့တာ ဖြစ်ပါတယ်။ နိုင်ငံခြားသား ဧည့်ဝင်နှုန်းအနေနဲ့ ၂၀၁၈-၂၀၁၉ ဘဏ္ဍာနှစ်မှာ ၁၀၅,၉၅၆ ဦး ဝင်ရောက်ခဲ့ပြီး ဝင်ငွေ ကျပ် ၁,၀၅၉,၅၆၀,၀၀၀ ရရှိခဲ့ကာ ၂၀၁၉-၂၀၂၀ ဘဏ္ဍာနှစ် ၂၀၁၉ ခုနှစ် အောက်တိုဘာလ ၁ ရက်ကနေ ၂၀၂၀ ခုနှစ် မတ် ၂၁ ရက်အထိ ၆၆၀၅၁ ဦးဝင်ရောက်ခဲ့ရာ ငွေကျပ် ၆၆၀,၅၁၀,၀၀၀ ကောက်ခံ ရရှိခဲ့တယ်လို့ ကျိုက်ထိုမြို့နယ် စည်ပင်သာယာရေးအဖွဲ့ရုံး မှတ်တမ်းတွေအရ သိရပါတယ်။ ယူမင်းစိုး
10 months Ago
Up