မွန်ပြည်နယ်၊ ကျိုက်ထိုမြို့နယ်၊ အင်္ဂဘိုကျေးရွာ၊ လက်ပံပင်သင်္ချိုင်းကုန်းအနီးမှာ နယ်မြေကျုးကျော်ဝင်ရောက်ပြီး လက်နက်ကြီးထိုင် တပ်စွဲထားတဲ့ စစ်ကောင်စီတပ်ဖွဲ့ဝင်တွေ တိုက်ခိုက်ခံရတာကြောင့် ၁၇ ဦး သေဆုံးသွားတယ်လို့ ကျိုက်ထိုတော်လှန်ရေး အင်အားစု (KRF) က ထုတ်ပြန်ပါတယ်။

လက်ပံပင်သင်္ချိုင်းကုန်းအနီးမှာ လက်နက်ကြီးထိုင် တပ်စွဲထားတဲ့ စစ်ကောင်စီတပ်ဖွဲ့ဝင်တွေကို ကရင်အမျိုးသားလွတ်မြောက်ရေးတပ်မတော် (KNLA)၊ ကျိုက်ထိုတော်လှန်ရေးအင်အားစု (KRF)နဲ့ ပြည်သူ့ကာကွယ်ရေး ပူးပေါင်းတပ်တို့က သြဂုတ် ၂၈ ရက်နေ့ မနက် ၁ နာရီလောက်မှာ သွားရောက် တိုက်ခိုက်ခဲ့တာပါ။

KNLA အပါအဝင် ပူးပေါင်းတပ်ဖွဲ့ ၃ ဖွဲ့ဟာ စစ်ကောင်စီတပ်စွဲထားတဲ့ နေရာကို လက်နက်ကြီးတွေအပြင် ဒရုန်းတွေနဲ့ပါ အလစ်ငိုက်သွားရောက် တိုက်ခိုက်ခဲ့တာလို့ ဆိုပါတယ်။

အဲဒီတိုက်ခိုက်မှုအတွင်း စစ်ကောင်စီတပ်ဖွဲ့ဝင် ၁၇ ဦး သေဆုံးခဲ့ပြီး စစ်ကောင်စီတပ်ဖွဲ့ဝင်တွေရဲ့ အလောင်းတွေကို မနက်ပိုင်းမှာ ဖောကားနဲ့ လာရောက် သယ်ဆောင်သွားတယ်လို့ ကျိုက်ထိုတော်လှန်ရေး အင်အားစု (KRF)က တာဝန်ရှိသူတဦးက ဒီဗွီဘီကို ပြောပါတယ်။

တိုက်ခိုက်မှုအတွင်း စစ်ကောင်စီဘက်က လက်နက်ကြီးတွေနဲ့အပြင် စက်သေနတ်တွေနဲ့ပါ ပြန်လည်ပစ်ခတ်ခဲ့ပေမယ့် KNLA ပူးပေါင်းအဖွဲ့က ထိခိုက်တစုံတရာ မရှိဘဲ အောင်မြင်စွာ ဆုတ်ခွာနိုင်ခဲ့တယ်လို့ ဆိုပါတယ်။

စစ်ကောင်စီယာဉ်တန်းတွေ မကြာခဏ မိုင်းဆွဲတိုက်ခိုက်ခံရနေတဲ့ လက်ပံပင်သင်္ချိုင်းကုန်းအနီးမှာ စစ်ကောင်စီတပ်က လက်နက်ကြီးထိုင် တပ်စွဲထားတာဟာ တပတ်လောက်ပဲ ရှိနေသေးတယ်လို့ ဆိုပါတယ်။

စစ်ကောင်စီတပ်ဟာ လက်နက်ကြီးထိုင် တပ်စွဲထားတဲ့ နေရာကနေ ဖြတ်သန်းသွားတဲ့ ပြည်သူတွေကို ဖမ်းဆီးစစ်ဆေးတာနဲ့ ဒူးထောက်လက်မြှောက်ခိုင်းတာတွေ လုပ်ဆောင်ခဲ့တယ်လို့ ဒေသခံတွေက ပြောပါတယ်။

ဒါပေမယ့် တိုက်ခိုက်ခံရပြီးနောက် အဲဒီနေရာမှာ ရှိနေတဲ့ စစ်ကောင်စီတပ်ဖွဲ့ဝင်တွေ မရှိတော့ဘူးလို့ ဆိုပါတယ်။

ကရင်အမျိုးသားအစည်းအရုံး တပ်မဟာ (၁) ထိန်းချုပ်နယ်မြေ ကျုက်ထိုမြို့နယ်ထဲမှာ စစ်ကောင်စီတပ်နဲ့ KNLA ပူးပေါင်းတပ်တို့ကြား နှစ်ဖက် စစ်ရေးအခြေအနေ ဆက်လက် တင်းမာနေပါတယ်။

လက်ပံပင်သင်္ချိုင်းကုန်းအနီး တိုက်ခိုက်ခံရတာနဲ့ပတ်သက်ပြီး စစ်ကောင်စီဘက်ကတော့ သတင်းထုတ်ပြန်တာ မရှိသေးပါဘူး။

မွန်ပြည်နယ်၊ ကျိုက်ထိုမြို့နယ်၊ အင်္ဂဘိုကျေးရွာအနီး ရန်ကုန်-မော်လမြိုင်ကားလမ်းမပေါ်မှာ သြဂုတ် ၁၅ ရက်နေ့ မနက် ၉ နာရီလောက်က စစ်ကောင်စီ ရဲတပ်ဖွဲ့ဝင် ၂ ဦး တိုက်ခိုက်ခံရတာကြောင့် သေဆုံးသွားတယ်လို့ ကျိုက်ထိုတော်လှန်ရေးအင်အားစု KRF က DVB  ကို ပြောပါတယ်။

ကျိုက်ထိုမြို့နယ် မရမ်းချောင်းဘက်ကနေ အရပ်သား အိမ်စီးကား (Toyota Wish) အဖြူရောင်ကားကို အသုံးပြုပြီး အရပ်သားဝတ်နဲ့ မောင်းနှင်းလာတဲ့ စစ်ကောင်စီ ရဲတပ်ဖွဲ့ဝင်တွေကို KNLA ပူးပေါင်းတပ်ဖွဲ့က သတင်းအရ ကြိုတင်စောင့်ဆိုင်းပြီး တိုက်ခိုက်ခဲ့တာပါ။

ကရင်အမျိုးသားလွတ်မြောက်ရေးတပ်မတော် (KNLA) နဲ့ ကျိုက်ထိုတော်လှန်ရေး အင်အားစု KRF ပူးပေါင်းအဖွဲ့ တိုက်ခိုက်မှုကြောင့် စစ်ကောင်စီ ရဲတပ်ဖွဲ့ဝင် ၂ ဦး အခင်းဖြစ်ရာ နေရာမှာပဲ သေဆုံးခဲ့ပြီး ၁ ဦး ပြင်းထန်ဒဏ်ရာရရှိခဲ့တာပါ။

ပြင်းထန်ဒဏ်ရာရှိခဲ့တဲ့သူဟာ တရားခံ ဒါမှမဟုတ် စစ်ကောင်စီ စစ်တပ်သား ၁ ဦး ဖြစ်တယ်လို့ ပြောဆိုနေကြပေမယ့် DVB အနေနဲ့ သီးခြားအတည်မပြုနိုင်သေးပါဘူး။

တိုက်ခိုက်ခံရပြီး သေဆုံးသွားတဲ့ ရဲတပ်ဖွဲ့ဝင် ၂ ဦးနဲ့ ပြင်းထန်ဒဏ်ရာရရှိခဲ့တဲ့သူ ၁ ဦးကိုတော့ စစ်ကောင်စီတပ်က လာရောက် ကောက်ယူသွားပြီး ကျိုက်ထိုမြို့နယ်ပြည်သူ့ဆေးရုံကို ပို့ဆောင်ထားတယ်လို့ ကျိုက်ထိုတော်လှန်ရေးအင်အားစု KRF တာဝန်ရှိသူတဦးက ပြောပါတယ်။

KNLA ပူးပေါင်းတပ်ဖွဲ့ရဲ့ တိုက်ခိုက်မှုကြောင့် သေဆုံးတဲ့ ရဲတပ်ဖွဲ့ဝင်တွေဟာ မရမ်းချောင်နယ်ထိန်း ရဲတပ်ကြပ်ကြီး စိုးမင်းနဲ့ ရဲတပ်သားတဦး ဖြစ်တယ်လို့ သိရပါတယ်။

ကျိုက်ထိုမြို့နယ်၊ အင်္ဂဘိုကျေးရွာဟာ စစ်ကောင်စီယာဉ်တန်းတွေ မကြာခဏ မိုင်းဆွဲ တိုက်ခိုက်ခံနေရတဲ့ နေရာတစ်ခုလည်း ဖြစ်ပါတယ်။