ကျိုက်ထို

August 15, 2022

အချုပ်သားပို့ဆောင်စဥ် ပစ်ခတ်ခံရသဖြင့် သိမ်ဇရပ်ရဲစခန်းက ဒုရဲအုပ်ပါ ၂ ဦးသေ၊ ၁ ဦးဒဏ်ရာရ

မွန်ပြည်နယ်၊ ကျိုက်ထိုမြို့နယ်မှာ သိမ်ဇရပ်ရဲစခန်းက  ဒုရဲအုပ်တယောက်နဲ့ တပ်ဖွဲ့ဝင်သုံးယောက်ဟာ အချုပ်သားကို တရားရုံးသို့ပို့ဆောင်စဉ် ဩဂုတ် ၁၅ ရက် မနက် ၁၀ နာရီက သေနတ်နဲ့ပစ်ခတ်ခံရပြီး ဒုရဲအုပ်အပါအဝင်နှစ်ယောက် သေဆုံးကာ တယောက် ဒဏ်ရာရရှိတယ်လို့ မြို့ခံတွေဆီက သိရပါတယ်။

သိမ်ဇရပ်ရဲစခန်းက အချုပ်သားတယောက်ကို  သထုံခရိုင်တရားရုံးသို့ပို့ဆောင်စဥ်  လက်ပံပင်သင်္ချိုင်းကုန်းအကွေ့အရောက်မှာ သေနတ်နဲ့ ပစ်ခတ်ခံရတာလို့ မြို့ခံတစ်ဦးက ပြောပါတယ်။

“ဗုံးနဲ့ရော သေနတ်တွေရော ပစ်တယ်ပြောတယ် ရဲနှစ်ဦး သေတယ်။ တစ်ဦး ဒဏ်ရာရတယ်"လို့ ပြောပါတယ်။

သထုံခရိုင်တရားရုံးကို အချုပ်သား သွားရောက်ပို့ဆောင်တဲ့ ဒုရဲအုပ်ပါလေးယောက် ပစ်ခတ်ခံရတာ မှန်ကန်ပြီး ဒုရဲအုပ်တယောက်၊ ရဲတပ်ကြပ်ကြီးတယောက် သေဆုံးပြီး ရဲတပ်သားတယောက် ဒဏ်ရာရရှိခဲ့တဲ့အပြင် အချုပ်သားလည်း ထိခိုက်ဒဏ်ရာရရှိခဲ့တယ်လို့ အုပ်ချုပ်ရေးနဲ့ နီးစပ်သူတစ်ဦးက ပြောပါတယ်။

“လက်နက်ကြီးငယ်တွေနဲ့ ပစ်တာ နှစ်ဦးသေတယ်။ တစ်ဦး ဒဏ်ရာရတယ် အချုပ်သားလည်း ထိတယ် ပိုဆိုးတာက ရဲတစ်ယောက်ပါ ပျောက်နေတာ လိုက်ရှာနေတုန်း။”

လတ်တလောမှာ သေဆုံးသူနဲ့ဒဏ်ရာရှိသူတွေကို ကျိုက်ထိုဆေးရုံကြီးသို့ ပို့ဆောင်ပြီး ပျောက်ဆုံးနေတဲ့ ရဲတပ်သားကို စစ်ကောင်စီတပ်တွေက လိုက်လံရှာဖွေနေတယ်လို့ မြို့ခံတွေဆီက သိရပါတယ်။

3 days Ago

ကျိုက်ထိုတွင် တိုက်ခိုက်ခံရသဖြင့် စစ်ကောင်စီ ရဲတပ်ဖွဲ့ဝင် ၂ ဦး သေဆုံး

မွန်ပြည်နယ်၊ ကျိုက်ထိုမြို့နယ်၊ အင်္ဂဘိုကျေးရွာအနီး ရန်ကုန်-မော်လမြိုင်ကားလမ်းမပေါ်မှာ သြဂုတ် ၁၅ ရက်နေ့ မနက် ၉ နာရီလောက်က စစ်ကောင်စီ ရဲတပ်ဖွဲ့ဝင် ၂ ဦး တိုက်ခိုက်ခံရတာကြောင့် သေဆုံးသွားတယ်လို့ ကျိုက်ထိုတော်လှန်ရေးအင်အားစု KRF က DVB  ကို ပြောပါတယ်။

ကျိုက်ထိုမြို့နယ် မရမ်းချောင်းဘက်ကနေ အရပ်သား အိမ်စီးကား (Toyota Wish) အဖြူရောင်ကားကို အသုံးပြုပြီး အရပ်သားဝတ်နဲ့ မောင်းနှင်းလာတဲ့ စစ်ကောင်စီ ရဲတပ်ဖွဲ့ဝင်တွေကို KNLA ပူးပေါင်းတပ်ဖွဲ့က သတင်းအရ ကြိုတင်စောင့်ဆိုင်းပြီး တိုက်ခိုက်ခဲ့တာပါ။

ကရင်အမျိုးသားလွတ်မြောက်ရေးတပ်မတော် (KNLA) နဲ့ ကျိုက်ထိုတော်လှန်ရေး အင်အားစု KRF ပူးပေါင်းအဖွဲ့ တိုက်ခိုက်မှုကြောင့် စစ်ကောင်စီ ရဲတပ်ဖွဲ့ဝင် ၂ ဦး အခင်းဖြစ်ရာ နေရာမှာပဲ သေဆုံးခဲ့ပြီး ၁ ဦး ပြင်းထန်ဒဏ်ရာရရှိခဲ့တာပါ။

ပြင်းထန်ဒဏ်ရာရှိခဲ့တဲ့သူဟာ တရားခံ ဒါမှမဟုတ် စစ်ကောင်စီ စစ်တပ်သား ၁ ဦး ဖြစ်တယ်လို့ ပြောဆိုနေကြပေမယ့် DVB အနေနဲ့ သီးခြားအတည်မပြုနိုင်သေးပါဘူး။

တိုက်ခိုက်ခံရပြီး သေဆုံးသွားတဲ့ ရဲတပ်ဖွဲ့ဝင် ၂ ဦးနဲ့ ပြင်းထန်ဒဏ်ရာရရှိခဲ့တဲ့သူ ၁ ဦးကိုတော့ စစ်ကောင်စီတပ်က လာရောက် ကောက်ယူသွားပြီး ကျိုက်ထိုမြို့နယ်ပြည်သူ့ဆေးရုံကို ပို့ဆောင်ထားတယ်လို့ ကျိုက်ထိုတော်လှန်ရေးအင်အားစု KRF တာဝန်ရှိသူတဦးက ပြောပါတယ်။

KNLA ပူးပေါင်းတပ်ဖွဲ့ရဲ့ တိုက်ခိုက်မှုကြောင့် သေဆုံးတဲ့ ရဲတပ်ဖွဲ့ဝင်တွေဟာ မရမ်းချောင်နယ်ထိန်း ရဲတပ်ကြပ်ကြီး စိုးမင်းနဲ့ ရဲတပ်သားတဦး ဖြစ်တယ်လို့ သိရပါတယ်။

ကျိုက်ထိုမြို့နယ်၊ အင်္ဂဘိုကျေးရွာဟာ စစ်ကောင်စီယာဉ်တန်းတွေ မကြာခဏ မိုင်းဆွဲ တိုက်ခိုက်ခံနေရတဲ့ နေရာတစ်ခုလည်း ဖြစ်ပါတယ်။

3 days Ago

August 10, 2022

ကျိုက်ထိုတွင် စစ်ကောင်စီတပ်နှင့် KNLA ပူးပေါင်းတပ် ထိတွေ့တိုက်ပွဲဖြစ်

မွန်ပြည်နယ်၊ ကျိုက်ထိုမြို့နယ်၊ မရမ်းချောင်းကျေးရွာအနီးမှာ စစ်ကောင်စီ ယာဉ်တန်းအတွက် ကင်းပုန်းလာဝပ်တဲ့ စစ်ကောင်စီတပ်နဲ့ KNLA ပူးပေါင်းတပ်တို့ကြား ထိတွေ့တိုက်ပွဲ ဖြစ်ပွားပါတယ်။

သြဂုတ် ၉ ရက် မနက်ပိုင်းက ကား ၈ စီးပါ စစ်ကောင်စီယာဉ်တန်း ကျိုက်ထိုမြို့နယ်ကို ဖြတ်သန်းသွားလာဖို့အတွက် မရမ်းချောင်းကျေးရွာအနီးမှာ ကင်းပုန်းလာဝပ်တဲ့ စစ်ကောင်စီတပ် အင်အား ၃၀ လောက်နဲ့ သတင်းအရ ကြိုတင်စောင့်ဆိုင်းနေတဲ့ ကရင်အမျိုးသားလွတ်မြောက်ရေးတပ်မတော် (KNLA) ပူးပေါင်းတပ်တို့ကြား ထိတွေ့တိုက်ပွဲ ဖြစ်ပွားခဲ့တာပါ။

နာရီဝက်နီးပါးကြာ ဖြစ်ပွားခဲ့တဲ့ နှစ်ဖက်ထိတွေ့တိုက်ပွဲမှာ စစ်ကောင်စီဘက်က ၁ ဦး သေဆုံးပြီး ၃ ဦးထက်မနည်း ဒဏ်ရာရရှိခဲ့ကာ KNLA ပူးပေါင်းတပ်ဖွဲ့ဘက်က အထိအခိုက် တစုံတရာမရှိဘဲ အောင်မြင်စွာ ဆုတ်ခွာနိုင်ခဲ့တယ်လို့ KNLA ပူးပေါင်းတပ် တာဝန်ရှိသူတဦးက ပြောပါတယ်။

ကရင်အမျိုးသားအစည်းအရုံး (KNU) ထိန်းချုပ်နယ်မြေဖြစ်တဲ့ ကျိုက်ထိုမြို့နယ်မှာတော့ ပြီးခဲ့တဲ့ရက်ပိုင်းကစပြီး စစ်ကောင်စီတပ်က စစ်ရေး ဝင်ရောက်လှုပ်ရှားနေတာကြောင့် နှစ်ဖက် စစ်ရေးတင်းမာနေပါတယ်။

1 week Ago
More News
Up