ကျန်းမာရေးဝန်ကြီးဌာန

August 31, 2022

ကျပ်သိန်း ၆၀၀ အကုန်အကျခံပြီး ဆေးတက္ကသိုလ်တက်နိုင်၊ နိုင်ငံဝန်ထမ်းလုပ်စရာမလိုဟု စစ်ကောင်စီကြေညာ

၂၀၂၂ ခုနှစ် တက္ကသိုလ်ဝင်စာမေးပွဲအောင်မြင်သူတွေထဲက ဆေးတက္ကသိုလ်နဲ့ သွားဘက်ဆိုင်ရာ ဆေးတက္ကသိုလ်တွေကို တက်လိုသူတွေအနေနဲ့ ကျောင်းလခ ငွေကျပ် သိန်း ၆၀၀ ကနေ သိန်း ၇၀၀ အထိအကုန်အကျခံပြီး တက်နိုင်မယ့်အစီအစဉ်ရှိတယ်လို့  စစ်ကောင်စီလက်အောက်ခံ ကျန်းမာရေးဝန်ကြီးဌာနက ကြေညာထားပါတယ်။

၂၀၂၂-ခုနှစ် တက္ကသိုလ်ဝင် စာမေးပွဲအောင်မြင်ပြီး ဆေးတက္ကသိုလ်တွေနဲ့ သွားဘက်ဆိုင်ရာ ဆေးတက္ကသိုလ်တွေကို ဝင်ခွင့်ရရှိသူတွေဟာ နိုင်ငံတော်အစီအစဉ်နဲ့ပညာသင်ကြားခွင့်(သို့မဟုတ်) မိမိအစီအစဉ်နဲ့ ပညာသင်ကြားခွင့်ကို ရွေးချယ်ပိုင်ခွင့်ရရှိကြမယ်လို့ ဆိုပါတယ်။

နိုင်ငံတော်အစီအစဉ်နဲ့ဆိုရင် ဆေးတက္ကသိုလ်တွေနဲ့ သွားဘက်ဆိုင်ရာ ဆေးတက္ကသိုလ်တွေမှာ တက္ကသိုလ်သင်တန်းကြေးအဖြစ် တစ်လကို ငွေကျပ် ၈၀၀ သာ ပေးသွင်းရမှာဖြစ်ပြီး မိမိအစီအစဉ်နဲ့ဆိုရင် တက္ကသိုလ်သင်တန်းကြေးကို ပညာသင်နှစ်အလိုက် လစဉ် ပေးသွင်းရမှာ ဖြစ်ပါတယ်။

ဆေးတက္ကသိုလ်တွေ အတွက်ကတော့ ပညာသင်ကာလ ပြီးဆုံးတဲ့အထိ ငွေကျပ်သိန်း ၆၀၀ အကုန်အကျခံရမှာဖြစ်ပြီး သွားဘက်ဆိုင်ရာ ဆေးတက္ကသိုလ်တွေကတော့ ပညာသင်ကာလ ပြီးဆုံးတဲ့အထိ ငွေကျပ်သိန်း ၇၀၀ အကုန်အကျခံရမှာ ဖြစ်ပါတယ်။

နိုင်ငံတော်အစီအစဉ်နဲ့ ပညာသင်ကြားခွင့်ရရှိတဲ့သူတွေကတော့ ဘွဲ့ရရှိပြီးတဲ့နောက် နိုင်ငံ့ဝန်ထမ်း အဖြစ် အနည်းဆုံး ၅ နှစ် မဖြစ်မနေ တာဝန်ထမ်းဆောင်ရမှာဖြစ်ပြီး နိုင်ငံ့ဝန်ထမ်းတွေသာ တက်ခွင့်ရှိတဲ့ ဘွဲ့လွန်သင်တန်းတွေကို ဆက်လက်တက်ရောက်ခွင့်ရရှိမယ်ဆိုရင် နောက်ထပ် ၅ နှစ် နိုင်ငံ့ဝန်ထမ်းအဖြစ် ဆက်လက်တာဝန် ထမ်းဆောင်ရမှာ ဖြစ်ပါတယ်။

မိမိအစီအစဉ်နဲ့ ပညာသင်ကြားခွင့်ရရှိတဲ့သူတွေကတော့ လတ်တလောအနေနဲ့ နိုင်ငံ့ဝန်ထမ်းအဖြစ် ၅ မဖြစ်မနေ ဝင်ရောက်စရာမလိုပေမယ့် နိုင်ငံ့ဝန်ထမ်းတွေသာ တက်ရောက်ခွင့်ရှိတဲ့ ဘွဲ့လွန်သင်တန်းတွေ တက်ရောက်လိုလို့ဖြစ်စေ၊ နိုင်ငံ့တာဝန်ကို ဝင်ရောက်ထမ်းဆောင်ချင်လို့ဖြစ်စေ နိုင်ငံ့ဝန်ထမ်းအဖြစ် ဝင်ရောက်တာဝန် ထမ်းဆောင်လို ပါကလည်း တာဝန်ထမ်းဆောင်နိုင်မှာ ဖြစ်ပါတယ်။

၂၀၂၂ ခုနှစ်အတွက် ဆေးတက္ကသိုလ်ဝင်ခွင့်တွေကိုလည်း စစ်ကောင်စီရဲ့ ကျန်းမာရေးဌာနက ခါတိုင်းနှစ်တွေထက် ရမှတ် ၅၀ လောက်လျှော့ချပြီးခေါ်ယူထားတာဖြစ်ပါတယ်။

5 months Ago

ဆေးတက္ကသိုလ်ဝင်ခွင့်ကို ပုံမှန်ထက် ရမှတ် ၅၀ လျှော့ခေါ်

စစ်ကောင်စီလက်အောက်က ကျန်းမာရေးဝန်ကြီးဌာနက ၂၀၂၂ ခုနှစ် တက္ကသိုလ်ဝင်စာမေးပွဲ အောင်မြင်ခဲ့သူတွေထဲက အမှတ်ပေါင်း ၄၅၀ နဲ့အထက် ရရှိသူတွေ ဆေးတက္ကသိုလ် လျှောက်ထားနိုင်တယ်လို့ သတ်မှတ်လိုက်ပါတယ်။

ဆက်လက်ပြီးတော့ ၆ ဘာသာ ရမှတ်စုစုပေါင်း အမှတ် ၄၅၀ နဲ့အထက် ရရှိသူတွေအနက် အင်္ဂလိပ်စာ၊ ဓာတုဗေဒ၊ ဇီဝဗေဒ၊ ၃ ဘာသာရမှတ်ပေါင်း အများ/အနည်းပေါ်မူတည်ပြီး ပထမဦးစားပေး ဆေးတက္ကသိုလ် လျှောက်ထားသူတွေကို ပဏာမအဆင့် ရွေးချယ်ခံရသူတွေအဖြစ် သတ်မှတ်ထားရှိမယ်လို့ ကျန်းမာရေး လူ့စွမ်းအားအရင်းအမြစ် ဦးစီးဌာနက သိရပါတယ်။

ဆေးတက္ကသိုလ်ဝင်ခွင့်ကို အရင်နှစ်တွေက ရမှတ်သတ်မှတ်ပေးတာမျိုးနဲ့ ဝင်ခွင့်ပေးတာမျိုး မဟုတ်ဘဲ တက္ကသိုလ်ဝင်ခွင့် လျှောက်ထားသူတွေရဲ့ ဦးစားပေးတက္ကသိုလ် လျှောက်ထားတာမျိုးကို ပြန်လည်စိစစ်ပြီး ရမှတ်အများဆုံးသူကနေ ဝင်ခွင့်ပေးမယ့် ဦးရေအပေါ် မူတည်ပြီး ရွေးချယ်ခဲ့တာပါ။

ဒါကြောင့် ဆေးတက္ကသိုလ်တွေရဲ့ ဝင်ခွင့်အမှတ်တွေဟာ နှစ်စဉ် အမြင့်ဆုံး ၆ ဘာသာ ရမှတ်ပေါင်း ၅၀၀ ကျော်အထိ ရှိခဲ့ပြီးတော့ အနိမ့်ဆုံးရမှတ်ဟာ ၅၀၀ ဝန်းကျင်အထိ ရှိခဲ့တာလို့ အရင်နှစ်တွေက ကြေညာခဲ့တဲ့ ဆေးတက္ကသိုလ်ဝင်ခွင့်တွေအရ သိရပါတယ်။

၂၀၂၂ ခုနှစ် တက္ကသိုလ်ဝင်စာမေးပွဲ အောင်မြင်သူတွေကတော့ ဆေးတက္ကသိုလ် ဝင်ခွင့်တွေကို အမှတ်သတ်မှတ်လိုက်ပြီး ဝင်ခွင့်ဖြေဆိုခွင့်ရသူတွေကို လူတွေ့နှုတ်မေးစာမေးပွဲ စစ်ဆေးသွားမှာဖြစ်ပြီး ပဏာမရွေးချယ်ထားသူအားလုံးဟာ စိတ်ပိုင်းဆိုင်ရာ ဆန်းစစ်ခြင်း (ရေးဖြေ) စာမေးပွဲကိုလည်း ဝင်ရောက်ဖြေဆိုရမှာ ဖြစ်ပါတယ်။

ဆက်လက်ပြီး သင်တန်းသား အပြီးသတ်ရွေးချယ်ခြင်းအနေနဲ့ အင်္ဂလိပ်စာ၊ ဓာတုဗေဒ၊ ဇီဝဗေဒ၊ ၃ ဘာသာပေါင်းရမှတ်နဲ့ လူတွေ့နှုတ်မေးစစ်ဆေးခြင်း ရမှတ်အပေါ် မူတည်ကာ အမှတ် အများ/အနည်းအလိုက်စီပြီး အမှတ်အများဆုံး ရရှိတဲ့သူတွေကို ဆေးတက္ကသိုလ်တွေအတွက် သတ်မှတ်ဦးရေပေါ်  မူတည်ရွေးချယ်သွားမယ်လို့ ဆိုပါတယ်။

စစ်ကောင်စီဟာ ဒီနှစ်ထဲမှာ တက္ကသိုလ်တွေကို ပြန်လည်ဖွင့်လှစ်ခဲ့ပေမဲ့ ကျောင်းတက်သူ မရှိသလောက် နည်းပါးနေတာကြောင့် ကျောင်းတက်မယ့်သူ များလာစေဖို့အတွက် အမျိုးမျိုး လုပ်ဆောင်နေပြီး တခြားတက္ကသိုလ်တွေက ကျောင်းသားတွေအနေနဲ့ ဆေးတက္ကသိုလ် တက်ချင်တယ်ဆိုရင် လျှောက်ထားနိုင်တယ်ဆိုပြီး ကြေညာခဲ့ပါသေးတယ်။

5 months Ago

January 1, 2022

အိုမီခရွန် ကူးစက်ခံရသူ တွေ့ပြီးနောက် လူ ၂၀၀ စုနိုင်ပြီဟု စစ်ကောင်စီကျန်းမာရေးဌာန ကြေညာ

ကူးစက်မြန် အိုမီခရွန် ကိုဗစ်မျိုးစိတ်သစ်ကူးစက်ခံရသူ မြန်မာနိုင်ငံမှာ တွေ့ရှိပြီးနောက်  ဇန်နဝါရီ ၁ ရက် ဒီနေ့ကစလို့ အခမ်းအနားတွေမှာ လူ ၂၀၀ စုနိုင်ပြီလို့ စစ်ကောင်စီလက်အောက်ခံ ကျန်းမာရေးဌာနက ထုတ်ပြန်ပါတယ်။

ကိုဗစ်ရောဂါကြိုတင်ကာကွယ်ရေးလုပ်ငန်းတွေနဲ့ ပတ်သက်ပြီး ရောဂါကူးစက်တာဖြစ်စေဖို့ ခြွင်းချက်ထားတဲ့ ကိစ္စတွေကလွဲပြီး လူ ၁၀၀ ထက်ပို မစုဖို့အတွက် ၂၀၂၁ ခုနှစ် အောက်တိုဘာ ၂၉ ရက်မှာ စစ်ကောင်စီလက်အောက်ခံ ကျန်းမာရေးဌာနက ထုတ်ပြန်ထားခဲ့တာပါ။

ပြည်ပနိုင်ငံက ပြန်လာသူတွေကို ကိုဗစ်စစ်ဆေးရာမှာ ဒီဇင်ဘာ ၂၈ ရက်က စစ်‌ဆေးချက်အဖြေအရ ယူအေအီးနိုင်ငံကနေပြန်လာသူ ၄ ယောက်မှာ အိုမီခရွန်မျိုးစိတ်တွေ့ရတယ်လို့ ထုတ်ပြန်ခဲ့ပါတယ်။

အဲဒီနောက်မှာတော့ ဘာသာရေးဆိုင်ရာ အခမ်းအနားတွေနဲ့ သာရေးနာရေး ကိစ္စတွေအတွက် လူ ၁၀၀ အစား လူ ၂၀၀ အထိ စုရုံးနိုင်ပြီလို့ စစ်ကောင်စီလက်အောက်ခံ ကျန်းမာရေးဌာနက ဒီဇင်ဘာ ၃၀ ရက်မှာ ထုတ်ပြန်ကြေညာပါတယ်။

အိုမီခရွန်ဟာ ကိုဗစ်ဖြစ်ဖူးသူတွေမှာ ပြန်ဖြစ်နိုင်ခြေများပြီး အရင် မျိုးစိတ်တွေထက် ပိုပြီး ကူးစက်မြန်စေတယ်လို့ ကျန်းမာရေးပညာရှင်တွေက ပြောထားပါတယ်။

ဗီဇပြောင်းမျိုးကွဲကိုဗစ်ပိုး အိုမီခရွန်ဟာ လက်ရှိ နိုင်ငံ ၁၀၀ ကျော်မှာ ကူးစက်ပျံ့နှံ့နေပြီး အဲဒီမျိုးကွဲကြောင့် သေဆုံးသူ ၆၀ ကျော်နေပြီဖြစ်ပါတယ်။။

1 year Ago
More News
Up