ကျန်းမာရေးစစ်ဆေ

August 23, 2020

စစ်တွေနှင့်ပဲခူးတိုင်းက လာသည့် ခရီးသည်တင်ယာဉ်များကို ကျန်းမာရေးစစ်ဆေးပြီးမှ ရန်ကုန် ဝင်ခွင့်ပြု (ဓာတ်ပုံ)

ရခိုင်ပြည်နယ်၊ စစ်တွေမြို့နဲ့ ပဲခူးတိုင်းက လာတဲ့ ခရီးသည်တင်ယာဉ်တွေနဲ့ ခရီးသည်တွေကို တိုက်ကြီးမြို့နယ်၊ မီးနင်းချောင်းအနီး စစ်ဆေးရေးဂိတ်မှာ ကျန်းမာရေးစစ်ဆေးပြီးမှ  ရန်ကုန်တိုင်းအတွင်း ဝင်ခွင့်ပြုသွားမယ်လို့ ဥက္ကံမြို့ အုပ်ချုပ်ရေးမှူး ဦးအောင်ကျော်က ပြောပါတယ်။ "ဒီနေ့ စစ်တွေကလာတဲ့ ခရီးသည်ကားတစ်စီး၊ ယာဉ်မောင်းနဲ့ယာဉ်နောက်လိုက် နှစ်ဦးထဲ ပါလာတယ်။ သူတို့ကိုတော့အင်းစိန် GTC ဝန်းထဲက Quarantine Center ကိုပို့လိုက်တယ်။ ပဲခူးတိုင်းအတွင်းက ဝင်လာတဲ့ ခရီးသည်ကားတွေနဲ့ အိမ်စီးကားတွေကိုပါ အကုန်စစ်ဆေးတယ်။ နာမည်၊ မှတ်ပုံတင်နဲ့ နေရပ်လိပ်စာတွေစစ်ဆေးတယ်။ ကျန်းမာရေးနဲ့ပတ်သက်ပြီး အပူချိန်တိုင်းတာတွေ ပြုလုပ်ပြီးမှ ရန်ကုန်တိုင်းထဲကို ဝင်ခွင့်ပြုသွားမယ်။" ရခိုင်ပြည်နယ်၊ စစ်တွေမြို့မှာ ကိုဗစ်-၁၉ ရောဂါပိုးတွေ့ရှိတာ များလာတာကြောင့် စစ်တွေမြို့ကလာတဲ့ ခရီးသည်ယာဉ်တွေကို တိုက်ကြီးမြို့နယ်မှာ သြဂုတ် ၂၁ ရက်ကစလို့ ၂၄ နာရီစောင့်ကြည့်ကာ ကျန်းမာရေးစစ်ဆေးပြီး ရန်ကုန်မြို့ရှိ Quarantine Center တွေကို ပို့ဆောင်ပေးခဲ့တာ သြဂုတ် ၂၃ ရက်အထိ လူဦးရေ ၂၂၅ ဦး ရှိပြီလို့ သိရပါတယ်။ ပဲခူးတိုင်းအနောက်ခြမ်း ပြည်မြို့မှာလည်း ရခိုင်ပြည်နယ်၊ စစ်တွေမြို့က လာတဲ့ကားတွေကို လည်း  ကျန်းမာရေးစစ်ဆေးနေတယ်လို့ သိရပါတယ်။ မေသွယ်
8 months Ago

January 31, 2020

တရုတ်နိုင်ငံက ပြန်လာသည့် မြန်မာရွှေ့ပြောင်းလုပ်သား ၂၀၀၀ ကျော်ကို ကျန်းမာရေးစစ်ဆေး

တရုတ်နိုင်ငံ၊ ထိန်ချုံးမြို့ကနေ ပြန်လာကြတဲ့ မြန်မာအလုပ်သမားတွေကို ကန်ပိုက်တီးနယ်စပ်ကုန်သွယ်ရေးဂိတ်ပေါက်မှာ ကျန်းမာရေးစစ်ဆေးပေးနေရာမှာ  ၅ ရက်အတွင်း လူပေါင်း ၂၀၀၀ ကျော်ရှိသွားပြီလို့ သိရပါတယ်။ ကချင်ပြည်နယ်၊ ဝိုင်းမော်မြို့နယ်၊ ကန်ပိုက်တီး တရုတ်-မြန်မာနယ်စပ်ကုန်သွယ်ရေး ဂိတ်ပေါက်မှာ ဇန်နဝါရီ ၂၆ ရက်ကနေ ဇန်နဝါရီ ၃၀ ရက်အထိ  တရုတ်နိုင်ငံ စက်ရုံတွေ၊ ကုမ္ပဏီတွေမှာ အလုပ်လုပ်နေတဲ့ မြန်မာလုပ်သားတွေ နေရပ်ပြန်ဝင်လာကြရာမှာ ကျန်းမာရေးစစ်ဆေးပေးနေတာပါ။ ကန်ပိုက်တီး လဝက ဦးစီးမှူး ဦးထွန်းထွန်းအောင်က "ဂိတ်ပိတ်ချိန် ညနေ ၆ နာရီပါ၊ ဝင်လာသူတွေက မြန်မာနိုင်ငံသား တိုင်းရင်းသားတွေပဲ၊ ပြည်နယ်ကျန်းမာရေးအဖွဲ့ကစစ်ဆေးပြီး ရောဂါကင်းရှင်းကြောင်း ထောက်ခံချက်ပါမှ ဝင်ခွင့်ပေးပါတယ်၊ ဒီနေ့ ၅ ရက်တာအထိ ဝင်ရောက်လာသူ နှစ်ထောင်ကျော်ရှိပါပြီ” လို့ ပြောပါတယ်။ ကန်ပိုက်တီး နယ်စပ်ပေါက်ကျန်းမာရေး စစ်ဆေးရေးအဖွဲ့ ယာယီတာဝန်ခံ ဒေါက်တာတင်မိုးဝင်းက "စစ်ဆေးကုသရေးမှာ ဝင်လာတဲ့ အလုပ်သမားတွေနဲ့ ဒေါက်တာ သူနာပြုသားဖွား ကျန်းမာရေးမှူး တပ်ဘက်ဆိုင်ရာတွေအပါဆိုတော့ ကျန်းမာရေးစစ်တာ လူအင်အား လုံလောက်မှုရှိပါတယ်၊ အမိုးအကာပြည့်စုံပါတယ်၊ ဗိုင်းရပ်စ်ကာကွယ်ရေး ၀တ်စုံဖြစ်တဲ့ အာကာသယာဉ်မှူးဝတ်စုံပုံစံမျိုး ကျန်းမာရေးဝတ်စုံတွေလည်းရှိပါတယ်” လို့ ပြောပါတယ်။ ပြန်လည်ဝင်လာသူတွေရဲ့ နေရပ်လိပ်စာနဲ့ ဖုန်းနံပါတ်တွေကိုလည်း မှတ်တမ်းတင်ထားတယ်လို့ ဆိုပါတယ်။ တရုတ်နိုင်ငံရှိ ပြည်နယ်အားလုံးလိုလိုမှာ ကိုရိုနာဗိုင်းရပ်စ်ကူးစက်ပျံ့နှံ့ဖြစ်ပွားနေတဲ့အတွက် ထိန်ချုံးမြို့မှာ စက်ရုံတွေနဲ့ ကုမ္ပဏီတွေ ယာယီပိတ်သိမ်းထားတာကြောင့် မြန်မာအလုပ်သမားတွေ နေရပ်ပြန်လာကြတာလည်းဖြစ်ပါတယ်။ ကိုရိုနာဗိုင်းရပ်စ်ကြောင့် သေဆုံးသူဦးရေ စုစုပေါင်း ၂၁၃ ရှိလာပြီလို့ ဇန်နဝါရီ ၃၁ ရက်နေ့မနက် တရုတ်အမျိုးသားကျန်းမာရေးကော်မရှင်ရဲ့  ထုတ်ပြန်ချက်အရသိရပါတယ်။ သေဆုံးမှုတွေက လတ်တလော တရုတ်နိုင်ငံတနိုင်ငံတည်း  ဖြစ်နေပေမယ့် နိုင်ငံပေါင်း ၂၃ နိုင်ငံမှာ ကိုရိုနာဗိုင်းရပ်စ် ကူးစက်ခံရသူ  ၉၈၂၁ ယောက် ရှိလာနေပါတယ်။  မုန်းမုန်းမင်း
1 year Ago
Up