ကျန်းမာရေး

November 24, 2022

ဒီးမော့ဆိုမြို့နယ်တွင် ရွာလုံးကျွတ်ဖျားနာမှုများ ဖြစ်ပွားနေ

ကရင်နီ(ကယား)ပြည်နယ်၊ ဒီးမော့ဆိုမြို့နယ်က စစ်ရှောင်စခန်းတွေအပါအဝင် ကျေးရွာတော်တော်များများမှာ ရာသီတုပ်ကွေးလို ကူးစက်ရောမျိုးဖြစ်ပွားနေပြီး ရွာလုံးကျွတ် ဖျားနာတာတွေ ဖြစ်ပွားနေပါတယ်။

စက်တင်ဘာဘာလကုန်ပိုင်းကတည်းကနေ အခုချိန်ထိ ရာသီတုပ်ကွေးလို ရောဂါဖြစ်ပွားနေပြီး မိသားစုလိုက် ဖျားနာတာ၊ ရွာလုံးကျွတ်ဖျားနာတွေ ဖြစ်နေတယ်လို့ ဒေသခံ သူနာပြုဆရာမတဦးက ပြောပါတယ်။

“အခုက ဒီးမော့ဆိုအရှေ့ခြမ်း စစ်ရှောင်တွေဘက်မှာလည်း တော်တော်ဖြစ်တယ်။ ကန်ခုနှစ်ဆင့်တကြောလုံးကနေ ဒေါသမကြီးဘက်တွေအထိ အကုန်ဖြစ်တယ်။ ၉ လပိုင်းကုန်ကနေ စပြီး အခုချိန်ထိပဲ၊ ဖြစ်ပြီးသားလူတွေလည်း ပြန်ပြန်ဖြစ်နေတယ်။ ရောဂါက ကူးစက်သလိုမျိုး ဖြစ်သွားတာ။ တချို့အိမ်တွေဆိုရင်လည်း တအိမ်လုံးဖြစ်ပြီးတော့မှ အချင်းချင်းတောင် မကြည့်နိုင်တော့တဲ့ အခြေအနေတွေလည်းရှိတယ်။”

သောက်ဆေးနဲ့ ရောဂါသက်သာတဲ့သူတွေရှိသလို သောက်ဆေးနဲ့မသက်သာဘဲ ထိုးဆေးထိုးပေးဖို့ ပြန်လာကြတဲ့သူ အများကြီးရှိနေတယ်လို့ စစ်ရှောင်စခန်းမှာ ဆေးခန်းဖွင့်ကုသပေးနေတဲ့ အဆိုပါ သူနာပြုဆရာမက ပြောပါတယ်။

“ပြောရမယ်ဆိုရင် ညီမတို့ ဒေါလောခူ စစ်ရှောင်တို့ ဘာတို့ဆိုရင် ညီမတို့ ကမ့်ဖွင့်ထားတာရှိတယ်။ အဲမျိုး သူတို့လာတော့လာကြတယ်။ တအိမ်လုံးဖြစ်တဲ့ အိမ်တွေလည်းရှိတယ်။ တချို့အိမ်တွေဆိုရင် သောက်ဆေးနဲ့ မသက်သာလို့ ထိုးဆေးထိုးပေးပါလို့ complain လာတဲ့ လူနာတွေတော့ တော်တော်များတယ်။ တချို့တွေကျတော့ ပြန်သက်သာသွားတယ်။ သက်သာပြီး နောက်တခေါက်ပြန်ဖြစ်တဲ့အတွက် ပြန်ပြန်လာပြကြတယ်။”

လက်ရှိအခြေအနေအရ စစ်ရှောင်စခန်းတွေမှာ ဆေးဝါးမလုံလောက်သလို စစ်ကောင်စီရဲ့ ကန့်သတ်မှုကြောင့် ဆေးဝါးဝယ်ယူ သယ်ဆောင်ဖို့ ခက်ခဲနေတဲ့အတွက် တောရွာတွေနဲ့ စစ်ရှောင်စခန်းတွေအတွက် ဆေးဝါးမလုံလောက်မှု ဖြစ်ပွားနေပါတယ်။

စစ်ရှောင်ကူညီပေးနေသူတဦးက “ကျန်းမာရေးနဲ့ပတ်သက်ပြီး အဓိကအခက်အခဲက ဆေးဝါးပေါ့နော်။ ကျနော်တို့ ဒီမှာဆေးက သယ်ယူပို့ဆောင်ရေးကြောင့်မို့လို့ အခက်အခဲ တော်တော်များများ ရှိတယ်ပေါ့နော်။ အဓိက အခြေခံဆေးဝါးလိုအပ်ချက် တော်တော်များများ လိုအပ်တယ်။ ဒီစစ်ရှောင်တွေမှာဆိုရင် ကျနော်တို့ ဝမ်းပျက်ဝမ်းလျှောတွေရှိခဲ့တယ်၊ ပြီးရင် ရာသီဥတုအပြောင်းအလဲကြောင့်မို့လို့ အခြေခံဆေး ပါရာစီတမောတို့၊ ဘာမီတွန်တို့လိုကအစ လိုအပ်တာရှိတာပေါ့နော်။ အဲဒီဆေးတွေတောင်မှ ကျနော်တို့ သယ်ဖို့ အတော်ခက်ခဲတယ်ပေါ့နော်။ စကစတွေရဲ့ လမ်းကြောင်းပိတ်ဆို့မှုတွေ အတော်များနေတဲ့အခါကျတော့ ဟိုးအရင်က ဝယ်ခဲ့တဲ့ဆေးကိုပဲ ပြန်ပြီးတော့ လှည့်သုံးနေရတာပေါ့နော်။ ဒီဘက်က ဆရာဝန်၊ ဆရာတွေရှိပေမယ့် ဆေးဝါးသယ်တဲ့အပိုင်းမှာ အတော်ခက်ခဲတဲ့အတွက် အခက်အခဲတော့ ကြုံတွေ့နေရတယ်။ ပြီးတော့အလှူရှင်တွေလည်း နည်းပါးတဲ့အတွက် ပိုခက်ခဲတယ်။”

ကရင်နီ (ကယား) ပြည်နယ်မှာ အာဏာသိမ်းပြီးနောက် တိုက်ပွဲကြောင့် ထွက်ပြေးတိမ်းရှောင်နေသူ ၂ သိန်းလောက် ရှိနေပြီး ၂၀၂၁ ခု အာဏာသိမ်းချိန်ကနေ ၂၀၂၂ ခုနှစ် နိုဝင်ဘာ ၁ ရက်နေ့အထိ စစ်ရှောင်နေစဉ် သေဆုံးသူ ၉၃ ဦးရှိပါတယ်။

သေဆုံးသူအများစုဟာ ဆေးဝါးမလုံလောက်တာနဲ့အချိန်မီဆေးကုသမှုမရတဲ့ အတွက်ကြောင့် ဖြစ်တယ်လို့ တိုးတက်သော ကရင်နီပြည်သူ့အင်အားစု (PKPF) ရဲ့ ထုတ်ပြန်ချက်အရ သိရပါတယ်။

2 weeks Ago

November 14, 2022

ကျောင်းသားခေါင်းဆောင် မဝတ်ရည်အောင် အကျဉ်းထောင်တွင်း ကျန်းမာရေးဆိုးရွားနေ

အကျဉ်းထောင် မကြာခဏ ပြောင်းရွှေ့ခံရသလို ကျန်းမာရေးအခြေအနေ ပိုဆိုးရွားလာတဲ့ ဒဂုံတက္ကသိုလ်ကျောင်းသားများသမဂ္ဂ ဗဟိုအလုပ်အမှုဆောင် မဝတ်ရည်အောင်အတွက် ထိရောက်တဲ့ ဆေးကုသခွင့်ရရှိရေး သူ့ရဲ့မိသားစုက လိုလားနေတယ်လို့ မိသားစုနဲ့ နီးစပ်သူတယောက်က ပြောပါတယ်။

“ရောဂါအခြေအနေက ဆိုးရွားလာတယ်။ လေဖြန်းပြီး မကြာခဏ သတိလစ်တယ်။ သတိလစ်ရင် နာရီပေါင်းများစွာကြာတဲ့ အခြေအနေမျိုးတွေပေါ့လေ။ နောက်ပြီးတော့ အစာအိမ်ရောဂါ အခြေအနေက ပိုမိုဆိုးရွာလာပြီး ဗိုက်အောင့်တယ်၊ သွေးအန်တယ်၊ အင်မတန် စိုးရိမ်စရာကောင်းပါတယ်။ အဲ့ဒီအခြေအနေမျိုးမှာ လုံလောက်ပြည့်စုံတဲ့ ပြင်ပဆေးကုသမှု ရရှိဖို့အတွက် မိသားစုဝင်တွေအနေနဲ့ ဆန္ဒရှိတယ်ဆိုတာမျိုး ကျနော်တို့ သိရပါတယ်။”

မဝတ်ရည်အောင်ဟာ ပြီးခဲ့တဲ့ ၂ဝ၂၁ ခုနှစ်၊ စက်တင်ဘာလအတွင်းက ဒဂုံတက္ကသိုလ်ကျောင်းသား သမဂ္ဂရဲ့ တခြားအလုပ်အမှုဆောင်တချို့နဲ့အတူ ရန်ကုန်မှာ ဖမ်းဆီးခံခဲ့ရတာဖြစ်ပြီး ပုဒ်မ ၅၀၅(က) နဲ့ ထောင် ၃ နှစ် ချမှတ်ခံခဲ့ရပြီး အကြမ်းဖက်ဥပဒေပုဒ်မ ၅၂(က) နဲ့လည်း ထပ်မံ စွဲချက်တင်ခံခဲ့ရပါတယ်။

အင်းစိန်ထောင်ကိုရောက်ရှိပြီး သုံးလအကြာမှာ လေဖြန်းတဲ့အတွက် မဝတ်ရည်အောင်ကို ထောင်ဆေးရုံတင်ခဲ့ရပြီး စစ်ကြောရေးအတွင်း အကြမ်းဖက်နှိပ်စက်မှုတွေကြောင့် ဦးနှောက်အကြိတ်တည်တယ်လို့ မိသားစုက ယူဆထားပြီး ကျန်းမာရေးစစ်ဆေးခွင့်နဲ့ ဆေးကုသခွင့် လျှောက်ထားခဲ့ပေမဲ့ ခွင့်ပြုချက်မရရှိဘူးလို့ သိရပါတယ်။

သူမအနေနဲ့ အကျဉ်းထောင် မကြာခဏ ပြောင်းရွှေ့ခံရပြီးတဲ့နောက် မကြာခဏဆိုသလို အချိန်ကြာမြင့်စွာ သတိလစ်သွားပြီး နောက်ဆုံးအကြိမ်မှာ ၂၂ နာရီ ကြာတဲ့အထိ သတိလစ်သွားခဲ့ပေမဲ့ လိုအပ်တဲ့ ကျန်းမာရေးစောင့်ရှောက်မှု မရတဲ့အတွက် စိုးရိမ်ရတဲ့ အခြေအနေ ဖြစ်တယ်လို့ ဒဂုံတက္ကသိုလ်ကျောင်းသားများသမဂ္ဂက ထုတ်ပြန်ထားပါတယ်။

ဒဂုံတက္ကသိုလ်ကျောင်းသားများသမဂ္ဂ ဥက္ကဋ္ဌ ကိုမင်းဟန်ထက်က “ထောင်ဆေးရုံတွေက ကုသပေးနိုင်ခြင်းမရှိဘူး။ ရည်ရွယ်ချက်ရှိရှိနဲ့ ကုသမှုပေးတာ မလုပ်ဘူးပေါ့လေ။ အဲ့ဒီအတွက် ပြင်ပဆေးရုံကို ရည်ညွှန်းချက်ပေးပြီး ကုသဖို့လိုတယ်ဆိုတဲ့ ကိစ္စမျိုးကို သူ့ရဲ့မိသားစုတွေက အစဉ်တစိုက် တိုက်တွန်းနေတာပေါ့လေ။ အစဉ်တစိုက် စာတင်နေတာ၊ တောင်းဆိုနေတာတွေ ရှိတယ်။ ဒါပေမဲ့ အခုအချိန်အထိ မဝတ်ရည်အောင်ဟာ ပြင်ပဆေးကုသမှုကို အခုထိမရသေးဘူး။ ထောင်တွင်း ဆေးရုံမှာပဲ အဖြစ်ကုပေးနေတယ်ဆိုတဲ့ ပုံစံမျိုးကိုပဲ ကျနော်တို့ သိရသေးတယ်ပေါ့နော်” လို့ ပြောပါတယ်။

မဝတ်ရည်အောင် အပါအဝင် မတရားဖမ်းဆီးခံထားရတဲ့ ကျောင်းသားတွေနဲ့ ပြည်သူတွေဟာ လူ့အခွင့်အရေးဆိုင်ရာ ချိုးဖောက်နေတဲ့ စစ်ကြောရေးမှာ စိတ်ပိုင်းဆိုင်ရာ ရုပ်ပိုင်းဆိုင်ရာ ထိခိုက်မှုတွေ ကြုံတွေ့နေရပြီး စစ်ကောင်စီဟာ အကြမ်းဖက်လုပ်ရပ်တွေကို ပြောင်ပြောင်တင်းတင်း ချိုးဖောက်နေတယ်လို့ ဒဂုံတက္ကသိုလ်ကျောင်းသားများသမဂ္ဂက ထုတ်ပြန်ထားပါတယ်။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း (အေအေပီပီ) ရဲ့ ထုတ်ပြန်ချက်အရ စစ်အာဏာသိမ်းပြီးနောက် ၂ဝ၂၂ ခုနှစ်၊ နိုဝင်ဘာ ၁၄ ရက်အထိ ဖမ်းဆီးခံရသူ ၁၆,၁၇၉ ယောက်အနက် ၁၂,၉၆၄ ယောက်ဟာ ဖမ်းဆီးခံထားရဆဲ ဖြစ်ပါတယ်။

4 weeks Ago
More News
Up