ကော်မရှင် ဥက္ကဋ္ဌ

June 26, 2020

ပြည်သူ့ဆန္ဒနှင့် ရွေးကောက်ပွဲရလဒ် တထပ်တည်းကျအောင်လုပ်ပေးမည်ဟု ကော်မရှင် ဥက္ကဋ္ဌ ကတိပြု

နိုင်ငံရေးပါတီတွေနဲ့ ကိုယ်စားလှယ်လောင်းတွေအတွက် ကျင့်ဝတ်လက်မှတ်ရေးထိုးပွဲ အခမ်းအနားကို ဇွန်လ ၂၆ ရက်နေ့က ရန်ကုန်မြို့ မယ်လီယာဟိုတယ်မှာ ကျင်းပခဲ့တာပါ။ ပြည်ထောင်စုရွေးကောက်ပွဲကော်မရှင် ဥက္ကဋ္ဌ ဦးလှသိန်းက “ပွင့်လင်းမြင်သာမှုရှိရမယ်၊ အများယုံကြည်လက်ခံ နိုင်ရမယ်၊ ပြည်သူ့ဆန္ဒနဲ့‌ ေရြးေကာက္ပြဲ ရလဒ်တစ်ထပ်တည်းကျရမယ်။ အမဲစက်မရှိ‌အောင်၊ သမာသမတ်ကျ‌အောင် ဆောင်ရွက်‌ပေး သွားမယ်၊ ဝေဖန်နေကြတာတွေကတော့ တစ်ဦးချင်းစီရဲ့ သ‌ဘောထားသာ ဖြစ်ပါတယ်။ ကျနော်တို့က ဘယ်ပါတီကိုမှ ဘက်လိုက်မှာမဟုတ်ပါဘူး”လို့  အခမ်းအနားအဖွင့်မိန့်ခွန်းမှာပြောပါတယ်။ ပြည်ထောင်စုရွေးကောက်ပွဲကော်မရှင်က နိုဝင်ဘာလမှာရွေးကောက်ပွဲကျင်းပမယ်လို့ ကြေညာအပြီး ပထမဆုံးလူစုလူဝေးနဲ့ အခမ်းအနား ကျင်းပခဲ့တာဖြစ်ပါတယ်။ အခမ်းအနားကိုနိုင်ငံရေးပါတီ ၉၀ ကျော်က  ကိုယ်စားလှယ်တွေ နိုင်ငံတကာသံရုံးတွေက ကိုယ်စားလှယ်တွေနဲ့ ရွေးကောက်ပွဲလေ့လာစောင့်ကြည့်သူတွေ တက်ရောက်ခဲ့ပါတယ်။ ဒီကနေ့လက်မှတ်ရေးထိုးတဲ့ကျင့်ဝတ်တွေမှာ ၂၀၂၀အတွက်အထူးပြုချက်တွေပါဝင်ပြီး ဥပဒေလိုအာဏာမတည်ပေမဲ့ နိုင်ငံရေးပါတီတွေက လေးစားလိုက်နာဖို့လိုတယ်လို့ ကော်မရှင် ဥက္ကဋ္ဌက တိုက်တွန်းပါတယ်။
12 months Ago

June 3, 2020

၂၀၂၀ ရွေးကောက်ပွဲ ကိုဗစ်-၁၉ ရောဂါထိန်းချုပ်နိုင်သည့်အပေါ်မူတည်ဟု ကော်မရှင် ဥက္ကဋ္ဌ ပြော 

လာမယ့် အထွေထွေရွေးကောက်ပွဲကျင်းပမယ့်နေ့ရက်ကို  ကိုဗစ်-၁၉  ကပ်ရောဂါ ထိန်းချုပ်နိုင်တဲ့ အခြေအနေအပေါ်မူတည်ပြီး သတ်မှတ်ကြေညာမယ်လို့ ပြည်ထောင်စု ရွေးကောက်ပွဲ ကော်မရှင် ဥက္ကဋ္ဌက ပြောပါတယ်။  ဒီနေ့ ပြည်ထောင်စုရွေးကောက်ပွဲကော်မရှင်ရုံးမှာလုပ်တဲ့ ၂၀၂၀ ပြည့်နှစ် အထွေထွေရွေးကောက်ပွဲအတွက် မဲဆန္ဒနယ်နဲ့ မဲရုံတွေ သတ်မှတ်နိုင်ရေး လုပ်ငန်းညှိနှိုင်းအစည်းအဝေးမှာ ပြောခဲ့တာပါ။ ၂၀၁၀ ပြည့်နှစ် အထွေထွေရွေးကောက်ပွဲကို ရွေးကောက်ပွဲမကျင်းပမီ ၂ လနဲ့ ၂၄ ရက်အလိုမှာ ကြိုတင်ကြေညာပေးခဲ့ပြီး ၂၀၁၅ ခုနှစ် အထွေထွေရွေးကောက်ပွဲ ကျင်းပမယ့် ရက်ကိုလည်း ၄ လ ကြိုတင်ကြေညာပေးခဲ့တယ်လို့ ဆိုပါတယ်။ ပြည်ထောင်စုရွေးကောက်ပွဲကော်မရှင်အနေနဲ့ လက်ရှိအချိန်မှာ ကျန်းမာရေးနဲ့ အားကစား ဝန်ကြီးဌာနရဲ့ ကိုဗစ်-၁၉ ရောဂါနဲ့ပတ်သက်ထုတ်ပြန်ထားတဲ့ ညွှန်ကြားချက်တွေနဲ့အညီ ဆောင်ရွက်နေပြီး ၂၀၂၀ ပြည့်နှစ် အထွေထွေရွေးကောက်ပွဲကျင်းပမယ့်ရက်ကို လက်ရှိဖြစ်ပေါ်နေတဲ့ ကိုဗစ်-၁၉ ထိန်းချုပ်နိုင်တဲ့အပေါ်မူတည်ပြီး သတ်မှတ်ကြေညာသွားမယ်လို့ ကော်မရှင်ဥက္ကဋ္ဌ ဦးလှသိန်းက ပြောပါတယ်။ ဖွဲ့စည်းပုံအခြေခံဥပဒေပါ ပြဋ္ဌာန်းချက်တွေအရ တတိယအကြိမ် လွှတ်တော်သက်တမ်း အတွက် ပါတီစုံဒီမိုကရေစီအထွေထွေရွေးကောက်ပွဲကို ၂၀၂၀ ပြည့်နှစ် နှောင်းပိုင်းမှာ ကျင်းပပေးရမယ်လို့လည်း ပြောပါတယ်။ ပြည်ပနိုင်ငံတွေကနေ ပြန်လာနေတဲ့ ရွှေ့ပြောင်းလုပ်သားတွေဟာ သူတို့ဒေသအသီးသီးကို ပြန်ရောက်လာနေပြီး သူတို့ကိုလည်း အခြေခံမဲဆန္ဒရှင်စာရင်းမှာ စိစစ်ထည့်သွားဖို့လိုသလို တပ်မတော်သားတွေနဲ့ အတူနေအိမ်ထောင်စုဝင်တွေရဲ့ အခြေခံမဲဆန္ဒရှင် စာရင်းရရှိရေး အတွက်ကို လည်း ညှိနှိုင်းဆောင်ရွက်ထားပြီလို့ ဦးလှသိန်းက ပြောပါတယ်။ ကော်မရှင်အဖွဲ့ခွဲတွေအနေနဲ့ သက်ဆိုင်ရာလွှတ်တော်ရွေးကောက်ပွဲ ဥပဒေတွေနဲ့အညီ မဲဆန္ဒနယ်တွေ လျာထားသတ်မှတ်နိုင်ဖို့ အလုပ်သမား၊ လူဝင်မှုကြီးကြပ်ရေးနဲ့ ပြည်သူ့အင်အား ဝန်ကြီးဌာနကနေရတဲ့ လူဦးရေစာရင်းတွေကို ကော်မရှင်က ပေးပို့ထားပြီး ကြိုတင်ပြင်ဆင်ထားဖို့ မှာကြားထားပြီလို့ ဆိုပါတယ်။ ကော်မရှင်အဖွဲ့ခွဲတွေက တင်ပြထားတဲ့မဲဆန္ဒနယ်တွေကို ကော်မရှင်က စိစစ်ပြီး သက်ဆိုင်ရာ လွှတ်တော်အလိုက် မဲဆန္ဒနယ်တွေ အတည်ပြုပေးမှာ ဖြစ်သလို တိုင်းရင်းသားလူမျိုး မဲဆန္ဒနယ်တွေ သတ်မှတ်နိုင်ဖို့အတွက်လည်း ဆောင်ရွက်ထားတယ်လို့ ပြောပါတယ်။ ဒီအစည်းအဝေးကို မနက်ဖြန် ဇွန် ၄ ရက်မှာလည်း ဆက်လက် ပြုလုပ်ဦးမယ်လို့ ပြည်ထောင်စုရွေးကောက်ပွဲကော်မရှင်က ထုတ်ပြန်ထားပါတယ်။
1 year Ago
Up