ကော့သောင်း

August 17, 2022

ထိုင်းတောင်ပိုင်းတွင် ပြစ်ဒဏ်သင့်ပြီး လွတ်ရက်စေ့မြန်မာ ၁၇၃ ဦး ကော့သောင်းသို့ ပြန်ရောက်

ထိုင်းနိုင်ငံတောင်ပိုင်းမှာ အကြောင်းအမျိုးမျိုးကြောင့် ပြစ်ဒဏ်သင့်ပြီး လွတ်ရက်စေ့ ပြန်လွတ်လာတဲ့ မြန်မာနိုင်ငံသား ၁၇၃ ဦးကို ဒီကနေ့မနက်မှာ ရနောင်းအာဏာပိုင်တွေက တနင်္သာရီတိုင်း ကော့သောင်းမြို့ရှိ စစ်ကောင်စီထံ ပြန်လည်လွှဲအပ်ပေးခဲ့ပါတယ်။ 

သူတို့တတွေဟာ ထိုင်းတောင်ပိုင်းနေရာအသီးသီးမှာ နိုင်ငံထဲ တရားမဝင် ဝင်ရောက်မှု၊  စာရွက်စာတမ်း အထောက်အထားမပြည့်စုံမှု၊ အလုပ်ရှင်လွဲမှားမှု၊ အလုပ်နေရာလွဲမှားမှု အစရှိတဲ့ အလုပ်သမားဥပဒေနဲ့ ငြိစွန်းမှု၊ မူးယစ်ဆေးဝါးမှု စတာတွေနဲ့ အဖမ်းခံရပြီး ပြန်လွတ်လာတာလို့ ဝိုင်းဝန်းကူညီပေးနေတဲ့ ကော့သောင်းအခြေစိုက် ရွှေ့ပြောင်း အလုပ်သမားပညာပေးစင်တာမှ တာဝန်ခံ ကိုမိုးဝေက ဒီဗွီဘီကို ပြောပါတယ်။ 

“ထိုင်းတောင်ပိုင်းမှာ အကြောင်းအမျိုးမျိုးကြောင့် အဖမ်းခံရတဲ့အုပ်စုဖြစ်ပါတယ်။ ပြစ်မှုအများစု က တော့ လဝက ဥပဒေ၊ အလုပ်သမားဥပဒေနဲ့ငြိစွန်းတာပါ။ မူးယစ်မှုအနည်းငယ်ပါပါတယ်၊  အချုပ်ခန်းထဲမှာ ၄၅ ရက်ကနေ ၃ လအထိ နေခဲ့ရသူတွေဖြစ်ပါတယ်ခင်ဗျ။ ထိုင်းဘက်က မနက် ၁၁ နာရီကျော်မှာ လွှတ်လိုက်ပြီး ကော့သောင်းကို နေ့လယ် ၁၂ နာရီကျော်ရောက်လာပါတယ်။ အမျိုးသမီး ၅၂ ဦး၊ အမျိုးသား ၁၂၁ ဦး ပါပါတယ်ခင်ဗျ။”

ပြန်လွတ်လာသူတွေကို သက်ဆိုင်ရာတာဝန်ရှိသူတွေက ကိုဗစ်-၁၉ ရောဂါပိုးနဲ့ ကျန်းမာရေးစစ်ဆေးပြီး ကော့သောင်းရှိ ကွာရန်တင်းစင်တာတွေမှာ ၃ ရက်မှ ၅ ရက်ထိ ထားမှာဖြစ်ကြောင်း၊ ဆေးစစ်ချက်မှာ ရောဂါပိုးမတွေ့ရင် သူတို့နေရပ်ဒေသတွေဆီ ပြန်ပို့ ပေးမယ်လို့ ဆိုပါတယ်။ 

ထိုင်းတောင်ပိုင်းအချုပ်ထောင်တွေမှာ နောက်ထပ်အဖမ်းခံထားရတဲ့ မြန်မာနိုင်ငံသား အမြောက်အမြားရှိသေးကြောင်း၊ သက်ဆိုင်ရာအာဏာပိုင်တွေကတော့ တလ ၂ ကြိမ်လောက်သာ ပြန်ပို့လေ့ရှိပြီး ဒီ ၂၀၂၂ ခုနှစ်ထဲမှာတော့ ပြစ်ဒဏ်စေ့ မြန်မာနိုင်ငံသားပေါင်း ၁၈၀၀ ကျော် ပြန်လည်ဝင်ရောက်လာခဲ့တယ်လို့ ကိုမိုးဝေက ပြောသွားပါတယ်။

4 months Ago

August 16, 2022

ကော့သောင်းတွင် ငွေလဲလုပ်ငန်းများ ရပ်နားထားရ

တနင်္သာရီတိုင်း၊ ကော့သောင်းမြို့မှာ ထိုင်းဘတ်ငွေနဲ့ မြန်မာကျပ်ငွေ လဲလှယ်နေသူတွေကို စစ်ကောင်စီက ဖမ်းမယ်လို့ သတင်းတွေထွက်နေတာကြောင့် ငွေလဲလုပ်ငန်း လုပ်ကိုင်နေသူတွေ မနေ့ကစပြီး လုပ်ငန်းရပ်နားထားတယ်လို့ မြို့ခံတွေက ပြောပါတယ်။

မြန်မာကျပ်ငွေတန်ဖိုး ဆက်တိုက်ကျဆင်းနေချိန်မှာ ငွေလဲလုပ်ငန်း လုပ်ကိုင်နေသူတွေက ငွေကစားနေတယ်ဆိုတဲ့ စွပ်စွဲချက်နဲ့ ဖမ်းမယ်လို့ သတင်းတွေထွက်ပေါ်နေတယ်လို့ ဆိုပါတယ်။

ကော့သောင်းမြို့ခံတယောက်က “လောလောဆယ် ငွေလဲဒိုင်တွေ ပိတ်ထားတယ်။ ဖွင့်တဲ့ဒိုင်တွေ ဖမ်းမယ်လို့ ပြောသံကြားရတယ်။ ကုန်ခြောက်ဆိုင်တွေမှာလည်း မလဲပေးရဲကြဘူး။ ငွေဈေးအတိအကျကို မပြောတတ်တော့ဘူး” လို့ ပြောပါတယ်။

ဒီနေ့ညနေ ငွေပေါက်ဈေးမှာ ဝယ်စျေး ထိုင်းဘတ်ငွေ ၁၀၀ ကို မြန်မာကျပ်ငွေ ၈,၀၀၀ လောက် ရှိတယ်လို့ ဘန်ကောက်ငွေလွှဲဒိုင်တခုက ပြောပါတယ်။

ကော့သောင်းမြို့မှာ ငွေလဲဒိုင် ၂၀ လောက်ရှိပြီး လက်ရှိအခြေအနေအထိ အဖမ်းခံထားရတာမျိုးတော့ မရှိသေးဘူးလို့ သိရပါတယ်။

ဩဂုတ် ၁၃ ရက်နေ့က ထိုင်း-မြန်မာနယ်စပ် ကရင်ပြည်နယ်၊ မြဝတီမြို့ အမှတ် ၃ ရပ်ကွက် ကြံခင်းလမ်းမှာ ထိုင်း-မြန်မာ ငွေလဲလုပ်ငန်း လုပ်ကိုင်နေတဲ့ဆိုင်တွေကို စစ်ကောင်စီက ဝင်ရောက်စီးနင်းကာ လူကိုဖမ်းပြီး ငွေတွေ သိမ်းယူသွားခဲ့ပါတယ်။

4 months Ago
More News
Up