ကေအိုင်အေနှင့်စစ်ကောင်စီတပ်

October 23, 2021

မိုးမောက်တွင် ကေအိုင်အေနှင့်စစ်ကောင်စီတပ် တိုက်ပွဲဖြစ်၊ လမ်းအချို့ပိတ်ထား

ကချင်ပြည်နယ် မိုးမောက်မြို့နယ်အထွက် ဝဝမ်တောင်ကြောဘက်မှာ ကေအိုင်အေနဲ့ စစ်ကောင်စီတပ်တို့ အောက်တိုဘာ ၂၂ ရက်နေ့ မနက် ၆ နာရီကျော်လောက်ကနေ ညအထိ  တိုက်ပွဲဖြစ်ပွားခဲ့တယ်လို့ ဒေသခံတွေဆီက သိရပါတယ်။

ဒေသခံရွာသားတစ်ဦးက “လက်နက်ကြီး၊ လက်နက်ငယ်သံတွေ ဝဝမ်ဘက်မှာဖြစ်နေကြတာ ကြားနေရတယ်၊ လူအသေအပျောက်တော့ မသိရဘူး။ ကိုဗစ်ကာကွယ်ဆေး ထိုးမလို့ သွားဖို့ရာတောင် စစ်ကောင်စီတပ်က ကျောက်စခန်းလမ်းနဲ့ မိုးမောက်ဘက်လမ်းမှာ ဖြတ်သန်းသွားလာခွင့်ပိတ်ထားတယ်” လို့ ပြောပါတယ်။

လွယ်ဂျယ်ဘက်သွားဖို့ တိုက်ပွဲကြောင့် လမ်းတွေပိတ်ထားတဲ့အတွက် ခရီးသည်တွေကို အောက်လမ်းကသွားမယ့် ကားတွေကို ပေးလိုက်ရတယ်လို့ လွယ်ဂျယ်-ဗန်းမော် ခရီးသည်တင် ယာဉ်မောင်းတဦးက ပြောပါတယ်။

“ကျနော်တို့က လွယ်ဂျယ်တက်မလို့ စောစောထွက်လာတာ ခရီးသည်တွေလည်းပါတယ်၊ မိုးမောက်ဘက်ရောက်တော့ တိုက်ပွဲဖြစ်နေတော့ လမ်းပိတ်ထားလို့ မိုးမောက်မြို့ထဲမှာပဲ ထားရတယ်။ နေ့လယ်ပိုင်းအထိဖြစ်နေတော့ ခရီးသည်တွေကို သူများ ပေးလိုက်ရတယ်၊ အောက်လမ်းက သွားတယ်လို့ပြောတယ်။ မြို့သစ်ဘက်မှာလည်း ၉ နာရီကျော်လောက်ကနေ ဂိတ်ပိတ်ထားတယ်။”

တိုက်ပွဲအခြေအနေနဲ့ပတ်သက်ပြီး ကချင်လွတ်မြောက်ရေးတပ်မတော် (ကေအိုင်အ) ကို ဆက်သွယ်မေးမြန်းရာမှာ တိုက်ပွဲဖြစ်စဉ် မှန်ကန်ကြောင်း၊ စစ်ကောင်စီဘက်က ရမ်းသမ်းပစ်ခတ်တာတွေ ပိုလုပ်နေပြီး ၆ နာရီလောက်ထိ ပစ်ခတ်နေကြဆဲဖြစ်ပြီး အ သေးစိတ်အခြေအနေတော့ ပြောမရသေးဘူးလို့ ဆိုပါတယ်။

တိုက်ပွဲကြောင့် နှစ်ဖက်ထိခိုက်ဒဏ်ရာမှု အခြေအနေကိုတော့ မသိရသေးဘဲ ဒီဗွီဘီက စုံစမ်းမေးမြန်းနေဆဲ ဖြစ်ပါတယ်။

မိုးမောက်မြို့နယ်မှာ စစ်တပ်အာဏာသိမ်းပြီးနောက်ပိုင်း ဗုံးပေါက်ကွဲတာနဲ့ တိုက်ပွဲတွေ မကြာခဏ ဖြစ်ပွားနေတယ်လို့ သိရပါတယ်။

အောက်တိုဘာ ၂၁ ရက်နေ့ည ၆ နာရီလောက်ကလည်း မိုးမောက်မြို့၊ ခါနန်ရပ်ကွက်အတွင်း နေထိုင်တဲ့ စစ်ကောင်စီတပ်က တပ်ကြပ်ကြီး တင့်ဆွေဦးနဲ့ ယောက်ဖဖြစ်သူတို့အား အမည်မသိအဖွဲ့က သေနတ်ထောက် ဖမ်းဆီးခေါ်ဆောင်သွားခဲ့တယ်လို့ သိရပါတယ်။

1 month Ago

May 22, 2021

နန်စီပွန်တွင် ကေအိုင်အေနှင့်စစ်ကောင်စီတပ်တိုက်ပွဲဖြစ်၊ ဦးပိုင်ကုမ္ပဏီ ပစ်ခတ်ခံရပြီးမီးလောင်

စစ်ကိုင်းတိုင်း ခန္တီးမြို့နယ် နန်စီပွန်ဒေသမှာ ကေအိုင်အေ နဲ့ အာဏာသိမ်းစစ်ကောင်စီတပ်တို့ မေ ၂၂ ရက်နေ့ မနက် ၄ နာရီခွဲလောက်က တိုက်ပွဲဖြစ်ပွားခဲ့တယ်လို့ ဒေသခံတဦးက ပြောပါတယ်။

“အခုတိုက်ပွဲဖြစ်နေတာပါ နန်းစီ၊ပွန်မှာ ဒီမနက်အစောပိုင်း ၄ နာရီလောက် သေနတ်သံ၊ လက်နက်ကြီးအသံကြားတယ်။ ဦးပိုင်ကုမ္ပဏီကို ဝင်စီးတယ်။ အဲဒီကုမ္ပဏီကို ဒီမနက်အစောပိုင်း ဝင်ပစ်ခဲ့တယ်။ ကုမ္ပဏီက မီးလောင်သွားတယ်။ အသေအပျောက်တော့ မသိရသေးဘူး။"

ခန္တီးမြို့ နန်းစီပွန်ဒေသမှာ စစ်တပ်ပိုင် ဦးပိုင်ကုမ္ပဏီက ကျောက်စိမ်းလုပ်ငန်းလုပ်ကိုင်နေပြီး ကျန်တဲ့ကျောက်စိမ်းလုပ်တဲ့ ကုမ္ပဏီတွေ ၁၀၀ လောက်ရှိနေပါတယ်။ 

တိုက်ပွဲဖြစ်တဲ့ နန်းစီပွန်ဒေသဟာ ခန္တီးနဲ့ မိုင် ၃၀ လောက်သာ ကွာဝေးတဲ့အတွက် ခန္တီးဒေသခံတွေ စိုးရိမ်နေကြတယ်လို့ သိရပါတယ်။

6 months Ago
Up