ကိုယ်စားလှယ်လောင်း

A d v e r t i s e m e n t With Us

December 24, 2015

ခိုင်လုံမဲ ၈ ပုံ ၁ ပုံအထက်ရသည့် ကိုယ်စားလှယ်လောင်းများကို မှတ်ပုံတင်ကြေး ပြန်ပေးမည်

နိုဝင်ဘာ ၈ ရက် အထွေထွေရွေးကောက်ပွဲမှာ အနိုင်မရပေမယ့် ခိုင်လုံမဲ ၈ ပုံ ၁ ပုံအထက် ရရှိတဲ့ ကိုယ်စားလှယ်လောင်းတွေကို မှတ်ပုံတင်ကြေး ကျပ် ၅ သိန်း ပြန်ပေးမယ်လို့ ပြည်ထောင်စုရွေးကောက်ပွဲကော်မရှင်က သိရပါတယ်။ အရင် ရွေးကောက်ပွဲတွေတုန်းက အနိုင်ရကိုယ်စားလှယ်ကိုသာ မှတ်ပုံတင်ကြေး ပြန်ထုတ်ပေးခဲ့တာ ဖြစ်ပါတယ်။ ဒီဇင်ဘာလကုန်ပိုင်းကစပြီး မှတ်ပုံတင်ကြေးငွေ ပြန်ထုတ်ပေးသွားမှာဖြစ်ပြီး ၆ လအတွင်း လာမထုတ်ရင်တော့ နိုင်ငံတော်ဘဏ္ဍာငွေအဖြစ် သိမ်းဆည်းမှာ ဖြစ်ပါတယ်။ ရခိုင်ပြည်နယ်၊ မြေပုံမြို့နယ် ပြည်သူ့လွှတ်တော်ကိုယ်စားလှယ် ဦးဖေသန်းက မဲရှစ်ပုံတပုံ ရ မရ ဆိုတာ ဆန္ဒမဲပေးတဲ့အပေါ် မူတည်တယ်လို့ ပြောပါတယ်။ “ရွေးကောက်ခံရတဲ့သူက ရတဲ့သူက မဲပြတ်သွားမယ်၊ ဒုတိယလူကလည်း မဲကပ်လိုက်သွားမယ်၊ ဒါဆိုရင် ပြန်ရနိုင်တယ်၊ ဒါပေမယ့် တတိယ၊ စတုတ္ထရတဲ့သူတွေက မဲပြတ်ကျန်ရစ်မယ်ဆိုရင် မရနိုင်တော့ဘူး၊ မဲရဲ့အခြေအနေအပေါ် မူတည်တယ်၊ တချို့က တယောက်တည်းပဲ မဲအပြတ်ရသွားပြီးတော့ ကျန်တဲ့သူတွေ မဲအရမ်းနည်းပြီး ပြန်မရနိုင်တာမျိုးလည်း ဖြစ်နိုင်တာပေါ့။” ၂၀၁၅ ခုနှစ်၊ နိုဝင်ဘာ ရွေးကောက်ပွဲမှာ လွှတ်တော်အရပ်ရပ်အတွက် ကိုယ်စားလှယ်ပေါင်း ၆၀၀၀ ကျော် စံချိန်တင် ၀င်ရောက် ယှဉ်ပြိုင်ခဲ့ကြပါတယ်။
5 years Ago

December 9, 2015

ကော်မရှင်ထံ ကိုယ်စားလှယ်လောင်း ကန့်ကွက်ထားမှု ၄ ခုရှိ

ပြည်ထောင်စုရွေးကောက်ပွဲကော်မရှင်ထံ ကိုယ်စားလှယ်လောင်း ကန့်ကွက်လွှာ တင်သွင်းထားမှု ၄ ခု ရောက်ရှိနေပြီး ဒီထဲ ကချင်ပြည်နယ် အမျိုးသားလွှတ်တော် နယ်မြေ ၅ က ဦးဇခုန်တိန့်ယိန်းကို အန်အယ်လ်ဒီအမတ်က ကန့်ကွက်လွှာလည်း ပါဝင်တယ်လို့ ကော်မရှင်က ပြောပါတယ်။ ပြည်ထောင်စုရွေးကောက်ပွဲကော်မရှင်ရုံး၊ ညွှန်ကြားရေးမှူး ဦးသောင်းလှိုင်က ရွေးကောက်ပွဲ ကျင်းပအပြီး တလကျော်ကြာအချိန်မှာ ကချင်နဲ့ ရှမ်းပြည်နယ်တို့က ကန့်ကွက်လွှာ ၄ စောင် ရောက်ရှိနေပြီလို့  ပြောပါတယ်။ “ပထမတခုက ရှမ်းပြည်နယ် အမျိုးသားနယ်မြေ ၅ မှာ ကန့်ကွက်တာက ပြည်ခိုင်ဖြိုး၊ ကန့်ကွက်ခံရသူက တအာင်းပလောင်အမျိုးသားပါတီက ဦးညီစိန်၊ နောက်တခုက အမျိုးသား ၅ ပဲ၊ ကချင်ပြည်နယ်၊ လျှောက်ထားသူက ဦးစံဝေခေါင်လွမ်း၊ အန်အယ်လ်ဒီပေါ့၊ လျှောက်ထားခံရသူက ဦးဇခုံတိန့်ယိန်း၊ တသီးပုဂ္ဂလက။” ကချင်ပြည်နယ်၊ ဆော့လော်မဲဆန္ဒနယ်အမှတ် ၁ မှာ အန်အယ်လ်ဒီကိုယ်စားလှယ်က ပြည်ခိုင်ဖြိုးပါတီ ကိုယ်စားလှယ်ကို ကန့်ကွက်ထားမှု၊ ရှမ်းပြည်နယ်၊ နမ့်ခမ်းမဲဆန္ဒနယ်အမှတ် ၂ မှာ ပြည်ခိုင်ဖြိုးကိုယ်စားလှယ်က တအာင်းပလောင်ကိုယ်စားလှယ်နဲ့ ရှမ်းတိုင်းရင်းသားများ ဒီမိုကရေစီအဖွဲ့ချုပ် ကိုယ်စားလှယ် ၂ ယောက်တို့ကို ကန့်ကွက်ထားမှုတွေလည်း ပါဝင်ပါတယ်။ ကချင်ပြည်နယ်၊ အမှတ် ၅ အမျိုးသားလွှတ်တော်ကိုယ်စားလှယ် ဦးကျော်ကျော်ဦးက သူတို့ မဲဆွယ်ကာလ အောက်တိုဘာ ၂၂ ရက်မှာ ဦးဇခုံတိန့်ယိန်းနဲ့ သားဖြစ်သူတို့က ကိုယ်ထိလက်ရောက် စော်ကားမှုနဲ့ ပစ္စည်းဖျက်ဆီးမှုတွေ လုပ်ခဲ့တာကြောင့် ကော်မရှင်အဆင့်ဆင့်ကို တိုင်ကြားခဲ့တာလို့ ပြောပါတယ်။ “သူတို့မှာ ကြံ့ခိုင်ဖွံ့ဖြိုးရေး ခေါင်းစည်းတွေ စည်းထားတယ်၊ စည်းလုံးညီညွတ်ရေးနဲ့ ဒီမိုကရေစီပါတီ ခေါင်းစီးစည်းထားတယ်၊ နောက်ပြီးတော့ နေလဆိုတဲ့ နဖူးစီးတွေ စီးထားတယ်၊ သူတို့က ဟိုဘက်က ရွာတရွာက ပြန်လာကြတာ၊ ကျနော်တို့နဲ့တွေ့တော့ ဘယ်သူ့ခွင့်ပြုချက်နဲ့ လာတာလဲ ဘာလဲဆိုပြီး မပြောမဆိုနဲ့ တခါတည်း လက်တော့တွေ ဗီနိုင်းတွေ ပရိုဂျက်တာတွေ အကုန်လုံး ရိုက်ချိုးဖျက်ဆီးပစ်တယ်၊ လူတွေကိုလည်း လက်သီးနဲ့ထိုး ခြေထောက်တွေနဲ့ ကန်တယ်။” ဦးဇခုံတိန့်ယိန်းနဲ့ သားဖြစ်သူတို့ အနီးကပ်ညွှန်ကြားချက်နဲ့ လူ ၇၀ လောက်ပါတဲ့ လူအုပ်စုက လုပ်ဆောင်ခဲ့တာဖြစ်ပါတယ်။ ပြည်ထောင်စုရွေးကောက်ပွဲကော်မရှင် အနေနဲ့ ဒီကန့်ကွက်တိုင်ကြားမှုတွေနဲ့ ပတ်သက်လို့ နှစ်ဘက် ကြားနာမှုတွေကို အခုလ ၂၁ ရက်မှာ စတင်ပြုလုပ်သွားမှာ ဖြစ်ပါတယ်။ ကန့်ကွက်လွှာတင်သွင်းသူဟာ ဒုတိယ မဲအများဆုံးရသူဖြစ်ပြီး သူဟာ တရားမဲ့ပြုကျင့်ခံရသူဖြစ်ကြောင်း ကော်မရှင်က ကြားနာစစ်ဆေး တွေ့ရှိရင် ကန့်ကွက်ခံရသူဟာ ကိုယ်စားလှယ်အဖြစ်မှ ဖယ်ရှားခံရနိုင်ပါတယ်။ ရွေးကောက်ပွဲဥပဒေ နည်းဥပဒေတွေအရ ကိုယ်စားလှယ်လောင်းစာရင်း ကြေညာအပြီး ၄၅ ရက်အတွင်း ကန့်ကွက်လွှာ တင်သွင်းနိုင်တာမို့ ကန့်ကွက်လွှာတင်သွင်းမှု ခုထက်ပိုများလာစရာအကြောင်း ရှိပါသေးတယ်။ ပြည်ထောင်စုရွေးကောက်ပွဲကော်မရှင်ထံ ကိုယ်စားလှယ်လောင်း ကန့်ကွက်လွှာ တင်သွင်းသူဟာ အမှုစရိတ် ကျပ် ၅ သိန်း ကော်မရှင်ထံတင်ပြီး ကန့်ကွက်ရတာ ဖြစ်ပါတယ်။
5 years Ago
More News
Up