ကုလအထူးသံတမန်

June 9, 2019

ကုလအထူးသံတမန် ဂျိုလီ ဗင်နီဇွဲလားနယ်စပ်က ဒုက္ခသည်စခန်းကို သွားရောက်

ကုလသမဂ္ဂ ဒုက္ခသည်များဆိုင်ရာ မဟာမင်းကြိး (UNHCR)  အထူးသံတမန် အိန်ဂျလီနာ ဂျိုလီဟာ ဇွန် ၇ ရက်နေ့က ကိုလံဘီယာ-ဗင်နီဇွဲလားနယ်စပ်မှာရှိတဲ့ ဒုက္ခသည်စခန်းတွေကို သွားရောက်ခဲ့ပါတယ်။ ဗင်နီဇွဲလားနိုင်ငံအတွင်း စီးပွားရေးနဲ့ လူသားချင်းစာနာမှု ပြဿနာတွေကြောင့် ဒုက္ခသည်နဲ့ ရွှေ့ပြောင်းသူ ၄ သန်း နိုင်ငံကနေ ထွက်ပြေးခဲ့တယ်လို့ ကုလသမဂ္ဂက ကြေညာပြီးနောက် အထူးသံတမန် ဂျိုလီဟာ ဒုက္ခသည်စခန်းကို သွားရောက်ခဲ့တာပါ။ မကြာသေးခင် ထုတ်ပြန်တဲ့ ကိန်းဂဏန်းတွေအရ ကိုလံဘီယာဟာ ဗင်နီဇွဲလား ဒုက္ခသည် အများစု  ၁ ဒသမ ၃ သန်း ကို လက်ခံထားပြီး သူ့နောက်မှာတော့ ပီရူး၊ ချီလီ အီကွေဒေါ၊ ဘရာဇီင်္း နဲ့ အာဂျင်တီးနား နိုင်ငံတို့က ဒုက္ခသည်တွေကို လက်ခံထားပါတယ်။ ဂျိုလီဟာ  ဒုက္ခသည်တွေနဲ့အတူ စကားပြောဆိုခဲ့ပြီး ဒုက္ခသည်တွေရဲ့ စကားသံတွေကို နားထောင်ခဲ့ပါတယ်။ ဇွန်လ ၇ ရက်နေ့က ဗင်နီဇွဲလား သမ္မတ မာဒူရိုဟာ နယ်စပ် တစိတ်တဒေကို ပြန်ဖွင့်တယ်လို့ ကြေညာခဲ့ပါတယ်။ အဲဒီနယ်စပ်ကို ပြီးခဲ့တဲ့ ဖေဖော်ဝါရီလတုန်းက ဗင်နီဇွဲလားအစိုးရက ပိတ်ခဲ့တာပါ။ အဲဒီလို ပိတ်လိုက်တဲ့အတွက် နယ်စပ်မြို့တွေမှာ စီးပွားရေးပြဿနာတွေ ဖြစ်ခဲ့ပါတယ်။ ဒါကြောင့်  ဗင်နီဇွဲလား နိုင်ငံသားတွေဟာ ကြံရာမရဖြစ်တာနဲ့ နယ်စပ်လမ်းတွေကို ထိန်းချုပ်တဲ့ ဒုစရိုက်သမားတွေကို အခကြေးငွေပေးပြိး တရားမ၀င် ဖြတ်သန်းတာတွေ လုပ်ကြတယ်လို့ ရိုက်တာသတင်းအရ သိရပါတယ်။
2 years Ago

June 14, 2018

အမှန်တရားဘက်က ရပ်တည်ရန် ကုလအထူးသံတမန်ကို ဒေါ်အောင်ဆန်းစုကြည် တိုက်တွန်း

ရခိုင်ပြည်နယ်ရဲ့ မြေပြင်အခြေအနေနဲ့ နက်နဲရှုပ်ထွေးမှုတွေရဲ့ ပကတိအခြေအနေကို သိရှိနားလည်ပြီး အမှန်တရားဘက်က ရပ်တည်ဖို့  နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ကုလသမဂ္ဂ အထူးကိုယ်စားလှယ်ကို တိုက်တွန်းလိုက်ပါတယ်။ မြန်မာနိုင်ငံကို ပထမဆုံးအကြိမ် လာရောက်တဲ့ ကုလသမဂ္ဂ အတွင်းရေးမှူးချုပ်ရဲ့ မြန်မာနိုင်ငံဆိုင်ရာ အထူးကိုယ်စားလှယ် မစ္စခရစ္စတင်း ရွှာနာဘာဂီနာကို ဇွန် ၁၃ရက်မနက်က နေပြည်တော်မှာ လက်ခံတွေ့ဆုံပြောကြားခဲ့တာလို့ နိုင်ငံခြားရေးသတင်းမှာ ဖော်ပြပါတယ်။ “မြေပြင်အခြေအနေနဲ့ နက်နဲရှုပ်ထွေးမှုတွေရဲ့ ပကတိအခြေအနေတွေကို သိရှိနားလည်ပြီး အမှန်တရားဘက်က ရပ်တည်ဖို့၊ အခြေအနေမှန်တွေကို နိုင်ငံတကာ အသိုက်အဝန်းက သိရှိနိုင်စေဖို့ ဆောင်ရွက်ပေးဖို့ လိုအပ်ကြောင်းနဲ့ အထူးကိုယ်စားလှယ်အနေနဲ့  မြန်မာနိုင်ငံနဲ့ ကုလသမဂ္ဂတို့အကြား အပြုသဘောဆောင်တဲ့ ပံ့ပိုးမှုတွေနဲ့ ပေါင်းကူးဆောင်ရွက်ပေးဖို့ မျှော်လင့်ကြောင်း” ဒေါ်အောင်ဆန်းစုကြည်က ပြောကြားခဲ့တယ်လို့ဆိုပါတယ်။ အထူးကိုယ်စားလှယ် ခရစ္စတင်းရွှာနာဘာဂီနာကလည်း “ရခိုင်ပြည်နယ်ကိစ္စ ဖြေရှင်းရေးမှာ မြန်မာနိုင်ငံနဲ့ ကုလသမဂ္ဂ အကြား အပြုသဘောဆောင် ပူးပေါင်း ဆောင်ရွက်မှုတွေ တိုးမြှင့်ဖို့ မြန်မာပြည်ကို လာရောက်တာဖြစ်ကြောင်း အသိုက်အဝန်းနှစ်ခု ပိုမိုနီးကပ်လာစေဖို့နဲ့  မြန်မာနိုင်ငံရဲ့ ငြိမ်းချမ်းရေး လုပ်ငန်းစဉ်ကို အထောက်အကူပြုဖို့ လာရောက်တာဖြစ်တယ်”လို့ ပြောပါတယ်။ တွေ့ဆုံစဉ် နိုင်ငံတော်အတိုင်ပင်ခံပုဂ္ဂိုလ်နဲ့ ကုလသမဂ္ဂအထူးကိုယ်စားလှယ်တို့ဟာ ရခိုင်ပြည်နယ်အရေး အပါအဝင် မြန်မာပြည်မှာ ရင်ဆိုင်နေရတဲ့ စိန်ခေါ်မှုတွေကို ဖြေရှင်းရေးမှာ ပူးပေါင်းဆောင်ရွက်ရေး၊ အမျိုးသား ပြန်လည်သင့်မြတ်ရေးနဲ့ ငြိမ်းချမ်းရေး လုပ်ငန်းစဉ်ကိစ္စတွေနဲ့ ပတ်သက်ပြီးလည်း ဆွေးနွေးခဲ့ကြတယ်လို့ သိရပါတယ်။ ကုလသမဂ္ဂ အထူးကိုယ်စားလှယ်ဟာ  ပြည်ထောင်စုဝန်ကြီး ဦးကျော်တင်၊ ပြည်ထောင်စုဝန်ကြီး ဦးသောင်းထွန်းတို့နဲ့လည်း သီးခြားတွေ့ဆုံပြီး မြန်မာနဲ့ ကုလသမဂ္ဂတို့အကြား ပူးပေါင်းဆောင်ရွက်မှု မြှင့်တင်ရေးနဲ့ ရခိုင်ပြည်နယ်အရေးကိစ္စတွေ  အမြင်ချင်းဖလှယ် ဆွေးနွေးခဲ့ကြပါတယ်။ ကုလသမဂ္ဂ အထူးကိုယ်စားလှယ်ဟာ မြန်မာခရီးစဉ်အတွင်း မြန်မာအာဏာပိုင်တွေအပြင် တိုင်းရင်းသားလက်နက်ကိုင်အဖွဲ့တွေ၊ အရပ်ဘက် အဖွဲ့အစည်းတွေ၊ ဘာသာရေးခေါင်းဆောင်တွေ၊ သံတမန်တွေနဲ့ တွေ့ဆုံပြီး ရခိုင်ပြည်နယ်အရေး၊ ငြိမ်းချမ်းရေး၊ ဒီမိုကရေစီနဲ့ လူ့အခွင့်အရေးကိစ္စတွေ ဆွေးနွေးဖို့ရှိနေပါတယ်။ မြန်မာပြည်ခရီးအပြီးမှာတော့ ကုလသမဂ္ဂ အထူးကိုယ်စားလှယ်နဲ့ အဖွဲ့ဟာ ဘင်္ဂလားဒေ့ရ်ှနိုင်ငံကို ဆက်လက်သွားရောက်မှာဖြစ်ပါတယ်။ မစ္စခရစ္စတင်း ရွှာနာဘာဂီနာကို ပြီးခဲ့တဲ့ ဧပြီလကမှ  မြန်မာနိုင်ငံဆိုင်ရာ အထူးကိုယ်စားလှယ်အဖြစ် အသစ်ခန့်အပ်လိုက်တာဖြစ်ပြီး သူဟာ ဂျာမနီ နိုင်ငံဆိုင်ရာ ဆွစ်ဇာလန်သံ အမတ်ဟောင်းအဖြစ် ထမ်းဆောင်ခဲ့တဲ့ ဝါရင့်သံတမန်လည်း ဖြစ်ပါတယ်။ ဓာတ်ပုံ-MOFA
3 years Ago
Up