ကုလသမဂ္ဂ အတွင်းရေးမှူးချုပ်

A d v e r t i s e m e n t With Us

February 22, 2021

ပြည်သူအပေါ်ဖိနှိပ်မှု ချက်ချင်းရပ်တန့်ရန် မြန်မာစစ်တပ်ကို ကုလသမဂ္ဂအကြီးအကဲတောင်းဆို

မြန်မာစစ်တပ်အနေနဲ့ ဖိနှိပ်မှုတွေကို ချက်ချင်း ရပ်တန့်ဖို့၊ ဖမ်းဆီးထိန်းသိမ်းထားတွေကို လွှတ်ပေးဖို့နဲ့ အကြမ်းဖက်မှုတွေကို အဆုံးသတ်ဖို့  ကုလသမဂ္ဂ အတွင်းရေးမှူးချုပ် အန်တိုနီရိုဂူတာရပ်စ်က အပြင်းအထန်တောင်းဆိုလိုက်ပါတယ်။ 

ဒီကနေ့ကျင်းပတဲ့ ကုလသမဂ္ဂလူ့အခွင့်အရေးကောင်စီအစည်းအဝေးမှာ ကုလသမဂ္ဂအတွင်းရေးမှူးချုပ်က  မြန်မာနိုင်ငံအရေးနဲ့ ပတ်သက်လို့  ပြောကြားရာမှာ ထည့်သွင်း ပြောသွားတာပါ။

လူ့အခွင့်အရေးနဲ့ ပြီးခဲ့တဲ့ ၂၀၂၀ ရွေးကောက်ပွဲမှာ ဖော်ပြခဲ့တဲ့ ပြည်သူတို့ရဲ့ ဆန္ဒကို လေးစားဖို့နဲ့ ခေတ်မီတိုးတက်တဲ့ ကမ္ဘာမှာ  အာဏာသိမ်းမှုတွေအတွက် နေရာမရှိပါလို့လည်း အတွင်းရေးမှူးချုပ်က ပြောပါတယ်။

အတွင်းရေးမှူးချုပ် ဂူတာရပ်စ်က “ဒီမိုကရေစီ အနှစ်သာရကို ယုတ်လျော့စေခြင်း၊ ရက်စက်စွာ အင်အားသုံးခြင်း၊ ခိုင်လုံတဲ့ အကြောင်းပြချက်မရှိဘဲ ဖမ်းဆီးထိန်းသိမ်းခြင်းနဲ့ ဖိနှိပ်မှုမျိုးစုံလုပ်ဆောင်နေမှုတွေကို  ကျွန်ုပ်တို့ တွေ့မြင်နေရတယ်။ ပြည်သူလူထုရဲ့ လှုပ်ရှားဆောင်ရွက်နိုင်ခွင့်တွေကို ကန့်သတ်ချုပ်ချယ်မှုတွေ၊ အရပ်ဘက် ပြည်သူတွေကို တိုက်ခိုက်မှု၊ ရိုဟင်ဂျာလူမျိုးစုတွေကို မျိုးတုန်းသတ်ဖြတ်မှုဟု အမှန်အကန်ခေါ်ဆိုခဲ့တဲ့ ချိုးဖောက်မှုအပါအဝင် လူနည်းစုတွေကို တာဝန်ခံမှုမရှိ ပြင်းထန်တဲ့ ချိုးဖောက်မှုတွေ စတဲ့ ကျူးလွန်ချိုးဖောက်မှုများစွာ ဆက်လက်ရှိနေပါတယ်၊ ဖရိုဖရဲကသောင်းကနင်းအခြေအနေသို့ ဦးတည်နေပါတယ်” လို့ပြောပါတယ်။ 

လူ့အခွင့်အရေးကောင်စီရဲ့ ဆုံးဖြတ်ချက်တွေကို ကြိုဆိုတဲ့အကြောင်း၊ တောင်းဆိုမှုတွေကို ဖြည့်ဆည်းပေးဖို့ ကတိပြုကြောင်းနဲ့ ဒီမိုကရေစီ၊ ငြိမ်းချမ်းရေး၊ လူ့အခွင့်အရေးတွေနဲ့ တရားဥပဒေစိုးမိုးရေး ကြိုးပမ်းဆောင်ရွက်နေကြတဲ့ မြန်မာပြည်သားတွေကို အပြည့်အဝ ထောက်ခံအားပေးတယ်လို့ ကုလအကြီးအကဲက ပြောပါတယ်။

Photo- UN

2 weeks Ago

November 4, 2019

ရခိုင်စစ်ပွဲကိစ္စ ကုလအတွင်းရေးမှူးချုပ်ပြောဆိုခြင်းမရှိ၊ ရိုဟင်ဂျာနေရပ်ပြန်ရေး တောင်းဆို

ရခိုင်ပြည်နယ်မှာ ဖြစ်ပွားနေတဲ့ စစ်ပွဲနဲ့ပတ်သက်ပြီး ကုလသမဂ္ဂ အတွင်းရေးမှူးချုပ်က အာဆီယံအစည်းအဝေးမှာပြောဆိုခဲ့ခြင်းမရှိဘဲ ဘင်္ဂလားဒေ့ရှ်ဘက် နေရပ်စွန့်ခွာသွားသူတွေ ဆန္ဒအလျောက် ဘေးကင်း လုံခြုံစွာ ပြန်လာနိုင်ရေးဆောင်ရွက်ပေးဖို့   တောင်းဆိုလိုက်ပါတယ်။ နိုဝင်ဘာလ ၃ ရက်နေ့က ထိုင်းနိုင်ငံ ဘန်ကောက်မြို့မှာ ကျင်းပတဲ့ ၁၀ ကြိမ်မြောက် အာဆီယံ-ကုလသမဂ္ဂ ထိပ်သီးအစည်းအဝေးမှာ ကုလသမဂ္ဂ အတွင်းရေးမှူးချုပ် အန်တိုနီရို ဂူတာရပ်စ်က ပြောသွားတာ ဖြစ်ပါတယ်။ ကုလသမဂ္ဂ အတွင်းရေးမှူးချုပ်က ရခိုင်ပြည်နယ် အရေးကိစ္စအပေါ် စိုးရိမ်ပူပန်ကြောင်း၊ ပြဿနာအရင်းအမြစ်ကို ဖြေရှင်းဖို့နဲ့ နေရပ်စွန့်ခွါသူတွေ မိမိဆန္ဒအလျောက် ဘေးကင်းလုံခြုံစွာ ဂုဏ်သိက္ခာရှိရှိ ပြန်လာနိုင်ရေး မြန်မာအစိုးရရဲ့  တာဝန် ဖြစ်ကြောင်းပြောပါတယ်။ မြန်မာအစိုးရအနေနဲ့ ဒုက္ခသည်တွေ ဆန္ဒအလျောက်ငြိမ်းချမ်းစွာပြန်လာနိုင်ဖို့လိုအပ်တဲ့ အခြေအနေတွေကို ဖန်တီးပေးဖို့နဲ့ လုံခြုံမှုမရှိဘူးလို့ ခံစားရပါက ဆန္ဒအလျောက်နေရပ်ပြန်ဖို့ ကိစ္စ မဖြစ်နိုင်ဘူးလို့ လည်း မစ္စတာ ဂူတာရပ်စ်က ပြောပါတယ်။ “ရခိုင်ပြည်နယ်မှာ ရခိုင်အသိုက်အဝန်းရယ်၊ ရိုဟင်ဂျာအသိုက်အဝန်းရယ်ရှိတယ်။ အမုန်း စကားတွေနဲ့ တခြားမုန်းတီးမှုပုံစံတွေ ပျောက်ကွယ်သွားဖို့အတွက်  ရင်ကြားစေ့ရေး ဖြစ်စေမယ့် အခြေအနေတွေ မရှိမဖြစ် ဖန်တီးပေးရမယ်”  ဒါ့အပြင် ရခိုင်အရေးကိစ္စနဲ့ ပတ်သက်ပြီး အာဆီယံညှိနှိုင်းဆောင်ရွက်မှုကို ကုလသမဂ္ဂ အနေနဲ့ ကြိုဆိုတယ်လို့ လည်းပြောပါတယ်။ ရခိုင်ပြည်နယ်အရေး ကိစ္စနဲ့ ပတ်သက်ပြီး  ကုလသမဂ္ဂ အတွင်းရေးမှူးချုပ်ရဲ့ ပြောကြားချက်အပေါ် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က “ကာကွယ် စောင့်ရှောက်ပေးရမယ့်လူအားလုံးရဲ့ လုံခြုံရေးနဲ့ အခွင့်အရေးတွေကို ကာကွယ်ပေးဖို့ တာဝန်ကို မြန်မာအစိုးရအနေနဲ့ ရှောင်လွှဲမှာမဟုတ်ဘူး”လို့  ပြန်လည်တုန့်ပြန်ပြောကြားပါတယ်။ ဒါ့အပြင် ရခိုင်ပြည်နယ် အရေးကိစ္စဟာ အလွန်သိမ်မွေ့ ရှုပ်ထွေးတဲ့ ကိစ္စတခု ဖြစ်ကြောင်း၊ ကုလသမဂ္ဂ အဖွဲ့အစည်းတွေအနေနဲ့ ပြဿနာရဲ့ သိမ်မွေ့ရှုပ်ထွေးမှု အတိုင်းအတာကို အနည်းအကျဉ်း သိထားဖို့ လိုအပ်ကြောင်း၊ ဘင်္ဂလားဒေ့ရှ်နိုင်ငံနဲ့ လက်မှတ်ရေးထိုးထားတဲ့ နှစ်နိုင်ငံ သဘောတူညီချက်၊ UNHCR ၊ UNDP တို့နဲ့ လက်မှတ်ရေးထိုးထားတဲ့ သုံးပွင့်ဆိုင် သဘောတူညီချက်တွေနဲ့အညီ စိစစ်အတည်ပြုပြီးဖြစ်တဲ့ နေရပ်စွန့်ခွါသူတွေကို ပြန်လည်လက်ခံဖို့ အပြည့်အဝ ကတိပြုထားတယ်လို့ လည်း ဒေါ်အောင်ဆန်းစုကြည်ကပြောပါတယ်။  မြန်မာအစိုးရရဲ့ ရခိုင်ပြည်နယ် တည်ငြိမ်အေးချမ်းရေး ကြိုးပမ်းဆောင်ရွက်နေမှုတွေကို ကူညီပံ့ပိုးပေးကြတဲ့ အာဆီယံ၊ အာဆီယံ အတွင်းရေးမှူးချုပ်ရုံးနဲ့ AHA စင်တာတို့အပေါ် ကျေးဇူးတင်ရှိကြောင်း၊ ပြဿနာအပေါ် လက်တွေ့ကျပြီး ဘက်လိုက်မှုမရှိဘဲ မျှတဲ့ ချဉ်းကပ်မှုနဲ့ အကူအညီပေးနေကြတဲ့ မိတ်ဆွေတွေရဲ့အကူအညီနဲ့ ဆက်လက် ကြိုးပမ်းသွားမယ်လို့လည်း ပြောသွားပါတယ်။ ကမ္ဘာကြီးရင်ဆိုင်နေရတဲ့ ရာသီဥတုပြောင်းလဲမှုဆိုင်ရာ အရေးပေါ်အခြေအနေကို ပိုမိုဝိုင်းဝန်းဆောင်ရွက်ကြဖို့ လိုအပ်နေတယ်လို့လည်း ကုလသမဂ္ဂ အတွင်းရေးမှူးချုပ်က အာဆီယံ ခေါင်းဆောင်တွေကို တိုက်တွန်း ပြောကြားသွားပါတယ်။   
1 year Ago
Up