ကုလသမဂ္ဂလူ့အခွင့်အရေးကောင်စီ

September 19, 2021

စစ်တပ်ကျူးလွန်ခဲ့သည့် လူအစုလိုက်သတ်ဖြတ်မှုများကို ကုလလူ့အခွင့်ရေးကောင်စီထံ NUG အစိုးရက အစီရင်ခံစာတင်သွင်း

စစ်ကိုင်းတိုင်းနဲ့ မကွေးတိုင်းအတွင်း  ဖြစ်ပွားခဲ့တဲ့ လူ့အခွင့်အရေးဆိုင်ရာ အခြေအနေတွေကို ကုလသမဂ္ဂလူ့အခွင့်အရေးကောင်စီသို့ တင်သွင်းလိုက်ကြောင်း အမျိုးသားညီညွတ်ရေးအစိုးရ လူ့အခွင့်အရေးဆိုင်ရာဝန်ကြီးဌာနက စက်တင်ဘာ ၁၉ ရက် ဒီကနေ့ ထုတ်ပြန်ပါတယ်။

စစ်ကိုင်းတိုင်းနဲ့ မကွေးတိုင်းအတွင်း ၂၀၂၁ ခုနှစ် ဇူလိုင်လမှ စတင်ပြီး စစ်တပ်က ကျူးလွန်တဲ့ လူ့အခွင့်အရေးချိုးဖောက်မှု အခြေအနေတွေကို ပြုစုထားတဲ့  အစီရင်ခံစာတစ်စောင်ကို  ကုလသမဂ္ဂ လူ့အခွင့်အရေးကောင်စီသို့ ဒီကနေ့ တင်သွင်းလိုက်တာဖြစ်ပါတယ်။ ဒီအစီရင်ခံစာဟာ လူ့အခွင့်အရေးချိုးဖောက်မှုတွေ ကိုယ်တိုင်တွေ့ကြုံခံစားခဲ့ သူတွေကို တိုက်ရိုက်မေးမြန်း ပြုစုထားတာလို့လည်း ဆိုပါတယ်။

အဆိုပါ တိုင်းဒေသကြီး ၂ ခုမှာ စစ်ကောင်စီတပ်တွေက အရပ်သားတွေအပေါ် စတင် ထိုးစစ်ဆင်ပြီး နယ်မြေရှင်းလင်းခဲ့တဲ့ ဇူလိုင်၊ ဩဂုတ်နဲ့ စက်တင်ဘာလအတွင်း ဖြစ်ပွားခဲ့တဲ့ အစုလိုက်အပြုံလိုက် သတ်ဖြတ်မှုတွေ၊ သေဆုံးတဲ့အထိ ညှဉ်းပန်းနှိပ်စက်မှုတွေနဲ့ တရားဥပဒေမဲ့ ဖမ်းဆီးမှုတွေကို အစီရင်ခံစာမှာ ဖော်ပြထားပါတယ်။

မြန်မာစစ်တပ်ကို လက်နက်တွေ တင်ပို့ရောင်းချတာနဲ့ စစ်ရေး အကူအညီပေးတာတွေ ရပ်တံ့ဖို့၊ လူ့အခွင့်ရေးချိုးဖောက်မှုတွေ အမြန်ဆုံးရပ်တန့်ပြီး တရားမျှတမှု အတွက် အပြည်ပြည်ဆိုင်ရာ ရာဇဝတ်မှုတရားရုံး (အိုင်စီစီ) အပါအဝင် နိုင်ငံတကာ လုပ်ထုံးလုပ်နည်းတွေအရ ထိရောက်စွာ အရေးယူဖို့လည်း လူ့အခွင့်အရေးကောင်စီကို တိုက်တွန်းပါတယ်။

ဒါ့အပြင် အကြမ်းဖက်ခံနေရတဲ့ စစ်ကိုင်းတိုင်းနဲ့ မကွေးတိုင်းက ပြည်သူလူထုတွေအပါအဝင် မြန်မာပြည်သူတွေကို လူသားချင်းစာနာမှု အကူအညီတွေ ထောက်ပံ့ပေးဖို့လည်း NUG လူ့အခွင့်အရေးဆိုင်ရာ ဝန်ကြီးဌာနက တောင်းဆိုထားပါတယ်။

မြန်မာနိုင်ငံမှာ မတရားအာဏာသိမ်းကာလ ၇ လခွဲကျော်အကြာ အကြမ်းဖက်စစ်တပ် ပစ် ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူအယောက် ၁၁၀၈ ယောက်ထိ ရှိလာပြီလို့ နိုင်ငံရေး အကျဉ်းသားများ ကူညီစောင့်ရှောက်ရေးအသင်း(အေအေပီပီ)က ထုတ်ပြန်ပါတယ်။

ဒီစာရင်းဟာ ပြီးခဲ့တဲ့ ဖေဖော်ဝါရီ ၁ ရက်မှ စက်တင်ဘာ ၁၇ ရက်အထိ အေအေပီပီက ကောက်ယူမှတ်တမ်း ပြုစုထားတာဖြစ်ပြီး အမှန်တကယ် ကျဆုံးသူတွေဟာ ဒီထက်ပိုနိုင်တယ်လို့ ဖော်ပြထားပါတယ်။

နွေဦးတော်လှန်ရေးကာလအတွင်း ပြည်သူ ၈၂၂၇ ယောက် ဖမ်းဆီးခံခဲ့ရကာ ၆၅၉၁ ယောက်ကတော့ လက်ရှိချုပ်နှောင်ခံထားရဆဲဖြစ်ပြီး အဲဒီထဲက ၂၇၆ ယောက်ကတော့ ထောင်ဒဏ် ချမှတ်ခံထားရပါတယ်။

PHOTO-UN

4 weeks Ago

September 14, 2021

ရှင်းကျန်းဒေသလူ့အခွင့်အရေးချိုးဖောက်မှု ကုလလူ့အခွင့်အရေးကောင်စီ စုံစမ်းစစ်ဆေးခွင့်မရ

တရုတ်နိုင်ငံ၊ ရှင်းကျန်းဒေသမှာ မွတ်စလင် ဝီဂါတိုင်းရင်းသားတွေအပေါ် လူ့အခွင့်အရေး ဆိုးဆိုးရွားရွား ချိုးဖောက်မှု အစီရင်ခံစာတွေကို စုံစမ်းစစ်ဆေးဖို့ အားထုတ်ပေမဲ့ မအောင်မြင်ခဲ့လို့ ဝမ်းနည်းရတယ်လို့ ကုလသမဂ္ဂ လူ့အခွင့်အရေးကောင်စီ အကြီးအကဲ မီရှဲဘာချေးလက်က ဂျီနီဗာမှာ  စက်တင်ဘာ ၁၃ ရက်ကစတင်ကျင်းပတဲ့  ကုလသမဂ္ဂ လူ့အခွင့်အရေးကောင်စီ ညီလာခံဖွင့်ပွဲမှာ ပြောလိုက်ပါတယ်။

“ရှင်းကျန်း ဝီဂါ ကိုယ်ပိုင်အုပ်ချုပ်ခွင့်ရဒေသကို အဓိပ္ပာယ်ရှိရှိ လက်လှမ်းမီအောင် ကြိုးစားနေတဲ့ ကျမရဲ့ အားထုတ်မှုတွေ တိုးတက်မှုရှိအောင် မလုပ်နိုင်ခဲ့လို့ ဝမ်းနည်းရတယ်။ လောလောဆယ် ကျမရဲ့ရုံးက အဲဒီဒေသအတွင်း ပြင်းထန်တဲ့ လူ့အခွင့်အရေး ချိုးဖောက်မှု စွဲချက်တွေအတွက် ရနိုင်သမျှ သတင်းအချက်အလက်တွေကို လက်လှမ်းမီအောင်စုပြီး အများပြည်သူအတွက် ဖြန့်ချိမယ့် အမြင်နဲ့ အခြေအနေဆိုင်ရာ အစီရင်ခံစာကို အဆုံးသတ် ရေးသားနေတယ်”လို့လည်း သူက ပြောပါတယ်။

ရှင်းကျန်းပြည်နယ်ထဲမှာ မွတ်စလင် အယောက် ၁ သန်းလောက်ဟာ အလုပ်လုပ်ခိုင်းဖို့ စခန်းတွေထဲမှာ ထိန်းသိမ်းခံထားရတယ်လို့ ယုံကြည်ရလောက်တဲ့ အစီရင်ခံစာတွေကို ကိုးကားပြီး ကုလသမဂ္ဂက ပြောထားပါတယ်။

တရုတ်က အဲဒီလိုစခန်းတွေ ရှိတယ်ဆိုတာကို အစပိုင်းမှာ ငြင်းထားပြီး အစွန်းရောက်ဝါဒကို တိုက်ဖျက်ဖို့ ပုံစံထုတ်ထားတဲ့ အသက်မွေးဝမ်းကျောင်းဌာနတွေသာ ရှိတယ်လို့ ပြောထားပါတယ်။

၂၀၁၉ နှောင်းပိုင်းမှာတော့ စခန်းထဲက လူအားလုံး ပညာတတ်တွေ ဖြစ်ကုန်ပြီလို့ တရုတ်အစိုးရက ပြောပါတယ်။

1 month Ago
More News
Up