ကုလသမဂ္ဂလုံခြုံရေးကောင်စီ

July 30, 2021

လုံခြုံရေးကောင်စီ၌ မြန်မာအရေး အလွတ်သဘောဆွေးနွေး၊ မြန်မာ့လူဦးရေတဝက် ကိုဗစ်ကူးစက်နိုင်ဟု သတိပေး

စစ်တပ်အာဏာသိမ်းမှုနဲ့ရော ပြင်းထန်တဲ့ကိုဗစ်ကပ်ရောဂါလှိုင်းနဲ့ပါ ရင်ဆိုင်နေရတဲ့ မြန်မာနိုင်ငံရဲ့ လက်ရှိအခြေအနေနဲ့ ပတ်သက်ပြီး ကုလသမဂ္ဂလုံခြုံရေးကောင်စီ အလွတ်သဘောဆွေးနွေးပွဲကို ဇူလိုင် ၂၉ ရက်က နယူးယောက်မြို့ကုလသမဂ္ဂဌာနချုပ်မှာ ကျင်းပပါတယ်။ 

ဒီအစည်းအဝေးကျင်းပဖို့ ကမကထပြုလုပ်ခဲ့တဲ့  ကုလသမဂ္ဂဆိုင်ရာ ဗြိတိန်အမြဲတမ်းကိုယ်စားလှယ် အမတ်ကြီး ဘာဘရာဝုဒ်ဝပ်ဒ်က မြန်မာနိုင်ငံမှာလာမယ့် သီတင်းနှစ်ပတ်လောက်အတွင်း နိုင်ငံလူဦးရေ ၅၄ သန်းရဲ့ တဝက်လောက်ဟာ ကိုဗစ်-၁၉ ရောဂါ ကူးစက်ခံရနိုင်တဲ့ အခြေအနေရှိနေတယ်လို့ သတိပေးပြောကြားလိုက်ပါတယ်။ 

အာဏာသိမ်းစစ်ကောင်စီရဲ့ လုပ်ရပ်တွေကြောင့် မြန်မာပြည်ရဲ့ ကျန်းမာရေးစနစ်တစ်ခုလုံးနီးပါး ယိုယွင်းပျက်စီးသွားပြီး ကျန်းမာရေးဝန်ထမ်းတွေလည်း ပစ်မှတ်ထား တိုက်ခိုက်ခံရ၊ ဖမ်းဆီးခံနေရတယ်လို့လည်း ဗြိတိန်သံအမတ်ကြီးက ပြောပါတယ်။

ကုလသမဂ္ဂဆိုင်ရာ အမေရိကန် လက်ထောက် သံအမတ်ကြီး ဂျက်ဖရီ ဒီလော်ရန်းတစ် ကလည်း မြန်မာနိုင်ငံမှာ ကိုဗစ်-၁၉ ရောဂါဖြစ်ပွားမှု တရှိန်ထိုးမြင့်တက်လာနေတဲ့ အပြင် အစာရေစာငတ်မွတ်ခေါင်းပါးမှုလည်း တိုးလာနေတဲ့အကြောင်းနဲ့ အချိန်နှောင့်နှေးကြံ့ကြာလာတာနဲ့ အမျှသေဆုံးသူတွေ ပိုများလာလိမ့်မယ်လို့ သတိပေးပြောကြားလိုက်ပါတယ်။

ကုလသမဂ္ဂလုံခြုံရေးကောင်စီအနေနဲ့လည်း မြန်မာစစ်တပ်ကို အကြမ်းဖက်မှုတွေရပ်တန့် အောင်နဲ့လုပ်ဆောင်ဖို့နဲ့ ဒီမိုကရေစီစနစ်ပြန်ရအောင်လုပ်ဖို့ ဖိအားပေးဆောင်ရွက်ဖို့လည်း အမေရိကန် ဝါရင့်သံတမန်က တိုက်တွန်းပါတယ်။  

မြန်မာစစ်တပ်ရဲ့အကြမ်းဖက်နှိပ်နင်းမှုတွေကြောင့် လူထောင်ပေါင်းများစွာဟာ အိုးအိမ်စွန့်ခွာ ထွက်ပြေးနေရပြီး လူပေါင်း ၂ ဒသမ ၈ သန်းလောက်ဟာ အစာရေစာပြတ်လပ်မှုနဲ့ ရင်ဆိုင်နေရနိုင်တယ်လို့ ပြောပါတယ်။

ဒီအစည်းအဝေးမှာပါဝင်တက်ရောက်ခဲ့တဲ့  ကုလသမဂ္ဂဆိုင်ရာ မြန်မာ အမြဲတမ်းကိုယ်စားလှယ် သံအမတ်ကြီး ဦးကျော်မိုးထွန်းကလည်း မြန်မာနိုင်ငံကို ကိုဗစ်ကာကွယ်ဆေးတွေနဲ့ လူသားချင်းစာနာမှုအကူအညီတွေ ထိထိရောက်ရောက် ဖြန့်ဝေပေးနိုင်ရေး ကုလသမဂ္ဂအနေနဲ့  စောင့်ကြပ်လုပ်ဆောင်ပေးဖို့လည်း   တောင်းဆိုလိုက်ပါတယ်။ 

ဒီကိစ္စတွေလုပ်ဆောင်ဖို့  ကုလသမဂ္ဂက ဦးဆောင်တဲ့ စောင့်ကြည့်ရေးအဖွဲ့တစ်ခုကို အရေးပေါ်ဖွဲ့စည်းပေးဖို့လည်း မြန်မာသံအမတ်ကြီးက တိုက်တွန်းအကြံပြုခဲ့ပါတယ်။

ဒီအစည်းအဝေးကို အမျိုးသားညီညွတ်ရေးအစိုးရ (NUG) အမျိုးသမီးရေးရာဝန်ကြီး ဒေါ်ဆူဇန်နာလှလှစိုးနဲ့ ကချင်တိုင်းရင်းသား ဂွမ်ဆန်းအန်စန်းတို့လည်း အွန်လိုင်းကနေ ပါဝင်ဆွေးနွေးခဲ့ကြပါတယ်။

ပါဝင်ဆွေးနွေးရာမှာ စစ်အာဏာသိမ်းတာကို ဆန့်ကျင်ဆန္ဒပြတဲ့ပြည်သူတွေ အပေါ် စစ်တပ်ရဲ့  လူ့အခွင့်အရေး ချိုးဖောက်မှုတွေနဲ့ စစ်အုပ်စုဟာ  နိုင်ငံမှာ ကိုဗစ်-၁၉ ရောဂါကို  ထိန်းချုပ်ဖို့ မနိုင်မနင်းဖြစ်နေတဲ့ အခြေအနေတွေကို ပြောဆိုခဲ့ကြပါတယ်။

မြန်မာနိုင်ငံရဲ့ တရားဥပဒေစိုးမိုးမှုအခြေအနေ၊ အာဆီယံသဘောတူညီချက် ၅ ချက် အကောင်အထည်ဖော်ဖို့ကိစ္စ၊ ကိုဗစ်-၁၉  ကူးစက်ပျံ့နှံ့မှုအခြေအနေ၊ လူသားချင်းစာနာမှု အကူအညီပေးရေးကိစ္စ စတာတွေနဲ့ ပတ်သက်ပြီး ဆွေးနွေးပွဲကို ကျင်းပတာပါ။

ကုလသမဂ္ဂ လုံခြုံရေးကောင်စီ၀င်တွေဟာ မြန်မာပြည်အကျပ်အတည်းကို ဘယ်လို ကိုင်တွယ်ဖြေရှင်းမယ်ဆိုတာနဲ့ ကိုဗစ် ကာကွယ်ဆေးတွေ အားလုံးရရှိအောင် ပြုလုပ်တာ အပါအ၀င် စစ်တပ်ကနေ နှုတ်ပိတ်ဖို့ကြိုးစားတဲ့အသံတွေကို တိုက်ရိုက်နားဆင်ကြားနာသွားမှာ ဖြစ်တယ်လို့ ဗြိတိန်သံအမတ်ကြီး ဘာဘရာဝုဒ်ဝပ်ဒ်က  ဆွေးနွေးပွဲမတိုင်ခင်ကလည်း တွစ်တာ ဗီဒီယိုကြေညာချက်မှာ ပြောထားပါတယ်။ 

မြန်မာကျန်းမာရေး၀န်ထမ်းတွေရဲ့ သူရဲကောင်းဆန်တဲ့ ကြိုးပမ်းမှုတွေ ရှိနေပေမယ့်လည်း ကျန်းမာရေးစောင့်ရှောက်မှုစနစ်က ပြိုလဲလုနီးဖြစ်နေပြီးတော့ စီးပွားရေး၊ အလုပ်အကိုင်၊ လုပ်ငန်းတွေ ကျရှုံးနေတယ်လို့လည်း ပြောပါတယ်။ 

မြန်မာနိုင်ငံဆိုင်ရာ ကုလသမဂ္ဂလူ့အခွင့်ရေး အထူးကိုယ်စားလှယ် တွမ်အန်ဒရူးစ်ကတော့ မြန်မာနိုင်ငံမှာ ကိုဗစ်-၁၉ ရောဂါ တစ်ဟုန်ထိုး တိုးပွားလာနေတဲ့အတွက် အရေးပေါ် ကိုဗစ်ရပ်စဲရေး လုပ်ဆောင်ဖို့ လုံခြုံရေးကောင်စီနဲ့ ကုလသမဂ္ဂ အဖွဲ့ဝင် ၁၉၃ နိုင်ငံကို ပြီးခဲ့တဲ့ ရက်ပိုင်းက တောင်းဆိုထားပါတယ်။

မြန်မာနိုင်ငံရဲ့ ကိုဗစ်-၁၉ ကူးစက်ရောဂါတိုက်ဖျက်ရေးမှာ အလွန်လိုအပ်နေတဲ့ ကျန်းမာရေးပညာရှင်တွေအပေါ် စစ်ကောင်စီက ပစ်မှတ်ထားတိုက်ခိုက်မှုတွေကို ရပ်တန့်ဖို့အတွက် ကုလသမဂ္ဂရဲ့ လုပ်ဆောင်နိုင်သမျှ အခွင့်အာဏာအားလုံးကို သုံးဖို့ အရေးတကြီး လိုအပ်နေပြီလို့ လည်း တွမ်အန်ဒရူစ်က အလေးအနက် ပြောကြားခဲ့ပါတယ်။ 

ကုလသမဂ္ဂရဲ့ အဆိုအရ စစ်ကောင်စီတပ်ဖွဲ့တွေဟာ ဆေးဘက်ဆိုင်ရာ၀န်ထမ်းတွေနဲ့ ဆေးကုပေးရာနေရာ အနည်းဆုံး ၂၆၀ လောက်ကို တိုက်ခိုက်ခဲ့ပြီး အနည်းဆုံးလူ ၁၈ ဦး သေဆုံး ခဲ့တယ်လို့ သိရပါတယ်။ 

ဆေးဘက်ဆိုင်ရာ  ပညာရှင် အယောက် ၆၀၀ ကျော်ဟာ လက်ရှိမှာ ဖမ်းဝရမ်းထုတ်ခံရလို့ ရှောင်တိမ်းနေရပြီး အနည်းဆုံး ၆၇ ယောက်ကို စစ်တပ်က ဖမ်းဆီးထားတယ်လို့ဆိုပါတယ်။ လက်ရှိ မြန်မာနိုင်ငံမှာ ကိုဗစ်ရောဂါဖြစ်ပွားမှု မြင့်တက်နေချိန်မှာ လူနာတွေအတွက်  အောက်ဆီဂျင်ထောက်ပံ့မှုမရှိတာကြောင့် လူအသေအပျောက်များပြီး အခြေအနေက ပိုမိုဆိုးရွားလာနေပါတယ်။  မြန်မာနိုင်ငံမှာ မနေ့က တရက်တည်း ကိုဗစ်-၁၉ ရောဂါကူးစက်ခံရသူပေါင်း ၅,၂၃၄ ဦးနဲ့ သေဆုံးသူ ၃၄၂ ဦး ထပ်တိုးလာလာကာ   စုစုပေါင်း ကူးစက်ခံရသူ ၂၈၉,၃၃၃ ဦးနဲ့ သေဆုံးသူ ပေါင်း ၈,၅၅၂ ရှိပြီလို့  စစ်ကောင်စီ ကျန်းမာရေးနဲ့ အားကစားဝန်ကြီးဌာနက ဇူလိုင် ၂၉ ရက်ညမှာ ထုတ်ပြန်ပါတယ်။

3 months Ago

May 15, 2021

လုံခြုံရေးကောင်စီက တရုတ်ရဲ့ နိုင်ငံရေးပြက်လုံးတခု

မေ ၃ ရက်နေ့ ကုလသမဂ္ဂမှာ ကျင်းပတဲ့ လုံခြုံရေးကောင်စီ တံခါးပိတ်အစည်းအဝေးမှာ တရုတ်ကိုယ်စားလှယ် ချင်းယွင်က “မြန်မာပြည်ကို စီးပွားရေးဒဏ်ခတ်ပိတ်ဆို့မှုတွေ မလုပ်ကြပါနဲ့ အကျိုးမရှိပါဘူး၊ အာစီယံအဖွဲ့ရဲ့ ကြိုးပမ်းမှုတွေကို လေးစားလိုက်နာ အသိအမှတ်ပြုသင့်ပါတယ်၊ လွဲမှားတဲ့ စွက်ဖက်မှုတွေ ပြုလုပ်ရင် မြန်မာပြည်မှာ ပြည်တွင်းစစ်ဖြစ်သွားနိုင်တယ်” လို့ သတိပေးစကား ပြောကြားသွားပါတယ်။

ဒီလို တရုတ်ကိုယ်စားလှယ်ကြီးက မြန်မာပြည်မှာ ပြည်တွင်းစစ်ဖြစ်မှာကို စိုးရိမ်သလိုလို ပြောလိုက်တာ အတော်ပြောင်‌မြောက်တဲ့ နိုင်ငံရေးပြက်လုံးတခုပါပဲ။ မြန်မာပြည်မှာ ပြည်တွင်းစစ် ဖြစ်နေခဲ့တာ နှစ်ပေါင်း ၇၀ ကျော်ခဲ့ပါပြီ။ ကမ္ဘာမှာ အရှည်ကြာဆုံးပြည်တွင်းစစ်လို့ ပညာရှင်များက အသိအမှတ်ပြုခဲ့ကြပါတယ်။ ဒီလို ပြည်တွင်းစစ် ရှည်ကြာရတာ ပထဝီစစ်ရေးအရ တရုတ်ပြည်လို ကျယ်ပြန့်လို့ မဟုတ်ပါဘူး။ ပြည်တွင်းစစ်ဟာ ရေရှည်စစ်ဖြစ်နေရတာ မြန်မာစစ်တပ်နဲ့ တရုတ်ရဲ့ ‘မီးစတဖက် ရေမှုတ်တဖက်’ မူဝါဒတွေကြောင့်ပဲ ဖြစ်ပါတယ်။

၁၉၅၅ ခုနှစ်က ဗမာပြည်ကွန်မြူနစ်ပါတီက ‘ငြိမ်းချမ်းရေးညွန့်ပေါင်းအစိုးရ’ ဖွဲ့ဖို့ မြန်မာအစိုးရကို ဆွေးနွေးဖို့ ကမ်းလှမ်းခဲ့ပါတယ်။ ဒါကလည်း တရုတ်ရဲ့ ‘ငြိမ်းချမ်းစွာ အတူယှဉ်တွဲ နေထိုင်ရေး မူကြီး (၅) ရပ်’ ချမှတ်ထားချိန်ဖြစ်လို့၊ ဗကပက ကမ်းလှမ်းခဲ့ရတာပါ။ ဒါပေမဲ့ ‘ဗကပကို အမြစ်ဖြုတ် အပြုတ်တိုက်ရေး’ ကိုင်စွဲထားတဲ့ ဗိုလ်နေဝင်း စစ်တပ်ရဲ့ ကန့်ကွက်မှုကြောင့် ဦးနုအစိုးရကလည်း ငြိမ်းချမ်းရေး မလုပ်ရဲခဲ့ပါဘူး။ ဗိုလ်နေဝင်းကတော့ ‘အောင်မာဃ စစ်ဆင်ရေးကြီး’ နဲ့ ဗကပကို တုံ့ပြန် အဖြေပေးခဲ့ပါတယ်။ ဒီတော့လည်း ငြိမ်းချမ်းရေးအစား စစ်အနိုင်တိုက်ရေး ဖြစ်လာခဲ့ကြပြန်ပါတယ်။

၁၉၆၇ ခုနှစ် တရုတ်ပြည်မှာ မော်စီတုန်း ဦးဆောင်ဆင်နွှဲတဲ့ ယဉ်ကျေးမှုတော်လှန်ရေး ဂယက်ရိုက်ခတ်မှုကြောင့် မြန်မာပြည်မှာ တရုတ်-ဗမာ လူမျိုးရေး အဓိကရုဏ်းတွေဖြစ်ပြီး၊ တရုတ်လူမျိုးတွေ သတ်ဖြတ်လုယက်ခံခဲ့ကြရပါတယ်။ တချိန်ထဲမှာ ပဲခူးရိုးမမှာလည်း အဲဒီယဉ်ကျေးမှုတော်လှန်ရေးရဲ့ အစွန်းရောက်မူဝါဒတွေ ကျင့်သုံးရင်း အချင်းချင်း ‘ဖြုတ်၊ ထုတ်၊ သတ်’ ပွဲတွေ အကြီးအကျယ် ဆင်နွှဲခဲ့ပါတယ်။ ဒီနောက်တော့ ဥက္ကဋ္ဌသခင်သန်းထွန်း လုပ်ကြံခံရပြီး၊ ပဲခူးရိုးမနဲ့ ပြည်တွင်းအခြေခံစခန်းတွေ ပြုတ်သွားခဲ့ပါတယ်။

တရုတ်ပြည်က ကျုံးနန်ဟိုင် အစိုးရခန်းမထဲမှာ သခင်သန်းထွန်း ကျဆုံးလို့ ငိုကြီးချက်မ ဖြစ်နေတဲ့ သခင်ဘသိန်းတင်ကို ဝန်ကြီးချုပ်ချူအင်လိုင်းကိုယ်တိုင်က ကျောသပ် ဖျောင်းဖျချခဲ့ရပါတယ်။

အကျိုးဆက်ကတော့ ဗိုလ်နေဝင်းစစ်တပ်ကို တုံ့ပြန်လက်စားချေ နှိပ်ကွပ်ဖို့ တရုတ်က ဗကပကို အရှေ့မြောက်စစ်ဒေသကြီး ဖွင့်လှစ်စေခဲ့ပါတယ်။ တရုတ်-မြန်မာနယ်စပ်ဒေသရှိ ရှမ်း၊ ကချင်၊ ကိုးကန့်၊ ‘ဝ’ လူမျိုးတွေကို တရုတ်စစ်လက်နက်တွေ ခြေဆုံး ခေါင်းဆုံး တပ်ဆင်ပေးပြီး၊ တရုတ်စစ်အကြံပေးတွေ ဦးဆောင်တိုက်စေခဲ့ပါတယ်။ အင်အားသောင်းချီရှိတဲ့ အမည်ခံ ဗကပတပ်နဲ့ နှစ်စဉ် တိုက်ပွဲရာချီ တိုက်ခဲ့လို့ ဗိုလ်နေဝင်းကိုယ်တိုင် တရုတ်ပြည် ပီကင်းသွားပြီး မေတ္တာရပ်ခံ ဝန်ချတောင်းပန်ခဲ့ရပါတယ်။

၁၉၈၀ ပြည့်နှစ် ခေါင်းဆောင်ကြီး တိန့်ရှောင်ဖင် တက်လာချိန်မှာတော့ တရုတ်ရဲ့မူဝါဒတွေ ပြောင်းလဲသွားခဲ့တယ်။ တရုတ်က တော်လှန်ရေးတင်ပို့မှု မလုပ်တော့ဘူး၊ ညီအစ်ကိုပါတီ မထားတော့ဘူး၊ အစိုးရချင်းပဲ ဆက်ဆံတော့မယ်လို့ ဆုံးဖြတ်လိုက်ပါတယ်။ ဒီမူဝါဒအရ နှစ်ပေါင်း နှစ်ဆယ် တည်တံ့ခဲ့တဲ့ အရှေ့‌မြောက်စစ်ဒေသကြီးကို ထောက်ပံ့မှုရပ်ဆိုင်းလိုက်ပြီး တရုတ်တွေ အားလုံးကို ပြန်ခေါ်သွားပါတော့တယ်။

တရုတ် လေမှုတ်သွင်းထားတဲ့ ဗကပတော်လှန်ရေး ပူဖောင်းကြီးလည်း ‘ရှူး’ဆို ပိန်လိန် ပြားချပ်သွားပါတော့တယ်။ ၁၉၈၉ ခုနှစ် သင်္ကြန်ကာလမှာတော့ ‘ဝ’၊ ရှမ်း၊ ကချင် စတဲ့ ဖိနှိပ်ခံလူမျိုးပေါင်းစုံရဲ့ ပုန်ကန်အုံကြွမှုကြောင့် ဗကပတွေ တရုတ်ပြည်ထဲ ထွက်ပြေး ခိုလှုံသွားကြပါတယ်။ တရုတ်ကလည်း ရှင်းပါတယ်။ ဗကပခေါင်းဆောင်တွေကို နိုင်ငံရေးမလုပ်ရ ဆိုတဲ့ ကန့်သတ်ချက်နဲ့ ရာသက်ပန် ခိုလှုံခွင့်ပေးထားလိုက်ပါတယ်။

တချိန်တည်းမှာ ငြိမ်းချမ်းရေးရယူပြီး စီးပွားရေးတည်ဆောက်ချင်ကြတဲ့ ‘ဝ'အဖွဲ့ (UWSA)၊ မိုင်းလား (NDAA)၊ ကိုးကန့် (MNDAA) နဲ့ ဇခုံတိန့်ယင်းရဲ့ (KDA) တို့ကို တရုတ်က လက်နက် ရောင်းချရင်း ဩဇာခံအင်အားစုများအဖြစ် စည်းရုံးသိမ်းသွင်းထားခဲ့ပါတယ်။ စစ်အစိုးရအပေါ် လုံးဝ ယုံကြည်စိတ်ချမှုမရှိတဲ့ ဒီအင်အားစုတွေကလည်း တရုတ်အပေါ် နိုင်ငံရေး၊ စစ်ရေး၊ စီးပွားရေးအရ မှီခိုရပ်တည်နေကြပါတယ်။

ပင်လုံငြိမ်းချမ်းရေးညီလာခံမှန်သမျှ တရုတ်ကိုယ်စားလှယ် ဆွန်ကော့ရှန်ကိုယ်တိုင် ခေါင်းဆောင် တက်ရောက်ခဲ့ကြပါတယ်။ ဒါကြောင့်လည်း ဒီအဖွဲ့တွေဟာ စစ်ကောင်စီ အာဏာသိမ်းပြီးနောက်ပိုင်းမှာ တရုတ်ရဲ့မူဝါဒအတိုင်း ကြားနေ ရပ်တည်ပြနေကြတာပါ။ တရုတ်က စစ်ခရာသံ တချက်ပေးလိုက်တာနဲ့ အပြေးတက် တိုက်ကြမယ့် အဖွဲ့တွေပါ။

ချုပ်ပြောရရင် မြန်မာပြည်ရဲ့ ပြည်တွင်းစစ်ပြဿနာဆိုတာ တရုတ်ရဲ့ လက်ခုပ်ထဲက ရေပါ။ သွန်လိုသွန် မှောက်လိုမှောက်လို့ ရပါတယ်။ မြန်မာပြည်ရဲ့ ပြည်တွင်းစစ်နဲ့ ငြိမ်းချမ်းရေးဆိုတာ စင်စစ်အားဖြင့် တရုတ်က လိုသလို ရေလဲသုံးနိုင်တဲ့ ‘မီးစတဖက် ရေမှုတ်တဖက်’ သာ ဖြစ်ပါတယ်။

မင်းရဲကျော်စွာ

5 months Ago
More News
Up