မြန်မာနိုင်ငံမှာ ဆန္ဒပြပွဲတွေနဲ့  စစ်တပ်တို့ ထိပ်တိုက်တွေ့ရင် အကြမ်းဖက်မယ့် အလားအလာအတွက် အင်မတန် စိုးရိမ်ထိတ်လန့်မိတယ်လို့  မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေးဆိုင်ရာအထူးသံတမန် တွန်မ်အန်ဒရူးစ်က ပြောပါတယ်။

“ဖေဖော်ဝါရီ ၁ ရက်မှာ စစ်တပ်က တိုင်းပြည်အာဏာကို တရားမဝင် သိမ်းပိုက်ပြီးတည်းက မြင်ဖူးသမျှ ထက်ပိုကြီးတဲ့ ပမာဏနဲ့ မြန်မာနိုင်ငံထဲမှာ အကြမ်းဖက်မယ့် အလားအလာ ရှိနေလို့ ကျနော့်အနေနဲ့ ကြောက်ရွံ့ မိတယ်”လို့  အန်ဒရူးစ်က ပြောပါတယ်။

တခြားဒေသတွေကနေ ရန်ကုန်ကို စစ်သားတွေပို့ဆောင်တဲ့ အစီရင်ခံစာတွေ သူရထားတယ်လို့လည်း  အန်ဒရူးစ်က ပြောပါတယ်။

အရင်ကခုလို တပ်တွေရွှေ့ရင် သတ်ဖြတ် တာတွေ လူပျောက်တာတွေ ဖမ်းဆီးထိန်းသိမ်းတာတွေ အရေအတွက်အများကြီး ဖြစ်လေ့ရှိတယ်၊ မြန်မာပြည်သူတွေအပေါ် စစ်တပ်က ပိုကြီးတဲ့ ရာဇဝတ်မှုတွေ ကျူးလွန်မယ့် ချောက်ကမ်းပါးပေါ်မှာ ကျနော်တို့ ရှိနေနိုင်တယ်လို့လည်း သူက ပြောပါတယ်။

ဖေဖော်ဝါရီ ၁၇ ရက်အတွက် စီစဉ်ထားတဲ့  မြန်မာလူထုရဲ့ ဆန္ဒပြချီတက်ပွဲတွေကို အဖမ်းအဆီး အကြမ်းဖက်မှု မလုပ်ဘဲ ခွင့်ပြုရေး သိမ်းသွင်းစည်းရုံးဖို့ မြန်မာစစ်အာဏာပိုင်တွေအပေါ် သြဇာလွှမ်းမိုးမှုရှိတဲ့ အစိုးရတွေနဲ့ လူတယောက်ချင်းစီနဲ့ အဖွဲ့အစည်းတွေ အားလုံးကိုလည်း အန်ဒရူးက အရေးပေါ် ဆော်သြချက် ထုတ်ပြန်ခဲ့ပါတယ်။

မြန်မာပြည်သူတွေရဲ့ အခြေခံလွတ်လပ်ခွင့်နဲ့ လူ့အခွင့်အရေးအပေါ် စဉ်ဆက်မပြတ် ဖိနှိပ်နေတာတွေ ချက်ချင်း အဆုံးသတ်ရမယ် လို့လည်း သူက ဖိအားပေး ပြောဆိုခဲ့ပါတယ်။

မြန်မာပြည်သူတွေအပေါ် ကျူးလွန်တဲ့ ဘယ်လို ရက်စက် ကြမ်းကြုတ်မှုကို မဆို ရာထူးအဆင့်နဲ့ မဆိုင်ဘဲ အမိန့်ပေးသူ အစဉ်လိုက်ဟာ တာဝန်ခံရမယ် သူတို့ဟာ တိုက်ခိုက်ဖို့ အမိန့်ကို မနာခံဘဲ နေရမယ်လို့လည်း အန်ဒရူးစ်က ထပ်ပြီး အခိုင်အမာ ပြောပါတယ်။

မြန်မာစစ်တပ်ဟာ သွေးစွန်းတာကို ရှောင်ဖို့ ကျင့်ဝတ်နဲ့ တာဝန်သိစိတ် အပေါ်ကိုချည်း အားကိုးလို့ မရဘူး၊ ဒါကြောင့် တရားလက်လွတ် ဖမ်းဆီးတာတွေနဲ့ အကြမ်းဖက်တာတွေ နောက်ထပ် မလုပ်အောင် စစ်အစိုးရကို ထိန်းချုပ်ဖို့ အားလုံးရဲ့ သြဇာနဲ့ တောင်းဆိုရေးဟာ မရှိမဖြစ် အရေးပါတယ်လို့ အင်ဒရူးစ်က ရှင်းပြပါတယ်။

မြန်မာအာဏာသိမ်း စစ်တပ်အပေါ် နိုင်ငံတကာ စီးပွားရေး လူ့အဖွဲ့အစည်းကလည်း ချက်ချင်း အရေးယူ ဆောင်ရွက်ဖို့ အထူးသံတမန်က ဆော်သြပါတယ်။

မြန်မာနိုင်ငံကအဓိက မြို့ကြီးတွေမှာ စစ်တပ်ချထားတဲ့ စစ်ဗိုလ်ချုပ်ကြီးတွေကို အာခံတဲ့အနေနဲ့ အာဏာသိမ်းမှုဆန့်ကျင်ရေးလှုပ်ရှားမှုမှာပါဝင် ဆန္ဒပြသူတွေလည်း နိုင်ငံတဝန်းမှာ ကြီးထွားနေပါတယ်။ 

ဗိုလ်ချုပ်မှူးကြီးမင်းအောင်လှိုင် ခေါင်းဆောင်တဲ့ စစ်အစိုးရကတော့ ခြေလျင်တပ်ရင်းတွေက စစ်သည်တွေကို အရင်အပတ်က စေလွှတ်ထားလို့  ရန်ကုန်မြို့ထဲမှာ  လက်နက်ကိုင်စစ်သားတွေကိုရော တင့်ကားတွေကိုပါ တွေ့နေရပါတယ်။

မြန်မာစစ်တပ်ဟာ လူထုဆန္ဒပြပွဲတွေကို ရက်ရက်စက်စက် ချေမှုန်းလေ့ရှိတဲ့  သမိုင်းရှိပြီး တိုင်းရင်းသားလက်နက်ကိုင် အုပ်စုတွေနဲ့ အရပ်သားတွေအပေါ် အကြမ်းဖက် လှုပ်ရှားမှုတွေ လူ့အခွင့်အရေးချိုးဖောက်မှုတွေ ပြုခဲ့တယ်လို့လည်း စွပ်စွဲ ခံထားရတယ်လို့ CNN သတင်းဌာနက ရေးပါတယ်။

ခြေလျင်တပ်ရင်းက စစ်သည်တွေကို တောနက်နဲ့ တောင်တန်းတွေပေါ်က တိုင်းရင်းသား သူပုန်တွေကိုတိုက်ဖို့ သင်ကြားလေ့ကျင့် ပေးထားတာ ဖြစ်ပြီး မြို့ထဲလမ်းတွေပေါ်မှာ လက်နက်တွေနဲ့ တွေ့ရတာဟာ စိုးရိမ်ရတဲ့ အကြောင်းရင်းပဲလို့ အကဲခတ်တွေက ပြောပါတယ်။

စစ်တပ်ဟာ မြို့ထဲ လမ်းတွေ ပေါ်မှာ အင်မတန် မြန်မြန် တပ်ချနိုင်တဲ့ တပ်အမျိုးအစားတွေ ဖြစ်တယ်လို့ လူ့အခွင့်အရေး စောင့်ကြည့်လေ့လာရေးအဖွဲ့ အကြပ်အတည်းနဲ့ ပဋိပက္ခရေးရာ သုတေသီ ရစ်ချတ် ဝီယာက ပြောပါတယ်။

ရန်ကုန်မှာ စစ်သည် အင်အား ဘယ်လောက်ကြီးကြီး တပ်ချထားတယ် ဆိုတာကိုတော့ ရှင်းရှင်းလင်းလင်း မသိရသေးပါဘူး။  

စစ်အာဏာသိမ်းမှု ဆန့်ကျင်ရေး ဆန္ဒပြပွဲတွေနဲ့  အာဏာဖီဆန်ရေးလှုပ်ရှားမှု တွေဟာ ဆယ်စုနှစ်တွေအတွင်း အကြီးဆုံး ဖြစ်လာပြီး သိန်းချီတဲ့ လူတွေက အရပ်သားအစိုးရ ခေါင်းဆောင် ဒေါ်အောင်ဆန်းစုကြည်ကို ပြန်လွှတ်ပေးဖို့နဲ့ အာဏာကို အရပ်သား အစိုးရ ထိန်းချုပ်မှုအောက် ပြန်လွှဲပေးဖို့ တောင်းဆိုနေကြပါတယ်။ 

ကိုးကား- UN/CNN