ကုန်သွယ်ရေး

November 15, 2022

မြန်မာ-အိန္ဒိယ ကုန်သွယ်မှုတွင် ဒေါ်လာမသုံးဘဲ ကျပ်နှင့် ရူပီး သုံးစွဲရန် စစ်ကောင်စီဝန်ကြီး တိုက်တွန်း

မြန်မာ-အိန္ဒိယ နှစ်နိုင်ငံ အပြန်အလှန်ကုန်သွယ်မှုတွင် အမေရိကန်ဒေါ်လာ မသုံးဘဲ ကျပ်နဲ့ ရူပီး သုံးစွဲဖို့ စစ်ကောင်စီခန့် စီးပွားကူးသန်းဝန်ကြီးက အိန္ဒိယကုန်သည်များနဲ့ တွေ့ဆုံပွဲမှာ ပြောဆိုခဲ့ပါတယ်။

နိုဝင်ဘာ ၁၃ ရက်က အိန္ဒိယနိုင်ငံ ကို့လ်ကတ္တားမြို့မှာ ပြုလုပ်ခဲ့တဲ့ အိန္ဒိယကုန်သည်ကြီးများအသင်း နှစ်ပတ်လည်အစည်းအဝေးမှာ စစ်ကောင်စီလက်အောက်ခံ စီးပွားကူးသန်းဌာန ပြည်ထောင်စုဝန်ကြီး ဦးအောင်နိုင်ဦးက ကျပ် နဲ့ ရူပီး ကို နှစ်နိုင်ငံကုန်သွယ်မှုမှာ သုံးစွဲနိုင်ဖို့အတွက် နှစ်ဖက် ကုန်သည်တွေ Asian Clearing Union (ACU) ငွေပေးချေမှုယန္တရားကို အသုံးပြုကြဖို့ တိုက်တွန်း ပြောဆိုခဲ့တာပါ။

မြန်မာ-အိန္ဒိယ နှစ်နိုင်ငံအကြား ကုန်ပေးချေမှုမှာ အမေရိကန်ဒေါ်လာ မသုံးဘဲ ကျပ်နဲ့ ရူပီး ပြောင်းသုံးဖို့ စစ်ကောင်စီရဲ့ လုပ်ဆောင်ချက်ဟာ အောင်မြင်မှာ မဟုတ်ဘူးလို့ မြန်မာပို့ကုန်လုပ်ငန်းရှင်တွေက တုံ့ပြန်လိုက်ပါတယ်။

ပို့ကုန်၊သွင်းကုန် လုပ်ငန်းရှင်ကြီးတဦးက “ရူပီးနဲ့လုပ်ဖို့ဆိုတာ ဘယ်လိုမျှ အောင်မြင်မယ် မထင်ဘူး။ ဘာလို့လဲဆို ရူပီးက တဒေါ်လာကို ၈၀ ဝန်းကျင်မှာ ရှိတယ်ပဲ ထားပါဦး။ ဒါပေမဲ့ ဘဏ်တွေမှာ ဝယ်ဈေး ရောင်းဈေးဆိုတာ ရှိတယ်လေ။ သူတို့က ဒသမလောက်ပဲ ဖြတ်ယူတာ ဆိုပေမဲ့ ကျနော်တို့က ပမာဏများတယ်ဗျ။ ဥပမာ-သင်္ဘော တစီးကို ကွန်တိန်နာ အလုံး ၅၀ လောက် တင်တာလေ။ ကွန်တိန်နာ တလုံးမှာ တန်ချိန်က ၂၅ တန်ပါတယ်။ ပြောချင်တာက bank charges တွေက နည်းနည်းလေးပဲ ခြားနားချက်ရှိတယ်ဆိုပေမယ့် amount ကများတော့ ကုန်သည်တွေအတွက် မကိုက်ဘူး။ ဒေါ်လာနဲ့ အရောင်းအဝယ်လုပ်တာက အများကြီး တွက်စရာ မလိုဘူး။ ဒါပေမဲ့ ရူပီးနဲ့ဆိုရင် ဈေးက အမြဲတမ်းပြောင်းနေတာ။ ခဏနေ ၅၀ လောက် တက်သွားလိုက်၊ ပြီးတော့ ၂၀ ပြန်ကျသွားလိုက်နဲ့။ အဲ့လိုမျိုးဆိုတော့ ဘယ်လိုမှ အဆင်မပြေဘူး” လို့ ဒီဗွီဘီကို ပြောပါတယ်။

နှစ်နိုင်ငံအကြား ငွေပေးချေမှုနဲ့ပတ်သက်ပြီး မြန်မာနိုင်ငံ ပဲမျိုးစုံ၊ ပြောင်းနှင့် နှမ်းကုန်သည်များအသင်းက အခုအချိန်အထိ ညွှန်ကြားချက် တစုံတရာ ထုတ်ပြန်လာတာ မရှိသေးတဲ့အကြောင်း အသင်းဝင် ပဲအိတ်စပို့စ်လုပ်ငန်းရှင်တဦးက မှတ်ချက်ပေးပါတယ်။

“ပေါ်လစီက မချသေးတော့ ကျနော်တို့လည်း သိပ်မသိသေးဘူးခင်ဗျ။ အရောင်းအဝယ်စကား စပြောကတည်းက ကိုယ်ကြိုက်ရာနဲ့ပဲ ပြောရမယ်ထင်တယ်။ တရုတ်ကုန်သည်တွေနဲ့ oversea မှာ အရောင်းအဝယ်လုပ်တဲ့အခါ တချို့လည်း ယွမ်နဲ့ ရတယ်၊ ဒေါ်လာနဲ့ ရတယ်၊ ဒီလိုပဲ ပြောနေကြတာပဲလေ။ ကျနော်တို့ကတော့ ဒေါ်လာနဲ့ပဲ လုပ်မယ်။ မရတဲ့အဆုံးတော့ တခြား စီစဉ်ရမှာပေါ့။ နောက်ဆုံး ဘာဖြစ်လာမလဲဆိုရင် ဒေါ်လာနဲ့ အရောင်းအဝယ်လုပ်လို့မရဘူးဆိုရင် အဲ့အချိန်မှာ ဈေးကွက်တခုက ပေါ်လာမှာပဲ။ ဘာလို့လဲဆို ဘယ်သူမဆို အရောင်းအဝယ်က ရပ်ထားလို့ မရဘူးလေ။ ဖြစ်တဲ့နည်းလမ်းနဲ့ လုပ်နေကြရတာ။ ဒါပေမဲ့ အဲ့လောက်ထိ ဖြစ်လာမယ်လို့လဲ ကျနော်တို့တော့ မမြင်ပါဘူး” လို့ ဒီဗွီဘီကို ပြောပါတယ်။

ဒီကနေ့ နိုဝင်ဘာ ၁၅ ရက် ပြည်တွင်းအိတ်စပို့စ်ပဲဈေးကွက်မှာ အိန္ဒိယနိုင်ငံဆီ အဓိကတင်ပို့နေပြီး အရောင်းအဝယ် ဖြစ်နေတဲ့ ဈေးနှုန်းက မတ်ပဲ(FAQ) ၁ တန်ကို အမေရိကန်ဒေါ်လာ ၇၆၀ ရှိပြီး အရည်အသွေးမြင့် မတ်ပဲ(SQ) ၁ တန်က အမေရိကန်ဒေါ်လာ ၉၀၀ ရှိပါတယ်။

အလားတူ ပဲစင်းငုံက ၁ တန်ကို အမေရိကန်ဒေါ်လာ ၈၀၅ ဒေါ်လာရှိပါတယ်။ အဆိုပါဈေးနှုန်းတွေဟာ ရန်ကုန်ဆိပ်ကမ်း သင်္ဘောပေါ်အရောက် (FOB) ဈေးနှုန်းဖြစ်ပါတယ်။ 

စီးပွားကူးသန်းဝန်ကြီးဌာနက ထုတ်ပြန်ထားတဲ့ အချက်အလက်တွေအရ မြန်မာနိုင်ငံမှ ပြည်ပသို့ ပဲမျိုးစုံတင်ပို့မှုဟာ ပြီးခဲ့တဲ့ ၂၀၂၀-၂၁ ဘဏ္ဍာနှစ်မှာ ပင်လယ်ရေကြောင်းကတဆင့် တန်ချိန် ၁ ဒသမ ၂၄ သန်း တင်ပို့မှုက အမေရိကန်ဒေါ်လာ ၉၆၆ သန်း ကျော် ရရှိခဲ့ပြီး နယ်စပ်လမ်းကြောင်းကတဆင့် တန်ချိန် ၇ ဒသမ ၈၆ သိန်း တင်ပို့မှုက အမေရိကန်ဒေါ်လာ ၆၀၄ သန်းကျော် ရရှိခဲ့တဲ့အတွက် စုစုပေါင်းနိုင်ငံခြားဝင်ငွေ အမေရိကန်ဒေါ်လာ ၁၅၇၀ သန်း ရရှိခဲ့ပါတယ်။

အခု ၂၀၂၂-၂၃ ဘဏ္ဍာနှစ် (ဧပြီလ မှ နိုဝင်ဘာ ၄ ရက်အထိ) ပင်လယ်ရေကြောင်းကတဆင့် တန်ချိန် ၇ ဒသမ ၈ သိန်း တင်ပို့မှုက အမေရိကန်ဒေါ်လာ ၆၃၅ သန်း ကျော်ရရှိထားပြီး နယ်စပ်လမ်းကြောင်းကတဆင့် တန်ချိန် ၁ ဒသမ ၄ သိန်း တင်ပို့မှုက အမေရိကန်ဒေါ်လာ သန်း ၁၀၀ ကျော် ရရှိထားတဲ့အတွက် စုစုပေါင်းနိုင်ငံခြားဝင်ငွေ အမေရိကန်ဒေါ်လာ ၇၃၆ သန်း ရရှိထားပါတယ်။

Photo- Commerce

2 weeks Ago

October 30, 2022

အိန္ဒိယနှင့် လွတ်လပ်စွာ ကုန်သွယ်ရေးသဘောတူညီချက်ရရန် ဗြိတိန်ကြိုးစား

ဗြိတိန်နိုင်ငံဟာ အိန္ဒိယနဲ့ လွတ်လပ်စွာ ကုန်သွယ်ရေး သဘောတူညီချက်ရဖို့ ဦးစားပေး လုပ်ဆောင်နေတယ်လို့ ဗြိတိန်နိုင်ငံခြားရေးဝန်ကြီး ဂျိမ်းစ်ကလဲဗားလီးက အောက်တိုဘာ ၂၉ ရက်မှာ ပြောပါတယ်။ 

ဒါပေမဲ့ ဒီလအတွင်း နောက်ဆုံး သတ်မှတ်ရက် ကျော်သွားပြီးတဲ့နောက် ထပ်ပြီး အသစ် သတ်မှတ်မယ့် နောက်ဆုံးရက်ကို ပြောဖို့ကို ငြင်းခဲ့ပါတယ်။

နှစ်နိုင်ငံကြား ဆက်ဆံရေးဟာ အခုသီတင်းပတ်အတွင်း ဗြိတိန်ရဲ့ ပထမဆုံး အိန္ဒိယနွယ်ဖွား ဝန်ကြီးချုပ်ဖြစ်လာသူ ရီရှီဆူနတ်ခ်ရဲ့ လက်ထက်မှာ ပိုတိုးတက်ကောင်းမွန်လာမယ်လို့လည်း  အိန္ဒိယမြို့တော် နယူးဒေလီမှာ အိန္ဒိယနိုင်ငံခြားရေးဝန်ကြီး အက်စ် ဂျိုင်ရှန်ကာနဲ့ တွေ့ဆုံမှုအပြီး ဂျိမ်းစ်က ရိုက်တာ သတင်းဌာနကို ပြောပါတယ်။

ကုန်သွယ်ရေး သဘောတူညီချက်ကို ဒီနှစ်မှာ အပြီးသတ်နိုင်မလားဆိုတာကိုလည်း ဂျိမ်းစ်က မပြောခဲ့ပါဘူး။ အခုအချိန်မှာ ဒေါ်လာ ၃၁ ဘီလီယံကျော်ရှိနေတဲ့ အပြန်အလှန် ကုန်သွယ်မှု တန်ဖိုးကို ၂၀၃၀ ခုနှစ်မှာ နှစ်ဆ တိုးချင် နေကြတာပါ။

ကမ္ဘာ့ စီးပွားရေးအင်အားကြီး ခုနှစ်နိုင်ငံအဖွဲ့ G7 ရဲ့ ရုရှားရေနံ ဈေးနှုန်းကို ကန့်သတ်မယ့် အစီအစဉ်နဲ့ အိန္ဒိယလို နိုင်ငံတွေကပါ ဗြိတိန်ရဲ့ မူဝါဒကို သဘောတူဖို့ ကမ်းလှမ်းမလား ဆိုတာနဲ့ ပတ်သက်ပြီး မေးမြန်းရာမှာ ဗြိတိန်ဟာ အိန္ဒိယအစိုးရရဲ့ နိုင်ငံခြားရေးမူဝါဒကို ချမှတ်မှာ မဟုတ်ဘူးလို့ ဂျိမ်းစ်က ပြောပါတယ်။

အိန္ဒိယနှင့် ရုရှားတို့ဟာ ကာကွယ်ရေးဆိုင်ရာ နီးကပ်တဲ့ ဆက်ဆံရေးရှိပြီး အိန္ဒိယဟာ ယူကရိန်းစစ်ပွဲ စတင်ကတည်းက ရုရှားရေနံကို အဓိက ဝယ်ယူသူ ဖြစ်လာ ခဲ့ပါတယ်။ 

1 month Ago
More News
Up