ကိုလေအိုး

April 3, 2021

ဘယ်သူလုံခြုံသလဲ

မြန်မာပြည်မှာ လတ်တလောအခြေအနေအရ ဘယ်သူလုံခြုံလဲမေးရင် ဘယ်သူမှ မလုံခြုံဘူးလို့ ပြောရမယ်။ ရန်ကုန်မြို့လယ်မှာတိုက်ခန်းနဲ့နေတဲ့သူမလုံခြုံသလို ဟိုးတောတောင်ထဲနေတဲ့ တိုင်းရင်းသားတွေလည်း ထွက်ပြေးနေရတယ်။

ရန်ကုန်ကစပြောပြရရင် တညသား ည ၈ နာရီသံပုံးတီးနေချိန် လမ်းထိပ်ကမီးလောင်နေတာမြင်လို့ ဝရန်တာက ထွက်ကြည့်တာ ရဲက လေးခွနဲ့လှမ်းပစ်တာခံလိုက်ရတယ်။

ကုန်းကြည့်မိလိုက်လို့ တိုက်ခန်းနေကာကိုထိပြီး ခဲအစပဲ လာစင်တယ်။ အဲ့ဒါမြို့လယ်ခေါင်မှာပါ။ ဒီအကြောင်းကြားသွားတဲ့ ကျောက်မြောင်းနေမိတ်ဆွေက ဒါ တော်သေးတာတဲ့။

သူတို့ကျောက်မြောင်းမှာဆို နေ့လယ်ဘက်မှာတောင် ဝရန်တာထွက် မရပ်ရဲဘူး။ ရဲက ဘာထွက်ကြည့်တာလဲဆိုပြီး လေးခွနဲ့လှမ်းလှမ်းပစ်ပါသတဲ့။

ဒဂုံဆိပ်ကမ်းမြို့နယ်ထဲပါတဲ့ ယုဇနအိမ်ရာအဟောင်းနေ မိတ်ဆွေမိသားစုကတော့ ရဲတွေ အုပ်လိုက်ကြီးလမ်းထဲဝင်ဝင်လာပြီး ရမ်းသန်းပစ်ခတ်နေလို့ ကြောက်ပြီး ရွာပြန်ပြေးတယ်။

ဒဂုံတောင်နေမိတ်ဆွေတယောက်က သူ့အိမ်အောက်မှာ သဲအိတ်တွေနဲ့ ဗုံးခိုကျင်းလုပ်ထားရတယ်။ ရဲကားသံကြားရင် အိမ်တွင်းမှာဖောက်ထားတဲ့အပေါက်ကနေ ဗုံးခိုကျင်းထဲဆင်းပြေးရတယ်။

ကြာတော့ ခြောက်ခြားလာပြီး ရွာပြန်ပြေးရတော့တာပါ။

အဲ့ဒီဒဂုံတောင် ၁၀၄ ရပ်ကွက်မှာပဲ ဧပြီ ၁ ရက်က အိမ်ထဲနေတဲ့ ဗိုက်ကြီးသည်ကို လမ်းပေါ်က လှမ်းပစ်သွားတာ နောက်တနေ့ကျ သေပါရောလား။

မြင်းခြံမှာလည်း သူ့ဘာသာအိမ်ဝရပ်နေတဲ့ ၁၃ နှစ်ကလေးကို ရဲက သေနတ်နဲ့လှမ်းပစ်လို့ သေခဲ့တယ်။ ရန်ကုန် သမိုင်းဘူတာထဲ သူ့ဘာသာပြေးလွှားဆော့နေတဲ့ ၁ နှစ်သားလေးလည်း မျက်စိကျည်မှန်ခဲ့တယ်။

SaveThe Children အဖွဲ့ရဲ့ထုတ်ပြန်ချက်အရ စစ်တပ်အာဏာသိမ်းရက်စွဲ ၂ လပြည့်ချိန်မှာ ကလေး ၄၃ ဦးထက်မနည်းသေဆုံးခဲ့တယ်လို့ဆိုတယ်။ သေဆုံးရတဲ့ထဲ အသက် ၇ နှစ်အရွယ် ကလေးငယ်ပါတယ်။

အခုပဲမကွေးတိုင်းဘက်မှာ စစ်တပ်နဲ့ရဲက အကြမ်းဖက်နှိမ်နင်းတာ မခံနိုင်တော့လို့ လူ တသောင်းကျာ် တောထဲထွက်ပြေးနေကြရတယ်။ ဂန့်ဂေါမြို့နယ်ထဲက ရွာတွေက အကြမ်းဖက်စစ်တပ်ကို ပြန်ခုခံလို့ဆိုပြီး ရွာထဲဝင်လုယက်ဖျက်ဆီးတာတွေနေ့စဉ်လာလာလုပ်နေလို့ ရွာမှာမနေရဲတော့ဘဲ တောထဲထွက်ပြေးခိုလှုံနေကြရတယ်လို့ Myanmar Now သတင်းမှာဖတ်လိုက်ရတယ်။

လမ်းပေါ်သွားလာနေသူတွေကိုလည်း မထင်ရင်မထင်သလိုပစ်တယ်။ ထားဝယ်က စီစီတီဗီတခုမှာ ဆိုင်ကယ်စီးလာတဲ့ လူငယ်လေးသုံးယောက်ကို စစ်ကားက ရပ်ပြီးသေနတ်နဲ့လှမ်းပစ်တယ်။

အလယ်က လူငယ်လေးတယောက်သေနတ်မှန်ပြုတ်ကျပြီး ကျန်တဲ့နှစ်ယောက်က ထွက်ပြေးသွားတယ်။ နှစ်ရက်လောက်ရှိ ဆိုင်ကယ်ပေါ်ကလူငယ်သေတော့ ဆိုင်ကယ်ပေါ်က ပြုတ်ကျဒဏ်ရာနဲ့သေဆိုပြီး ဆေးစာထုတ်တယ်။

ယုတ်မာရက်စက်မှုတွေက ကမ်းကုန်နေပြီ။

ကရင်ပြည်နယ်ဘက်မှာလည်း လေယာဉ်ပျံနဲ့ ဗုံးသွားကြဲတာ လူ ၆ ယောက်သေတယ်။ ရွာသားတသောင်းကျော် တောထဲထွက်ပြေးနေရတယ်။

စစ်တပ်ကလုပ်တဲ့အခမ်းနား သွားတက်ခဲ့ကြတဲ့ အိမ်နီးချင်းဆိုးတွေဖြစ်တဲ့ ထိုင်းနဲ့ အိန္ဒိယက  မြန်မာပြည်က ထွက်ပြေးသွားသူတွေကို နှင်ထုတ်လိုက် ပြန်လက်ခံလိုက်နဲ့ ရှုပ်ချည်နှပ်ချည်လုပ်တယ်။

တောရောမြို့ပါမကျန် မဲမဲမြင်ရမ်းသန်းပစ်ခတ်ပြီး ခိုးဆိုးလုနိုက်နေတဲ့ အကြမ်းဖက်စစ်အုပ်စု လက်အောက်မှာ ဘယ်သူမှ မလုံခြုံပါဘူး။

အကြမ်းဖက်စစ်တပ်ဟာ လူ့အသက်တွေကို တန်ဖိုးမထားဘဲ ပစ်ချင်သလို ပစ်ခတ်သတ်ဖြတ်နေတာပါ။ နေ့မြင်ညပျောက် အသက်တွေလည်း တိုးတိုးလာနေတယ်။

စဉ်းစားကြည့်ပါ။

လူ့အသက်ကို ဖက်ရွက်လောက်တောင် တန်ဖိုးမထားဘဲ ထင်သလို ပစ်ခတ်သတ်ဖြတ်နေသူတွေရဲ့ အုပ်ချုပ်တာကို လက်ခံလိုက်ရင် ဘာတွေဆက်ဖြစ်လာနိုင်မလဲ။

ခုခံဆန့်ကျင်ကြပါ။ အခု ပြည်သူလုထု နည်းအမျိုးမျိုသုံးပြီး စစ်အာဏာရှင်စနစ်ကို ဆန့်ကျင်ကြောင်းပြသနေသလို ဆက်ပြီးဆန့်ကျင်ကြပါ။ CRPH ကဖွဲ့ဖို့ရှိတဲ့ ဖက်ဒရယ်အာမီမှာ ပါဝင်နိုင်ဖို့လည်း အသင့်ပြင်ထားကြပါ။

သေချာတာက မြန်မာလူထုဟာ အကြမ်းဖက်စစ်တပ်အုပ်ချုပ်မှုအောက်ကို လုံးဝ ကျရောက်လို့ မရပါ။ ဒီတွက် အားလုံး တောင့်ထားပါ။

အရေးတော်ပုံ အောင်ရမည်။

PHOTO-CREDIT

ကိုလေအိုး

8 months Ago

March 31, 2021

မြောက်ပိုင်းသုံးဖွဲ့ကြေညာချက်နှင့် ပြည်သူ့အောင်ပွဲ (ဆောင်းပါး)

တပ်မတော်အနေနဲ့ ငြိမ်းချမ်းစွာဆန္ဒပြတဲ့ ပြည်သူတွေကို အကြမ်းဖက်ပစ်ခတ်သတ်ဖြတ်နေတာတွေ ဆက်လုပ်နေမယ်ဆိုရင် နွေဦးတော်လှန်ရေးဆင်နွှဲနေကြတဲ့ တိုင်ရင်းသားလူမျိုးပေါင်းစုံ ညီနောင်တွေနဲ့အတူ ခုခံကာကွယ်ရေးအတွက် ပူးပေါင်းဆောင်ရွက်သွားမယ်လို့ ညီနောင်မဟာမိတ် ၃ ဖွဲ့က ထုတ်ပြန် ကြေညာလိုက်ပါတယ်။

ဒီဗွီဘီ သတင်းဝက်ဘ်ဆိုက်မှာ မတ်လ ၃၀ ရက်က တက်လာတဲ့သတင်းဖြစ်ပြီး မြောက်ပိုင်း သုံးဖွဲ့ကြေညာချက်က စိတ်ဝင်စားဖို့ကောင်းတယ်။

ဒီမတိုင်ခင် မတ်လအစောပိုင်းမှာလည်း အေအေ ရက္ခိုင့်တပ်တော်နဲ့ ရခိုင်အရပ်ဘက်အဖွဲ့အစည်းတွေက အလားတူကြေညာချက်မျိုးထုတ်ခဲ့တယ်။

အခု စစ်အာဏာရှင်ဆန့်ကျင်ရေးဆန္ဒပြပွဲတွေမှာ လက်ရှောင်နေတဲ့  ရခိုင်ဒေသဟာ ဒီအချိန်ကျမှ သဘောထားတွေထုတ်ပြန်လာတာဟာ ဘယ်လိုမကြောင်းရင်းခံက ထွက်ပေါ်ခဲ့တာလဲဆိုတာ သုံးသပ်ကြည့်ပါမယ်။

ဒီနေရာမှာ အေအေ ရက္ခိုင့်တပ်တော် ရုတ်ခြည်း အင်အားကောင်းလာတာက စပြီးကြည့်ကြည့်ပါမယ်။ ၂၀၁၁ ခုနှစ်နှောင်းပိုင်းမှာ ဒီတုန်းက သမ္မတဦးသိန်းစိန်ဟာ သူတဦးတည်းသဘောနဲ့ မြစ်ဆုံစီမံကိန်းကို ရပ်ဆိုင်းခဲ့ပါတယ်။

ဦးသိန်းစိန်ကတော့ မြန်မာပြည်သူတွေထောက်ခံမှုရအောင် စီမံကိန်းကို ရပ်ခဲ့တာဖြစ်ပေမယ့် နောက်ဆက်တွဲထွက်ပေါ်လာတဲ့ အကျိုးဆက်က မကောင်းခဲ့ပါဘူး။

မြစ်ဆုံစီမံကိန်းရပ်ခဲ့တုန်းက တရုတ်အစိုးရသတင်းတွေမှာ ပြင်းထန်တဲ့ သဘောထားတွေထွက်ပေါ်ခဲ့ပြီး နောင်မှာပြည်ပမှာရင်းနှီးမြှပ်နုံရင် အသေအချာစိစစ်လုပ်ကိုင်ဖို့ သတိပေးတဲ့ထိရေးခဲ့ကြတယ်။

များမကြာခင်မှာပဲ အေအေ ရခိုင့်တပ်ရုတ်ခြည်း အင်အားတောင့်တင်းခဲ့တယ်။ မြောက်ပိုင်းလက်နက်ကိုင်လေးဖွဲ့က ဆွေးနွေးပွဲတွေကို အကြောင်းအမျိုးမျိုးပြပြီး ရှောင်ဖယ်သွားခဲ့ကြတယ်။

ဒီနေရာမှာ လက်ရှိမြန်မာ့ဒီမိုကရေစီအရေးအပေါ် တရုတ်အစိုးရသဘောထားကို ဆန်းစစ်ကြည့်ရင် စစ်တပ်နဲ့ တိုက်ပွဲဝင်ဒီမိုကရေစီဘက်တော်သားများ ဘယ်ဘက်ကများ အသာစီးရသွားမလဲဆိုတာကို စောင့်ကြည့်နေတဲ့အနေအထားဖြစ်တယ်။

ဒေါ်အောင်ဆန်းစုကြည်အစိုးရလက်ထက်မှာ နှစ်နိုင်ငံအစိုးရအကြား သဘောတူညီမှုတွေရှိခဲ့ပေမယ့် ဘယ်စီမံကိန်းကိုမှ အကောင်အထည်ဖော်တာ မယ်မယ်ရရ မရှိခဲ့ဘူး။

သူ့နိုင်ငံအကျိုးစီးပွားကိုသာကြည့်တဲ့တရုတ်အစိုးရဟာ မြန်မာစစ်တပ်အာဏာရရင် သူ့နိုင်ငံကလုပ်ဖို့ရှိတဲ့ မြစ်ဆုံစီမံကိန်းလိုဟာမျိုး ပြန်စခွင့်ရမလားဆိုတဲ့ မျှော်လင့်ချက်နဲ့ အာဏာသိမ်း အစောပိုင်းရက်တွေမှာ အသာစောင့်ကြည့်ခဲ့တာပါ။

စစ်တပ်က အာဏာသိမ်းပြီး တလကျော်အကြာမှာတော့ စစ်တပ်ရဲ့လူမဆန်တဲ့ စက်ဆုတ်ရွံ့ရှာဖွယ်အကြမ်းဖက်ပစ်သတ်မှုတွေကြောင့်ကမ္ဘာ့နိုင်ငံအသီးသီးက ရှုတ်ချကြတယ်။

ပြည်တွင်းမှာ စစ်တပ်ရဲ့နှိမ်နင်းမှုကို အံတုရင်ဆိုင်နေကြတဲ့မြန်မာပြည်သူတွေနဲ့ အစိုးရတရပ်လုပ်မရတဲ့ စစ်တပ်ကို ကြည့်ပြီး တရုတ်ရဲ့အမြင်ပြောင်းလာပုံရတယ်။

ဒီမှာတင် ဆန္ဒပြအစောပိုင်းကာလတွေမှာ ရေငုံနှုတ်ပိတ်နေခဲ့ကြတဲ့ အေအေ ရက္ခိုင့်တပ်ကလည်း  ကြေညာချက်တွေထုတ်လာ အခုတခါ မြောက်ပိုင်းသုံးဖွဲ့ကပါ ကြေညာချက်ထုတ်လာတာဖြစ်တယ်။

တရုတ်အစိုးရရဲ့သြဇာမကင်းတဲ့မြောက်ပိုင်းတပ်ဖွဲ့တွေ အခုလို လူထုဘက်က ရပ်တည်လိုက်တာကို တခြားတဘက်ကကြည့်ရင် ပြည်သူတွေအောင်ပွဲနဲ့နီးလာတာကို ပြဆိုနေတယ်။

လက်နက်ကိုင်တပ်ဖွဲ့တွေထဲ အင်အားအကောင်းဆုံးဖြစ်တဲ့ UWSA ‘ဝ” တပ်ဖွဲ့ကတော့ ဆန်ပြုတ်ဒီပလိုမေစီအရ အခုထိ တုတ်တုတ်မလှုပ်သေးဘူး။

ဘယ်လိုပဲဖြစ်ဖြစ်တိုင်းရင်းသားလက်နက်ကိုင်တပ်ဖွဲ့တွေ ခုအချိန်ပြည်သူနဲ့အတူရပ်ပေးတာ ကောင်းတဲ့အလားအလာဖြစ်တယ်။

CRPH ကလည်း မြောက်ပိုင်းသုံးဖွဲ့ရဲ့ကြေညာချက်အပေါ် မဆိုင်းမတွကြိုဆိုလိုက်တာ  တွေ့ရတယ်။ အနာဂတ်ဖက်ဒရယ်တပ်မတော်ပေါ်ထွန်းရေးအတွက်လည်း တတပ်တအားဖြစ်တယ်။

အရေးတော်ပုံ အောင်ရမည်။

ကိုလေအိုး

8 months Ago
More News
Up