ကိုရိုနာဗိုင်းရပ်စ် တိုက်ဖျက်ရေး

March 22, 2020

ကိုရိုနာဗိုင်းရပ်စ် တိုက်ဖျက်ရေးအတွက် ရိုးမားအသင်း ၁ ရက်စာ လစာလှူဒါန်း

ရိုးမားအသင်းရဲ့ ကစားသမားတွေနဲ့ ဝန်ထမ်းတွေဟာ ၁ ရက်စာ လစာကို မယူဘဲ ကိုရိုနာဗိုင်းရပ်စ် ထိန်းချုပ်ရေးမှာ အထောက်အကူဖြစ်စေဖို့ ရောမမြို့က ဆေးရုံတခုကို လှူဒါန်းသွားမယ်လို့ သိရပါတယ်။ အသက်ရှူစက်တွေနဲ့ ခုတင်တွေ လှူဒါန်းသွားမှာဖြစ်ပြီး ဒါဟာ ကလပ်အသင်းအဆင့် ယူရို ၂ သိန်းကျော် လှူဒါန်းမှုတွေရဲ့ အမြင့်မားဆုံးပမာဏလည်း ဖြစ်ပါတယ်။ ရိုးမားအသင်းဟာ လာဇာရိုစပယ်လန်ဇာနီဆေးရုံအတွက် ပြီးခဲ့တဲ့ သီတင်းပတ်ထဲမှာ ပေါင် ၄၆၀၀၀၀ စုဆောင်းဆိုနိုင်ခဲ့ပါတယ်။ ဒီဆေးရုံဟာ အီတလီနိုင်ငံအတွင်း Covid–19 တိုက်ဖျက်ရေးဆိုင်ရာ ပင်မဗဟိုချက်တွေထဲက တခုလည်း ဖြစ်ပါတယ်။ ဒီအလှူငွေတွေထဲက တချို့ကို အရေးပေါ်ခန်းသုံး အသက်ရှူစက် ၃ လုံး၊ သာမန်အသက်ရှူစက် ၅ လုံးနဲ့ အရေးပေါ်ခန်းသုံး ခုတင် ၈ လုံး ဝယ်ယူဖို့အတွက် အသုံးပြုသွားမှာပဲဖြစ်ပါတယ်။ ရိုးမားအသင်းဟာ အခုသီတင်းပတ်အစောပိုင်းမှာလည်း မြို့တော်မှာရှိတဲ့  ဆေးရုံအတွက် FFP2 နှာခေါင်းစည်း ၁၃၀၀၀ အပြင် လက်ဆေးရည်ဘူး ၁၂၀ ကိုလည်း ပေးအပ်ခဲ့ပြီး ဖြစ်ပါတယ်။   ရိုးမားအသင်း စီအီးအို ဂိုင်ဒိုဖီရန်ဂါက “ဒီအချိန်မှာ အရေးအကြီးဆုံးကတော့ ကိုယ်နဲ့သက်ဆိုင်မှုတိုင်းကို တာဝန်ယူပြီး၊ ကိုယ်တတ်နိုင်တဲ့ဘက်က ကူညီမှုတွေ လုပ်ဆောင်ပေးဖို့ပဲဖြစ်ပါတယ်။ အသင်းဥက္ကဋ္ဌကနေ၊  ကစားသမားတွေ၊ ဝန်ထမ်းတွေ၊ ကစားသမားဟောင်းတွေ၊ အသင်းပရိသတ်တွေရဲ့ ဒီလိုလုပ်ရပ်တွေက လူ့အသက်ပေါင်းများစွာကို ကယ်တင်နိုင်မှာပဲ ဖြစ်ပါတယ်။ ဘယ်လို အခက်အခဲမျိုးကိုမဆို ကျနော်တို့ လက်လျှော့မှာ မဟုတ်ပါဘူး။ အခုဆိုရင် ကျနော်တို့ဟာ အရင်ကသတ်မှတ်ထားတဲ့ ပမာဏထက်ကို ကျော်လွန်ပြီး အလှူငွေရရှိသွားမယ်လို့ မျှော်လင့်ပါတယ်” လို့ ပြောပါတယ်။  အီတလီနိုင်ငံဟာ မတ် ၁၉ ရက်မှာ ဗိုင်းရပ်စ်ဒဏ်ကို အဆိုးရွားဆုံးခံရတဲ့နိုင်ငံအဖြစ် တရုတ်နိုင်ငံကို ကျော်တက်သွားခဲ့ပြီဖြစ်ပြီး ဗိုင်းရပ်စ် စတင်ပေါ်ပေါက်ချိန်ကစလို့ သေဆုံးမှုအများဆုံးဆိုတဲ့ အခြေအနေကိုလည်း ရောက်ရှိသွားခဲ့ပြီ ဖြစ်ပါတယ်။  အီတလီနိုင်ငံအတွင်း ဒီနေ့ မွန်းလွဲပိုင်းအထိ COVID–19 ကူးစက်ခံရသူ ၅၃၅၇၈ ဦးနဲ့ ၄၈၂၅ ဦး သေဆုံးခဲ့ပါတယ်။ အီတလီနိုင်ငံတဝန်းလုံးကို Lock down လုပ်ထားပြီး ဒီအခြေအနေကို ထိန်းချုပ်ပေးဖို့ အစိုးရက အီတလီစစ်တပ်ကို အကူအညီ တောင်းခံထားပါတယ်။
1 year Ago

March 14, 2020

ကိုရိုနာဗိုင်းရပ်စ် တိုက်ဖျက်ရေး ဒေါ်လာသန်း ၂၀ လှူမည်ဟု ဖေ့စ်ဘွတ်ခ်စီအီးအို ပြော

ကိုရိုနာဗိုင်းရပ်စ် တိုက်ဖျက်ရေးအတွက် ဒေါ်လာသန်း ၂၀ အထိ လှူဒါန်းသွားမယ်လို့ ဖေ့စ်ဘွတ်ခ် တည်ထောင်သူနဲ့ စီအီးအိုဖြစ်သူ မာ့ခ်ဇူကာဘတ် မတ် ၁၃ ရက်နေ့မှာ ထုတ်ပြန်လိုက်ပါတယ်။  ဇူကာဘတ်က သူ့ Facebook စာမျက်နှာမှာ ဒေါ်လာ ၁၀ သန်းကို COVID-19 Solidarity Response Fund ကို လှူဒါန်းထားပြီး အဲဒီပရောဂျတ်က ကုလသမဂ္ဂ၊ WHO ကမ္ဘာ့ကျန်းမာရေး အဖွဲ့တို့နဲ့ ပူးတွဲလုပ်ဆောင်နေတာပါ။  ဇူကာဘတ်ဟာ CDC Foundation ကိုလည်း ဒေါ်လာ ၁၀ သန်း လှူထားပါသေးတယ်။  သူ့ဖေ့စ်ဘွတ်ခ်စာမျက်နှာမှာ ဒီရန်ပုံငွေတွေက ကမ္ဘာတဝန်း ကိုရိုနာဗိုင်းရပ်စ် ပြန့်ပွားမှုကို တုံ့ပြန်တားဆီးဖို့ လုပ်နေတာတွေအတွက် အထောက်အကူဖြစ်အောင် လှူတာလို့လည်း ရှင်းပြထားပါတယ်။  ဒါ့အပြင်  ကိုရိုနာဗိုင်းရပ်စ် တိုက်ဖျက်ဖို့ ဖေ့စ်ဘွတ်ခ်ဟာ ကမ္ဘာ့ကျန်းမာရေးအဖွဲ့ (WHO) ကို   အခမဲ့ကြော်ငြာတွေ လိုသလောက်ပေးသွားမယ်လို့ စီအီးအို မက်ဇူကာဘတ်က မတ်လ ၃ ရက်မှာ ကြေညာခဲ့ပါသေးတယ်။   ဖြစ်ပေါ်နေတဲ့အခြေအနေအရ ဖေ့စ်ဘွတ်ခ်ဟာ WHO, CDC နဲ့  UNICEF တို့လို ကျန်းမာရေးအဖွဲ့အစည်းတွေနဲ့ အတူလုပ်ဆောင်နေပြီး  ကိုရိုနာဗိုင်းရပ်စ်နဲ့ ပတ်သက်လို့ အချိန်နဲ့ တပြေးညီ တိကျတဲ့သတင်းတွေကို အဲဒီအဖွဲ့အစည်းတွေ  ထုတ်ပြန်နိုင်စေဖို့ ကူညီပေးသွားမယ်လို့ ဇူကာဘတ်က ပြောခဲ့ပါတယ်။  ဖေ့စ်ဘွတ်ခ်အနေနဲ့ တခြားအဖွဲ့အစည်းတွေကိုလည်း အကူအညီတွေနဲ့ ကြော်ငြာသန်းချီ ပေးအပ်ပြီး လိုအပ်ရင် ထပ်တိုးအကူအညီပေးနိုင်ဖို့ ကမ္ဘာလုံးဆိုင်ရာကျန်းမာရေး ကျွမ်းကျင်သူ တွေနဲ့ အနီးကပ် အတူအလုပ်လုပ်သွားမယ်လို့လည်း ဇူကာဘတ်က  ပို့စ်တင်ခဲ့ဖူးပါတယ်။
1 year Ago
Up