ကိုရိုနာဗိုင်းရပ်စ်မရှိ

March 22, 2020

အမေရိကန် ဒုသမ္မတတွင် ကိုရိုနာဗိုင်းရပ်စ် မရှိကြောင်း ထုတ်ပြန်

မတ် ၂၁ ရက်နေ့က ကိုရိုနာဗိုင်းရပ်စ် ကူးစက်ခံရခြင်း ရှိ၊ မရှိ ဆေးစစ်မယ်လို့ ကြေညာခဲ့သူ အမေရိကန်ဒုသမ္မတ မိုက်ပန့်စ်ဟာ ရောဂါကင်းရှင်းကြောင်း တွေ့ရတယ်လို့ သူ့ရဲ့ ပြောခွင့်ရပုဂ္ဂိုလ်က တွစ်တာမှာ ထုတ်ပြန် ကြေညာလိုက်ပါတယ်။  ရိုက်တာသတင်းအရ ဒုသမ္မတရဲ့ပြန်ကြားရေးအတွင်းဝန် ကေတီမေလာက ဒီသတင်းကို သူမရဲ့ တွစ်တာစာမျက်နှာမှာ အတည်ပြုတင်ပြထားတာလို့ ဆိုပါတယ်။  ဒုသမ္မတနဲ့ကတော်တို့ဟာ ဒုသမ္မတရဲ့ရုံးက ဝန်ထမ်းတဦးမှာ ကိုရိုနာဗိုင်းရပ်စ် တွေ့ရှိကြောင်း သိရပြီးနောက် ဆေးစစ်ခဲ့တာပါ။  အမေရိကန်သမ္မတတ ဒေါ်နယ်ထရမ့်ဟာလည်း ပြီးခဲ့တဲ့အပတ်က ကိုရိုနာဗိုင်းရပ်စ်ပိုး ရှိ၊ မရှိ ဆေးစစ်ခံခဲ့ပါသေးတယ်။ အမေရိကန် လက်ထောက်ကျန်းမာရေးဝန်ကြီး ဘရတ်ဂီရာရွာကတော့ နိုင်ငံတွင်းမှာ ကိုရိုနာဗိုင်းရပ်စ် ရှိ၊ မရှိ ဆေးစစ်ခံထားသူဦးရေ ၁၉၅၀၀၀ ကျော် ရှိထားပြီးဖြစ်ကာ ဦးစားပေးစစ်ဆေးမှာက ကျန်းမာရေးလုပ်သားတွေ၊ ရောဂါလက္ခဏာပြနေတဲ့သူတွေနဲ့ သက်ကြီးရွယ်အိုတွေ ဖြစ်တယ်လို့ ရိုက်တာသတင်းကို ပြောပါတယ်။
1 year Ago

February 15, 2020

စောင့်ကြည့်လူနာ ၂၁ ဦးထဲမှ ၁၃  ဦးတွင် ကိုရိုနာဗိုင်းရပ်စ်မရှိ

မြန်မာနိုင်ငံမှာ ကိုရိုနာဗိုင်းရပ်စ် စောင့်ကြည့်လူနာ ၂၁ ဦးထဲက ၁၃ ဦးဟာ  ရောဂါပိုး လုံးဝ မရှိဘူးလို့ အစိုးရ ကျန်းမာရေးဝန်ကြီးဌာနက ဒီနေ့မနက် ကြေညာပါတယ်။ ဒီလူနာတွေရဲ့ ဓာတ်ခွဲအဖြေတွေမှာ ကိုရိုနာဗိုင်းရပ်စ် ရောဂါပိုး မရှိဘူးလို့ ဖေဖော်ဝါရီ ၁၄ ရက် ညပိုင်းမှာ ရည်ညွှန်းဓာတ်ခွဲခန်းက ပြန်ကြားလာတယ်လို့ ဆိုပါတယ်။ အဲဒီရောဂါပိုး မရှိဘူးဆိုတဲ့ သူတွေကတော့ တောင်ကြီး စဝ်စံထွန်း ပြည်သူ့ဆေးရုံကြီးက အမျိုးသား ၁ ဦး၊ ပုတီးကုန်း တိုက်နယ်ဆေးရုံက အမျိုးသမီး ၁ ဦး၊ ပုဏ္ဏားကျွန်းမြို့နယ် ဆေးရုံက အမျိုးသမီး ၁ ဦး၊ မကွေးပြည်သူ့ဆေးရုံကြီးက အမျိုးသမီး ၁ ဦး၊ မန္တလေး ပြည်သူ့ဆေးရုံကြီးက အမျိုးသား ၁ ဦးနဲ့ အမျိုးသမီး ၁ ဦး၊ ဝေဘာဂီအထူးကုဆေးရုံက အမျိုးသမီး ၁ ဦး (စင်ကာပူနိုင်ငံမှ ပြန်လာသူ)၊ မောင်တော ပြည်သူ့ဆေးရုံက အမျိုးသား ၁ ဦး၊ ပေါက်မြို့နယ်ဆေးရုံက အမျိုးသမီး ၁ ဦး၊ မောက်မယ်မြို့နယ်ဆေးရုံက အမျိုးသား ၁ ဦး နဲ့ အမျိုးသမီး ၃ ဦးတို့ ဖြစ်ပါတယ်။ ကျန်းမာရေးနှင့်အားကစားဝန်ကြီးဌာနအနေနဲ့ လတ်တလော အသက်ရှူလမ်းကြောင်းဆိုင်ရာ ရောဂါစောင့်ကြပ်ကြည့်ရှုမှုနဲ့ ကာကွယ်ထိန်းချုပ်ရေး လုပ်ငန်းတွေကို အရှိန်အဟုန်နဲ့ ဆောင်ရွက်နေတယ်လို့ ထုတ်ပြန်ချက်မှာ ဖော်ပြထားပါတယ်။ သက်ဆိုင်ရာဆေးရုံတွေမှာ စောင့်ကြပ်ကြည့်ရှု ကုသမှုခံယူတဲ့ ကျန်လူနာတွေရဲ့ ဓာတ်ခွဲ စစ်ဆေးမှုအဖြေ သတင်းတွေကို ဆက်ပြီးထုတ်ပြန်ပေးမယ်လို့ ဆိုပါတယ်။ ဒီနေ့မနက်ပိုင်းအထိ  ကမ္ဘာတဝန်း ကိုရိုနာဗိုင်းရပ်စ်ကူးစက်ခံရသူ ၆၇၁၀၂ ဦး၊ သေဆုံးသူ ၁၅၂၆ ရှိပြီဖြစ်ပြီး တရုတ်နိုင်ငံမှာ ၁၅၂၃ ဦး၊ ဖိလစ်ပိုင်၊ ဟောင်ကောင်နဲ့ ဂျပန်နိုင်ငံတို့မှာ ၁ ဦးစီ သေဆုံးခဲ့ပါတယ်။ ရောဂါ ပျောက်ကင်းသက်သာသူ ၈၂၇၆ ရှိပြီလို့ သိရပါတယ်။
1 year Ago
Up