ကိုရိုနာဗိုင်းရပ်စ်

November 8, 2022

တရုတ်တွင် ကိုရိုနာဗိုင်းရပ်စ် ကူးစက်မှုအသစ် ၆၄ ခုတွေ့

တရုတ်အာဏာပိုင်တွေဟာ နိုဝင်ဘာ ၇ ရက်က ဒေသတွင်း ကိုရိုနာဗိုင်းရပ်စ် ကူးစက်မှုအသစ် ၆၄ ခုကို တွေ့ရှိခဲ့ပြီး နေထိုင်သူအများအပြားကို ကူးစက်ခံ ဟုတ်မဟုတ် ထပ်စမ်းသပ်ခဲ့ပါတယ်။

တချို့နေရာတွေမှာ အဆောက်အအုံတွေ၊ ရပ်ကွက်တွေနဲ့ ခရိုင်တွေကို ပိတ်ဆို့ထားခဲ့ပါတယ်။

ကမ္ဘာ့ဒုတိယအကြီးဆုံး စီးပွားရေးနိုင်ငံ တရုတ်ဟာ သူ့ရဲ့ ကိုဗစ်-၁၉ ကပ်ရောဂါထိန်းချုပ်ရေး မူဝါဒကို ဖြေလျှော့ဖို့ ပြင်ဆင်နေတယ်ဆိုတဲ့ ကောလာဟလတွေကြောင့် ၂ နှစ်ကျော်အတွင်း တရုတ်စတော့ရှယ်ယာတွေရဲ့ အပတ်စဉ် အမြတ်ငွေဟာ အကြီးမားဆုံး တက်လာခဲ့ပါတယ်။

ဒါပေမဲ့ တရုတ်အစိုးရဟာ တင်းကျပ်တဲ့ ကိုဗစ်-၁၉ မူဝါဒအပေါ် သူ့ကတိကဝတ်ကို ထပ်အတည်ပြုပြီး နိုဝင်ဘာ ၅ ရက်မှာ ထင်ကြေးကို ဖျက်သိမ်းခဲ့ပါတယ်။

တရုတ်နိုင်ငံတဝန်းမှာ ကူးစက်မှုအသစ်တွေ နိုဝင်ဘာ ၇ ရက်မှာ ၇,၄၇၅ ဦးအထိ မြင့်တက်လာခဲ့တာပါ။ ဒါဟာ မေလ ၁ ရက်နောက်ပိုင်း အမြင့်ဆုံးဖြစ်ပြီး နိုဝင်ဘာ ၆ ရက်ကတော့ တရက်အတွင်း အသစ်ကူးစက်ခံဦးရေ ၅,၄၉၆ ဦး ရှိခဲ့တယ်လို့ တရုတ်ကျန်းမာရေးအာဏာပိုင်အဖွဲ့က ပြောပါတယ်။

3 months Ago

July 12, 2022

ကမ္ဘာတဝန်း အိုမီခရွန်မျိုးကွဲ ကိုရိုနာဗိုင်းရပ်စ် ကူးစက်မှုတိုးလာ

ကိုရိုနာဗိုင်းရပ်စ်မျိုးကွဲအသစ်ဖြစ်တဲ့ အိုမီခရွန် BA.5 မကြာသေးမီက ပေါ်ပေါက်လာချိန်မှာ ကမ္ဘာတဝန်း အတည်ပြုထားတဲ့ ကိုဗစ်-၁၉ ကူးစက်ခံနေရသူ လူဦးရေတိုးလာနေပါတယ်။

အမေရိကန်ပြည်ထောင်စုကတော့ ကိုရိုနာဗိုင်းရပ်စ် ကူးစက်ခံရသူ အရေအတွက် အများဆုံးအဖြစ် မှတ်တမ်းဝင်ခဲ့ပြီး အိန္ဒိယနဲ့ ဘရာဇီးတို့က အမေရိကန်ရဲ့ နောက်မှာ ဆက်တိုက် ရှိနေပါတယ်။

ဇူလိုင် ၁၁ ရက် နှောင်းပိုင်းအထိ အမေရိကန်မှာ တစ်နိုင်ငံလုံးအတိုင်းအတာနဲ့ ကိုဗစ်-၁၉ ကူးစက်ခံရသူ ၈၈ ဒသမ ၆ သန်းနီးပါး မှတ်တမ်းတင်ထားပြီး သေဆုံးသူ ၁ ဒသမ ၀၂ သန်းကျော်ရှိတယ်လို့ ဂျွန်ဟော့ပ်ကင်းတက္ကသိုလ် စနစ်များသိပ္ပံနဲ့ အင်ဂျင်နီယာဌာနက ပြောပါတယ်။

အမေရိကန်နိုင်ငံမှာ ကိုဗစ်-၁၉ ကာကွယ်ဆေး အကြိမ်ရေ စုစုပေါင်း ၅၉၄ သန်းနီးပါး ထိုးနှံပေးခဲ့ပြီးဖြစ်ပေမဲ့ အလွန်ကူးစက်တတ်တဲ့ BA.4 နဲ့ BA.5 အိုမီခရွန် မျိုးကွဲတွေဟာ ခုချိန်မှာ အမေရိကန်ရဲ့ အဓိကခြိမ်းခြောက်မှုတွေ ဖြစ်နေပါတယ်။ 

အိန္ဒိယနိုင်ငံမှာ လွန်ခဲ့သော ၂၄ နာရီအတွင်း ကိုဗစ်-၁၉ ကူးစက်ခံရသူ အသစ် ၁၈,၂၅၇ ဦးအထိ မြင့်တက်လာခဲ့ပြီး စုစုပေါင်း အရေအတွက်မှာ ၄၃ ဒသမ ၆သန်းကျော် အထိ ရှိခဲ့တယ်လို့ အိန္ဒိယကျန်းမာရေးဝန်ကြီးဌာနက ဇူလိုင် ၁၀ ရက်က ထုတ်ပြန်ကြေညာပါတယ်။

ဒါ့အပြင် ဇူလိုင် ၉ ရက် မနက်ပိုင်းက စပြီး ကိုဗစ်ကြောင့် သေဆုံးသူ ၄၂ ဦးအထိ ရှိလာခဲ့လို့ စုစုပေါင်း သေဆုံးသူဦးရေ ၅၂၅၄၂၈ ဦးဖြစ်လာပါတယ်။ 

ဗီယက်နမ်မှာတော့ ကိုဗစ်-၁၉ ကူးစက်ခံရသူအသစ် ၄၆၅ ဦးကို ဇူလိုင် ၁၀ ရက်မှာ မှတ်တမ်းတင်ခဲ့ပြီး တနှစ်တာအတွင်း အနိမ့်ဆုံး တရက်အတွင်း ကူးစက်ခံဦးရေ ဖြစ်တယ်လို့ ကျန်းမာရေးဝန်ကြီးဌာနက ထုတ်ပြန်ခဲ့ပါတယ်။ ကူးစက်ခံရသူ စုစုပေါင်း ၁၀ ဒသမ ၇၅သန်းရှိပြီး သေဆုံးသူ ၄၃,၀၈၉ ယောက် ရှိခဲ့တာပါ။

တနိုင်ငံလုံး ရောဂါကူးစက်ခံဦးရေရဲ့ ၉၁ ရာခိုင်နှုန်းနီးပါးဟာ အခု နေပြန်ကောင်းလာပြီလို့လည်း ဝန်ကြီးဌာနက ပြောပါတယ်။ 

စင်္ကာပူမှာ ဇူလိုင် ၁၀ ရက် တရက်တည်းမှာ ကိုဗစ်-၁၉ ကူးစက်ခံရသူ ၆,၄၂၃ ဦး ထပ်တွေ့ခဲ့လို့ စုစုပေါင်း ကူးစက်ခံ ဦးရေမှာ ၁ ဒသမ ၅ သန်း ကျော် ရှိခဲ့ပါတယ်။

လက်ရှိမှာ ကူးစက်ခံ စုစုပေါင်း ၆၆၈ ဦးကို ဆေးရုံတွေမှာ ထားပြီး အထူးကြပ်မတ်ကုသဆောင်မှာ လူနာ ၁၈ ယောက် ရှိနေပါတယ်။

ဇူလိုင် ၁၀ ရက်မှာ ကိုဗစ်-၁၉  ကြောင့် သေဆုံးသူ ၄  ဦးရှိခဲ့လို့ စုစုပေါင်း ကူးစက်ခံ သေဆုံးသူ ၁၄၃၂  ဦး ရှိခဲ့တယ်လို့ စင်ကာပူ ကျန်းမာရေးဝန်ကြီးဌာနက ထုတ်ပြန်ခဲ့ပါတယ်။ 

7 months Ago
More News
Up