ကိုဗစ်-၁၉ ကာကွယ်ဆေးထိုးနှံရန်

January 16, 2021

အိန္ဒိယတွင် ကိုဗစ်-၁၉ ကာကွယ်ဆေးထိုးနှံမှု စတင်

ကမ္ဘာ့အကြီးဆုံး ကိုဗစ်-၁၉ ကာကွယ်ဆေး ထိုးနှံရေးလှုပ်ရှားမှုတစ်ခုကို အိန္ဒိယဝန်ကြီးချုပ် မိုဒီက ဇန်နဝါရီ ၁၆ ရက်မှာ စတင်လိုက်ပါတယ်။ ကမ္ဘာ့ဒုတိယလူဦးရေ အများဆုံးနိုင်ငံအနေနဲ့ ပြည်တွင်းထုတ် ကိုဗစ်ကာကွယ်ဆေး နှစ်မျိုးနဲ့ အစပြုလို့ အိန္ဒိယဟာ ကပ်ရောဂါကို ထိန်းချုပ်ဖို့ ကြိုးပမ်းတာပါ။  ကိုဗစ်ကာကွယ်ဆေး ပထမဆုံး ထိုးနှံတဲ့နေ့မှာ နိုင်ငံတဝန်းက ကာကွယ်ဆေးထိုးနှံရေး စင်တာပေါင်း ၃,၀၀၆ ခုထဲက တစ်ခုစီမှာ အယောက် ၁၀၀ ဝန်းကျင် ဆန္ဒအလျောက် ကာကွယ်ဆေး ထိုးနှံခံသွားမယ်လို့ အိန္ဒိယအစိုးရက ဒီသီတင်းပတ်ထဲမှာ ပြောထားပါတယ်။  ဇန်နဝါရီ ၁၆ ရက်က  မန်နစ်ရှ်ကူမား ဆိုတဲ့ သန့်ရှင်းရေးဝန်ထမ်းဟာ အိန္ဒိယရဲ့ ပထမဆုံး ကိုဗစ်ကာကွယ်ဆေးထိုးနှံခံသူ ဖြစ်လာပါတယ်။   အိန္ဒိယဟာ ကနဦးအနေနဲ့  သူနာပြု၊ ဆရာဝန်နဲ့  ရှေ့တန်းက တိုက်ပွဲဝင်နေတဲ့ တခြားသူ သန်း ၃၀ ကို ဦးစားပေး ကာကွယ်ဆေးထိုးနှံသွားမှာပါ။  အဲဒီနောက်မှာတော့ အသက် ၅၀ အထက်နဲ့ အသက်အန္တရာယ်ရှိသူ သန်းပေါင်း ၂၇၀ ကို ထိုးနှံပေးမှာ ဖြစ်တဲ့အတွက် ဝန်ကြီးချုပ်မိုဒီဟာ ချက်ချင်း ကာကွယ်ဆေးထိုးနှံခံမှာ မဟုတ်ပါဘူး။   ဒါပေမဲ့ ကာကွယ်ဆေးထိုးသူတွေအနေနဲ့ အက်စ်ထရာဇန်နက်ကာ ထိုးမလား၊ ဒါမှမဟုတ် အစွမ်းထက်မှု မသိရသေးတဲ့ ပြည်တွင်းမှာ ဖော်ထုတ်တဲ့ ဘာရတ်ဘိုင်အိုတက်ခ်က ကာကွယ်ဆေးထိုးမလား ဆိုတာကိုတော့ ရွေးချယ်ခွင့် မရှိပါဘူး။ ကာကွယ်ဆေး နှစ်မျိုးစလုံးကတော့ အိန္ဒိယမှာပဲ ထုတ်လုပ်တာပါ။ ကမ္ဘာမှာ အမေရိကန် ပြီးရင် ကိုဗစ်ကူးစက်မှု အများဆုံးရှိတဲ့ အိန္ဒိဟာ ၂၀၂၁ ရဲ့ ပထမ ၆ လကနေ ၈ လအတွင်း လူဦးရေ သန်း ၃၀၀ ဝန်းကျင်ကို ကာကွယ်ဆေးထိုးဖို့ ရည်မှန်းထားတယ်လို့ ရိုက်တာက ဖော်ပြထားပါတယ်။
3 months Ago

December 16, 2020

ကိုဗစ်-၁၉ ကာကွယ်ဆေးထိုးနှံရန် စာရင်းကောက်ထားသည့် ကျန်းမာရေးဝန်ထမ်း ၁ သိန်း ကျော်ရှိ

မြန်မာနိုင်ငံမှာ  ကိုဗစ်-၁၉ ကာကွယ်ဆေးရရှိပါက ဦးစားပေးထိုးနှံပေးနိုင်ဖို့ စာရင်း ကောက်ယူထားတဲ့ ကျန်းမာရေးဝန်ထမ်းဦးရေ တစ်သိန်းကျော်လောက် ရှိနေတယ်လို့ ကျန်းမာရေးနဲ့ အားကစားဝန်ကြီးဌာနက သိရပါတယ်။  ကမ္ဘာ့ကျန်းမာရေးအဖွဲ့အစည်းတွေ အသိအမှတ်ပြုထားတဲ့ ကိုရိုနာဗိုင်းရပ်စ် ကာကွယ်ဆေး ပေါ်ထွက်လာရင် ၂၀၂၁ ခုနှစ်၊ ဧပြီလအတွင်း မြန်မာနိုင်ငံရဲ့ လူဦးရေ ၂၀ ရာခိုင်နှုန်းကို ထိုးနှံပေးသွားဖို့ စီစဉ်နေပါတယ်။   ဒီထဲ ကိုဗစ်-၁၉ ရောဂါကာကွယ်ဆေးရရှိရင်  ကျန်းမာရေးဝန်ထမ်းတွေနဲ့ သက်ကြီးရွယ်အို တွေကို ဦးစားပေးထိုးနှံပေးဖို့ စီစဉ်နေတာပါ။ ပြီးခဲ့တဲ့အပတ်က စတင်ပြီး ကိုဗစ်-၁၉  ကာကွယ်ဆေး ထိုးနှံပေးမယ့် ကျန်းမာရေးဝန်ထမ်း အရေအတွက် စာရင်းကောက်ယူထားတယ်လို့ ပြည်သူ့ ကျန်းမာရေးဦးစီးဌာန၊ ဗဟိုကူးစက်ရောဂါတိုက်ဖျက်ရေးဌာနခွဲ ညွှန်ကြားရေးမှူး ဒေါက်တာ ခင်ခင်ကြီးက ပြောပါတယ်။  လက်ရှိမှာ ကာကွယ်ဆေးထိုးနှံပေးဖို့  ရန်ကုန်တိုင်းထဲ ကျန်းမာရေးဝန်ထမ်းတွေ အားလုံး စာရင်းကောက်ယူထားပြီး  စေတနာဝန်ထမ်းနဲ့ လူမှုဝန်ထမ်းအဖွဲ့တွေကိုလည်း ထပ်မံစာရင်းကောက်ယူဖို့ စီစဉ်နေတယ်လို့ ဒေါက်တာခင်ခင်ကြီး က ပြောပါတယ်။  မြန်မာနိုင်ငံအတွက်  COVAX  အစီအစဉ်ကနေ  ကိုဗစ်-၁၉ ကာကွယ်ဆေးရရှိဖို့ ဆွစ်ဇာလန်အခြေစိုက် Gavi၊ The vaccine၊ Alliance အဖွဲ့ ကို  ဒီဇင်ဘာ ၇ ရက်နေ့က အဆိုပြုလွှာပေးပို့ထားတယ်လို့  နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောထားပါတယ်။ ကိုဗစ်-၁၉ ရောဂါ ကာကွယ်ဆေးထိုးပေးရာမှာ ဘယ်သူ့ကိုမှ မချန်ဘဲ တစ်တိုင်းပြည်လုံးကို ထိုးပေးမှာဖြစ်တယ်လို့ နိုင်ငံတော်၏အတိုင်ပင်ခံပုဂ္ဂိုလ်က ပြောပါတယ်။ မြန်မာနိုင်ငံမှာ ဒီဇင်ဘာ ၁၅ ရက် ည ၈ နာရီအထိ ကိုဗစ်-၁၉ အတည်ပြုလူနာစုစုပေါင်း   ၁၁၀,၆၆၇ ယောက်၊ သေဆုံးသူ ၂,၃၁၉   ယောက်နဲ့ ဆေးရုံက ဆင်းခွင့်ရသူပေါင်း ၈၉,၄၁၈ ယောက်ရှိပြီဖြစ်ပါတယ်။ ကိုဗစ်-၁၉ ကုသရေးစင်တာတွေမှာ ဆောင်ရွက်နေကြတဲ့   ဆရာဝန်၊ သူနာပြုနဲ့ ကျန်းမာရေး ဝန်ထမ်းအယောက် ၁,၀၀၀ ကျော်လောက်လည်း ကိုဗစ်-၁၉ ရောဂါစက်ခံနေရတယ်လို့ ကျန်းမာရေးနဲ့ အားကစားဝန်ကြီးဌာန သတင်းအချက်အလက်အရ သိရပါတယ်။  သတင်း - နန့်ခိုင်
4 months Ago
Up