ကိုဗစ်-၁၉ ကာကွယ်ဆေး

January 17, 2022

ရုရှားထုတ် ကိုဗစ်-၁၉ ကာကွယ်ဆေး ၅ သိန်းကျော် ဒုတိယအသုတ် ထပ်မံရောက်ရှိ

ရုရှားနိုင်ငံကနေ Sputnik Light ကိုဗစ်-၁၉ ကာကွယ်ဆေး ၅၁၂,၀၀၀ ဒုတိယအသုတ်အနေနဲ့ ထပ်မံရောက်ရှိလာတယ်လို့ စစ်ကောင်စီ ကျန်းမာရေးဝန်ကြီးဌာနက သတင်းထုတ်ပြန်ပါတယ်။

ပြီးခဲ့တဲ့ ဇန်နဝါရီ ၁၃ ရက်ကတော့ ပထမအသုတ်အနေနဲ့ ကာကွယ်ဆေး ၄၈၈,၀၀၀ ရောက်ရှိခဲ့ပြီး ဖြစ်ပါတယ်။

အာဏာသိမ်းစစ်ကောင်စီဟာ ရုရှားနိုင်ငံကနေ အဆိုပါ Sputnik Light ကိုဗစ်-၁၉ ကာ ကွယ်ဆေး ၆ သိန်း ဝယ်ယူထားခဲ့ပြီး ရုရှားက လှူဒါန်းတဲ့ ကာကွယ်ဆေး ၄ သိန်းနဲ့ စုစုပေါင်း ကာကွယ်ဆေး ၁ သန်း မြန်မာနိုင်ငံကို ရောက်ရှိခဲ့ပြီလို့ ဆိုပါတယ်။

စစ်ကောင်စီ ကျန်းမာရေးဝန်ကြီးဌာန ထုတ်ပြန်ချက်မှာတော့ ရုရှားနိုင်ငံထုတ် Sputnik Light ကာကွယ်ဆေးတွေဟာ လူတယောက်ကို တစ်ကြိမ်သာ ထိုးနှံပေးဖို့ လိုအပ်ပြီး မြန်မာနိုင်ငံရဲ့ ကိုဗစ်-၁၉ ရောဂါကာကွယ်ဆေးထိုးနှံမှု ပိုမိုလျင်မြန်စွာ လွှမ်းခြုံနိုင်ရေးအတွက် များစွာအထောက်အကူပြုမယ်လို့ ဆိုပါတယ်။

ဒါပေမဲ့ လတ်တလော မြန်မာပြည်သူတွေကြားမှာတော့ စစ်ကောင်စီကို မယုံကြည်ကြတာမို့ ကာကွယ်ဆေး သွားရောက်ထိုးနှံသူအရေအတွက်ဟာ နည်းပါးတယ်လို့ သိရပါတယ်။ အာဏာသိမ်း စစ်ခေါင်းဆောင်ကတော့ ၂၀၂၁ နှစ်ကုန်မှာ မြန်မာနိုင်ငံ လူဦးရေရဲ့ ၅၀ ရာခိုင်နှုန်းကျော်ကို ကိုဗစ်-၁၉ ကာကွယ်ဆေး ထိုးနှံပေးနိုင်မယ်လို့ ပြောထားတာပါ။

လတ်တလောအချိန်ထိ တိုင်းဒေသကြီး နဲ့ ပြည်နယ်အလိုက် ကိုဗစ်-၁၉ ကာကွယ်ဆေးကို ဦးတည်အုပ်စုတွေအလိုက် ထိုးနှံပေးနေပြီး ဇန်နဝါရီ ၁၅ ရက်အထိ ကာကွယ်ဆေး ၁ ကြိမ် ထိုးနှံပြီးသူ ၃ ဒသမ ၈ သန်းကျော်၊ ၂ ကြိမ်အပြည့်ထိုးနှံပြီးသူ  ၁၇ ဒသမ ၅၅ သန်းကျော်နဲ့ စုစုပေါင်း ၂၁ ဒသမ ၃၆ သန်းကျော်ရှိခဲ့ပြီလို့ ဖော်ပြထားပါတယ်။

ဒီစစ်ဆေးမှုဟာ အာဏာဖီဆန်ရေးလှုပ်ရှားမှု (CDM) မှာ ပါဝင်နေကြတဲ့ ဆေးရုံတွေ၊ ဓာတ်ခွဲ စမ်းသပ်ခန်းတွေ မပါဝင်ဘဲ စစ်အုပ်စုလက်အောက်ခံ တပ်မတော်ဆေးရုံတွေ အများစုမှာ စမ်းသပ်စစ်ဆေးခဲ့တာမို့ ရောဂါကူးစက်မှု တိကျတဲ့ ပမာဏအတိုင်းအဆကို မသိနိုင်သေးပါဘူး။

ကျန်းမာရေးဝန်ကြီးဌာနအနေနဲ့တော့ ကိုဗစ်-၁၉ ရောဂါ ကာကွယ်ဆေးကို ဝယ်ယူခြင်းမှ ၄၅ သန်းနဲ့ လှူဒါန်းမှုမှ ၁၄ ဒသမ ၁ သန်း၊ စုစုပေါင်း ၅၉ ဒသမ ၁ သန်းလောက် ရရှိပြီးဖြစ်တယ်လို့ ဆိုပါတယ်။

2 days Ago

January 9, 2022

ဝါးခယ်မတွင် ဆေးမလောက်၍ တစ်ရွာကို လူ ၂၀ နှုန်းသာ ကိုဗစ်ကာကွယ်ဆေး ထိုးခွင့်ရ

ဧရာဝတီတိုင်း၊ ဝါးခယ်မမြို့နယ်မှာ စစ်ကောင်စီက ကိုဗစ်-၁၉ ကာကွယ်ဆေးထိုးပေးမယ်ခေါ်ပြီး ကျေးရွာ တရွာကို လူ ၂၀ လောက်သာ ထိုးပေးနေတယ်လို့ သိရပါတယ်။

ကိုဗစ်ကာကွယ်ဆေး မဖြစ်မနေထိုးရမယ်၊ မထိုးရင် ဒဏ်ငွေ ၅ သိန်းပေးဆောင်ရမယ် ခြိမ်းခြောက်ပြောဆိုတာကြောင့် ရွာသွားတွေက ကာကွယ်ဆေးထိုးဖို့သွားချိန်မှာ ဆေးမလောက်တာကြောင့် တရွာကို လူ ၂၀ ခန့်သာ ထိုးပေးတာလို့ ဒေသခံတွေက ပြောပါတယ်။

“သွားရတာတော်တော်ဝေးတယ်၊ ရွာမှာလာထိုးပေးတာမဟုတ်ဘူး။ သူတို့ထိုးပေးတဲ့နေရာကို သွားရတာ တချို့ကလည်း ဒဏ်ငွေမဆောင်နိုင်လို့ ထိုးဖို့လာရတာ၊ ဟိုရောက်တော့ ဆေးက မလောက်ဘူး။ အဲ့တော့ ခွဲတမ်း နဲ့ တရွာကို ၂၀ ထိုးပေးတာ ကျန်တဲ့သူတွေ ဒီအတိုင်းပြန်ရတာ” လို့ ဒေသခံတဦးက ပြောပါတယ်။

ဒဏ်ငွေဆောင်ရမယ် ထောင်ချမယ်ဆိုတဲ့ ခြိမ်းခြောက်မှုတွေကြောင့် ဆေးထိုးဖို့သွားချိန်မှာ ဆေးမလောက်လို့ မထိုးရဘဲ ပြန်လာရတာ ၂ ကြိမ်ထိရှိပြီလို့ သီလချောင်းကျေးရွာအုပ်စု သီလချောင်း၊ အုန်းပင်ချောင်း၊ မရင်အေး၊ ဘလေး၊ ဘလောင် ရွာသားတွေက ပြောဆိုပါတယ်။

ဝါးခယ်မမြို့နယ်အတွင်းက ကျေးရွာတွေအတွက် ဒီဇင်ဘာလ ၁၄ ရက်နေ့နဲ့ ဒီဇင်ဘာလ ၂၃ ရက်နေ့တွေမှာ ဆေး ၂ ကြိမ်ထိုးပေးတာဖြစ်ပြီး ၂ ကြိမ်လုံးမှာ ဆေးမလုံလောက်တာကြောင့် တရွာ ၂၀ ပဲ ထိုးခဲ့ရတယ်လို့ သိရပါတယ်။

1 week Ago
More News
Up