ကိုဗစ်-၁၉ ကပ်ရောဂါ

September 28, 2020

ကမ္ဘာတဝန်း ကိုဗစ်-၁၉ ကပ်ရောဂါကြောင့် သေဆုံးသူ ၁ သန်းကျော်ရှိလာ

လတ်တလော ကူးစက်ပျံ့နှံ့မှုတွေ ဖြစ်ပွားနေဆဲ ကိုဗစ်-၁၉ ကပ်ရောဂါကြောင့် တ ကမ္ဘာလုံးမှာ သေဆုံးသူအရေအတွက် ၁ သန်းကျော် ရှိလာပါတယ်။ တကမ္ဘာလုံးအတိုင်းအတာနဲ့ ရောဂါကူးစက်ခံရသူ အရေအတွက်ဟာလည်း ၃၃ သန်းကျော်လာခဲ့ပြီဖြစ်ကာ ရောဂါကူးစက်မှု အမြင့်ဆုံးနိုင်ငံတွေအဖြစ် အမေရိကန်၊ အိန္ဒိယနဲ့ ဘရာဇီးနိုင်ငံတွေက ထိပ်ဆုံး ၃ နိုင်ငံအနေနဲ့ ရှိနေပါတယ်။ ပြီးခဲ့တဲ့ နှစ်ကုန်ပိုင်းလောက်က တရုတ်နိုင်ငံအလယ်ပိုင်း ဝူဟန်မြို့မှာ စတင်ခဲ့တဲ့ ကိုဗစ်-၁၉ ရောဂါ ကူးစက်ပျံ့နှံ့မှုဟာ ကမ္ဘာ့နိုင်ငံတွေအနှံ့ ကပ်ရောဂါအသွင် ပျံ့နှံ့ခဲ့ပြီး ကမ္ဘာ့ကျန်းမာရေး အဖွဲ့(WHO)က ဒါကို နိုင်ငံတကာ အရေးပေါ် ကျန်းမာရေး ကိစ္စအနေနဲ့ ပြီးခဲ့တဲ့ မတ်လ ၁၁ ရက်နေ့က ထုတ်ပြန်ကြေညာခဲ့ပါတယ်။ ကိုဗစ်-၁၉ ကာကွယ်ဆေးကို ကျယ်ကျယ်ပြန့်ပြန့် မရခင်မှာ ရောဂါထိန်းချုပ်ရေးကို ညီညီ ညွတ်ညွတ် မလုပ်ဆောင်ကြရင်  ရောဂါကြောင့် သေဆုံးသူအရေအတွက် ၂ သန်းအထိ ရှိလာနိုင်တယ်လို့ ကမ္ဘာ့ကျန်းမာရေးအဖွဲ့ (WHO) က ပြီးခဲ့တဲ့ စက်တင်ဘာ ၂၅ ရက်မှာ သတိပေးခဲ့ပါသေးတယ်။ လက်ရှိအချိန်ထိ အမေရိကန်နိုင်ငံမှာ ကိုဗစ်-၁၉ ရောဂါကူးစက်ခံရသူ အရေအတွက် ၇ ဒသမ မ ၂ သန်းကျော် ရှိလာခဲ့ပြီဖြစ်ကာ စုစုပေါင်း သေဆုံးသူ ၂၀၉,၂၄၂ ယောက်၊ အိန္ဒိယနိုင်ငံမှာ ရောဂါကူးစက်ခံရသူ အရေအတွက် ၆ သန်းကျော်၊ သေဆုံးသူ ၉၄,၉၇၁ ယောက်၊ ဘရာဇီးနိုင်ငံမှာ ရောဂါကူးစက်ခံရသူ အရေအတွက် ၄ ဒဿမ ၇ သန်းကျော်၊ သေဆုံးသူ ၁၄၁,၅၀၃ ယောက် အသီးသီး ရှိနေပါတယ်။ ကိုရိုနာဗိုင်းရပ်စ် စတင်ရာ တရုတ်နိုင်ငံမှာတော့ ကိုဗစ်-၁၉ ရောဂါကူးစက်ခံရသူ အရေအတွက် ၈၅,၃၅၁ ယောက်၊  စုစုပေါင်း သေဆုံးသူ ၄,၆၃၄ ယောက်နဲ့ ထပ်တိုးသေဆုံးတာမျိုး မရှိပဲ နိုင်ငံအလိုက် အမှတ်စဉ် ၄၄ နေရာထိ ကျဆင်းလာခဲ့ပြီ ဖြစ်ပါတယ်။ ဥရောပနိုင်ငံတွေထဲမှာတော့ ရုရှားနိုင်ငံက ကိုဗစ်-၁၉ ရောဂါကူးစက်ခံရသူ အရေအတွက် ၁ ဒသမ ၁ သန်းကျော်၊  စုစုပေါင်း သေဆုံးသူ ၂၀,၃၂၄ ယောက်နဲ့ ထိပ်ဆုံးမှာ ရှိနေပြီး သူ့နောက်မှာတော့ စပိန်၊ ပြင်သစ်၊ အင်္ဂလန်၊ အီတလီ၊ ဂျာမနီနိုင်ငံတွေက ရောဂါ ကူးစက်မှုအမြင့်ဆုံး နိုင်ငံတွေအဖြစ် ရှိနေပါတယ်။ အာရှနိုင်ငံတွေထဲမှာတော့ ကမ္ဘာ့ရောဂါကူးစက်မှုအမြင့်ဆုံး ဒုတိယနေရာမှာရှိနေတဲ့ အိန္ဒိယနိုင်ငံရဲ့နောက် အီရန်နိုင်ငံက ကိုဗစ်-၁၉ ရောဂါကူးစက်ခံရသူ အရေအတွက် ၄၄၆,၄၄၈ ယောက်၊  စုစုပေါင်း သေဆုံးသူ ၂၅,၅၈၉ ယောက်နဲ့ ရပ်တည်နေတာပါ။ အဲဒီ ၂ နိုင်ငံနောက်မှာတော့ ဘင်္ဂလားဒေ့ရှ်၊ အီရတ်၊ ဆော်ဒီအာရေးဗီးယားနိုင်ငံတွေ ရှိနေပြီး အာရှမှာ ကိုဗစ်-၁၉ ကူးစက်မှုအမြင့်ဆုံး ၅ နိုင်ငံ ဖြစ်လာခဲ့တာပါ။ အာဆီယံနိုင်ငံတွေထဲမှာတော့ ဖိလစ်ပိုင်က ရောဂါကူးစက်ခံရသူ အရေအတွက် ၃၀၄,၂၂၆ ယောက်၊  စုစုပေါင်း သေဆုံးသူ ၅,၃၄၄ ယောက်နဲ့ ထိပ်ဆုံးမှာ ရှိနေပြီး သူ့နောက်မှာတော့ အင်ဒိုနီးရှားနိုင်ငံက ရောဂါကူးစက်ခံရသူ အရေအတွက် ၂၇၅,၂၁၃ ယောက်၊  စုစုပေါင်း သေဆုံးသူ ၁၀,၃၈၆ ယောက်နဲ့ ကပ်လိုက်နေပါတယ်။ စင်ကာပူနိုင်ငံမှာတော့ ရောဂါကူးစက်ခံရသူ အရေအတွက် ၅၇,၇၀၀ ယောက်၊  စုစုပေါင်း သေဆုံးသူ ၂၇ ယောက်ရှိနေပြီး သူ့နောက်မှာတော့ မလေးရှား၊ မြန်မာ၊ ထိုင်း၊ ဗီယက်နမ်၊ ကမ္ဘောဒီးယား၊ ဘရူနိုင်း၊ လာအိုနိုင်ငံတွေ အသီးသီး ရှိနေကြပါတယ်။ တကျော့ပြန်ကူးစက်မှုတွေ မြင့်တက်နေတဲ့ မြန်မာနိုင်ငံမှာတော့ ပထမဆုံးသော ကိုဗစ်-၁၉ အတည်ပြုလူနာကို ပြီးခဲ့တဲ့ မတ်လ ၂၃ ရက်နေ့မှာ စတင်တွေ့ရှိခဲ့တာဖြစ်ပြီး ဒီကနေ့မနက်ပိုင်းအထိ ကိုဗစ်-၁၉ အတည်ပြုလူနာ ၁၀,၇၃၄ ယောက်နဲ့ စုစုပေါင်း သေဆုံးသူ ၂၂၆ ယောက် ရှိပါတယ်။
9 months Ago

September 2, 2020

ကိုဗစ်-၁၉ ကပ်ရောဂါအခြေအနေ အရေးကြီးသည့် လမ်းဆုံလမ်းခွရောက်နေပြီဟု ဝန်ကြီးပြော 

လက်ရှိမှာ ကိုဗစ်-၁၉ ကပ်ရောဂါရဲ့ အခြေအနေဟာ အရေးကြီးတဲ့ လမ်းဆုံလမ်းခွ အခြေအနေတခုကိုရောက်နေတာကြောင့် အမြန်တုံ့ပြန်ဆောင်ရွက်မှပဲ အချိန်တိုအတွင်း ထိန်းချုပ်နိုင်မယ်လို့ ကျန်းမာရေးနဲ့ အားကစားဝန်ကြီး ဒေါက်တာမြင့်ထွေးက ပြောပါတယ်။ မနေ့ကလုပ်တဲ့ ရခိုင်ပြည်နယ်မှာသာမက တိုင်းနဲ့ပြည်နယ်အားလုံးမှာ ကိုဗစ်-၁၉ ကာကွယ်ထိန်းချုပ်ရေး အရှိန်အဟုန်မြှင့်ဖို့ ဗဟိုနဲ့ တိုင်းနဲ့ပြည်နယ် တာဝန်ရှိသူတွေ ဆွေးနွေးပွဲမှာ ပြောခဲ့တာပါ။ ရောဂါဟာ အချိန်တိုအတွင်း မြန်မြန်ကူးစက်ပြန့်ပွားနေတာကြောင့် အဆိုးဆုံးအခြေအနေကို မျှော်မှန်းပြီး ရထားတဲ့အရင်းအမြစ်တွေကို ထိထိရောက်ရောက်သုံးပြီး တုံ့ပြန်ဆောင်ရွက်နေတယ်လို့ ဆိုပါတယ်။ ရောဂါဖြစ်တာနည်းတဲ့ တိုင်းနဲ့ ပြည်နယ်ဆေးရုံတွေအနေနဲ့ လူနာတွေများလာနိုင်တယ်ဆိုတဲ့ ခံယူချက်ကို နောက်ခံထားပြီး စောင့်ကြည့်လူနာတွေကို စနစ်တကျထားရှိရေးနဲ့ စီမံခန့်ခွဲရေး ကိစ္စတွေကို ဆန်းစစ်သုံးသပ်ပြီး ကြိုတင်ပြင်ဆင်တာတွေ လုပ်ထားရမယ်လို့လည်း ပြောပါတယ်။ အခုရောက်နေတဲ့ ကပ်ရောဂါရဲ့ အခြေအနေနဲ့ အဆင့်မှာ ကိုဗစ်-၁၉ လူနာနဲ့ ထိတွေ့ခဲ့သူတွေကို အမြန်ဆုံးရှာဖွေဖော်ထုတ်တာဟာ အဓိကအကျဆုံးနဲ့ အရေးအကြီးဆုံး နည်းဗျူဟာဖြစ်ပြီး ရခိုင်ပြည်နယ်ကနေ တခြားနေရာတွေကို ခရီးသွားခဲ့သူတယောက်ချင်းကို ဝန်ကြီးဌာနက ဖုန်းနဲ့ ဆက်သွယ်ပြီး ကျန်းမာရေးစစ်ဆေးဖို့နဲ့ အသွားအလာကန့်သတ်မှုခံယူဖို့ အကြောင်းကြားနေတာကြောင့် ပြည်သူတွေအနေနဲ့ ပူးပေါင်းဆောင်ရွက်စေလိုတယ်လို့လည်း ပြောပါတယ်။ လက်ရှိရေးဆွဲထားတဲ့ လုပ်ငန်းလမ်းညွှန်တွေနဲ့ စံလုပ်ထုံးလုပ်နည်းတွေကိုလည်း ကိုဗစ်-၁၉ နဲ့ပတ်သက်လို့ ထပ်တွေ့တဲ့ အချက်အလက်အသစ်တွေ၊ ကူးစက်ပျံ့နှံ့ပုံစံတွေ၊ ပြောင်းလဲနေတဲ့ ရောဂါလက္ခဏာတွေ စတာတွေတွေကို ထည့်သွင်းစဉ်းစား မွမ်းမံရေးဆွဲပြီး တိုင်းနဲ့ပြည်နယ်တွေကို ဖြန့်ဝေနေတယ်လို့လည်း ပြောပါတယ်။ ပြီးတော့ အသွားအလာကန့်သတ်စောင့်ကြပ်ကြည့်ရှုမယ့်ကာလ၊ လူနာတွေကို ကုသမှုပေးတာနဲ့ ဆေးရုံဆင်းခွင့်ပေးတဲ့ သတ်မှတ်ချက်တွေကို ကမ္ဘာ့ကျန်းမာရေးအဖွဲ့၊ အမေရိကန် CDC နဲ့ နောက်ဆုံးပေါ် သုတေသနတွေ့ရှိချက်တွေကို အခြေခံပြီး သက်ဆိုင်ရာ ပညာရှင်အသီးသီးနဲ့ ဆွေးနွေးတိုင်ပင် ပြုပြင်မွမ်းမံနေတယ်လို့လည်း ပြောပါတယ်။ ကျန်းမာရေးဝန်ကြီးဌာနရဲ့ ကိုဗစ်-၁၉နဲ့ပတ်သက်လို့ ပြောရေးဆိုခွင့်ရှိသူ ဒေါက်တာ သန်းနိုင်စိုးက “ဒါတွေကတော့ ပညာရှင်တွေ တိုင်ပင်ဆွေးနွေးနေပါတယ်။ အတည်ပြုပြီးရင် ထုတ်ပြန်ပေးပါ့မယ်” လို့ ပြောပါတယ်။ လက်ရှိမှာတော့ လူနာတွေကို ဝေဘာဂီအထူးကုဆေးရုံ၊ တောင်ဥက္ကလာပ အထူးကုဆေးရုံတို့အပြင် ဖောင်ကြီးမှာလည်း ကိုဗစ်-၁၉ ကုသရေးဌာနဖွင့်လှစ်ပြီး ကုသနေပါတယ်။
10 months Ago
More News
Up