ကိုဗစ်ရောဂါ

September 2, 2021

ချမ်းမြသာစည်တွင် Swab ယူနေစဉ် သေဆုံးသူ ၁ ဦးအပါအဝင် ကိုဗစ်ရောဂါဖြင့် ၁၃ ဦး ထပ်မံ သေဆုံး

မန္တလေးခရိုင် ချမ်းမြသာစည်မြို့နယ်မှာ စက်တင်ဘာ ၁ ရက်က Swab ယူစစ်ဆေးနေစဉ် သေဆုံးခဲ့တဲ့ ကိုဗစ်သံသယလူနာ တစ်ဦး အပါအဝင် ကိုဗစ်ရောဂါကြောင့် ၁၃ ဦး ထပ်မံ သေဆုံးခဲ့တယ်လို့ မန္တလေးမြို့ခံလူမှုကူညီရေးအသင်းက သိရပါတယ်။

မန်းတောင်ရိပ်ခို ကိုဗစ်ကုသရေးစင်တာက ကိုဗစ်လူနာ ၁ ဦး၊ မန္တလေးဆေးရုံကြီးရင်ခွဲရုံက ၇ ဦး၊ မြို့တော်ဆေးရုံက ၁ ဦး၊ ကံ့ကော်ဆေးရုံက ၁ ဦး၊ အရပ်ထဲက ကိုဗစ်လူနာ ၁ ဦးနဲ့ သံသယလူနာ ၂ ဦး သေဆုံးခဲ့တာပါ။

ဖော်ပြပါ ကိုဗစ်ကြောင့် သေဆုံးသူ စာရင်းဟာ မန္တလေးမြို့ခံပရဟိတအသင်းတချို့ရဲ့ ကူညီဆောင်ရွက်ပေးခဲ့ အချက်အလက်တွေသာ ဖြစ်ပါတယ်။ 

မန္တလေးခရိုင်မှာ ကိုဗစ်-၁၉ ရောဂါကြောင့် ဇူလိုင်လက သေဆုံးသူ  ၂၀၀၀ ကျော်နဲ့ သြဂုတ်လမှာ ၇၀၀ လောက် သေဆုံးခဲ့တယ်လို့ သိရပါတယ်။

သေဆုံးသူအများစုက အသက်အရွယ်ကြီးသူတွေ ရောဂါအခံရှိသူတွေဖြစ်ပြီး ဆေးခန်းမပြသနိုင်တာ၊ ဆေးဝါးအခက်အခဲ၊ အောက်ဆီဂျင်အခက်အခဲတွေနဲ့ သေဆုံးကြတာပါ။ 

စစ်ကောင်စီ ကျန်းမာရေးဝန်ကြီးဌာနရဲ့ စက်တင်ဘာ ၁ ရက် ထုတ်ပြန်ချက်အရ မန္တလေးခရိုင်မှာ ကိုဗစ်ကူးစက်ခံရသူ ၁၆ ဦးရှိတယ်လို့ ထုတ်ပြန်ထားပါတယ်။

လက်ရှိ မန္တလေးတိုင်းဒေသကြီးအတွင်းရှိ မြို့နယ် ၂၀ မြို့နယ်ကို Stay At Home သတ်မှတ်ထားပါတယ်။

3 months Ago

August 11, 2021

ရေဦးတွင် ကိုဗစ်ရောဂါနှင့်ကိုဗစ်သံသယကြောင့် သေဆုံးသူများအတွက် စုပေါင်းသရဏဂုံတင်

စစ်ကိုင်းတိုင်း၊ ရေဦးမြို့ မြို့မသုသာန်မှာ ဩဂုတ် ၁၁ ရက်နေ့မနက်ပိုင်းက ကိုဗစ်-၁၉ ရောဂါနဲ့ ကိုဗစ်သံသယ‌ကြောင့် သေဆုံးကြတဲ့သူတွေအတွက်  ကိုဗစ်ကော်မတီ၊ ပုညကုသလလူမှုရေးအသင်း၊ မြင့်မြတ်သူနာမှုကူညီရေးအဖွဲ့တွေက ဦးဆောင်ပြီး မြို့နယ်ဆရာတော်‌ကြီးတွေကို ပင့်ဆောင်ကာ သရဏဂုံတင် အမျှအတန်းပေးဝေခဲ့ကြပါတယ်။

မြို့နယ်အတွင်းမှာ လတ်တလောကာလ ကိုဗစ်သံသယနဲ့ သေဆုံးသူဦးရေ များပြားနေပြီး ရုပ်အလောင်းတွေကို ဗုဒ္ဓဘာသာ ထုံးတမ်းစဉ်လာအရ သရဏဂုံမတင်ရဘဲ နေ့ချင်း မီးသင်္ဂြိုဟ်ရတာကြောင့် အခုလို စုပေါင်း သရဏဂုံတင် အမျှတန်းပေးဝေကြတာလို့ ကိုဗစ်ကော်မတီဝင်တစ်ဦးက ပြောပါတယ်။

“ဆရာတော်တွေလည်း သရဏဂုံတင်ကို မလိုက်ရဲလောက်အောင်ဖြစ်နေတာဗျ။ မြို့နယ်သံဃာ့မဟာနာယက ဆရာတော်ကြီးတောင် နာရေးတခုကို သရဏဂုံ လိုက်တင်တာ ကိုဗစ်ကူးစက်ခံရပြီး ပျံလွန်တော်မူသွားတယ်။ ကျနော်တို့မြို့နယ်မှာ ဆရာတော် သံဃာတော် ဆယ်ပါးထက်မနည်း ပျံလွန်တော်မူသွားပြီးပြီ။ အဲဒီနောက်ပိုင်း တစ်ယောက်ဆုံးသွားရင် တခါတည်း မီးသင်္ဂြိုဟ်လိုက်တာ၊ နောက်ပြီး မီးသင်္ဂြိုဟ်စက်နားရုံးဆောက်ပြီး ၂၄ နာရီ အကူအညီပေးနေတဲ့ မြင့်မြတ်သူနာမှုကူညီရေးအဖွဲ့က လူငယ်တွေကလည်း တစ္ဆေခြောက်လို့ နေလို့မရဘူး ပြောတယ်၊ ဒါကြောင့် စုပေါင်းသရဏဂုံတင် အမျှအတန်းပေးဝေကြတာ” လို့ ပြောပါတယ်။

ရေဦးမြို့မှာ ကိုဗစ်-၁၉ ကြောင့် ၁၀ ယောက်ကျော်နဲ့ ကိုဗစ်သံသယကြောင့် ၁၀၀ လောက် သေဆုံးပြီး ဖြစ်တယ်လို့ သိရပါတယ်။

4 months Ago
More News
Up