ကိုဗစ်စည်းကမ်း

October 21, 2021

ကိုဗစ်စည်းကမ်း ဆက်လက်လိုက်နာရန်လိုအပ်နေဟု ကျန်းမာရေးကျွမ်းကျင်သူများပြော

မြန်မာနိုင်ငံမှာ လတ်တလော ကိုဗစ်-၁၉ ရောဂါပိုးကူးစက်မှုတွေ လျော့ကျသွားပေမဲ့ လူစုလူဝေးကိုရှောင်ကြဉ်ဖို့နဲ့ ကိုဗစ်စည်းကမ်းတွေကိုတော့ ဆက်လက်လိုက်နာဖို့ လိုအပ်နေသေးတယ်လို့ အထွေထွေအထူးကုသမားတော်တွေနဲ့  ကျန်းမာရေးပညာရှင် တချို့က ပြောပါတယ်။

အောက်တိုဘာ ၂၀ ရက်  သီတင်းကျွတ်လပြည့်နေ့က ရန်ကုန်မြို့ရွှေတိဂုံဘုရားအပါအဝင် စေတီဘုရားတွေမှာ  ပြည်သူတွေ  ကိုဗစ်စည်းကမ်းနဲ့အညီ ဘုရားဖူးနိုင်အောင် စစ်ကောင်စီက စီစဉ်မပေးပဲ  လူတွေ ပြည့်ကျပ် တိုးဝှေ့နေတာကို မြင်တွေ့ခဲ့ရတာပါ။  

ကိုဗစ်ကာကွယ်ဆေးထိုးထားပေမယ့်လည်း ပိုးသယ်ဆောင်သူတွေ ဖြစ်နိုင်သေးတဲ့အတွက် မဖြစ်မနေလူစု လူဝေးထဲသွားမယ်ဆိုရင်တော့ ကိုဗစ်စည်းကမ်းတွေကို လိုက်နာဖို့ လိုအပ်နေသေးတယ်လို့ ကျန်းမာရေးပညာရှင်တစ်ဦးက ပြောပါတယ်။ 

"ကိုဗစ်ဖြစ်ဖူးသူတွေနဲ့ ကာကွယ်ဆေးထိုးထားတဲ့သူတွေဟာ သူတို့ထဲကို ကိုဗစ်ပိုးမဝင်တော့ပေမယ့် သူတို့ရဲ့ နှာခေါင်းနဲ့ ပါးစပ်တွေမှာ ကိုဗစ်ပိုးတွယ်ကပ်နိုင်သေးတဲ့ တွေ့ရှိချက်တွေလည်း ရှိထားပါတယ်။ ဒါကြောင့်နိုင်ငံတကာမှာဆိုရင် ကိုဗစ်စည်းကမ်းတွေကို လျှော့ချလိုက်တာပဲ ရှိတယ်။ ပယ်ဖျက်လိုက်တာ မရှိဘူး။ လူစုလူဝေးထဲသွားမယ်ဆိုရင်တော့ ကိုဗစ်စည်းကမ်းတွေကို သေချာလိုက်နာဖို့ လိုမယ်။ "

လက်ရှိမြန်မာနိုင်ငံမှာ ရက်သတ္တပတ် ၂ ပတ်၊  ၃ပတ်အတွင်း ဖျားနာသူတွေ များလာပြီး ဖျားနာသူအများစုဟာ ကိုဗစ်မဟုတ်တဲ့ တုပ်ကွေးရောဂါ ခံစားရသူတွေ ပိုများတာတွေ့ရတယ်လို့ အထွေထွေ အထူးကုသမားတော် တစ်ဦးက ပြောပါတယ်။ 

"အများစုက ကိုဗစ်ကြောင့်ဖျားတာမျိုးမဟုတ်ပဲ သာမန် အအေးမိရောဂါ၊ တုပ်ကွေးရောဂါနဲ့ ဘက်တီးရီးယားကြောင့်ဖြစ်တဲ့ အသက်ရှုလမ်းကြောင်းပိုးဝင် ရောင်ရမ်းဖျားနာတာမျိုးတွေ တွေ့ရတယ်။ တုပ်ကွေးရော၊ အအေးမိတာတွေရောကလည်း ကိုဗစ်လိုပဲ အသက်ရှုလမ်းကြောင်းက တဆင့် ကူးစက်နိုင်တဲ့ ရောဂါဖြစ်တယ်။ တုပ်ကွေးရောဂါဟာ ရောဂါပြင်းထန်မှုသိပ်မရှိပေမယ့် အသက်ငယ်ရွယ်လွန်းသူ၊ အသက်ကြီးရင့်တဲ့သူတွေနဲ့ နာတာရှည်ရောဂါအခံရှိတဲ့ သူတွေမှာ အထူးသဖြင့် အဆုတ်နာတာရှည်ရောဂါရှိတဲ့သူတွေမှာ အသက်သေဆုံးတဲ့အထိ ဖြစ်တာမျိုးတွေ တွေ့ရတယ်။အဲ့အခါကျတော့ ကာကွယ်ရေး အစီအစဉ်မျိုးနဲ့ ဆောင်ရွက်သင့်တယ်။ လူစုလူဝေးထဲမှာ ကိုယ်က ကာကွယ်ဆေးလည်း မထိုးထားဘူး၊ ကိုယ့်ရဲ့ ကိုယ်ခံအားစနစ်ကလည်း ကျနေမယ်ဆိုရင် တုပ်ကွေး ရောဂါလက္ခဏာတွေ ပြင်းပြင်းထန်ထန် ခံစားရနိုင်တယ်။ "

ဒါ့အပြင် ကိုဗစ်ဖြစ်ဖူးတဲ့သူတွေဟာ ကိုဗစ်ရဲ့ နောက်ဆက်တွဲရောဂါတွေ ခံစားရနိုင်တာကြောင့် ကိုဗစ်ပိုးပျောက်ကင်းပြီး ၃လ အထိ အနားယူသင့်တယ်လို့ ပညာရှင်တွေက ထောက်ပြထားပါတယ်။

မနေ့ညက သတင်းကျွတ်လပြည့်နေ့မှာ လည်ပတ်သွားလာသူတချို့ဟာ ကိုဗစ်စည်းကမ်းတွေကို မလိုက်နာတဲ့အပြင် နှာခေါင်းစည်း Mask တောင်မတပ်ကြတာတွေလည်းရှိခဲ့တယ်လို့ ရန်ကုန်မြို့က တက္ကစီယာဉ်မောင်းတစ်ဦးက ပြောပါတယ်။ 

အာဏာသိမ်း စစ်ကောင်စီကတော့ ကိုဗစ်ကိုအကြောင်းပြပြီး ရန်ကုန်မှာ လူ ၅ ဦးထက်ပိုပြီး မစုဝေးဖို့အမိန့်ကို ထုတ်ပြန်ထားသလို ကိုဗစ်ကာကွယ်ရေးစည်းကမ်းတွေကိုလည်း ပြန်လည်မရုပ်သိမ်းသေးပါဘူး။

ဘုရားဖူးလာတဲ့ ပြည်သူတချို့ကတော့ ကိုဗစ်နဲ့ အာဏာသိမ်းမှုတွေကြောင့် ကာလရှည်အိမ်ထဲမှာ နေခဲ့ရတဲ့အတွက် စိတ်ထွက်ပေါက်ပေးတဲ့အနေနဲ့ အပြင်ထွက်လာကြတာလို့ဆိုပါတယ်။ 

အခုလိုဘုရားဖူးလာသူတွေ  ကိုဗစ်စည်းကမ်းတွေနဲ့မညီဘဲ လူအများအပြားစုဝေးနေတာဟာ ရောဂါကူးစက်မှုကြီးကြီးမားမား ပြန်ဖြစ်စေနိုင်တဲ့အခြေအနေဖြစ်ခဲ့ပါတယ်။

ကိုဗစ်တတိယလှိုင်းတုန်းကလည်း  စစ်ကောင်စီရဲ့လစ်လျူရှုမှုကြောင့် ရန်ကုန်မြို့မှာ ထောင်နဲ့ချီ တဲ့ပြည်သူတွေဟာ ကိုဗစ်-၁၉ ရောဂါနဲ့ အသက်ဆုံးရှုံးခဲ့ရပါတယ်။ 

အခုလို ရာသီအကူးအပြောင်းကာလမှာ ကိုဗစ်ရောဂါအပြင် ရာသီတုပ်ကွေးရောဂါကူးစက်မှုတွေလည်း ရှိနေတာကြောင့် ပြည်သူတွေဟာ ကျန်းမာရေးကို ဂရုစိုက်ဖို့လိုတယ်လို့  အထွေထွေရောဂါကု သမားတော်ကြီးတစ်ယောက်က ပြောပါတယ်။ 

လက်ရှိမြန်မာနိုင်ငံမှာ ကိုဗစ်-၁၉ ပိုးကူးစက်မှုနှုန်းတွေ လျော့ကျသွားပေမဲ့ ဖျားနာသူတွေများနေတာကြောင့် ကိုဗစ်စတုတ္ထလှိုင်း ပြန်လာတော့မလားဆိုပြီး ပြည်သူတွေက စိုးရိမ်နေကြပါတယ်။ ကျန်းမာရေး ကျွမ်းကျင်ပညာရှင်တွေကတော့ ကိုဗစ်စတုတ္ထလှိုင်း လာဖို့တော့ မဖြစ်နိုင်သေးဘူးလို့ သုံးသပ်ထားပါတယ်။ 

1 month Ago

January 12, 2021

ဂိုးသွင်းပြီးအောင်ပွဲခံချိန် ကိုဗစ်စည်းကမ်း လိုက်နာရန်ခက်ခဲဟု အာဆင်နယ်နည်းပြပြော

ဂိုးသွင်းပြီး အောင်ပွဲခံချိန်မှာ ခပ်ခွာခွာနေဖို့ ညွှန်ကြားထားပေမယ့် စိတ်ခံစားချက်ကို ထိန်းချုပ်ဖို့ ခက်ခဲတယ်လို့ အာဆင်နယ်နည်းပြ အာတီတာက ပြောပါတယ်။  ယူကေမှာ တနိုင်ငံလုံးနီးပါးကို လော့ဒေါင်းချထားပြီး ဘောလုံးပွဲတွေကိုတော့ စည်းမျဉ်း ကန့်သတ်ချက်တွေနဲ့အညီ ဆက်ပြီး ကျင်းပနေပါတယ်။  ကစားသမားတွေအနေနဲ့ ကွင်းပြင်ပမှာ ကိုဗစ်စည်းမျဉ်းစည်းကမ်းတွေကို လိုက်နာဖို့ လိုအပ်ပြီး ပွဲကစားနေစဉ်မှာလည်း မလိုလားအပ်တဲ့ အပြုအမူတွေမလုပ်ဖို့ ညွှန်ကြားထားတာပါ။ အထူးသဖြင့် ဂိုးသွင်းပြီး အောင်ပွဲခံတဲ့အချိန်တွေမှာ ခပ်ခွာခွာမနေဘဲ အတူတကွ အောင်ပွဲခံကြတာကို မလုပ်ကြဖို့ တိုက်တွန်းထားတာ ဖြစ်ပါတယ်။  အာဆင်နယ်အသင်းသားတွေဟာ နယူးကာဆယ်ကို အနိုင်ရခဲ့တဲ့ပွဲမှာ အချိန်ပို သွင်းဂိုးတွေ သွင်းယူအပြီးမှာ ညွှန်ကြားချက်တွေအတိုင်း မလိုက်နာခဲ့ဘဲ အသင်းသားတွေက အတူတကွ အောင်ပွဲခံခဲ့ကြတာပါ။  အာဆင်နယ်အသင်းဟာ ပရီးမီးယားလိဂ်မှာ ၃ ပွဲဆက်တိုက် အနိုင်ရခဲ့ပြီးနောက် ခရစ္စတယ်ပဲလေ့၊ နယူးကာဆယ်အသင်းတွေနဲ့ ဆက်ပြီး ကစားသွားရမှာ ဖြစ်ပါတယ်။
11 months Ago
More News
Up