ထိုင်းနိုင်ငံမှာ ကိုဗစ်-၁၉ ကူးစက်မှု လျော့နည်းလာပြီး ကာကွယ်မှုနည်းလမ်းတွေ တွင်ကျယ်လာတဲ့အတွက် ဒေသန္တရရောဂါအဖြစ် သတ်မှတ်ကာခရိုင်တချို့မှာ Mask နှာခေါင်းစည်း တပ်စရာမလိုတော့ဘူးလို့ သတင်းတွေ ထွက်ပေါ်ခဲ့ပေမဲ့လည်း တကယ်တမ်း အကောင်အထည် ဖော်ခြင်းတော့ မရှိသေးပါဘူး။
ထိုင်းနိုင်ငံမှာ နှာခေါင်းစည်းတွေချွတ်ဖို့ စည်းမျဉ်းဥပဒေချမှတ်ဖို့ မရှိဘူးလို့ ထိုင်းဝန်ကြီးများရုံး ပြောရေးဆိုခွင့်ရှိသူ နိုင်းထနကွန်းဝမ်ဘွန်းခုန်းချနက ပြီးခဲ့တဲ့ မေ ၃၀ ရက် ဝန်ကြီးများအဖွဲ့ အစည်းအဝေးအပြီးမှာ သတင်းထောက်တွေကို ပြောပါတယ်။
ထိုင်းဒုဝန်ကြီးချုပ်နဲ့ ကျန်းမာရေးဝန်ကြီး အနုထင်း ချန်းဝီရကွန်းကလည်း Mask ချွတ်ရေး၊ မချွတ်ရေးနဲ့ ပတ်သက်လို့ အစိုးရအနေနဲ့ စည်းကမ်းဥပဒေ သတ်မှတ်ထားတာ မရှိကြောင်း၊ အရင်ကလည်း Mask ချွတ်လို့ အရေးယူ အပြစ်ပေးတာမရှိခဲ့ဘဲ သက်ဆိုင်ရာ ဝန်ကြီးဌာန အသီးသီးရဲ့ နေရာဒေသအလိုက် တိုက်တွန်းနှိုးဆော်တာတွေပဲ ရှိတယ်လို့ ဆိုပါတယ်။
နေရာအလိုက်လို့ဆိုရာမှာ လူချင်း ၂ မီတာ အကွာအဝေးမှာ နေနိုင်တဲ့ ကွင်းပြင်တွေမှာ၊ အားကစားလုပ်ချိန်တွေမှာ Mask ချွတ်နိုင်ကြောင်း၊ လူထူထပ်သိပ်သည်းတဲ့ နေရာတွေမှာတော့ တပ်ထားသင့်ကြောင်း၊ ကိုဗစ်-၁၉ တင်မကဘဲ အသက်ရှူလမ်းကြောင်းဆိုင်ရာ ရောဂါပိုးတွေ၊ မျောက်ကျောက်ရောဂါပိုးတွေပါ ကာကွယ်ဖို့ Mask ဆက်ပြီး တပ်ထားသင့်တယ်လို့ ကျန်းမာရေးဝန်ကြီးက ပြောပါတယ်။
ထိုင်းပီဘီအက်စ် သတင်းဌာနက Mask ချွတ်ဖို့ အဆင်သင့်ပြီလားဆိုတဲ့ မေးခွန်းနဲ့ ပြည်သူ့စစ်တမ်း ကောက်ယူရာမှာ အများစုက မချွတ်သင့်သေးဘူးလို့ ဖြေဆိုကြပါတယ်။
ဒီမတိုင်ခင်ကတော့ ထိုင်းနိုင်ငံ ကူးစက်ရောဂါနှိမ်နင်းရေး ဦးစီးဌာနက လာမယ့် ဇွန်လထဲမှာ ကိုဗစ်-၁၉ ရောဂါကို ဒေသန္တရရောဂါအဖြစ် ကြေညာပြီး ကူးစက်မှု အစိမ်းရောင်ဇုန်နဲ့ အပြာရောင်ဇုန်ရှိ ခရိုင်တွေမှာ Mask နှာခေါင်းစည်း ချွတ်လို့ရမယ်လို့ ပြောဆိုထားတာ ရှိပါတယ်။
ထိုင်းနိုင်ငံမှာ ကိုဗစ်-၁၉ ရောဂါ ကူးစက်မှုတွေ လျော့ကျလာခဲ့ပါက လာမယ့် ဇွန် ၁ ရက်က စတင်ကာ ခရီးသွားလာမှုဆိုင်ရာ ကန့်သတ်ချက်တွေအားလုံးကို ဖယ်ရှားသွားဖို့ ရှိနေတယ်လို့ ထိုင်းခရီးသွားလုပ်ငန်းနဲ့ အားကစားဝန်ကြီးဌာနက ပြောပါတယ်။
လာမယ့် ဧပြီလထဲမှာ ကျင်းပဖို့ ရှိနေတဲ့ ဆုန်ခရန်သင်္ကြန်ပွဲတော်ကာလမှာ ရောဂါကူးစက်မှုနှုန်းတွေ တိုးမလာခဲ့ဘူးဆိုရင်တော့ ဝန်ကြီးဌာနအနေနဲ့ ကိုဗစ်-၁၉ ရောဂါအခြေအနေ စီမံကြီးကြပ်ရေးစင်တာ (စီစီအက်စ်အေ)နဲ့ အစိုးရအဖွဲ့ဆီ နိုင်ငံခြားသားခရီးသွားဧည့်သည်တွေ ဝင်ရောက်ခွင့်တွေအတွက် စည်းကမ်းတင်းကျပ်ထားတဲ့ ကန့်သတ်ချက်တွေ ဖြေလျှော့နိုင်ဖို့ တင်ပြသွားမယ်လို့ ဝန်ကြီး ဖိဖက်ထ် ရတ်ချာကစ် ပရာကန်က ပြောပါတယ်။
“အစိုးရက ခွင့်ပြုတယ်ဆိုရင်တော့ လာမယ့်ကာလမှာ ဒီအခြေအနေက တိုးတက်သွားဖို့ ရှိနေပြီး ဇွန် ၁ ရက်ကနေ စတင်ပြီးတော့ ဝန်ကြီးဌာနက ခရီးသွားကန့်သတ်ချက်တွေအားလုံးကို ဖယ်ရှားသွားနိုင်မှာ ဖြစ်တယ်။”
ဒီအစီအစဉ်အောက်မှာ ကိုဗစ်-၁၉ ကာကွယ်ဆေး အပြည့်ထိုးနှံပြီးသူ နိုင်ငံခြားသား ခရီးသွားဧည့်သည်တွေအနေနဲ့ ထိုင်းနိုင်ငံတွင်း လွတ်လွတ်လပ်လပ် ဝင်ရောက်လာနိုင်မယ်လို့ ဆိုပါတယ်။
တချိန်တည်းမှာပဲ ခရီးသွားဧည့်သည်တွေကို ပြီးခဲ့တဲ့ ဧပြီ ၁ ရက်ကစတင်ကာ Test & Go အစီအစဉ်နဲ့ ၇၂ နာရီအတွင်း ကိုဗစ်-၁၉ ရောဂါပိုးကင်းရှင်းကြောင်း စစ်ဆေးတွေ့ရှိရမှ ဆက်လက်လည်ပတ်ခွင့်ပြုမယ့် အစီအစဉ်ကို ထားရှိဖို့ လိုအပ်တော့မှာ မဟုတ်ပါဘူး။
ခုလို ခရီးသွားလုပ်ငန်းကန့်သတ်ချက်တွေကို ပြောင်းလဲနိုင်မယ်ဆိုရင်တော့ နိုင်ငံ့စီးပွားရေးကို လှုံ့ဆော်ပေးနိုင်မှာဖြစ်ပြီး တပြိုင်တည်းမှာပဲ လာမယ့် ဇူလိုင်လထဲမှာ ထိုင်းပြည်သူ့ကျန်းမာရေးဝန်ကြီးဌာနက ကိုဗစ်-၁၉ ကို ကပ်ရောဂါအဆင့်ကနေ ပယ်ဖျက်တဲ့ ပေါ်လစီအောက်မှာလည်း ဆက်လက်ပြီးတော့ အကောင်အထည်ဖော်သွားနိုင်မယ်လို့ ဆိုပါတယ်။
ဒါပေမယ့် ထိုင်းနိုင်ငံ ရောဂါထိန်းချုပ်ရေးဌာန (ဒီဒီစီ) က လာမယ့် ဆုန်ခရန် သင်္ကြန်ပွဲတော်ကာလအထိ နေ့စဉ် ကိုဗစ်-၁၉ ကူးစက်မှုနှုန်း ၁ သိန်းထိ အဆိုးဝါးဆုံးအခြေအနေမှာ ရှိလာနိုင်တယ်လို့ ခန့်မှန်းထားတာပါ။
လာမယ့် သီတင်းပတ်တွေထဲမှာ ရောဂါကူးစက်မှုအဆင့်တွေ လျော့ကျလာမလား၊ ဒါမှမဟုတ် ပြင်းထန်လာမလားဆိုတာကတော့ ကိုဗစ်-၁၉ ရောဂါကူးစက်ပြန့်ပွားမှု ကြိုတင်ကာကွယ်မှုတွေ ဘယ်လို တင်းကျပ်ချမှတ်ထားမလဲဆိုတဲ့အပေါ် မူတည်တယ်လို့ ဒီဒီစီက ဆိုပါတယ်။
