ကိုဗစ်ကာလ

August 30, 2021

သိန္နိမြို့တွင် ကိုဗစ်ကာလ ပြည်သူမှ ပြည်သူကို စားသောက်ကုန်များ လှူဒါန်း

ရှမ်းပြည်မြောက်ပိုင်း သိန္နိမြို့၊ ပန်းခြံရှေ့မှာ သြဂုတ် ၂၉ ရက် ညနေက ကိုဗစ်ကာလအတွင်း စားသောက်ရေးခက်ခဲသူတွေအတွက်  ပြည်သူက ပြည်သူကို ကူညီလှူဒါန်းခဲ့ပါတယ်။ 

ကိုဗစ်ကာလ စားသောက်ရေးခက်ခဲတဲ့ မရှိနွမ်းပါး အခြေခံလူတန်းစားတွေအတွက် မီးဖိုချောင်သုံးစားသောက်ကုန်တွေကို လိုသလောက်ယူဆောင်နိုင်ပြီး ပိုလျှင်လှူ လိုရင်ယူအစီအစဥ်နဲ့ ညီလှူဒါန်းနေတာပါ။ 

ကိုဗစ်-၁၉ ရောဂါဖြစ်ပွားတာ ကြာရှည်လာတာနဲ့အမျှ အတည်ပြုလူနာတွေ များပြား လာတဲ့အတွက် အခြေခံလူတန်းစားတွေဟာ အလုပ်အကိုင်ရှားပါးတာကြောင့် စားသောက်ရေးအခက်အခဲတွေ ရင်ဆိုင်နေရတယ်လို့ မြို့ခံတွေက ဆိုပါတယ်။ 

သိန္နီမြို့ အမှတ် ၂ ရပ်ကွက်နေထိုင်သူ တစ်ဦးက "မြို့မှာက ရောဂါပိုးတွေ့တာ များများလာတော့ အလုပ်ရှင်တွေက အလုပ်တွေရပ်ထားတယ်။ တစ်နေ့လုပ် တနေ့စားဆိုတော့ အလုပ်မရှိလို့ စားသောက်ရေးခက်ခဲနေတဲ့အချိန် အခုလိုလှူဒါန်းပေးတဲ့ အလှူရှင်တွေကို ကျေးဇူးတင်ပါတယ်"လို့ ဆိုပါတယ်။

ပန့်လော့ကျေးရွာသား အလှူရှင်ဦးအောင်အောင်လွင်က "ဆင်းရဲနွမ်းပါးတဲ့သူတွေ၊ အလုပ်အကိုင် အခက်အခဲရှိတဲ့သူတွေအတွက်လှူဖြစ်တာပါ။ အခုချိန်မှာ လူတိုင်းအခက်အခဲရှိနေပေမယ့် မရှိတဲ့သူတွေက ပိုခက်ခဲတယ် ဒါကြောင့် တတ်နိုင်တဲ့ဘက်က  ဆက်ပြီးလှူသွားဖို့ ရှိတယ်"လို့ ဆိုပါတယ်။

မရှိနွမ်းပါးသူတွေကို ကူညီလှူဒါန်းရာမှာ ပြည်သူက ပြည်သူကို ပြန်လည်ကူညီလှူဒါန်းတာ ဖြစ်လို့ တချို့ဒေသတွေမှာ စစ်ကောင်စီက အလှူရှင်တွေကို ဖမ်းဆီးတာတွေ ပိတ်ပင်တားမြစ်တာ တွေရှိတဲ့အတွက် အခြေခံ လူတန်းစားတွေရဲ့ စားသောက်ရေးအတွက် စိုးရိမ်တယ်လို့ အလှူရှင်တွေက ဆိုပါတယ်။ 

ဇွန်လ၂၁ ရက်က စတင်ပြီး သိန္နီမြို့မှာ ကိုဗစ် အတည်ပြုလူနာ ၂၀၀ နီးပါးရှိပြီး ၊ အတည်ပြုသေဆုံးသူ ၂ ဦးနဲ့ သံသယသေဆုံးသူ ၃၀ လောက်ရှိပြီလို့ မြို့ခံ လူမှုကူညီရေးအဖွဲ့က နေသိရပါတယ်။

3 weeks Ago

July 27, 2021

မြိုင်ကြီးငူတွင် ကိုဗစ်ကာလ ထီးတင်ပွဲနှင့် သံဃာ ၁၀၀၀ ဆွမ်းကပ်လှူပွဲကျင်းပ

ကရင်ပြည်နယ်၊ လှိုင်းဘွဲမြို့နယ်၊ မြိုင်ကြီးငူအထူးဒေသ ကျောက်စာကွင်းမှာ မုခ်ဦး ထီးတော်တင်ပွဲနဲ့ သံဃာတော်အပါး ၁၀၀၀ ဆွမ်းဆက်ကပ်လှူဒါန်းပွဲကို ဇူလိုင် ၂၆ ရက်နေ့ မနက်ပိုင်းက ပြုလုပ်ခဲ့ပါတယ်။

ကူးစက်မြန် ကိုဗစ်-၁၉ ရောဂါဖြစ်ပွားသူများပြားနေချိန် မြိုင်ကြီးငူဆရာတော် ဘဒ္ဒန္တသုဇနရဲ့ သက်တော် ၇၃ နှစ်ပြည့် ဝိဇာတမွေးနေ့ မင်္ဂလာကို ရည်စူးပြီး မုခ်ဦး ထီးတော်တင်ပွဲနဲ့ သံဃာတော်အပါး ၁၀၀၀ ဆွမ်းဆက်ကပ်လှူဒါန်းပွဲကို ပြုလုပ်ခဲ့တာပါ။

မြိုင်ကြီးငူ ဒေသခံတစ်ဦးက "အခုဘုရားပွဲကလည်း တိုက်အုပ် ဆရာတော်လုပ်တာဆိုတော့ သေသေချာချာတော့ မသိဘူး။ အခုကာလမှာ ဘာပွဲမှ မလုပ်တာ အကောင်းဆုံးပဲ။ ဖြစ်ရင် ကိုယ်ပဲခံရမှာ ဘယ်သူမှ လာမခံပေးဘူး"လို ဆိုပါတယ်။

လက်ရှိမြိုင်ကြီးငူဆရာတော် ဘဒ္ဒန္တဉာဏိကနဲ့ ဒေသခံရွာလူကြီးတွေက ဦးဆောင်ပြီးပွဲပြုလုပ်ခဲ့တာဖြစ်ပြီး ဆွမ်းကပ်လှူဒါန်းပွဲကို ဒေသခံ ၃၀၀ လောက် အနည်းဆုံးတက်ရောက်ခဲ့တယ်လို့ ဒေသခံတွေက ဆိုပါတယ်။

မြိုင်ကြီးငူအထူးဒေသမှာ ကိုဗစ်ရောဂါကူးစက်ခံရသူ ၁၀ ယောက်လောက်ရှိပြီး  ဆေးရုံရှိ ကျန်းမာ ရေးဝန်ထမ်းတွေနေအိမ်မှာ ကွာရန်တင်း အကုန်ဝင်နေရတယ်လို့ ကျေးရွာတာဝန်ရှိသူတစ်ဦးက ဆိုပါတယ်။

ကရင်ပြည်နယ်အတွင်း ကိုဗစ်ရောဂါကူးစက်ခံရသူ အတည်ပြုလူနာ ၂၀၀၀ လောက်ရှိပြီ သေဆုံးသူ ၇၀ ကျော်ရှိကာ ကူးစက်ခံထားရပြီး အတည်မပြုရသေးတဲ့လူနာတွေ အများအပြားရှိနေတယ်လို့  တာဝန်ရှိသူက ပြောပါတယ်။

2 months Ago
More News
Up