ကိုဗစ်

January 6, 2023

ကိုဗစ်ကပ်ရောဂါ အခြေအနေကို မျှမျှတတ လုပ်ဆောင်သင့်ဟု အီးယူကို တရုတ်ဝေဖန်

ဥရောပသမဂ္ဂ (အီးယူ) အနေနဲ့ တရုတ်နိုင်ငံရဲ့ ကိုဗစ် ကပ်ရောဂါအခြေအနေကို ဓမ္မဓိဋ္ဌာန်ကျကျ၊ မျှမျှတတ လုပ်ဆောင်သင့်တယ်လို့ တရုတ်နိုင်ငံခြားရေးဝန်ကြီးဌာနက ဇန်နဝါရီ ၆ ရက်နေ့မှာ ပြောပါတယ်။

“နိုင်ငံရေးအရ ခြယ်လှယ်ဖို့ကို ထားလိုက်ဦး၊ ခွဲခြားဆက်ဆံတဲ့ အလေ့အထတွေ မရှိသင့်ဘူး” လို့ နိုင်ငံခြားရေးဝန်ကြီးဌာနရဲ့ ပြောရေးဆိုခွင့်ရှိသူ မော်နင်က ပေကျင်းက ပုံမှန်သတင်းစာရှင်းလင်းပွဲမှာ ပြောခဲ့တာပါ။

တရုတ်နိုင်ငံကနေ အီးယူအဖွဲ့ဝင်နိုင်ငံတွေဆီ လေယာဉ်စီးလာတဲ့ ခရီးသည်တွေအနေနဲ့ လေယာဉ်ပေါ်မတက်ခင် ကိုဗစ်-၁၉ စစ်ဆေးမှုမှာ ရောဂါပိုးမရှိကြောင်း ရလဒ်ထွက်ပေါ်ဖို့ လိုအပ်တယ်ဆိုတဲ့ အချက်ကို အီးယူ အစိုးရတာဝန်ရှိသူတွေက ဇန်နဝါရီ ၄ ရက်မှာ ထောက်ခံခဲ့ကြပါတယ်။

ကမ္ဘာတဝန်းရှိ နိုင်ငံအများအပြားဟာ ဇန်နဝါရီ ၈ ရက်မှာ နယ်စပ်ထိန်းချုပ်မှုတွေကို ပြန်မဖွင့်ပေးခင် ရက်တွေကတည်းက တရုတ်နိုင်ငံကနေ လာရောက်ကြမယ့်သူတွေကို ကိုဗစ်ရောဂါ စစ်ဆေးလာဖို့ တောင်းဆိုထားကြပြီး ကိုဗစ်ကပ်ရောဂါကြောင့် ၃ နှစ်တာ နိုင်ငံထဲ ပိတ်မိနေကြရတဲ့ တရုတ်ပြည်သူတွေ ခရီးထွက်လာမှာကို စိတ်အားထက်သန်စွာ စောင့်မျှော်နေကြကြောင်း ရိုက်တာသတင်းမှာ ရေးထားပါတယ်။

3 weeks Ago

December 28, 2022

တရုတ်အပါအဝင် ၅ နိုင်ငံမှ ခရီးသည်များ ကိုဗစ်ကင်းစင်ကြောင်း ပြရမည်ဟု အိန္ဒိယပြဋ္ဌာန်း

တရုတ်၊ ဂျပန်၊ တောင်ကိုရီးယား၊ စင်ကာပူနဲ့ ထိုင်းနိုင်ငံတို့ကနေ ရောက်လာတဲ့ ခရီးသွားတွေအတွက် ကိုဗစ်-၁၉ ကင်းစင်ကြောင်း စစ်ဆေးအတည်ပြုထားတဲ့ အစီရင်ခံစာ ပါရမယ်လို့ အိန္ဒိယအာဏာပိုင်တွေက သတ်မှတ် ပြဋ္ဌာန်းလိုက်ပါတယ်။

ဇန်နဝါရီ ၈ ရက်ကစပြီး ပြည်တွင်းခရီးသွားတွေအတွက် ကိုဗစ်-၁၉ ကန့်သတ်ချက်ကို လျှော့ပေးမယ်လို့ တရုတ်အာဏာပိုင်တွေက မကြေညာမီ ရက်ပိုင်းအတွင်း အိန္ဒိယက ခုလို သတ်မှတ်လိုက်တာပါ။

သတ်မှတ်နိုင်ငံတွေက ခရီးသည်တွေကို ကိုဗစ်-၁၉ လက္ခဏာတွေ ပြနေတာ ဒါမှမဟုတ် ကူးစက်ခံအဖြစ် စမ်းသပ်တွေ့ရှိပါက ရောဂါခြေချုပ်နဲ့ ထားမယ်လို့ အိန္ဒိယကျန်းမာရေးဝန်ကြီး မန်းဆွတ် မန်ဒါးဗီယာက ဒီဇင်ဘာ ၂၄ ရက်မှာ ပြောပါတယ်။

တရုတ်နိုင်ငံဟာ မကြာသေးမီက တင်းကျပ်တဲ့ ကိုဗစ်ကန့်သတ်ချက်တွေကို ဖြေလျှော့ပေးခဲ့ပြီး မကြာသေးမီ သီတင်းပတ်တွေအတွင်း နိုင်ငံတဝန်း ကူးစက်မှုများလာတာ တွေ့ခဲ့ရပါတယ်။

ဂျပန်နိုင်ငံကလည်း တရုတ်နိုင်ငံကလာတဲ့ ခရီးသည်တွေ ဂျပန်ကို ဆိုက်ရောက်ချိန်မှာ ကိုဗစ်ကင်းစင်တဲ့ စစ်ဆေးချက်ရလဒ်ကို ပြဖို့လိုတယ်လို့ ဒီဇင်ဘာ ၂၇ ရက်မှာ ကြေညာခဲ့ပါတယ်။

1 month Ago

တရုတ်အစိုးရက ကိုဗစ်-၁၉ ကပ်ရောဂါ အစီအမံများကို အဆင့်‌လျှော့ချ တုံ့ပြန်မည်

တရုတ်အစိုးရဟာ ကူးစက်ရောဂါတုံ့ပြန်ရေးမူဝါဒရဲ့ အဓိကအပြောင်းအရွှေ့မှာ Class A အဆင့် ကူးစက်ရောဂါဆိုင်ရာ အစီအမံအစား Class B အဆင့် ကူးစက်ရောဂါတိုက်ဖျက်ရေး အစီအမံတွေနဲ့ ကိုဗစ်-၁၉ ကပ်ရောဂါဘေးကို စီမံခန့်ခွဲတော့မှာ ဖြစ်ပါတယ်။

ကိုဗစ်-၁၉ အတွက် တရုတ်အသုံးအနှုန်းကိုလည်း “နိုဗယ်ကိုရိုနာဗိုင်းရပ် အဆုတ်ရောင်ရောဂါ” ကနေ “နိုဗယ်ကိုရိုနာဗိုင်းရပ် ကူးစက်မှု” လို့ နာမည်ပြောင်းလဲလိုက်ကြောင်း အမျိုးသားကျန်းမာရေးကော်မရှင်က ဒီဇင်ဘာ ၂၆ ရက်နေ့မှာ သတင်းထုတ်ပြန်ခဲ့ပါတယ်။

ဇန်နဝါရီ ၈ ရက်ကစပြီး တရုတ်နိုင်ငံဟာ ကူးစက်ရောဂါ ကာကွယ်ရေးနဲ့ ကုသရေးဆိုင်ရာ ဥပဒေနဲ့အညီ ကိုဗစ်-၁၉ ကပ်ရောဂါဘေးအား Class A ကနေ Class B ကို အဆင့်လျှော့ချပြီး တရုတ်ပြည်သူ့သမ္မတနိုင်ငံ၊ နိုင်ငံတကာနယ်နိမိတ်နဲ့ သတ်မှတ်ထားတဲ့ ကျန်းမာရေးနဲ့ ရောဂါခြေချုပ် ဥပဒေအရ ခွဲထွက်နိုင်သော ကူးစက်ရောဂါစီမံခန့်ခွဲမှုကနေ ဖယ်ရှားမယ်လို့ တရုတ် ရောဂါခြေချုပ်ဥပဒေ ထုတ်ပြန်ချက်မှာ ဖော်ပြထားပါတယ်။

ဒါပေမဲ့ လက်ရှိမှာ ကိုဗစ်-၁၉ ကို Class B ကူးစက်ရောဂါအဖြစ် သတ်မှတ်ထားပေမဲ့ Class A ကူးစက်ရောဂါအတွက် ကြိုတင်ကာကွယ်ရေးနဲ့ ထိန်းချုပ်မှုအစီအမံတွေကို ဆက်လိုက်နာ ဆောင်ရွက်နေပါတယ်။

ပြုပြင်ပြောင်းလဲမှုကို ပံ့ပိုးကူညီဖို့ အခြေခံအခြေအနေတွေ ထားခဲ့တယ်လို့ နိုင်ငံတော်ကောင်စီရဲ့ ကိုဗစ်-၁၉ တိုက်ဖျက်ရေး ပူးတွဲကာကွယ်ရေးနဲ့ ထိန်းချုပ်ရေးယန္တရားက ထုတ်ပြန်တဲ့ စာတမ်းမှာ နောက်ဆုံးပေါ် ဗိုင်းရပ်စ်ပြောင်းလဲမှု၊ ကပ်ရောဂါ ဖွံ့ဖြိုးတိုးတက်မှုနဲ့ နိုင်ငံရဲ့ ကူးစက်ရောဂါ တုံ့ပြန်မှုတွေကို ကိုးကားဖော်ပြခဲ့ပါတယ်။

တချိန်တည်းမှာပဲ ကိုဗစ်-၁၉ ဗိုင်းရပ်စ်ရဲ့ အိုမီခရွန်ဗီဇမျိုးကွဲဟာ တရုတ်နိုင်ငံမှာ လွှမ်းမိုးထားတဲ့ ကိုဗစ်-၁၉ မျိုးကွဲအဖြစ် ဆက်ရှိနေတယ်လို့ တရုတ်ရောဂါထိန်းချုပ်ရေးနဲ့ ကာကွယ်ရေးစင်တာ တာဝန်ရှိသူတဦးက ဒီဇင်ဘာ ၂၇ ရက်မှာ ပြောလိုက်ပါတယ်။

ဒယ်လ်တာနဲ့ အိုမီခရွန် ဗီဇမျိုးကွဲတွေ တရုတ်နိုင်ငံထဲမှာ လက်ရှိ ပျံ့နှံ့နေတယ်ဆိုတဲ့ အွန်လိုင်းပေါ်က ကောလာဟလတွေကို တရုတ် ရောဂါကာကွယ်ရေးနဲ့ ထိန်းချုပ်ရေးဌာန၊ ဗိုင်းရပ်စ်ရောဂါ ထိန်းချုပ်ဟန့်တားရေး အမျိုးသားတက္ကသိုလ်က ညွှန်မှူး ရွှီဝမ်ဘိုက ငြင်းဆိုခဲ့ပါတယ်။

အခု တရုတ်နိုင်ငံမှာ ပျံ့နှံ့နေတဲ့ အဓိက ကိုဗစ်-၁၉ ဗိုင်းရပ်စ်ဗီဇမျိုးကွဲတွေက အိုမီခရွန် BA.5.2 နဲ့ BF.7 ဖြစ်တယ်လို့ သူကပြောပါတယ်။

တရုတ်နိုင်ငံမှာ ကိုဗစ်-၁၉ အထွတ်အထိပ် ကူးစက်မှုကို ရင်ဆိုင်ဖို့ အထူးကြပ်မတ် ကုသဆောင် အိုင်စီယူ တွေကို ဆက်လက်တိုးချဲ့ရင်း ပြင်းထန်တဲ့ ကိုဗစ်-၁၉ ရောဂါဖြစ်ပွားမှုတွေအတွက် ဆေးဘက်ဆိုင်ရာ အရင်းအမြစ်တွေနဲ့ ကုသရေးဌာနတွေ အတွက် အရန်ငွေတွေ တိုးမြှင့်သွားမယ်လို့ အကြီးတန်းကျန်းမာရေးအရာရှိတဦးက အင်္ဂါနေ့မှာ ကျင်းပတဲ့ သတင်းစာရှင်းလင်းပွဲမှာ ပြောခဲ့ပါတယ်။

အမျိုးသားကျန်းမာရေးကော်မရှင်ရဲ့ ဆေးဘက်ဆိုင်ရာ စီမံခန့်ခွဲမှုဗျူရို အကြီးအကဲ ကျောင်းယာဟွေက တရုတ်နိုင်ငံမှာ လက်ရှိ အလယ်တန်းနဲ့ အဆင့်မြင့်ဆေးရုံတွေမှာ ဆေးရုံကုတင် ၅ ဒသမ ၆ သန်းလောက်နဲ့ လုံလောက်တဲ့ အထူးကြပ်မတ်ကုသဆောင် အိုင်စီယူ ကုတင်တွေ ရှိနေတယ်၊ လက်ရှိရက်တွေမှာ အတွင်းလူနာ ၆၀ ရာခိုင်နှုန်းဝန်းကျင်ရှိတယ်လို့ ပြောပါတယ်။

နိုင်ငံတဝန်း အိုင်စီယူအတွင်း ကုတင်အရေအတွက်ဟာ တနင်္ဂနွေနေ့အထိ ၁၈၁,၀၀၀ ကို မြင့်တက်လာခဲ့ပြီး လူ ၁၀၀,၀၀၀ အတွက် အိုင်စီယူကုတင် ၁၂ ဒသမ ၈ လုံးရှိပြီး လောလောဆယ် အိုင်စီယူ လူနာ ၅၀ ရာခိုင်နှုန်းလောက် ရှိနေတယ်၊ နိုင်ငံတဝန်းက ပုံမှန်ကုတင် ၁၀၄,၈၀၀ ကို အိုင်စီယူ ကုတင်အဖြစ် အမြန်ပြောင်းနိုင်တယ်လို့ ကျောင်းက ပြောပါတယ်။

နိုင်ငံတဝန်းမှာ အရန် ဆေးဘက်ဆိုင်ရာကိရိယာတွေ အမြောက်အမြားရှိတယ်လို့လည်း သူက ဆက်ပြောပါတယ်။

1 month Ago
More News
Up