ကိုဂျင်မီ

October 26, 2021

ကိုဂျင်မီအပါအဝင် ဖမ်းဆီးခံထားရသူများအတွက် အလွန်အမင်းစိုးရိမ်ကြောင်း အမေရိကန်နှင့် ဗြိတိန်ထုတ်ပြန်

လုံခြုံရေးတပ်ဖွဲ့ဝင်တွေရဲ့ ဆက်လက်ဖမ်းဆီးနေမှုတွေ၊ ထင်ရှားတဲ့ ၈၈ မျိုးဆက်ကျောင်းသား ခေါင်းဆောင် ကိုဂျင်မီအပါအဝင် ဒီမိုကရေစီလိုလားသူတွေနဲ့ လူ့အခွင့်အရေးကာကွယ်စောင့် ရှောက်သူတွေအပေါ် မတရားဖိနှိပ်နေမှုသတင်းတွေ၊ ပြင်းပြင်းထန်ထန် ထိခိုက်ဒဏ်ရာရတဲ့ သ တင်းတွေကြောင့် အလွန်အမင်းစိုးရိမ်မိကြောင်း မြန်မာနိုင်ငံဆိုင်ရာ အမေရိကန်နဲ့ ဗြိတိန်သံရုံး တွေက ထုတ်ပြန်ထားပါတယ်။

စစ်အာဏာသိမ်းပြီးချိန်ကစပြီး မတရားဖမ်းဆီးထိန်းသိမ်းခံထားရသူတွေကို ပြန်လွှတ်ပေးဖို့ စစ်အာဏာရှင်ကို သံရုံးအနေနဲ့ ဆက်လက်တိုက်တွန်းပြီး လုံလောက်တဲ့ ဆေးဝါးကုသခွင့် ချက်ချင်းပံ့ပိုးပေးရေးအပါအဝင် ဖမ်းဆီးထိန်းသိမ်းခံထားရသူတွေရဲ့ ဂုဏ်သိက္ခာ နဲ့ အခြေခံ လူ့အခွင့်အရေးတွေကို လေးစားလိုက်နာဖို့လည်း တောင်းဆိုကြောင်း ဖော်ပြထားပါတယ်။

ဒါ့အပြင် မြန်မာပြည်သူတွေ လိုလားတောင်းတနေတဲ့ ဒီမိုကရေစီစနစ်ကို နောက်ပြန်လှည့်စေပြီး ဖိနှိပ်နိုင်ဖို့ အကြမ်းဖက်မှုကို ဆက်လက်အသုံးချနေခြင်းအတွက် စစ်အာဏာရှင်အနေနဲ့ တာဝန်ယူမှု၊ တာဝန်ခံမှုရှိလာစေဖို့လည်း အမေရိကန်ပြည်ထောင်စုက ကတိကဝတ် ပြုထားဆဲဖြစ်တယ်လို့ ဆိုပါတယ်။

မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်နေ့က စတင်ကာ အကြမ်းဖက်စစ်အုပ်စုက မတရားအာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေးကာလဟာ ၉ လနီးပါး ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီး ထောင်ချခံရသူတွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာကွယ် ရေးတပ်တွေနဲ့ စစ်ကောင်စီတပ်တွေကြားတိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ်ပြန်ချက်အရ လတ်တလောအချိန်ထိ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၁၂၀၀ နီးပါး၊ ဖမ်းဆီးထိန်းသိမ်းခံခဲ့ရသူပေါင်း ၉,၀၀၀ ကျော် ရှိခဲ့တယ်လို့ ဆိုပါတယ်။

လတ်တလောမှာတော့ အမျိုးသားညီညွတ်ရေးအစိုးရ(NUG)က စစ်အာဏာရှင် ဆန့်ကျင်ရေး ခုခံတွန်းလှန်စစ်စတင်ကြောင်းနဲ့ မင်းအောင်လှိုင် ဦးဆောင်တဲ့ အကြမ်းဖက် စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ စက်တင်ဘာ ၇ ရက်က ကြေညာထားပါတယ်။

3 months Ago

October 25, 2021

ကိုဂျင်မီ အကြမ်းဖက်ဖမ်းဆီးခံရမှု အကျိုးဆက်အားလုံး စစ်အုပ်စုတွင် တာဝန်ရှိဟု အေအေပီပီ ပြော

၈၈ မျိုးဆက် ကျောင်းသားခေါင်းဆောင်တဦးဖြစ်တဲ့ ကိုဂျင်မီ အဖမ်းခံရမှုနဲ့ ပတ်သက်ပြီး ဖြစ်ပေါ်လာမယ့် အကျိုးဆက်တွေအားလုံးဟာ မတရားဖမ်းဆီးခဲ့တဲ့ စစ်အုပ်စုမှာ တာဝန်အပြည့်အဝရှိပြီး စစ်အုပ်စုအနေဲ့ တာဝန်ယူ၊ တာဝန်ခံရမှာဖြစ်တယ်လို့ နိုင်ငံရေးအကျဉ်း သားများကူညီစောင့်ရှောက်အသင်း(အေအေပီပီ)က ထုတ်ပြန်ပါတယ်။

၈၈ ငြိမ်းချမ်းရေးနှင့်ပွင့်လင်းလူ့အဖွဲ့အစည်းရဲ့ ခေါင်းဆောင်တဦးဖြစ်တဲ့ ကိုဂျင်မီ(ခ) ကိုကျော်မင်းယုကို အာဏာသိမ်းစစ်အုပ်စုက အောက်တိုဘာ ၂၃ ရက်နေ့ ညပိုင်းက အင်အား အလွန်အကျွံသုံးပြီး အကြမ်းဖက်ဖမ်းဆီးခဲ့တာဖြစ်ပြီး အဲဒီလို ဖမ်းဆီးချိန်အတွင်း ဦးခေါင်းမှာ အသက်အန္တရာယ် စိုးရိမ်ရတဲ့အထိ ထိခိုက်ဒဏ်ရာရရှိထားတယ်လို့ သိရှိရပါတယ်။

ကိုဂျင်မီဟာ ဖမ်းဆီးခံရစဉ်  ဒဏ်ရာပြင်းထန်စွာ ရရှိတဲ့အတွက် မင်္ဂလာဒုံ စစ်ဆေးရုံမှာ ဆေးကုသမှု ခံယူနေရတယ်လို့ စုံစမ်းသိရကြောင်း သူ့ရဲ့ ဇနီးဖြစ်သူ မနီလာသိန်းက သူ့ရဲ့ ဖေ့စ်ဘွတ်ခ်လူမှုကွန်ရက်မှာ အသိပေးထားပါတယ်။

အာဏာသိမ်း စစ်အုပ်စုဟာ သူတို့နဲ့ အယူအဆမတူတွေကို ဖမ်းဆီးရာမှာ မလိုလားအပ် ဘဲ ကြမ်းတမ်းစွာဆက်ဆံတာတွေကို ပြုလုပ်နေတာကိုလည်း တွေ့ရှိနေရပြီး ဖမ်းဆီးစဉ် ပစ်ခတ်ခံရပြီး သေဆုံးတာတွေ၊ စစ်ကြောရေးမှာ ညှဉ်းပန်းနှိပ်စက်တာကြောင့် သေဆုံး တာတွေလည်း ရှိနေတာကို တွေ့ရှိနေရပါတယ်။

အဲဒီလို လုပ်ရပ်တွေဟာ အာဏာသိမ်း စစ်အုပ်စုက အာဏာတည်မြဲရေးအတွက် တရားဥပဒေကို မထေမဲ့မြင်ပြုပြီး အပြစ်မဲ့ ပြည်သူတွေကို စိတ်ထင်တိုင်း တရားမဲ့ပြုကျင့်နေကြောင်း ပေါ်လွင်နေတယ်လို့ အေအေပီပီက ပြောပါတယ်။

ဒါကြောင့်မို့ နိုင်ငံတကာအသိုက်အဝန်း အနေနဲ့လည်း ကိုဂျင်မီအပါအဝင် မတရားဖမ်းဆီး ခံထားရသူတွေကို ညှဉ်းပန်းနှိပ်စက်မှုတွေက ကာကွယ်ပေးဖို့နဲ့ လွတ်မြောက်ရေးအတွက် အား ထုတ်ဆောင်ရွက်ပေးဖို့ အေအေပီပီက အလေးအနက် မေတ္တာရပ်ခံထားပါတယ်။

3 months Ago

၈၈ မျိုးဆက်ကျောင်းသားခေါင်းဆောင် ကိုဂျင်မီ အသက်အန္တရာယ်စိုးရိမ်နေရဆဲ

၈၈ မျိုးဆက်ကျောင်းသားခေါင်းဆောင် ကိုဂျင်မီဟာ ဖမ်းဆီးခံရတုန်းက ဒဏ်ရာ ပြင်းပြင်းထန်ထန် ရထားလို့  မင်္ဂလာဒုံစစ်ဆေးရုံမှာ ဆေးကုသမှုခံနေရပြီး အောက်တိုဘာ ၂၅ ရက် ဒီနေ့မနက် နောက်ဆုံးကြား သိထားရတဲ့အခြေအနေအရ အသက်အန္တရာယ်စိုးရိမ်ရတဲ့ အနေအထားရှိနေတယ်လို့ မိသားစုထံက သိရပါတယ်။

ကိုဂျင်မီရဲ့ ဇနီး မနီလာသိန်းက ''အစ်မနောက်ဆုံးသိရတာကတော့ စစ်ဆေးရုံမှာပဲ ရှိသေးတယ်။ စိုးရိမ်ရတဲ့အအနေအထားရှိတယ်လို့ သိထားတယ်။ ဒါအစ်မ နောက်ဆုံး  သိထားတဲ့အခြေအနေပေါ့ "လို့ ပြောပါတယ်။

ဒဏ်ရာက ဘယ်လိုရရှိတာလဲဆိုတာ အတိအကျမသိရပေမယ့် စစ်ကောင်စီက ဖမ်းဆီးစဉ်မှာရရှိတဲ့ ဒဏ်ရာဖြစ်တာကြောင့် နောက်ဆက်တွဲအခြေအနေအားလုံးဟာ စစ်တပ်မှာပဲတာဝန်ရှိသလို အားလုံး ကိုတာဝန်ယူရမယ်လို့ မနီလာသိန်းက ပြောပါတယ်။

အမျိုးသားဖြစ်သူ ဖမ်းဆီးခံလိုက်ရတာကြောင့် ဝမ်းနည်းပေမယ့် စစ်အာဏာရှင်ဆန့်ကျင်ရေးကို ပြည်သူတွေနဲ့အတူ အဆုံးထိလုပ်ဆောင်သွားမယ်လို့လည်း မနီလာသိန်းက ပြောပါတယ်။

၈၈ မျိုးဆက်ကျောင်းသားခေါင်းဆောင်တစ်ဉီးဖြစ်တဲ့ ကိုဂျင်မီကို အောက်တိုဘာ ၂၃ ရက်  ညပိုင်းမှာ စစ်ကောင်စီက အင်အားအလုံးအရင်းနဲ့ သူနေထိုင်တဲ့  ရန်ကုန်မြို့  ဒဂုံမြို့သစ် (မြောက်ပိုင်း)က နေအိမ်မှာ ဖမ်းဆီးခဲ့တာပါ။

နိုင်ငံရေးအကျဉ်းသားဟောင်း ကိုဂျင်မီဟာ ရှစ်လေးလုံးမျိုးဆက် ထင်ရှားတဲ့ ကျောင်းသားခေါင်းဆောင်တဦးဖြစ်ပြီး ကိုမင်းကိုနိုင်နဲ့အတူ ၈၈ ငြိမ်းချမ်းရေးနဲ့ ပွင့်လင်းလူ့အဖွဲ့အစည်းကို ဦးဆောင်နေသူ ဖြစ်ပါတယ်။

Photo Credit- Nilar Thein Facebook

3 months Ago
Up