ကာတာနိုင်ငံမှာ ၂၀၂၂ ကမ္ဘာ့ဖလားဘောလုံးပွဲ စတင်ဖို့ သီတင်းနှစ်ပတ်ကျော်သာ လိုတော့တဲ့အချိန်မှာ ဒိုဟာမြို့ရဲ့ နိုင်ငံတကာလေဆိပ် နှစ်ခုစလုံးဟာ သူတို့ရဲ့ ဂိတ်တွေကတဆင့် ဖြတ်သန်းလာမယ့် ခရီးသည်တွေအတွက် ပြင်ဆင်နေပါတယ်။
နိုဝင်ဘာ ၂၀ ရက်မှာစမယ့် ဘောလုံးပွဲအတွက် ပြိုင်ပွဲကျင်းပရေး စီစဉ်သူတွေဟာ ပရိသတ်ဦးရေ ၁ ဒသမ ၂ သန်းထက်မနည်း လာရောက်ကြည့်ရှုဖို့ မျှော်လင့်ထားပါတယ်။
ဧည့်သည်အများစုဟာ ၂၀၁၄ ခုနှစ်ကတည်းက ကာတာလေကြောင်းလိုင်းရဲ့ အဓိကလေဆိပ်နဲ့ အိမ်ဖြစ်လာတဲ့ ဟာမဒ် အပြည်ပြည်ဆိုင်ရာလေဆိပ်ကို ဖြတ်သန်းကြရမှာ ဖြစ်ပါတယ်။
ဒါပေမဲ့ ဘောလုံးပွဲအတွက် ခရီးသွားဧည့်သည်တွေ ရောက်လာတာကို ကူညီဖို့ ဒိုဟာ နိုင်ငံတကာလေဆိပ် အဟောင်းကိုလည်း ပြန်ဖွင့်လှစ်ထားပါတယ်။
နိုင်ငံကိုယ်စားပြုအသင်းအများစုဟာ ဒူဘိုင်း၊ ကူဝိတ်စီးတီးနဲ့ ဂျဲ့ဒါမြို့တို့ အပါအဝင် အနီးနားမှာရှိတဲ့ မြို့တွေကနေ စင်းလုံးငှားလေယာဉ်တွေ၊ လွန်းပျံလေယာဉ်တွေကို ကြိုဆိုမယ့် လေဆိပ်ငယ်တွေကနေတဆင့် ပျံသန်းလာရောက်ဖို့ မျှော်လင့်ထားပါတယ်။
ဒိုဟာမြို့လယ်ကနေ ကီလိုမီတာ ၄၀ အကွာမှာရှိတဲ့ အားကစားကွင်းရှစ်ခုမှာ နိုင်ငံပေါင်း ၃၂ နိုင်ငံက ပါဝင်ယှဉ်ပြိုင်ကြပြီး ကမ္ဘာ့ဖလား ဘောလုံးပွဲ နောက်ဆုံးပွဲစဉ်တွေကို ယှဉ်ပြိုင်ကစားကြမှာ ဖြစ်ပါတယ်။
၂၀၂၂ ကမ္ဘာ့ဖလား ဘောလုံးပြိုင်ပွဲကို ကာတာနိုင်ငံမှာ နိုဝင်ဘာ ၂၀ ရက်ကနေ ဒီဇင်ဘာ ၁၈ ရက်နေ့အထိ ကျင်းပမှာဖြစ်ပါတယ်။
