ကာချုပ်

May 21, 2021

အကြမ်းဖက်စစ်ခေါင်းဆောင် မသေမချင်း ကာချုပ်လုပ်ရန် စီစဉ်နေသည့်အပေါ် တပ်မတော်အရာရှိ ဝေဖန်

ကာကွယ်ရေးဦးစီးချုပ်နဲ့ ဒုကာကွယ်ရေးဦးစီးချုပ်တို့ရဲ့ တာဝန်ထမ်းဆောင်ခွင့်သက်တမ်း အသက် ၆၅ နှစ်အထိဆိုတဲ့ သတ်မှတ်ချက်ကို ပယ်ဖျက်လိုက်တာဟာ အာဏာယစ်မူးနေတာကို ပြသတာဖြစ်တယ်လို့  CDM ဝင်ထားတဲ့ တပ်မတော်အရာရှိတစ်ယောက်က ဒီဗွီဘီကို ပြောပါတယ်။

တပ်မတော်ကာကွယ်ရေးဦးစီးချုပ်နဲ့ ဒုဦးစီးချုပ်တို့ အသက် ၆၅ အထိပဲ တာဝန်ထမ်းဆောင်ရမယ်ဆိုတဲ့ ကန့်သတ်ချက်ကို အာဏာသိမ်းပြီး မကြာခင်မှာဘဲ စစ်ကောင်စီက ပယ်ဖျက်ခဲ့ပါတယ်။

အသက် ၆၅ နှစ်အထိပဲ တာဝန်ထမ်းဆောင်ခွင့်ရှိတယ်ဆိုတဲ့ကန့်သတ်ချက်ကို ပယ်ဖျက်ကြောင်း စစ်ကောင်စီရဲ့ညွှန်ကြားလွှာကို မတ်လ ၅ ရက်နေ့ထုတ် မြန်မာနိုင်ငံတော်ပြန်တမ်းမှာ အတည်ပြု ထည့်သွင်းဖော်ပြခဲ့ပါတယ်။

တပ်မတော်သားတွေရဲ့ စစ်မှုထမ်းသက်ကိုကန့်သတ်ဖို့ ၂၀၁၄ခုနှစ်မှာ ညွန်ကြားလွှာထုတ်ပြန်ခဲ့ပြီး တပ်ချုပ်နဲ့ ဒုတပ်ချုပ်တို့ဟာ အသက် ၆၅နှစ်ထက် မပိုတဲ့ကာလအထိသာ တာဝန်ထမ်းဆောင်ခွင့်ရှိခဲ့တာ ဖြစ်ပါတယ်။

ဒီကိစ္စနဲ့ပတ်သက်ပြီး  CDMဝင်ထားတဲ့ တပ်မတော်အရာရှိတစ်ဦးက “ ဦးသန်းရွှေဆိုလည်း ကာချုပ်လုပ်ခဲ့တာနှစ်ပေါင်းမနည်း။ မင်းအောင်လှိုင်လည်း ကာချုပ်လုပ်ခဲ့တာ ဆယ်နှစ်ကျော်ခဲ့ပြီ။ ကျန်တဲ့သူတွေသာရာထူးတွေပြောင်းသွားတယ် အငြိမ်းစားယူသွားတယ် သူတို့နှစ်ယောက်ကတော့ လက်ရှိနေရာမှာကာချုပ် ဒုကာချုပ်ရာထူးတွေက အချိန်အကန့်အသတ်မရှိဘူး ဖြစ်နေတာ။ နောက်လူတွေအတွက်က အဲ့ဒီရာထူးတွေကိုမျှော်လင့်ဖို့က အခက်အခဲဖြစ်နေတာပေါ့။ တပ်မတော်ရဲ့ ဆုံးဖြတ်နိုင်တဲ့ ထိပ်ပိုင်းနေရာတွေကို ယူထားပြီးတော့ ပြန်မဆင်းတော့ဘူးဖြစ်နေတာပေါ့။ အာဏာယစ်မူးနေကြတာပေါ့။”

တပ်ချုပ်နဲ့ ဒုတပ်ချုပ်တို့ တာဝန်ထမ်းဆောင်မယ့်ကာလသက်တမ်းတိုးဖို့ ကြိုးစားတာဟာ သူတို့အာဏာစသိမ်းတုန်းက ရွေးကောက်ပွဲပြန်ကျင်းပပေးမယ်ဆိုတဲ့ အာမခံချက်ကို ဆောင်ရွက်နိုင်ဖို့လည်း ဖြစ်နိုင်တယ်လို့ သတင်းစာဆရာ ဦးစည်သူအောင်မြင့်က ကသုံးသပ်ပါတယ်။

စစ်တပ်ကအာဏာသိမ်းပြီး အချိန်သုံးလကျော်ကြာတဲ့အထိ တိုင်းပြည်ကိုစီမံခန့်ခွဲအုပ်ချုပ်ဖို့ မဆောင်ရွက်နိုင်သေးတဲ့အတွက် တပ်ချုပ်ဟာ သူ့ရဲ့တာဝန်ထမ်း ဆောင်ခွင့်သက်တမ်းကိုတိုးပြီး စီမံခန့်ခွဲနိုင်အောင် ကြိုးစားတာလို့လည်းဆိုပါတယ်။

နိုင်ငံရေးလေ့လာသူ ဦးသန်းစိုးနိုင်ကတော့  တပ်ချုပ်က သက်တမ်းတိုးဖို့ကြိုးစားတာဟာ အာဏာသိမ်းတုန်းကကတိ အတိုင်းရွေးကောက်ပွဲပြန်ကျင်းပပေးဖို့ဆိုတာထက် အာဏာကို ချုပ်ကိုင်ပြီး ရေရှည်အုပ်ချုပ်ဖို့ စီစဉ်တာလို့ သုံးသပ်ပါတယ်။

စစ်တပ်ကအာဏာသိမ်းပြီး ပြည်သူကိုအကြမ်းဖက်အုပ်ချုပ်ဖို့ကြိုးစားနေတာတွေဟာ အောင်မြင်လာမှာမဟုတ်ဘူးလို့လည်း ဆိုပါတယ်။

၂၀၁၀ မတိုင်ခင် စစ်အာဏာရှင်လက်ထက်မှာ ဗိုလ်ချုပ်မှူးကြီးသန်းရွှေဟာ အနှစ် ၂၀ကျော် တပ်ချုပ်ရာထူးနဲ့ကာလရှည်အုပ်ချုပ်ခဲ့တာဖြစ်ပါတယ်။ စစ်တပ်ထဲမှာ အရာရှိကြီးငယ်တွေဟာ ရာထူးတိုးဖို့ အခက်အခဲတွေရှိနေပြီး ထိပ်ပိုင်းခေါင်းဆောင်တွေအပြောင်းအလဲမဖြစ်သလို အောက်ခြေမှာလည်း ရာထူးနေရာ အတွက် စိတ်သဘောထားကွဲလွဲတာတွေရှိနေပါတယ်။

စစ်အာဏာသိမ်းပြီးချိန်မှာတော့ တပ်မတော်ထိပ်ပိုင်းခေါင်းဆောင်တွေဆောင်ရွက်ချက်ဟာ မတရားဘူးလို့မြင်တဲ့သူတွေနဲ့ အကြောက်တရားကြောင့်မလွန်ဆန်နိုင်သူတွေဆိုပြီး တပ်တွင်းမှာ သဘောထားကွဲနေကြတယ်လို့ CDM ဝင်ထားတဲ့ တပ်မတော်အရာရှိတွေက ပြောပါတယ်။

6 months Ago

February 3, 2021

၅၀၀၀ကျပ်တန်နှင့် ၁၀၀၀၀ ကျပ်တန်ငွေစက္ကူများ ဖျက်သိမ်းမည့်သတင်း မဟုတ်မှန်ဟု ကာချုပ်ပြော

မြန်မာငွေ ၅၀၀၀ ကျပ်တန်နဲ့ ၁၀၀၀၀ တန်ငွေစက္ကူတွေ ဖျက်သိမ်းမယ်ဆိုတဲ့  ကောလာဟလသတင်းတွေ မှန်ကန်မှု မရှိကြောင်း အာဏာသိမ်း စစ်အစိုးရ ခေါင်းဆောင် ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က ပြောကြားလိုက်ပါတယ်။

ဒီကနေ့ ဖေဖော်ဝါရီ ၃ ရက်မနက်က နိုင်ငံတော်စီမံအုပ်ချုပ်ရေးကောင်စီဥက္ကဋ္ဌ တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီး မင်းအောင်လှိုင်နဲ့ ပြည်ထောင်စုဝန်ကြီးတွေ၊ ပြည်ထောင်စုအဆင့် အဖွဲ့အစည်း တာဝန်ရှိသူတွေနဲ့တွေ့ဆုံစဉ် ပြောကြားခဲ့တာလို့  တပ်မတော်က သတင်းထုတ်ပြပါတယ်။ 

မိမိတို့ဟာ အာဏာကို ခေတ္တထိန်းပေးတဲ့သဘော ဖြစ်ကြောင်း၊ ခေတ္တ ထိန်းပေးရာမှာ နိုင်ငံခြားရေး မူဝါဒ၊ အုပ်ချုပ်ရေး မူဝါဒ၊ စီးပွားရေး မူဝါဒလုံးဝပြောင်းလဲ မည်မဟုတ်သလို လက်ရှိသွားနေတဲ့ နိုင်ငံရေး လမ်းစဉ်အပေါ် လုံးဝပြောင်း လဲခြင်း မရှိဘဲ ဆက်လက်ဆောင်ရွက် သွားမယ်လို့လည်း ကာကွယ်ရေးဦးစီးချုပ်က ပြောပါတယ်။

ကိုဗစ်-၁၉ ကပ်ရောဂါကြောင့် နိုင်ငံ့စီးပွားရေးတုန့်ဆိုင်းနေတာကြောင့် စီးပွားရေး၊ ပညာရေး၊ ကျန်းမာရေး၊ ဆောက်လုပ်ရေး၊ သဘာဝပတ်ဝန်းကျင် ထိန်းသိမ်းရေး၊ ပို့ဆောင်ဆက်သွယ်ရေးစသည့်ကဏ္ဍတွေ အားလုံးကိုအရှိန်အဟုန်နဲ့ ဆောင်ရွက်ဖို့ လိုအပ်တယ်လို့လည်း ပြောပါတယ်။

ပြင်ပမှာ ကောလာဟလသတင်းတွေ ထွက်ပေါ်နေတဲ့ ၅၀၀၀ ကျပ်တန်နဲ့ ၁၀၀၀၀ တန်ငွေစက္ကူတွေ ဖျက်သိမ်းမယ်ဆိုတဲ့ သတင်းမှားများပျံ့နှံ့ခဲ့မှုကြောင့် အဆိုပါသတင်းတွေ မှန်ကန်မှု မရှိကြောင်းကို နိုင်ငံတော်ဗဟိုဘဏ်မှထုတ်ပြန်ခဲ့ပြီးဖြစ်တယ်လို့ ကာကွယ်ရေးဦးစီးချုပ်က ပြောပါတယ်။

ကာကွယ်ရေး ဦးစီးချုပ်ဟာ ဒီနေ့မနက် နေပြည်တော်ရှိ နိုင်ငံတော်သမ္မတအိမ်တော်၊ ငုရွှေဝါခန်းမမှာ မြန်မာနိုင်ငံကုန်သည်များနှင့် စက်မှုလက်မှု လုပ်ငန်းရှင်များ အသင်းချုပ်နဲ့ ညီနောင်အသင်းများမှ လုပ်ငန်းရှင်တွေနဲ့လည်း သီးခြား တွေ့ဆုံဆွေးနွေးခဲ့ပါတယ်။

ဒီလိုတွေ့ဆုံရာမှာ  ရွေးကောက်ပွဲမှာဖြစ်ခဲ့တဲ့ မဲစာရင်းမှားယွင်းမှုတွေကို ဖော်ထုတ်ကာ ရလဒ်အပေါ်မူတည်ပြီး ရွေးကောက်ပွဲဥပဒေအရ ဆက်လက် ဆောင်ရွက်မှာ ဖြစ်ကြောင်း၊ ရွေးကောက်ပွဲထပ်မံကျင်းပပြီး အနိုင်ရပါတီကို ဒီမိုကရေစီ ကျင့်စဉ်နဲ့အညီ ဆက်လက်ဆောင်ရွက်နိုင်ဖို့ လုပ်သွားမယ်လို့ လည်း ကာကွယ်ရေးဦးစီးချုပ်က ပြောပါတယ်။၊

၂၀၀၈ ဖွဲ့စည်းပုံ အခြေခံဥပဒေမှာ နိုင်ငံတော်အရေးပေါ်အခြေအနေပြီးဆုံးပါက ၆ လ တာဝန်ယူပြီး ရွေးကောက်ပွဲပြန်လည်ကျင်းပနိုင်ရေးဆောင်ရွက်ပြီး အစိုးရကို အာဏာ ပြန်လည်လွှဲပြောင်းပေးရမယ်လို့ ပါရှိကြောင်းလည်း ဗိုလ်ချုပ်မှူးကြီးက ပြောပါတယ်။

လတ်တလော နိုင်ငံတဝန်း နိုင်ငံတော်အရေးပေါ်အခြေအနေကို ဖေဖော်ဝါရီ ၁ ရက်နေ့ကစပြီး တစ်နှစ်သတ်မှတ်ကြောင်း စစ်အစိုးရက ကြေညာထားပါတယ်။

Photo-DSINFO

10 months Ago
More News
Up