ကာကွယ်ရေးဝန်ကြီးဟောင်း

October 16, 2021

ဗင်နီဇွဲလား ကာကွယ်ရေးဝန်ကြီးဟောင်း သေဆုံးမှု မိသားစုက အချက်အလက်တောင်းခံ

ဗင်နီဇွဲလားကာကွယ်ရေးဝန်ကြီးဟောင်း ရာအူးလ်အီဆာရာဗဒူရလ်မိသားစုဟာ အကျဉ်းထောင်ထဲမှာ ဗိုလ်ချုပ်သေဆုံးမှုရဲ့ အကြောင်းရင်းအမှန်ကို အောက်တိုဘာ ၁၅ ရက် သောကြာနေ့မှာ သတင်းအချက်အလက်တောင်းခံခဲ့ပါတယ်။ 

ဗိုလ်ချုပ်ဗဒူရလ်ဟာ ကိုဗစ်-၁၉နဲ့ဆက်နွှယ်တဲ့ နှလုံးနဲ့အသက်ရှူလမ်းကြောင်းဆိုင်ရာ ချို့ယွင်းမှုကြောင့်သေဆုံးခဲ့တာလို့ ဗင်နီဇွဲလား ရှေ့နေချုပ်က အောက်တိုဘာလ ၁၂ ရက်မှာ ပြောပါတယ်။ 

ဗဒူရလ်ရဲ့မိသားစုဟာ ဗိုလ်ချုပ်အနေနဲ့  ကိုရိုနာဗိုင်းရပ်စ် ကာကွယ်ဆေး ပထမဆုံး ထိုးခံထားပြီးတာကို ကိုးကားပြီး ကိုဗစ်-၁၉ ရောဂါကြောင့် ဆိုတာကို သံသယဖြစ်တယ်လို့ ဆိုပါတယ်။ 

ကာကွယ်ဆေးတွေဟာ ရောဂါဖြစ်နိုင်ခြေကို လျော့ကျစေပေမယ့် ကိုဗစ်-၁၉ ကြောင့် သေဆုံးခြင်းကိုတော့ မကာကွယ်နိုင်ပါဘူး။ 

၀န်ကြီးဟောင်းကို လိုအပ်တဲ့ ကျန်းမာရေးစောင့်ရှောက်မှုတွေအားလုံး ပေးခဲ့တယ်လို့ ရှေ့နေချုပ် တာရပ်ခ်ဆပ်ဘ်က ပြောကြားခဲ့ပါတယ်။ 

မာဒူရိုကိုဖြုတ်ချဖို့ မအောင်မြင်လိုက်တဲ့ တိုက်ခိုက်မှုမှာ ပါဝင်တယ်လို့ စွပ်စွဲခံရပြီး ၂၀၂၀ မေလက ကိုယ်တိုင်အဖမ်းခံခဲ့တဲ့ ကွယ်လွန်သူ ၀န်ကြီးဟောင်းရဲ့သားဖြစ်သူ ဟိုဆနားစ်ဗဒူရလ်  ကတော့ သူ့အဖေ ဗိုလ်ချုပ်ဟာ ဆေးကုသမှု မခံရဘူးလို့ ပြောပါတယ်။

ဗဒူရလ်ဟာ ဆိုရှယ်လစ်ပါတီနဲ့ အဆင်မပြေဖြစ်ပြီးနောက် ၂၀၀၉ ခုနှစ်မှာ အကျင့်ပျက်ခြစားမှုစွဲချက်တွေနဲ့ အဖမ်းခံခဲ့ရတာဖြစ်ပြီး ဗင်နီဇွဲလားသမ္မတ နီကိုးလပ်စ်မာဒူရိုကို ဆန့်ကျင်ဖို့ ပူးပေါင်းကြံစည်မှု စွပ်စွဲချက်နဲ့ နောက်ဆုံးတော့ သူ့ကို နေအိမ်အကျယ်ချုပ်နဲ့ ဖမ်းထားပြီး ၂၀၁၇ ခုနှစ်မှာ ထောင်ပြန်ကျခဲ့ပါတယ်။ 

ဝန်ကြီးဟောင်းကို ပြီးခဲ့တဲ့လက သူ့သားနဲ့အတူ မျှဝေနေထိုင်ရတဲ့ ဆီဘင်ထောက်လှမ်းရေးရဲ ရုံးခန်းတွေက အကျဉ်းခန်းတခုကို ပြောင်းရွှေ့ခဲ့ပါတယ်။

ကာကွယ်ရေးဝန်ကြီးဟောင်း ဗိုလ်ချုပ်ဗဒူရလ်ကို အတိုက်အခံတွေက နိုင်ငံရေး အကျဉ်းသားအဖြစ် သတ်မှတ်ကြပါတယ်။

လူ့အခွင့်အရေးအုပ်စုတွေနဲ့ တက်ကြွလှုပ်ရှားသူတွေကတော့ သူ့ကို နိုင်ငံရေးအကျဉ်းသားအဖြစ် သတ်မှတ်လိုက်ကတည်းက သူ့ရဲ့သေဆုံးမှုအတွက် အစိုးရကို အပြစ်တင်ဝေဖန်ခဲ့ပါတယ်။

နိုင်ငံရေးအကျဉ်းသားတွေရဲ့ ဆွေမျိုးတွေဟာ အောက်တိုဘာလ ၁၅ ရက်က ကရာကာ့စ်မြို့ရှိ ကုလသမဂ္ဂ လူ့အခွင့်အရေးကောင်စီရုံး အပြင်ဘက်မှာ ဆန္ဒပြခဲ့ကြပြီး ဖမ်းဆီးထိန်းသိမ်းခံရသူ တွေရဲ့ လူ့အခွင့်အရေးသေချာရရှိစေဖို့ အေဂျင်စီကိုတောင်းဆိုခဲ့ပါတယ်။

ဗင်နီဇွဲလားနိုင်ငံဟာ အကျဉ်းသားတွေရဲ့အသက်နဲ့လုံခြုံမှုကို အာမခံချက်မပေးနိုင်မှာကို ကြောက်တယ်လို့ သူတို့က ပြောကြပါတယ်။ 

3 months Ago

January 5, 2021

သမ္မတထရမ့်၏ အာဏာမလွှဲပေးရေး အားထုတ်မှုတွင် စစ်တပ်မပါသင့်ဟု ကာကွယ်ရေးဝန်ကြီးဟောင်းများ ပြော

ရွေးကောက်ခံ သမ္မတသစ် ဂျိုးဘိုင်ဒင်ကို အာဏာလွှဲမပေးဖြစ်အောင် ပိတ်ဆို့ဖို့ သမ္မတ ဒေါ်နယ်ထရမ့်ရဲ့ အားထုတ်မှုမှာ စစ်တပ်က ဘယ်လိုအခန်းကဏ္ဍမှာမှ မပါသင့်ဘူးလို့ သက်ရှိထင်ရှားရှိဆဲ အမေရိကန် ကာကွယ်ရေးဝန်ကြီးဟောင်း ဆယ်ယောက်က ဇန်နဝါရီ ၃ ရက်မှာ ပြောလိုက်ပါတယ်။ သဝါရှင်တန်ပို့စ်သတင်းစာက ပုံနှိပ်ထုတ်ဝေတဲ့ ထင်မြင်ချက်ကဏ္ဍမှာ ခုလို ပြောလိုက်တာပါ။ ကာကွယ်ရေး ဝန်ကြီးဟောင်းတွေက “အခုအချိန်ဟာ ရီပတ်ဗလစ်ကင် သမ္မတ ဒေါ်နယ်ထရမ့်အနေနဲ့ နိုဝင်ဘာ ၃ ရက် ရွေးကောက်ပွဲမှာ ရှုံးခဲ့တယ်။ ဘိုင်ဒင်ဟာ ဇန်နဝါရီ ၂၀ ရက်မှာ ထရမ့်ရဲ့ နေရာကို ဆက်ခံရမယ် ဆိုတဲ့ အချက်ကို လက်ခံရမယ့်အချိန်ပဲ။ ရွေးကောက်ပွဲတွေ ကျင်းပပြီးပြီ။ မဲတွေ ပြန်ရေပြီးလို့ စစ်ဆေးပြီးပြီ။ သင့်လျော်တဲ့ စိန်ခေါ်မှု တွေကို တရားရုံးမှာ ရင်ဆိုင်ပြီးပြီ။ အုပ်ချုပ်ရေးမှူးတွေက ရလဒ်တွေကို တရားဝင် ထုတ်ပြန်ပြီးပြီ။ ပြီးတော့ ပြည်ထောင်စုကိုယ်စားလှယ်အဖွဲ့က သမ္မတနဲ့ ဒုသမ္မတကို ရွေးကောက်တင်မြှောက်ပြီးပြီ။ ရလဒ်ကို မေးခွန်းထုတ်ရမယ့်အချိန်က ကျော်နေပြီ”လို့ သဝါရှင်တန်ပို့စ်ကို ပြောပါတယ်။ သူတို့အုပ်စုထဲမှာ သမ္မတ နှစ်ဆက်ရဲ့လက်အောက်က ကာကွယ်ရေးဝန်ကြီး ဖြစ်ခဲ့ပြီး နောက်ထပ် သမ္မတနှစ်ဆက် လက်အောက်မှာ ဒုသမ္မတအဖြစ် တာဝန်ထမ်းဆောင်ခဲ့သူ ဒစ်ခ်ချေနေလည်း ပါပါတယ်။ လက်ရှိ ပင်တဂွန်စစ်ဌာနချုပ်အကြီးအကဲ ခရစ်စတိုဖာမေလာကိုလည်း ထရမ့်က သမ္မတ ဆက်ဖြစ်ရေး အားထုတ်မှုမှာ အခန်းကဏ္ဍတရပ်အနေနဲ့ ပါဝင်ပတ်သက်တာမျိုးကို ရှောင်ဖို့နဲ့  ဒီမိုကရက်အစိုးရလက်ထက် အသွင်ကူးပြောင်းရေးကာလမှာ ကူညီဖို့ ကာကွယ်ရေးဝန်ကြီးဟောင်းများက ဆော်သြလိုက်ပါတယ်။ ရွေးကောက်ပွဲ အငြင်းပွားမှုတွေကို ဖြေရှင်းရာမှာ အမေရိကန် စစ်တပ်ပါဝင်ရေး အားထုတ်မှုဟာ အန္တရာယ်ကြီးတယ်၊ ဥပဒေနဲ့ မညီဘူး၊ အခြေခံဥပဒေက ပေးထားတဲ့ လုပ်ပိုင်ခွင့် ပိုင်နက်ထဲမှာ မပါဘူးလို့ သူတို့က ပြောပါတယ်။ အရပ်ဘက်နဲ့ စစ်ဘက်အရာရှိတွေဟာ အလားတူ လုပ်ရပ်မျိုးကို ညွှန်ကြား ဆောင်ရွက်ပါက ရာဇဝတ်မှု ပြစ်ဒဏ်တွေကိုပါ ရင်ဆိုင်ရမယ့် အလားအလာ အပါအဝင် တာဝန်ခံရလိမ့်မယ်လို့လည်း သူတို့က ပြောပါတယ်။
1 year Ago
More News
Up