ကာကွယ်ရေးဝတ်စုံ

November 7, 2020

တကိုယ်ရည်သုံး ကာကွယ်ရေးဝတ်စုံပြည့် အစုံ ၂၄၀၀၀၀ မြန်မာကို တရုတ်လှူဒါန်း

တရုတ်နိုင်ငံဟာ တကိုယ်ရည်သုံး ကာကွယ်ရေးဝတ်စုံပြည့်အစုံ ၂၄၀၀၀၀ မြန်မာနိုင်ငံကို မနေ့က လှူဒါန်းပြီး ကိုဗစ်ကာလအတွင်းမှာ အမေရိကန်ဒေါ်လာ သိန်း ၆၀ လောက်လ လှူဒါန်းခဲ့ပါတယ်။ မနေ့ညနေပိုင်းက ကိုဗစ်-၁၉ ကာကွယ်၊ ထိန်းချုပ်ရေးလုပ်ငန်းတွေမှာသုံးဖို့ တရုတ်နိုင်ငံက ဆေးပစ္စည်းကိရိယာတွေ လှူဒါန်းပေးအပ်တဲ့ အခမ်းအနားကို Videoconferencing စနစ်နဲ့ တက်ရောက်ခဲ့တဲ့ ကျန်းမာရေးနဲ့ အားကစားဝန်ကြီး  ဒေါက်တာမြင့်ထွေးက ပြောတာပါ။ တရုတ်နိုင်ငံဟာ ၂၀၁၇ ခုနှစ်က မြန်မာနိုင်ငံမှာ ရာသီတုပ်ကွေးရောဂါ (influenza A (H1N1)) ကူးစက်ပျံ့နှံ့ခဲ့တုန်းကလည်း ရောဂါကာကွယ်ရေးပစ္စည်းတွေ၊ ဆေးနဲ့ ဆေးပစ္စည်းအများကြီး ပံ့ပိုးခဲ့တာကို ဝန်ကြီးဌာနက ကျေးဇူးတင်ရှိ မှတ်တမ်းတင်တယ်လို့ ဝန်ကြီးက ပြောပါတယ်။ အခု ကိုဗစ်-၁၉ ဖြစ်ချိန်မှာလည်း တရုတ်အစိုးရက အမေရိကန်ဒေါ်လာ ၅၉ သိန်းကျော်၊ ကုမ္ပဏီနဲ့ လူမှုအဖွဲ့အစည်းတွေက အမေရိကန်ဒေါ်လာ ၈၉၀၀၀၀ ကျော်၊ စုစုပေါင်း အမေရိကန်ဒေါ်လာ ၆၈ သိန်းကျော် တန်ဖိုးရှိတဲ့ ဆေးနဲ့ ဆေးပစ္စည်းကိရိယာတွေ ပံ့ပိုးပေးအပ်ခဲ့တဲ့အပြင် ဆေးဘက်ဆိုင်ရာ ပညာရှင်အဖွဲ့တွေ စေလွှတ်ပြီး ရောဂါကာကွယ်ထိန်းချုပ်မှု အတွေ့အကြုံတွေ ဝေမျှတာ၊ အကြံပြုတာတွေအတွက်လည်း ကျေးဇူးတင်တယ်လို့ ပြောပါတယ်။ ဒါ့အပြင် တရုတ်နိုင်ငံရဲ့ ပံ့ပိုးမှုနဲ့ မြန်မာနိုင်ငံရောဂါကာကွယ်ထိန်းချုပ်ရေးဗဟိုဌာန (Myanmar Center for Disease Control) ကို အမြန်ဆုံး စတင်တည်ဆောက်နိုင်ရေး ဆောင်ရွက်နေတယ်လို့လည်း ဝန်ကြီးက ပြောပါတယ်။ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံ သံအမတ်ကြီး H.E. Mr. Chen Hai ကလည်း မြန်မာနဲ့ တရုတ်တို့ဟာ ကိုဗစ်-၁၉ ကပ်ရောဂါကို ရင်ဆိုင်ရာမှာ ဆွေမျိုးပေါက်ဖော် ချစ်ကြည်ရင်းနှီးမှုတွေနဲ့ ပူးပေါင်းဆောင်ရွက်နေပြီး တရုတ်နိုင်ငံမှာ ကိုဗစ်-၁၉ ကပ်ရောဂါကူးစက်ပျံ့နှံ့မှုတုန်းက မြန်မာနိုင်ငံက မိတ်ဆွေကောင်းပီပီသသ ပံ့ပိုးကူညီခဲ့သလို မြန်မာနိုင်ငံမှာ ကိုဗစ်-၁၉ ဖြစ်ချိန်မှာလည်း တရုတ်နိုင်ငံက အပြန်အလှန် ပံ့ပိုးတာလို့ ပြောပါတယ်။ တရုတ်နိုင်ငံဟာ အမေရိကန်ဒေါ်လာ ၆ သိန်းတန်ဖိုးရှိတဲ့ အားကစားပစ္စည်းတွေကိုလည်း မနေ့က ပေးအပ်လှူဒါန်းခဲ့ပါတယ်။
8 months Ago

April 5, 2020

စိန့်ပီတာစဘတ်မြို့ဆေးရုံတခုက ဆေးဝန်ထမ်းများ ကာကွယ်ရေးဝတ်စုံများ လိုအပ်

ရုရှားနိုင်ငံ စိန့်ပီတာစဘတ်မြို့ ပိုစကော့ဗ်စခါယာဆေးရုံမှာ အလုပ်လုပ်နေတဲ့ ဆေးကုသရေး ဝန်ထမ်းတွေက သူတို့မှာ ဗိုင်းရပ်စ် ကူးစက်ခံ လူနာတွေကို ဘေးကင်းကင်း ကုသဖို့ တကိုယ်တော် ကာကွယ်ရေးဝတ်စုံတွေ လိုနေတယ်လို့ မီဒီယာကတဆင့် မေတ္တာရပ်ခံလိုက်ပါတယ်။ လူနာဆောင် တဆောင်လုံးမှ ဝတ်စုံ တစုံ နှစ်စုံသာ ရထားတယ်လို့ ဧပြီလ ၃ ရက်က ထုတ်ပြန်လိုက်တဲ့ ရုပ်သံထဲမှာ ပြောထားပါတယ်။  လူနာဆောင်ထဲမှာ အသက်ရှူ အားကူစက် တလုံး ၂ လုံးပဲ ရှိလို့ ကူးစက်ခံ လူနာတွေနဲ့ အလုပ်လုပ်ဖို့ မလုံလောက်ဘူးဆိုတာ ရှင်းပါတယ်။  တိုင်ကြားချက်ကို ဖြေရှင်းပေးမယ်လို့ စီမံရေးဌာနက ကတိပေးပေမယ့် ကျနော်တို့ အသက် တွေ၊ နီးစပ်သူတွေရဲ့ အသက်တွေကလည်း အရေးကြီးတယ်လို့ နာမည်မဖော်တဲ့ ဆေးဘက် ဝန်ထမ်း တယောက်က ပြောပါတယ်။  ကိုရိုနာဗိုင်းရပ်စ် ကူးစက်ခံ လူနာတွေ အလျှံပယ် ရောက်လာမယ့် အခြေအနေအတွက် ပြင်ဆင်ဖို့ ဆေးရုံဟာ ဧပြီလ ၂ ရက်က စပြီး ရက်ချိန်းပေး ဆေးကုသမှုကို ရပ်ခဲ့တယ်လို့ ဒေသခံ မီဒီယာ ဖွန်တန်ကာက ဆိုပါတယ်။ ဆေးဝန်ထမ်းတွေဟာ အသက်ရှူအားကူစက်တွေ အပါအဝင် ပစ္စည်းကိရိယာတွေ ပိုတပ်ဆင်ပေးဖို့ ဆေးရုံစီမံခန့်ခွဲရေးကို စာရေးသား တောင်းဆိုပေမယ့် အငြင်းခံခဲ့ ရတယ်လို့လည်း ပြောပါတယ်။  ဆေးရုံအကြီးအကဲကတော့ ဆေးဝန်ထမ်းတွေ ပြောဆိုချက် မမှန်ဘူးလို့ ဒေသခံ မီဒီယာကို ငြင်းဆိုခဲ့ပါတယ်။
1 year Ago
Up