ကာကွယ်ဆေး

August 16, 2022

ကိုရိုနာဗိုင်းရပ်စ်နှင့် အိုမီခရွန် မျိုးကွဲနှစ်ခုလုံးအတွက် ကာကွယ်ဆေး ဗြိတိန်အတည်ပြု

ဗြိတိန်နိုင်ငံဟာ ကိုရိုနာဗိုင်းရပ်စ်ရဲ့ မူရင်းနဲ့ အိုမီခရွန် မျိုးကွဲနှစ်မျိုးလုံးကို ပစ်မှတ်ထားတဲ့ ကိုဗစ်-၁၉ ကာကွယ်ဆေးကို အတည်ပြုတဲ့ ပထမဆုံးနိုင်ငံ ဖြစ်လာပါပြီ။

ယူကေ ဆေးဝါးကွပ်ကဲရေးရုံး (MHRA) ဟာ အရွယ်ရောက်ပြီးသူတွေအတွက် အားဖြည့်ဆေး အဖြစ် ယူအက်စ် ဆေးကုမ္ပဏီ မိုဒါးနားကထုတ်လုပ်တဲ့ ဘိုင်ဗေးလန့် ကာကွယ်ဆေးကို အတည်ပြုခဲ့တာပါ။

ဒီကာကွယ်ဆေးဟာ အိုမီခရွန် (BA.1) နဲ့ မူရင်း ၂၀၂၀ ဗိုင်းရပ်စ်နှစ်မျိုးလုံးကို ဆန့်ကျင်တဲ့ ‘ပြင်းထန်တဲ့ ကိုယ်ခံအားတုံ့ပြန်မှု’ ကို ဖြစ်ပေါ်စေကြောင်း ပြသတဲ့ လက်တွေ့စမ်းသပ်မှု ဒေတာပေါ်မှာ အခြေခံထားတယ်လို့ အေဂျင်စီက ပြောခဲ့ပါတယ်။

MHRA ဟာ လက်ရှိ လွှမ်းမိုးနေတဲ့ အိုမီခရွန် offshoots BA.4 နဲ့ BA.5 တို့ကို ဆန့်ကျင်တဲ့ ကောင်းတဲ့ခုခံအားတုံ့ပြန်မှုကို ထုတ်ပေးတယ်လို့လည်း စူးစမ်းလေ့လာဆန်းစစ်ချက်တခုကို ကိုးကားဖော်ပြပါတယ်။

MHRA အမှုဆောင်အရာရှိချုပ် ဂျွန်ရိန်းက “ယူကေမှာသုံးနေတဲ့ ကိုဗစ်-၁၉ ကာကွယ်ဆေးရဲ့ ပထမမျိုးဆက်ဟာ ရောဂါကို ကာကွယ်ဖို့နဲ့ အသက်တွေကိုကယ်ဖို့ ဆက်သုံးနေမယ်” လို့  ပြောပါတယ်။

“ဒီ ဘိုင်ဗေးလန့် ကာကွယ်ဆေးဟာ ဗိုင်းရပ်စ်က ဗီဇမျိုးကွဲတွေ ဆက်ပြီး ဆင့်ကဲ တိုးတက်ပေါ်ထွန်းနေလို့ ကိုဗစ်-၁၉ ကပ်ရောဂါကနေ ကျနော်တို့ကို ကာကွယ်ရာမှာ ကူညီမယ့် လက်နက်တိုက်ထဲက ထက်မြက်တဲ့ ကိရိယာတခုပဲ” လို့လည်း သူက ပြောခဲ့ပါတယ်။

4 months Ago

June 9, 2022

ရာသီတုပ်ကွေးကာကွယ်ဆေး ထိုးတော့မယ်ဆိုရင်

မိုးလေးအေးလာရင် ပတ်ဝန်းကျင်လေး စိမ်းလန်းလာလို့ စိတ်ချမ်းသာရတာ ကိုယ်တွေတင်မဟုတ်ပါဘူး။ ကိုယ်တွေကို နာဖျားအောင်လုပ်မယ့် တုပ်ကွေးပိုးလေးတွေရောပါ။ တုပ်ကွေးဖြစ်ရင် တစ်ကိုယ်လုံးကကိုက်ခဲ၊ အဖျားကတက်၊ ပါးစပ်ကပျက်နဲ့ ခံစားရတော်တော်ခက်တယ်။ ဒီကြားထဲက ကိုယ်က အိမ်ရဲ့ တုပ်ကွေးဖြန့်ချိသူများဖြစ်ခဲ့ရင် စိတ်ထဲမှာ စိတ်မကောင်းတောင် ဖြစ်မိသေးတယ်။ ဒီပြဿနာကို အကောင်းဆုံးဖြေရှင်းဖို့ဆိုရင် အကောင်းဆုံးနည်းလမ်းက ကာကွယ်တာပါ။

ကာကွယ်ခြင်း ကုသခြင်းထက် ပိုထိရောက်တယ်ဆိုတဲ့ စကားကလည်းရှိသေးတာကိုး။ ဒီတော့ ရာသီတုပ်ကွေးကို ဘယ်လိုများကာကွယ်ကြမလဲ။ လွယ်ပါတယ်။ ဒါကတော့ ရာသီတုပ်ကွေးကာကွယ်ဆေးထိုးပေါ့။ ကာကွယ်ဆေးထိုးလို့သာပြောတယ် ဘာမှသေသေချာချာမသိဘဲ မထိုးနိုင်ပါဘူးဆိုတဲ့ Helloဆရာဝန်ပရိသတ်ကြီးတွေရှိနေတယ်ဆိုရင်တော့ ဒီဆောင်းပါးလေးက သိချင်နေတဲ့ အဖြေတွေကို ထုတ်ပေးမှာပါ။

ဘယ်သူတွေက ကာကွယ်ဆေးအထိုးသင့်ဆုံးလဲ…….

အခုပြောပြမယ့်သူတွေက ကာကွယ်ဆေးကို မဖြစ်မနေထိုးသင့်တာပါ။

ရာသီတုပ်ကွေးကာကွယ်ဆေးမထိုးခင် ဘာတွေသိထားဖို့လိုမလဲ………

တုပ်ကွေးကာကွယ်ဆေးထိုးတော့မယ်ဆိုရင် သိချင်နေမယ့် အချက်လေးတွေများနေနိုင်ပါတယ်။ ဒီတော့ သိချင်နေတဲ့အကြောင်းအရာတွေရဲ့ အဖြေလေးတွေကို ဒီမှာကြည့်လိုက်ပါ။

ဘယ်အရွယ်က စပြီး ကာကွယ်ဆေးထိုးလို့ရလဲ…….

ရာသီတုပ်ကွေးကာကွယ်ဆေးကို ကလေးတွေထိုးထားဖို့လိုမယ်ဆိုပေမယ့် ဘေဘီလေးက ၆ လကျော်ပြီးမှသာ တုပ်ကွေးကာကွယ်ဆေးထိုးလို့ရမှာပါ။

ဓာတ်မတည့်တာမျိုးဖြစ်နိုင်လား…….

တုပ်ကွေးကာကွယ်ဆေးကဓာတ်မတည့်တာမျိုးဖြစ်နိုင်ပါတယ်။ တကယ်လို့ ဥအမျိုးမျိုးနဲ့ ဓာတ်မတည့်တာမျိုးရှိမယ်၊ အရင်က ကာကွယ်ဆေးနဲ့ ဓာတ်မတည့်တာမျိုးဖြစ်ဖူးမယ်ဆိုရင် ကာကွယ်ဆေးမထိုးခင်မှာ ဆရာဝန်နဲ့သေချာလေးတိုင်ပင်သင့်ပါတယ်။

တစ်ခါထိုးထားရုံနဲ့ လုံလောက်လား……..

ကာကွယ်ဆေးက တစ်နှစ်ကို တစ်ကြိမ်ထိုးဖို့လိုပါမယ်။

တုပ်ကွေးကာကွယ်ဆေးကြောင့် တုပ်ကွေးဖြစ်နိုင်လား……

တုပ်ကွေးကာကွယ်ဆေးကြောင့် တုပ်ကွေးဖြစ်သလို လက္ခဏာတွေခံစားရနိုင်ပေမယ့် တုပ်ကွေးကာကွယ်ဆေးကြောင့် တုပ်ကွေးတော့မဖြစ်နိုင်ပါဘူး။

တုပ်ကွေးကာကွယ်ဆေးကြောင့် ခန္ဓာကိုယ်မှာ ဘယ်လိုလက္ခဏာတွေတွေ့ရနိုင်လဲ……… တုပ်ကွေးကာကွယ်ဆေး ခန္ဓာကိုယ်ထဲမှာ ဓာတ်ပြုတဲ့အခါ ကာကွယ်ဆေးထိုးပြီး တစ်ရက် နှစ်ရက်လောက်အတွင်း ကြွက်သားတွေနာကျင်ကိုက်ခဲတာ၊ အဖျားတက်တာမျိုးတွေဖြစ်နိုင်ပါတယ်။ လူတိုင်းမှာတော့ မဖြစ်ပါဘူး။ ကာကွယ်ဆေးထိုးထိုးပြီးခြင်း အာနိသင်ရှိလား……… ကာကွယ်ဆေးက ထိုးပြီးပြီးချင်းမှာ အာနိသင်မပြပါဘူး။ ကာကွယ်ဆေးထိုးပြီးလို့ သီတင်းပတ် ၂ ပတ်ကြာမှ အာနိသင်က စပြတာပါ။ ဒါကြောင့် ကာကွယ်ဆေးထိုးပြီးချိန်ကနေ ၂ ပတ်အတွင်းမှာ တုပ်ကွေး ကူးစက်ခံရနိုင်ပါတယ်။ ဒါကြောင့် ကာကွယ်ဆေးထိုးပြီးပေမယ့်လည်း ၂ ပတ်အတွင်းမှာ တုပ်ကွေးအန္တရာယ်ကနေ ကာကွယ်ဖို့လိုပါမယ်။ ကာကွယ်ဆေးထိုးပြီးလည်း တုပ်ကွေးက လုံးဝ မဖြစ်တော့တာ မဟုတ်ပါဘူး။ ဖြစ်နိုင်ချေနည်းသွားတာပါ။ ဒါကြောင့် တခြားတုပ်ကွေးကာကွယ်တဲ့ နည်းလမ်းတွေကိုလည်း လိုက်နာနေရဦးမှာပါ။

ကာကွယ်ဆေးကြောင့် ဖြစ်နိုင်တဲ့ဘေးထွက်ဆိုးကျိုးတွေက ဘာတွေလဲ……..

ကာကွယ်ဆေးထိုးပြီးတဲ့အခါ ကာကွယ်ဆေးဓာတ်ပြုမှုကြောင့် ခန္ဓာကိုယ်မှာ အခုလိုဘေးထွက်ဆိုးကျိုးလေးတွေရှိနိုင်ပါတယ်။

  • အဖျားငွေ့ငွေ့လေးရှိမယ်
  • ဆေးထိုးထားတဲ့နေရာက နာနေမယ်
  • အားကုန်နေသလိုဖြစ်နေမယ်
  • ရောင်ရမ်းမယ်
  • အသက်ရှုရခက်မယ်
  • ထုံကျဉ်မယ် စတဲ့ လက္ခဏာတွေခံစားရနိုင်ပါတယ်။

ဘယ်လိုအခြေအနေမှာ ကာကွယ်ဆေးမထိုးသင့်ဘူးလဲ………

ကာကွယ်ဆေးက လူတိုင်းနဲ့ သင့်တော်မဟုတ်သလို အချိန်တိုင်းထိုးလို့ရတာမျိုးလည်းမဟုတ်ပါဘူး။ ဒီလိုအခြေအနေတွေမှာဆိုရင် ကာကွယ်ဆေးမထိုးသင့်ပါဘူး။

  • အဖျားရှိနေမယ်
  • အပြင်းဖျားနေမယ်
  • ကာကွယ်ဆေးနဲ့ဓာတ်မတည့်ဖြစ်ဖူးမယ်

ကာကွယ်ဆေးမထိုးဘဲ တုပ်ကွေးကာကွယ်လို့ရလား…….

ဆေးထိုးအပ်ကိုလည်းကြောက်တယ်။ တုပ်ကွေးလည်း မဖြစ်ချင်ဘူးဆိုရင်တော့ ဒီနည်းလမ်းလေးတွေက အသုံးတည့်မှာပါ။

  • လက်ကို မကြာခဏရေနဲ့ ဆပ်ပြာသုံးပြီး သန့်စင်နေအောင်ဆေးကြောပေးပါ
  • အယ်လ်ကိုဟောပါတဲ့ ရေမလိုလက်သန့်ဆေးရည်လည်း သုံးနိုင်ပါတယ်
  • မျက်လုံး၊ နှာခေါင်းနဲ့ပါးစပ်တွေကို ခဏခဏ ကိုင်တွယ်ထိတွေ့တာမျိုးမလုပ်ပါနဲ့
  • လူများတဲ့နေရာတွေကိုရှောင်ပါ
  • လေ့ကျင့်ခန်းပုံမှန်လုပ်ပါ
  • အစားမှန်မှန်စားပါ
  • အိပ်ရေးဝအောင်အိပ်ပါ
  • ရေများများသောက်ပါ
  • စိတ်ဖိစီးမှုတွေကိုဖြေလျော့ပါ။

ဤဆောင်းပါးကို DVB ၏ မိတ်ဘက် ကျန်းမာရေးနှင့် ဆေးပညာဝက်ဘ်ဆိုဒ် hellosayarwon.com မှ ပြန်လည်ဖော်ပြပါသည်။

6 months Ago
More News
Up