ကလေးဝမြို့၌ ရာစုနှစ်တဝက်အတွင်း အနိမ့်ဆုံးအပူချိန် စံချိန်တင်

February 3, 2020

ကလေးဝမြို့၌ ရာစုနှစ်တဝက်အတွင်း အနိမ့်ဆုံးအပူချိန် စံချိန်တင်

စစ်ကိုင်းတိုင်းဒေသကြီး ကလေးဝမြို့မှာ နှစ်ပေါင်း ၅၀ ကျော်အတွင်း ပိုအေးခဲ့ပြီး အနိမ့်ဆုံး အပူချိန် စံချိန်တင်သွားတယ်လို့ မိုးလေဝသနဲ့ ဇလဗေဒညွှန်ကြားမှု ဦးစီးဌာနက ထုတ်ပြန်ပါတယ်။ ဒီနေ့ ဖေဖော်ဝါရီ ၃ ရက်နေ့မှာ ကလေးဝမြို့ရဲ့ အပူချိန်ဟာ ၇ ဒသမ ၄ ဒီဂရီစင်တီဂရိတ်နဲ့ စံချိန်သစ်တင်လိုက်တာဖြစ်ပါတယ်။ အရင်စံချိန်ဟောင်းကတော့ ၇ ဒသမ ၈ ဒီဂရီစင်တီဂရိတ်ဖြစ်ပြီး ၁၉၆၈ ခုနှစ် ဖေဖော်ဝါရီ ၄ ရက်မှာ စံချိန်တင်ထားခဲ့တာပါ။ လက်ရှိမှာ ညအပူချိန်တွေအနေနဲ့ ချင်းပြည်နယ်မှာ ဖေဖော်ဝါရီလရဲ့ ပျမ်းမျှအပူချိန်အောက် ၃ ဒီဂရီစင်တီဂရိတ်၊ စစ်ကိုင်းတိုင်းအထက်ပိုင်းနဲ့ ရှမ်းပြည်နယ် မြောက်ပိုင်း၊ အရှေ့ပိုင်းတို့မှာ ဖေဖော်ဝါရီလရဲ့ ပျမ်းမျှအပူချိန်အောက် ၂ ဒီဂရီစင်တီဂရိတ် လျော့နည်းခဲ့ပါတယ်။ ရှမ်းပြည်နယ်တောင်ပိုင်းမှာ ဖေဖော်ဝါရီလရဲ့ ပျမ်းမျှအပူချိန်အထက် ၂ ဒီဂရီစင်တီဂရိတ်နဲ့ ပဲခူးတိုင်းနဲ့ ရန်ကုန်တိုင်းတို့မှာတော့ ဖေဖော်ဝါရီလရဲ့ ပျမ်းမျှအပူချိန်အထက် ၃ ဒီဂရီစင်တီဂရိတ် ကနေ ၄ ဒီဂရီစင်တီဂရိတ်အထိ ပိုခဲ့ပါတယ်။ ထူးခြားတဲ့ ညအပူချိန်တွေကတော့ ဟားခါးမြို့မှာ ၀ ဒီဂရီစင်တီဂရိတ်၊ ဖလမ်းမြို့၊ တီးတိန်မြို့၊ မင်းကင်းမြို့နဲ့ မိုးကုတ်မြို့တို့မှာ ၄ ဒီဂရီစင်တီဂရိတ်စီ၊ နမ့်စန်မြို့၊ မိုင်းယန်းမြို့နဲ့ ရမ်ကလောင်းတို့မှာ ၅ ဒီဂရီစင်တီဂရိတ်စီနဲ့ သီပေါမြို့၊ လားရှိုးမြို့၊ ကျောက်မဲမြို့၊ မင်းတပ်မြို့နဲ့ ပြင်ဦးလွင်မြို့တို့မှာတော့ ၆ ဒီဂရီစင်တီဂရိတ်စီတို့ အသီးသီး ဖြစ်ပါတယ်။
1 year Ago
Up