ကလေးမြို့နယ်

August 10, 2022

ကလေးမြို့နယ်တွင် ဘုရားကျောင်းအပါအဝင် လူနေအိမ် ၅၀ ကျော်ကို စစ်ကောင်စီတပ်က မီးရှို့ဖျက်ဆီး

စစ်ကိုင်းတိုင်း၊ ကလေးမြို့နယ်ရှိ ချင်းတိုင်းရင်းသားတွေနေထိုင်တဲ့ သာယာကုန်းကျေးရွာမှာ ဘုရားကျောင်းတကျောင်း အပါအဝင် လူနေအိမ်ခြေ ၅၀ ကျော်ကို စစ်ကောင်စီတပ်ဖွဲ့က အကြမ်းဖက် မီးရှို့ဖျက်ဆီးခဲ့တယ်လို့ ဒေသခံတွေက ပြောပါတယ်။

သာယာကုန်းကျေးရွာအတွင်း တပ်စွဲထားတဲ့ စစ်ကောင်စီတပ်သားတွေက သြဂုတ် ၂ ရက်မှ ၄ ရက်အထိ ၃ ရက်အတွင်း လူနေအိမ်ခြေ ၅၂ လုံးကို မီးရှို့ဖျက်ဆီးခဲ့တယ်လို့ ဒေသခံတစ်ဦးက ပြောပါတယ်။

အိမ်ခြေ ၃၀၀ ဝန်းကျင်ရှိတဲ့ သာယာကုန်းကျေးရွာမှာ လူဦးရေ ၁၅၀၀ လောက်နေထိုင်ကြပြီး ချင်းတိုင်းရင်းသားတွေ အများစုနေထိုင်တဲ့  ကျေးရွာဖြစ်ပါတယ်။

သာယာကုန်းကျေးရွာ မီးရှို့ခံရတာနဲ့ ပတ်သက်ပြီး စစ်ကောင်စီ မီဒီယာတွေမှာတော့ ဒေသခံ PDF တပ်ဖွဲ့ဝင်တွေ မီးရှို့တာလို့ စွပ်စွဲဖော်ပြထားပါတယ်။

အခုသြဂုတ်လဆန်းပိုင်းကစလို့ ကလေးနည်းပညာတက္ကသိုလ်အနီး တည်ရှိတဲ့ သာယာကုန်းကျေးရွာမှာ စစ်ကောင်စီတပ်နဲ့ ဒေသခံပြည်သူ့ကာကွယ်ရေးပူးပေါင်းတပ်ဖွဲ့တို့ ပြင်းပြင်းထန်ထန်တိုက်ပွဲဖြစ်ပွားခဲ့ကြပြီး နှစ်ဖက်တပ်တွေ ထိခိုက်ဒဏ်ရာရခဲ့ကြပါတယ်။

တိုက်ပွဲတွေကြောင့် ရွာသားတွေအားလုံး ကလေးမြို့ဘက်ကို ထွက်ပြေးတိမ်းရှောင်နေကြရပြီး အသင်းတော်၊ အရပ်ဖက်အဖွဲ့အစည်းတွေက ကူညီစောင့်ရှောက်ပေးနေတယ်လို့ စစ်ရှောင်တစ်ဦးက ပြောပါတယ်။

စစ်ကောင်စီတပ်တွေ ရွာထဲဝင်လာချိန်မှာ ထွက်မပြေးနိုင်ဘဲ  ရွာမှာကျန်ခဲ့တဲ့ အမျိုးသမီး၊ ကလေးငယ်၊ သက်ကြီးရွယ်အိုတွေအပါအဝင်  ရွာသား အယောက် ၃၀ လောက်ကို  စစ်ကောင်စီတပ်က  ဖမ်းဆီးခဲ့ပြီး  သြဂုတ် ၆ ရက်က  ပြန်လွှတ်ပေးခဲ့ပါတယ်။

အခုရက်ပိုင်း ကလေးမြို့နယ်တောင်ပိုင်းမှာ စစ်ကောင်စီတပ်ဖွဲ့နဲ့ ပြည်သူ့ကာကွယ်ရေး ပူးပေါင်းတပ်ဖွဲ့တို့အကြား တိုက်ပွဲတွေဖြစ်ပွားလို့  သာယာကုန်းကျေးရွာအပြင် ထောက်ကြံ့၊ ကြာအင်း၊ သံသာရွာနဲ့ တွန်းချောင်းရွာတို့မှာလည်း ရွာသားတွေ ထွက်ပြေးတိမ်းရှောင်နေကြရ ပါတယ်။

4 days Ago

August 5, 2022

ကလေးမြို့နယ်တွင် စစ်တပ်နှင့် PDF တိုက်ပွဲဖြစ်

စစ်ကိုင်းတိုင်း၊ ကလေးမြို့နယ်တောင်ပိုင်း သာယာကုန်းကျေးရွာမှာ ဩဂုတ် ၃ ရက် ညနေပိုင်းက ကလေးပြည်သူ့ကာကွယ်ရေးတပ်နဲ့ စစ်ကောင်စီတပ်ဖွဲ့တို့ တိုက်ပွဲဖြစ်ပွားခဲ့ပြီး Kalay-PDF တပ်ဖွဲ့ဝင်တဦး ကျဆုံးကာ စစ်ကောင်စီဘက်ကလည်း ထိခိုက်ကျဆုံးတာတွေ ရှိတယ်လို့ ထုတ်ပြန်ပြောဆိုပါတယ်။

ထောက်ကြန့်ကျေးရွာဘက်ကို ချီတက်လာတဲ့ စစ်ကောင်စီတပ်ဖွဲ့ဝင်တွေကို သာယာကုန်းကျေးရွာမှာ ပြည်သူ့ကာကွယ်ရေးတပ်ဖွဲ့ဝင်တွေက တိုက်ခိုက်ခဲ့တာဖြစ်ကြောင်း Kalay-PDF တာဝန်ရှိသူတဦးက ပြောပါတယ်။

“အကြမ်းဖက်စစ်ကောင်စီဘက်က စပြီး ချဉ်းကပ်လာတယ်။ တိုက်ပွဲက ပြင်းထန်တယ်။ အပြန်အလှန်ပစ်ပြီး လက်နက်ကြီးတွေနဲ့လည်းပစ်တော့ ကိုယ့်ဘက်ကလူကို ထိတယ်။ သူတို့ဘက်ကလည်း အကျအဆုံးရှိတယ်။ မှန်းလို့လုံးဝမရဘူး ဖြစ်နေတာ။ တိုက်ပွဲက ရွာထဲမှာဖြစ်တာဆိုတော့ သူတို့ (စစ်ကောင်စီ) ဘက်က သေနတ်ကောက်နေတာတွေ လဲနေတာတွေ တွေ့တယ်။ ဘယ်လိုမှ ရေတွက်လို့မရဘူး။”

Kalay-PDF တပ်ရင်း ၆ က အသက် ၁၉ နှစ်အရွယ် မောင်ဝေမင်းသော် တိုက်ပွဲမှာ ကျဆုံးသွားတယ်လို့ PDF တာဝန်ရှိသူတယောက်က ပြောပါတယ်။

အဆိုပါတိုက်ပွဲမှာ နှစ်ဖက် ထိခိုက်ကျဆုံးမှုရှိပြီး Kalay-PDF တပ်ဖွဲ့မှာ ကျည်မလုံလောက်တဲ့အတွက် ကျည်လိုအပ်နေတယ်လို့ ဆိုပါတယ်။

စစ်ကောင်စီစစ်ကြောင်း တက်လာ‌နေတာကို သတင်းရတဲ့အတွက် ဒေသခံတွေဟာ ဩဂုတ် ၁ ရက်ကတည်းက ဘေးလွတ်ရာ ထွက်ပြေးတိမ်းရှောင်နေကြတယ်လို့ ပြောပါတယ်။

ကလေးမြို့နယ်၊ ထောက်ကြန့်ကျေးရွာအနီးမှာ ပြီးခဲ့တဲ့ ဇူလိုင် ၁၄ ရက်နေ့ကလည်း တိုက်ပွဲြဖစ်ပွားခဲ့ပြီး Kalay–PDF တပ်သားတဦး ကျဆုံးခဲ့တယ်လို့ PDF အဖွဲ့က သိရပါတယ်။

1 week Ago
More News
Up