ကလော့

November 26, 2020

ကလော့ပ်လက်ထက် အိမ်ကွင်းအကြီးမားဆုံးရှုံးပွဲဖြင့် လီဗာပူးကြုံတွေ့

ဒီနေ့မနက်အစောပိုင်း ကစားခဲ့တဲ့ အတ္တလန္တာအသင်းနဲ့ ချန်ပီယံလိဂ်ပွဲစဉ်မှာ လီဗာပူးအသင်းက ၂ ဂိုး ဂိုးမရှိ နဲ့ ရှုံးနိမ့်ခဲ့ပါတယ်။  ဒီရှုံးနိမ့်မှုဟာ ကလော့လက်ထက် အိမ်ကွင်းအန်ဖီးလ်မှာ ပထမဆုံးအကြိမ် ဂိုးပြတ်ရှုံးနိမ့်မှုလည်း ဖြစ်ပါတယ်။  ကလော့ဟာ လီဗာပူးနည်းပြအဖြစ် အန်ဖီးလ်ကွင်းမှာ ပွဲစဉ် ၁၃၇ ပွဲတာဝန်ယူခဲ့ပြီး အတ္တလန္တာနဲ့ ပွဲမတိုင်ခင်ကအထိ ၁ ဂိုးအထက်နဲ့ ရှုံးနိမ့်ခဲ့ခြင်းမရှိပါဘူး။  လီဗာပူးအသင်း အန်ဖီးလ်ကွင်းမှာ နောက်ဆုံးအကြိမ်ဂိုးပြတ်ရှုံးနိမ့်မှုဟာ ၂၀၁၅ သြဂုတ် နည်းပြဟောင်းရော်ဂျာ လက်ထက်မှာဖြစ်ပြီး ဝက်စ်ဟမ်းကို ၃ ဂိုးပြတ်နဲ့ ရှုံးနိမ့်ခဲ့တာဖြစ်ပါတယ်။ ပွဲချိန်အတွင်းမှာ လီဗာပူးအသင်းဟာ စီးရီးအေပြိုင်ဘက်ကို အသာရရှိဖို့ ရုန်းကန်ခဲ့ရပြီး ဂိုးပေါက်ခြိမ်း  ခြောက်မှုလည်း မရှိခဲ့ပါဘူး။ ဒါဟာအသင်းအတွက် ၂၀၀၃ ခုနှစ်နောက်ပိုင်း ချန်ပီယံလိဂ်မှာ ပထမဆုံးအကြိမ်လည်း ဖြစ်ပါတယ်။  အတ္တလန္တာအသင်းဘက်ကတော့ သူတို့ပုံစံကောင်းကို ဆက်ထိန်းနိုင်ခဲ့ပြီး ၅ မိနစ်အတွင်း သွင်းယူခဲ့တဲ့ သွင်းဂိုး ၂ ဂိုးနဲ့ အနိုင်ရရှိခဲ့ပါတယ်။  ကလော့ဟာ ဒီပွဲမှာ ဆယ်ကျော်သက်လူငယ်ကစားသမားတွေဖြစ်တဲ့ ကာတစ်ဂျုံး၊ ရွိုင်းစ် ဝီလီယမ်နဲ့ နီကိုးလ်ဝီလီယမ်တို့ကို ထည့်သွင်းအသုံးပြုသွားခဲ့ပါတယ်။ ဒီပွဲမှာ လီဗာပူးစားသမားတွေဟာ အကောင်းဆုံးပုံစံမှာ ရှိမနေခဲ့ဘူးလို့ လီဗာပူးကစားသမား ဂျိမ်းစ်မီလ်နာက ပွဲအပြီးမှာပြောခဲ့ပါတယ်။  “ကျနော်တို့ ပုံစံကောင်းမှာ ရှိမနေခဲ့ပါဘူး။ ကစားသမားအများစုက တွဲပြီးကစားခဲ့ခြင်းမရှိဘဲ ပွဲစဉ်ဇယားကလည်း တော်တော်လေး ကြပ်နေပါတယ်။ တခါတလေမှာ အသင်းရဲ့ အကောင်းဆုံး ကစားသမားတွေ မပါဘဲနဲ့ နိုင်ပွဲကို ရှာနိုင်ရမှာဖြစ်ပေမယ့် ဒီပွဲမှာတော့ဒီလိုမလုပ်နိုင်ခဲ့ပါဘူး။ ကျနော်တို့ဟာ အုပ်စုရဲ့ထိပ်ဆုံးမှာရှိနေဆဲဖြစ်ပြီး သီတင်းပတ်ကုန်ပိုင်းမှာလည်း ပွဲကစားရဦးမှာဖြစ်ပါတယ်။ ကြိုးစားမှုကိုတော့ ဆက်လက်လုပ်ဆောင်နေဦးမှာဖြစ်ပါတယ်။ ဒီညမှာ ကျနော်တို့ အကောင်းဆုံးစွမ်းဆောင်ရည်ကို မပြသနိုင်ခဲ့ပေမဲ့ နောက်လာမယ့်ပွဲတွေအတွက် ဒီအရှုံးရလဒ်ကနေ ရုန်းထွက်ဖို့ လိုအပ်ပါတယ်” လို့ မီလ်နာက ပြောပါတယ်။ အတ္တလန္တာအသင်းကို ရှုံးနိမ့်ခဲ့ပေမယ့် လီဗာပူးအသင်းဟာ အုပ်စုဒီရဲ့ ထိပ်ဆုံးနေရာမှာ ဆက်ရှိနေဆဲဖြစ်ပါတယ်။ ဒါပေမဲ့ အတ္တလန္တာ၊ အေဂျက်ဇ်အသင်းတို့နဲ့ အမှတ်ကွာဟချက်ကတော့ ၂ မှတ်သာရှိပါတော့တယ်။
5 months Ago

November 21, 2020

ကိုဗစ်ကူးစက်ခံရသည့် ဆာလက်၏အခြေအနေ ကလော့ထုတ်ဖော်ပြောဆို

လက်စတာနဲ့ ကစားမယ့် တနင်္ဂနွေနေ့ ပရီးမီးယားလိဂ်ပွဲမှာ ဆာလက်မပါဘူးလို့ မပြောဆိုနိုင်ကြောင်း လီဗာပူးနည်းပြ ယာဂန်ကလော့က ငြင်းဆိုသွားခဲ့ပါတယ်။  လီဗာပူးတိုက်စစ်မှူး ဆာလက်ဟာ နိုင်ငံတကာ ပွဲစဉ်ကာလအတွင်းမှာ ကိုရိုနာဗိုင်းရပ်စ်ကူစက်ခံခဲ့ရသူပါ။  ဆာလက်ဟာ ပြီးခဲ့တဲ့ သီတင်းပတ် ကိုင်ရိုမြို့မှာ ကျင်းပခဲ့တဲ့ သူ့ညီရဲ့မင်္ဂလာဆောင်ကို နှာခေါင်းစည်းတပ်တာ၊ ခပ်ခွာခွာနေထိုင်းတာ စတာတွေလိုက်နာခြင်းမရှိဘဲ ဆင်နွှဲခဲ့တာတွေ့ခဲ့ရပြီးနောက် ဗိုင်းရပ်စ်ကူးစက်ခံရကြောင်း ကြေညာခဲ့တာပါ။ အသက် ၂၈ နှစ်အရွယ် ကစားသမားဟာ အခု သီတင်းပတ်အစောပိုင်းစစ်ဆေးမှုမှာလည်း ဒုတိယကြိမ်မြောက် positive ထပ် ဖြစ်ခဲ့ပေမယ့် မာဆေးဆိုဒ်ကို ပြန်လာတော့မှာဖြစ်ပါတယ်။ အာဆင်နယ်အသင်းရဲ့ အီဂျစ်လက်ရွေးစင်ကစားသမား အယ်လ်နီနီမှာလည်း ကိုရိုနာဗိုင်းရပ်စ်တွေ့ရှိခဲ့ရပါတယ်။  ဒီအခြေအနေကြောင့် အယ်လ်နီနီဟာ  လိဒ်နဲ့ ကစားမယ့်တနင်္ဂနွေနေ့ပွဲကို လွဲချော်မယ်လို့ အာဆင်နယ်အသင်းဘက်က ထုတ်ပြန်ထားပေမယ့် လီဗာပူးအသင်းဘက်ကတော့ ဆာလက်နဲ့ ပတ်သက်တဲ့ အခြေအနေကို တိတိကျကျထုတ်ပြန်ဖို့ငြင်းဆိုပါတယ်။  ပွဲကြိုသတင်းစာရှင်းလင်းပွဲမှာကလော့က “သူဒီနေ့အသင်းကို ပြန်လာမှာပါ။ ကျနော်သူနဲ့ အနီးကပ်အဆက်အသွယ်ရှိပါတယ်။ သူသာ negative ဖြစ်တယ်ဆိုရင် လုပ်စရာ ရှိတာတွေ ဆက်လုပ်သွားမှာပါ။ သူ့မှာ ရောဂါလက္ခဏာပြတာမျိုးမရှိပါဘူး။ သူ့အခြေအနေနဲ့ ပတ်သက်လို့ ဘာမှ လူသိရှင်ကြား ထုတ်ပြောစရာမရှိပါဘူး” လို့ ပြောပါတယ်။ ဆာလက်မင်္ဂလာပွဲ တက်ခဲ့တာနဲ့ပတ်သက်ပြီးလည်း ကလော့က “ညီအစ်ကိုတွေနဲ့ မင်္ဂလာအခမ်းအနားဟာ အမြဲတမ်းကောင်းပါတယ်။ ကျနော်ဒါနဲ့ပတ်သက်လို့ ကစားသမားတွေကို ဘာပြောလို့ရမှာလဲ။ သူတို့အားလုံးဟာ စည်းကမ်းကို လိုက်နာကြသူတွေပါ။ ဒါပေမဲ့ အခု ကိစ္စလို တခါတလေမှာ အလုပ်မဖြစ်တာတွေလည်း ရှိတတ်ပြီး တခုခုဖြစ်တတ်ပါတယ်။ ကျန်တာကတော့ ကျနော်နဲ့ ဆာလက် ကြားကိစ္စပါ။ ကျနော်တို့ အဆင်ပြေပါတယ်” လို့ ပြောပါတယ်။  လီဗာပူးအသင်းဟာ တနင်္ဂနွေနေ့ပွဲစဉ်မှာ လက်ရှိအမှတ်ပေးဇယားကို ဦးဆောင်နေတဲ့ လက်စတာအသင်း နဲ့ ယှဉ်ပြိုင်ရမှာဖြစ်ပြီး လက်စတာကိုသာ အနိုင်ရခဲ့ပါက အမှတ်ပေးဇယားထိပ်ဆုံး ရောက်ဖို့ အလားအလာကောင်းတွေ ရှိနေပါတယ်။  ဒါပေမဲ့ ရော်ဂျာရဲ့ လက်စတာသင်းဟာ ဒီရာသီပုံစံကောင်းတွေပြသနေပြီး ဒီအတွက်လည်း အံ့သြသင့်စရာမရှိဘူးလို့ ကလော့ကပြောပါတယ်။
5 months Ago
Up