ကရင့်အာဇာနည်နေ့

August 14, 2018

ဟင်္သာတတွင် ကရင့်အာဇာနည်နေ့ ဦးဆောင်ကျင်းပသူ ၅ ဦး တရားစွဲခံရ

ကရင့်အာဇာနည်နေ့ အခမ်းအနားကို တားမြစ်တဲ့ကြားက ဆက်လက်ကျင်းပခဲ့လို့ ဦးဆောင်သူ ကရင်ပြည်သူ့ပါတီက ဦးကျော်ကြီး၊ ကရင်အမျိုးသားအစည်းအရုံး ဗဟိုအလုပ်အမှုဆောင် ပဒိုမန်းငြိမ်းမောင် အပါအဝင် ၅ ဦးကို ဟင်္သာတမြို့နယ် ရဲစခန်းက တရားစွဲဆိုလိုက်ပါတယ်။ ပြီးခဲ့တဲ့ သြဂုတ် ၁၂ ရက်နေ့က ကျရောက်တဲ့ ၆၈ နှစ်မြောက် ကရင့်အာဇာနည်နေ့ အထိမ်းမှတ် အခမ်းအနားကို ဧရာဝတီတိုင်းဒေသကြီး ဟင်္သာတမြို့မှာ ကျင်းပရာမှာ အာဏာပိုင်တွေက တားမြစ်ခဲ့တာပါ။ မြို့နယ်မှူးက ကရင့်အာဇာနည်နေ့ ဆိုတဲ့ ဆိုင်းဘုတ်ကို ဖြုတ်ပေးဖို့ ပြောဆိုခဲ့ရာမှာ မဖြုတ်ပေးနိုင်ကြောင်း ပြောဆိုခဲ့လို့ တရားစွဲဆိုတာလို့ ကရင်အမျိုးသားအစည်းအရုံး ဗဟိုကော်မတီဝင် ပဒိုမန်းငြိမ်းမောင်က ပြောပါတယ်။ “အကြောင်းကြားစာတော့ မရသေးဘူး။ သူတို့က ဟင်္သာတက ကျင်းပတဲ့ လူကြီးတွေကို မြို့နယ်ရုံးကနေ ခေါ်ပြီးတော့ အခုလို တရားစွဲမယ်ဆိုပြီးတော့ အဲလို ပြောလိုက်တယ်လေ။ ဆင့်စာတော့ မရောက်သေးဘူး။  ပုဒ်မ ၂၆ က တားမြစ်တဲ့ဟာကို မလိုက်နာတဲ့ ဟာပေါ့နော်။ ခွင့်ပြုချက်မရဘဲနဲ့ လုပ်တဲ့ဟာမျိုးပေါ့နော်။ ” အခုလို ကရင့်အာဇာနည်နေ့ ကျင်းပတားမြစ်တာနဲ့ တရားစွဲဆိုတာဟာ လူမျိုးတမျိုးရဲ့ ဂုဏ်သိက္ခာကို နင်းခြေဖျက်ဆီးတာ ဖြစ်တယ်လို့လည်း ပဒိုမန်းငြိမ်းမောင်က ပြောပါတယ်။ “ကရင်အာဇာနည်နေ့ ဆိုတာ လူမျိုးတိုင်း၊ လူမျိုးတိုင်းမှာ သူ့အထွတ်အမြတ် အလေးအနက်ထားတဲ့ နေ့တွေ ရှိတယ်လေ။ ကျနော်တို့ ဗမာပြည်မှာ လွတ်လပ်ရေးနေ့တို့လို၊ ပြည်ထောင်စုနေ့၊ ဗိုလ်ချုပ်အောင်ဆန်းတို့ ကျဆုံးတဲ့အာဇာနည်နေ့ ဒါ နိုင်ငံတော်က အသိအမှတ်ပြုထားတဲ့ လူမျိုးအရ အထွတ်အမြတ်ထားတာ။ အဲလို ကျန်တဲ့လူမျိုးတွေမှာလည်း အဲလို ရှိတာပေါ့နော်။ ကျနော်တို့ကို ဒီလိုမျိုးလုပ်တဲ့အတွက် ဒါက လူမျိုးတမျိုးရဲ့ ဂုဏ်သိက္ခာကို နင်းခြေဖျက်ဆီးတာနဲ့ အတူတူပဲလေ။ အဲဒီခါကျတော့ တမျိုးသားလုံးအပေါ်မှာ မကောင်းဘူးပေါ့နော်။” ကရင့်အာဇာနည်နေ့အခမ်းအနားကို ဧရာဝတီတိုင်းဒေသကြီး၊ ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ မွန်ပြည်နယ်နဲ့ ကရင်ပြည်နယ်တွေမှာ ကျင်းပခဲ့ပြီး ရန်ကုန်နဲ့ င်္ဟသာတက အခမ်းအနားကို အာဏာပိုင်တွေက တားမြစ်ခဲ့တာဖြစ်ပါတယ်။ ၁၉၅၀ ပြည့်နှစ် သြဂုတ် ၁၂ ရက်မှာ ကေအန်ယူ ဥက္ကဋ္ဌ စောဘဦးကြီး၊ ဗိုလ်ချုပ်စိုင်းကေနဲ့ အဖွဲ့ဟာ တော်လှန်ရေးတာဝန် ထမ်းဆောင်နေရင်း နဘူးမြို့နယ် ထို့ကော်ကိုးကျေးရွာအနီး လယ်တဲတခုမှာ ပစ်ခတ်မှုကြောင့် ကျဆုံးခဲ့ရပါတယ်။ အဲ့ဒီနေ့ကို အစွဲပြုပြီး ကရင့်အမျိုးသားအာဇာနည်နေ့ ဖြစ်ပေါ်လာတာဖြစ်ပြီး ကရင်လူမျိုး အများစုနေထိုင်ရာ ဒေသတွေမှာတော့ အဲဒီနေ့တနေ့လုံး အစားမစားဘဲ ကရင့်အာဇာနည်နေ့ကို အလေးအနက် အထိမ်းအမှတ်ပြု ကျင်းပလေ့ရှိပါတယ်။ ကရင်အမျိုးသားအစည်းအရုံးဟာ ၂၀၁၂ ခုနှစ်က အစိုးရနဲ့ အပစ်ခတ်ရပ်စဲရေးရယူပြီး တနိုင်ငံလုံး ပစ်ခတ်တိုက်ခိုက်မှု ရပ်စဲရေးစာချုပ် (အန်စီအေ)မှာ လက်မှတ်ထိုးထားတဲ့အဖွဲ့ဖြစ်ပါ တယ်။ အပစ်ခတ်ရပ်ပြီးနောက်ပိုင်း မတရားသင်းကနေ ဖယ်ဖျက်ကြောင်း အစိုးရက ကြေညာခဲ့ပြီး အဖွဲ့ဝင်တွေအနေနဲ့လည်း ကရင်အမျိုးသားရှိတဲ့နေရာတွေမှာ လွတ်လပ်စွာ သွားလာနေကြပါတယ်။
3 years Ago

August 12, 2016

ကရင့်အာဇာနည်နေ့ ရန်ကုန်အပါအ၀င် နေရာတော်တော်များများတွင် ကျင်းပ

ဒီကနေ့ကျရောက်တဲ့ ၆၆ နှစ်ပြည့် ကရင့်အာဇာနည်နေ့အထိမ်းအမှတ် ရန်ကုန်အပါအ၀င် ကရင်ပြည်နယ်က နေရာတော်တော်များများမှာ ကျင်းပနေကြပါတယ်။ ရန်ကုန်မြို့ လှည်းတန်းက ယုဒသန်ခန်းမမှာ မနက် ၁၀ နာရီကနေ ၃ နာရီအတွင်း အထိန်းအမှတ်ပွဲတွေ ကျင်းပနေကြသလို ကရင်ပြည်နယ်အတွင်း ကေအန်ယူ ထိန်းချုပ်နယ်မြေ မှာလည်း အထိမ်းအမှတ်အခန်းအနားတွေကျင်းပကြပါတယ်။ ဒီကနေ့ဟာ ကရင်အမျိုးသားခေါင်းဆောင် စောဘဦးကြီးနှင့်တကွ မျိုးချစ်ခေါင်းဆောင် ရဲဘော်တွေ ကျဆုံးတဲ့ ၆၆ နှစ်ပြည့် ကရင့်အာဇာနည်နေ့ဖြစ်ပါတယ်။ ကရင်အမျိုးသားအစည်းအရုံးဥက္ကဌ ဗိုလ်ချုပ်ကြီးမူတူးစေးဖိုးရဲ့ ၆၆ နှစ်မြောက်အာဇာနည်နေ့ မိန့်ခွန်းမှာ “ယနေ့အချိန်အထိ မိမိတို့ကရင်အမျိုးသားများနှင့် တိုင်းရင်းသားများအနေဖြင့် ဥပေဒနှင်အညီ လွတ်လပ်မှု၊ အမျိုးသားတန်းတူမှုနှင့် ကိုယ်ပိုင်ပြဌာန်းခွင့် အပြည့်အ၀မရှိကြသေး ဘူးကြောင်းနဲ့ ဒီအခွင့်အရေးတွေဟာ နိုင်ငံရေး လုပ်ငန်းစဉ်များအရ ဖွဲ့စည်းပုံအခြေခံဥပေဒေမှ အတိအလင်းပြဌာန်းသတ်မှတ်ထားဖို့လိုအပ်ကြောင်း” ဖော်ပြထားပါတယ်။ ဒါ့အပြင့် ကေအန်ယူအနေနဲ့ လက်နက်ကိုင်တော်လှန်ရေးဆင်နွှဲနေတဲ့ အချိန်မှာ အကြောင်း အမျိုးမျိုးကြောင့် ကရင်အမျိုးသားများအနေနဲ့ မိမိတို့နှင့်အတူတကွ ပါဝင်ဆင်နွှဲကြဖို့ အခွင့်အခါမပေးခဲ့သော်လည်း နိုင်ငံရေးနည်းလမ်းအရ ကြိုးပမ်းအားထုတ်လျှက်ရှိတဲ့အခါမှာ ကရင်အမျိုးသားတွေအနေနဲ့ မိမိတို့ရဲ့ နေရာဒေသနှင့် မိမိတို့ရဲ့ ကျရာအခန်းကဏ္ဍအသီးသီးမှာ ပူးပေါင်းပါဝင်နိုင်ကြောင်းတိုက်တွန်း ပြောဆိုထားပါတယ်။
5 years Ago
Up