ကရင်အာဇာနည်နေ့

August 12, 2018

ကန့်သတ်မှုများကြားမှ ကရင်အာဇာနည်နေ့အခမ်းအနား ဟင်္သာတတွင် ကျင်းပ

ဟင်္သာတမြို့မှာ ကရင်အာဇာနည်နေ့အခမ်းအနားကို ကန့်သတ်မှုတွေ ကြားကနေ ကျင်းပခဲ့ပါတယ်။ ကရင် အာဇာနည်နေ့အခမ်းအနားတွေကို ဧရာဝတီတိုင်းဒေသကြီးက မြို့နယ်တွေမှာ ကျင်းပဖို့ စီစဉ်ထားပေမယ့် တားမြစ်ခံခဲ့ရပါတယ်။ ကရင့်အာဇာနည် စောဘဦးကြီးရဲ့ ဇာတိဖြစ်တဲ့ ပုသိမ် ဘဲဂရက်၊ မြောင်းမြမြို့နယ်၊ ပန်းတနော်၊ ဟင်္သာတမြို့နယ်တွေမှာ တားဆီးခံခဲ့ရပါတယ်။ အဲဒီလို ကန့်ကွက်တဲ့ကြားကနေ ဟင်္သာတမြို့နယ်မှာတော့ ၆၈ ကြိမ်မြောက် ကရင့်အာဇာနည်နေ့ အခမ်းအနားကို ကျင်းပခဲ့ပါတယ်။ ကရင်အာဇာနည်နေ့အခမ်းအနားကို ကန့်ကွက်တာဟာ ရိုင်းဆိုင်းတဲ့ လုပ်ရပ်ဖြစ်တယ်လို့ ကရင်အမျိုးသားအစည်းအရုံး (ကေအန်ယူ) အလုပ်အမှုဆောင်အဖွဲ့ဝင် ပဒိုမန်းငြိမ်းမောင်က ပြောပါတယ်။ “အာဏာရှိတိုင်း အပေါ်စီးကနေပြီး တိုင်းရင်းသားလူမျိုးတွေကို ဒီလိုဖိနှိပ်မယ်ဆိုရင် ငြိမ်းချမ်းရေးကလည်း ရမှာမဟုတ်ဘူး။ ငြိမ်းချမ်းရေး ဆောင်ရွက်တာလည်း ဘာမှအဓိပ္ပာယ်မရှိဘူး။ တိုင်းရင်းသား စည်းလုံးညီညွတ်ရေးဆိုတာလည်း ဘာမှအဓိပ္ပာယ်မရှိ ဘူး။ အမျိုးသား ပြန်လည်သင့်မြတ်ရေးဆိုတာလည်း ဘာမှ အဓိပ္ပာယ်မရှိဘူးဆိုတာ ကျနော်ပြောချင်တယ်။” ဟင်္သာတမြို့ ကရင်ပြည်သူ့ပါတီမှ စောကျော်ကြီးက “ဆုပေးပွဲမင်္ဂလာနဲ့ ဆုပေးပွဲ အခမ်းအနားကိုလုပ်ပါ။ အာဇာနည်နေ့ကို မလုပ်ပါနဲ့ဆိုပြီး ဆိုင်းဘုတ်တွေ၊ နဖူးစည်းစာတန်းတွေနဲ့ အတွင်းကဟာတွေ အကုန်လုံးဖြုတ်ခိုင်းတယ်။ ကျနော်တို့က မဖြုတ်ပေး နိုင်ဘူးဆိုတဲ့အကြောင်းကို သူတို့ကို ပြောပြပြီးတော့ ပြန်လာခဲ့တယ်” လို့ ပြောပါတယ်။ ဟင်္သာတမြို့မှာ ကရင် အာဇာနည်နေ့အခမ်းအနား ဦးဆောင်ကျင်းပသူတွေကို သြဂုတ် ၁၃ ရက်နေ့မှာ အရေးယူမယ်လို့ အုပ်ချုပ်ရေးဘက်ကလည်း ဆင့်ခေါ်ထားပါတယ်။ ဟင်္သာတမြို့နယ် အုပ်ချုပ်ရေးမှူး ဦးသန်းနိုင်က “ကရင်အမျိုးသားတို့ရဲ့ ဝါခေါင်လ ချည်ဖြူဖွဲ့မင်္ဂလာ လုပ်ဖို့ဆိုပြီး တင်ထားခြင်းဖြစ်ပါတယ်။ ကျနော်တို့က တင်ထားတဲ့အတိုင်း ခွင့်ပြု ပါတယ်။ ဒါပေမယ့် ခွင့်ပြုချက်တင်ထားတဲ့အထဲမှာ မပါတဲ့ (၆၈) နှစ်မြောက် ကရင်အမျိုးသား အာဇာနည်နေ့ဆိုတာကျတော့ ကျနော်တို့ကို တင်တဲ့ထဲမှာ မပါတဲ့အတွက် ခွင့်မပြုတာ ဖြစ်ပါတယ်” လို့ ပြောပါတယ်။ ကရင်အာဇာနည်နေ့ကို ကရင်တော်လှန်ရေးခေါင်းဆောင် စောဘဦးကြီး ကျဆုံးတဲ့ သြဂုတ် ၁၂ ရက်နေ့ကို သတ်မှတ်ပြီး နှစ်တိုင်း နိုင်ငံတ၀ှမ်းမှာ ကရင်တိုင်းရင်းသားတွေက အခမ်းအနားတွေ ကျင်းပလေ့ရှိပါတယ်။ ဟင်္သာတမှာလိုပဲ ဒီနှစ် ရန်ကုန်မှာပြုလုပ်တဲ့ ကရင်အာဇာနည်နေ့ အခမ်းအနားကို တားဆီးခံခဲ့ရပါတယ်။ ကေအန်ယူကတော့ ကရင့်အာဇာနည်နေ့ အခမ်းအနားကို ဖာပွန်ခရိုင် တပ်မဟာ ၅ အခြေစိုက်တဲ့ တပ်ရင်း ၁ မှာ စစ်ရေးပြ အခမ်းအနားနဲ့ ပြုလုပ်ခဲ့ပါတယ်။ ပြီးခဲ့တဲ့ ရက်ပိုင်းက အဲဒီအခမ်းအနားလုပ်ဖို့ ကေအန်ယူက ကြိုတင်လေ့ကျင့်တာကို တပ်မတော်က ကန့်ကွက်ပြီး စစ်အင်အား တိုးချဲ့ချထားတာတွေ လုပ်ခဲ့ပြီး နောက်ပို်င်းမှာ တပ်တွေ ပြန်လည်ရုပ်သိမ်းသွားခဲ့ပါတယ်။
3 years Ago

August 7, 2018

ကရင်အာဇာနည်နေ့ ကျင်းပမည့်နေရာမှ အစိုးရတပ်များ ပြန်ထွက်ခွာ

ကရင်အာဇာနည်နေ့ ကျင်းပမယ့်နေရာမှာ  တပ်မတော်က စစ်ကြောင်းတွေနဲ့ တပ်ချခဲ့ပေမယ့် အခုရက်ပိုင်းမှာ ပြန်ထွက်ခွာသွားတဲ့အတွက် သတ်မှတ်ထားတဲ့ နေရာမှာပဲ အခမ်းအနား ကျင်းပမယ်လို့ ကရင်အမျိုးသားအစည်းအရုံး မူတြော်(ဖာပွန်)ခရိုင် အတွင်းရေးမှူး စောရော်ဘင်မူးက ပြောပါတယ်။ လာမယ့် သြဂုတ် ၁၂ ရက်မှာ ကျရောက်မယ့် ၆၈ ကြိမ်​​မြောက်​ ကရင်​အာဇာနည်​​နေ့ အခမ်းအနားကို ကေအန်ယူ တပ်​မဟာ ၅ တပ်​ရင်း၊ ၁၀၂ နယ်မြေ ဒွယ်လိုးမြို့နယ်၊ ကတိုင်တိ ကျေးရွာအုပ်စု ဖာလုံကြီးရွာမှာ  ပြုလုပ်ဖို့ စီစဉ်ထားတာဖြစ်ပါတယ်။ ကေအန်ယူ မူတြော်(ဖာပွန်)ခရိုင် အတွင်းရေးမှူး စောရော်ဘင်မူးက “မနေ့က ကျနော်တို့ သတင်းအရ စစ်တပ်ဘက်က နေရာရွှေ့လိုက်တယ်လို့ သိရတယ်။ အရင်က ဖာလုံရွာ လမ်းမပေါ်မှာရှိနေခဲ့တယ် အခုတော့ ဆုတ်သွားတယ်။ ဘယ်အထိ ဆုတ်သွားလဲ ဆိုတော့မသိဘူး။ ဒါပေမယ့် ကျနော်တို့ ကျင်းပမယ့် ကရင့်အာဇာနည်နေ့ အခမ်းအနားကတော့ အဆင်ပြေ ချောမွေ့မယ်လို့တော့ ထင်ပါတယ်။ ” ကရင်အာဇာနည်နေ့အခမ်းအနားမှာ စစ်ရေးပြအခမ်းအနား ထည့်သွင်းမယ့်အပေါ် ကရင်ပြည်နယ် လုံခြုံရေးနဲ့ နယ်စပ်ရေးရာဝန်ကြီးက ကန့်ကွက်ထားခဲ့ပြီးနောက်  အခမ်းအနား ကျင်းပမယ့်နေရာမှာ တပ်မတော်က လက်နက်ကြီး လက်နက်ငယ်အပြည့်အစုံနဲ့ အင်အားဖြည့် ဝင်ရောက် ထပ်စွဲထားခဲ့တာ ဖြစ်ပါတယ်။ ကရင်အာဇာနည်နေ့ကို အစီအစဉ်အတိုင်း ဆက်လက်ကျင်းပသွားမယ်လို့ စောရော်ဘင်မူးက ပြောပါတယ်။ “ကန့်ကွက်စာကတော့ မကန့်ကွက်တော့ဘူးလို့ မပြောဘူး။ ကန့်ကွက်နေဆဲပဲ။ ကျနော်တို့ကလည်း ကျနော်တို့ လုပ်မယ့်ပွဲကလည်း သူများနေရာ၊ သူများခွင်၊ နောက်ပြီး သူများကို နှောင့်ယှက်မယ့် လှုပ်ရှားမှုမျိုးလည်း မဟုတ်ဘူး။ မိမိဒေသ၊ မိမိနယ်မြေ၊ မိမိအုပ်ချုပ်တဲ့ ဒေသမှာပဲ လုပ်တဲ့အတွက်ကြောင့် ကျနော်တို့ကတော့ စီစဉ်ထားတဲ့အတိုင်း အကောင်အထည်ဖော်မယ်ဆိုတာ ကျနော်တို့က ဆုံးဖြတ်ထားတာပေါ့နော်။” အခုလို အစိုးရတပ်ဖွဲ့တွေ ထွက်ခွာပေးတာဟာ နှစ်ဖက်ခေါင်းဆောင်တွေရဲ့ ညှိနှိုင်းမှုကြောင့် ဖြစ်နိုင်ပြီး ဒါဟာ ငြိမ်းချမ်းရေးအတွက် ကောင်းတဲ့ လက္ခဏာဖြစ်တယ်လို့လည်း စောရော်ဘင်မူးက ပြောပါတယ်။
3 years Ago
Up