ကယ်လီဖိုးနီးယား ကမ်းရိုးတန်း

October 5, 2021

ကယ်လီဖိုးနီးယားကမ်းရိုးတန်း ရေနံယိုစိမ့်မှု ကပ်ဆိုးကြီးဖြစ်ကြောင်း မြို့တော်ဝန်ပြော

အမေရိကန်နိုင်ငံ ကယ်လီဖိုးနီးယားကမ်းရိုးတန်း တောင်ပိုင်းမှာ ရေနံအကြီးအကျယ် ယိုဖိတ်မှုဟာ သဘာဝပတ်ဝန်းကျင်ဆိုင်ရာ ကပ်ဆိုးကြီးပဲလို့ ဟန်တင်တွန်ကမ်းခြေရှိရာ မြို့တော်ဝန်က အောက်တိုဘာ ၃ ရက်မှာ ပြောလိုက်ပါတယ်။

ရေနံပိုက်လိုင်း ကျိုးပေါက်မှုကြောင့် ရေနံတွေ ယိုစိမ့်ခဲ့လို့ ငါးတွေ၊ ငှက်တွေ သေဆုံးပြီး သဲသောင်ပေါ်မှာ တင်နေတာပါ။

ကမ်းရိုးတန်းက စိမ့်မြေတွေမှာလည်း ရေနံတွေ ပေကျံနေပါတယ်။ ခန့်မှန်းခြေ ရေနံစိမ်းစည် ၃,၀၀၀ ဒါမှမဟုတ် ဂါလန်ပေါင်း ၁၂၆,၀၀၀ လောက် ယိုဖိတ်ပြန့်ဆင်းခဲ့လို့ ပစိဖိတ်သမုဒ္ဒရာ ရေမျက်နှာပြင် ၁၃ စတုရန်းမိုင်လောက် ဧရိယာကို ရေနံလွှာ ဖုံးအုပ်သွားပါတယ်။

လော့စ်အိန်ဂျလိစ်မြို့ တောင်ဘက် မိုင် ၄၀ အကွာက ကမ်းခြေမြို့လေးဟာ ရေနံယိုဖိတ်မှု ဒဏ်ကို ခါးစည်းခံနေရပါတယ်။

ရေနံပြင်ကြီးဟာ လှိုင်းစီးသူတွေ နေပူဆာလှုံသူတွေကြားမှာ ကျော်ကြားတဲ့ ဟန်တင်တွန် ကမ်းခြေကနေ နယူးပို့ထ်ကမ်းခြေထိ ပြန့်နေခဲ့ပါတယ်။

ရေနံတူးစင်ကို ဟူစတန်မြို့ အခြေစိုက် အမ်ပလီဖိုင်းစွမ်းအင် ကော်ပိုရေးရှင်းရဲ့ ဘီတာ ကမ်းလွန်လုပ်ငန်းက လုပ်ငန်းလည်ပတ်နေပါတယ်။ ရေနံယိုဖိတ်ရတဲ့ အကြောင်းရင်းကိုရော ဘယ်လို ရေနံအမျိုးအစား ပါဝင်လဲ ဆိုတာကို စုံစမ်းစစ်ဆေးနေပြီလို့ အရာရှိတွေက ပြောထားပါတယ်။

2 weeks Ago
Up