ကယ်တင်

October 21, 2021

“မြန်မာပြည်ကိုကယ်တင်ရေး စစ်ကောင်စီကိုငွေမပေး” တကမ္ဘာလုံးဆိုင်ရာသပိတ်ပြုလုပ်မည်

တကမ္ဘာလုံးဆိုင်ရာ မြန်မာ့နွေဦးတော်လှန်ရေးဆန္ဒပြပွဲကို လာမယ့် အောက်တိုဘာ ၃၀ နဲ့ ၃၁ ရက်နေ့တွေမှာ ကျင်းပသွားဖို့ ရှိနေပြီး အားလုံးပါဝင်ကြဖို့ ဖိတ်ခေါ်ထားပါတယ်။

ဒီလှုပ်ရှားမှုမှာတော့ ပြည်သူတွေကို အကြမ်းဖက်သတ်ဖြတ်နေတဲ့ စစ်ကောင်စီထံကို စီးဆင်းနေတဲ့ Blood Money တွေ၊ ငွေကြေးထောက်ပံ့မှုတွေကို ရပ်တန့်စေရေး အဓိကထားပြီး “မြန်မာပြည်ကိုကယ်တင်ရေး စစ်ကောင်စီကိုငွေမပေး” လှုပ်ရှားမှုအနေနဲ့ တောင်းဆိုဆန္ဒပြသွားမှာဖြစ်တာမို့ ကမ္ဘာတဝန်းရှိ ဒီမိုကရေစီကိုလိုလားတဲ့ မြန်မာ သွေးချင်းတိုင်းရင်းသားညီအစ်ကိုမောင်နှမတွေ တစ်စုတည်းတစ်စည်းတည်း ပူးပေါင်းပါ ဝင်ပေးကြဖို့ ဖိတ်ခေါ်ထားတာ ဖြစ်ပါတယ်။ 

မြန်မာနိုင်ငံမှာ ပြီးခဲ့တဲ့ ဖေဖော်ဝါရီ ၁ ရက်နေ့က စတင်ကာ အကြမ်းဖက်စစ်အုပ်စုက မတရားအာဏာသိမ်းယူခဲ့တာကို ဆန့်ကျင်ဆန္ဒပြခဲ့ကြတဲ့ နွေဦးတော်လှန်ရေးကာလဟာ ၈ လခွဲကျော် ကြာမြင့်ခဲ့ပြီ ဖြစ်ပါတယ်။

ဒီကာလတွေအတွင်း အကြမ်းဖက်ဖြိုခွင်းမှုတွေကြောင့် ထိခိုက်ကျဆုံးရသူတွေ၊ ဖမ်းဆီး ထောင်ချခံရသူတွေနဲ့အတူ နိုင်ငံအဝန်း တောရောမြို့ပါမကျန် ဒေသခံပြည်သူ့ကာကွယ် ရေးတပ်တွေနဲ့ စစ်ကောင်စီတပ်တွေကြားတိုက်ပွဲတွေလည်း ပြင်းထန်နေတာပါ။

နိုင်ငံရေးအကျဉ်းသားများ ကူညီစောင့်ရှောက်ရေးအသင်း(အေအေပီပီ)ရဲ့ ထုတ်ပြန်ချက်အရ လတ်တလောအချိန်ထိ အာဏာသိမ်းစစ်ကောင်စီတပ်ရဲ့ ပစ်ခတ်သတ်ဖြတ်မှုကြောင့် အပြစ်မဲ့ကျဆုံးပြည်သူ ၁၁၈၀ ကျော်၊ ဖမ်းဆီးထိန်းသိမ်းခံခဲ့ရသူပေါင်း ၉,၀၀၀ ကျော်ရှိခဲ့တယ်လို့ ဆိုပါတယ်။

လတ်တလောမှာတော့ အမျိုးသားညီညွတ်ရေးအစိုးရ(NUG)က စစ်အာဏာရှင်ဆန့်ကျင်ရေး ခုခံတွန်းလှန်စစ်စတင်ကြောင်းနဲ့ မင်းအောင်လှိုင်ဦးဆောင်တဲ့ အကြမ်းဖက်စစ်အုပ်ချုပ်ရေးကို လှည်းနေလှေအောင်း မြင်းဇောင်းမကျန် တွန်းလှန်တိုက်ဖျက်ကြဖို့ စက်တင်ဘာ ၇ ရက်က ကြေညာထားပါတယ်။

3 months Ago

November 22, 2020

မြစ်အတွင်း ရေနစ်သည့်တရုတ်ကျောင်းသူကို ဗြိတိန်သံအမတ် ကယ်တင် (ရုပ်သံ)

ရေနစ်နေတဲ့ တရုတ်တက္ကသိုလ်ကျောင်းသားတဦးကို ဗြိတိန်သံတမန်တဦးက မြစ်ထဲခုန်ချကာ ကယ်တင်နိုင်ခဲ့တယ်လို့ ပေကျင်းမှာရှိတဲ့ ဗြိတိန်သံရုံးနဲ့ တရုတ်နိုင်ငံပိုင်မီဒီယာတို့မှာ ဖော်ပြပါတယ်။ နိုဝင် ဘာ ၁၄ ရက်က တက္ကသိုလ်ကျောင်းသူ တဦးဟာ မြစ်ထဲကို မတော်တဆပြုတ်ကျသွားခဲ့ပြီး  ရေမနစ်အောင်ရုန်းကန်နေရတာကို မြင်တွေ့ခဲ့ရတဲ့ အသက် ၆၁ နှစ်အရွယ် ဗြိတိန်သံမှူး စတီဖင် အီလစ်ဆင်က  ကယ်တင်ခဲ့တာလို့ နိုင်ငံပိုင် Xinhua သတင်းမှာ ဖော်ပြပါတယ်။ လူမှုကွန်ရက်ပေါ်ထွက်ပေါ်လာတဲ့ ဗွီဒီယိုဖိုင်တခုမှာလည်း အမျိုးသမီးတဦး ရေထဲမှာ ရုန်းကန်နေရတာကို ဘေးနားက လူတွေက ဝိုင်းဝန်းအော်ဟစ် အကူအညီတောင်းနေတာ မြင်တွေ့ခဲ့ရပြီး အဲ့ဒီအချိန်မှာ သံအမတ်က ဖိနပ်ချွတ်ကာ ရေထဲကို ခုန်ချပြီး သွားရောက်ကယ်ဆယ်ခဲ့ပါတယ်။  ဒီဗွီဒီယိုဖိုင်ကို ဖြစ်ရပ်အနီးမှာ ရှိနေသူတဦးက ရိုက်ကူးခဲ့တာလည်း ဖြစ်ပါတယ်။ အဲ့ဒီနောက်မှာတော့ အသက်ကယ်အင်္ကျီတွေ ရောက်ရှိလာပြီး အီလစ်ဆန်ရော အမျိုးသမီးကိုပါ ဘေးကင်းစွာ ဆယ်ယူနိုင်ခဲ့ပါတယ်။ နောက်ထပ်ဖြတ်သွားဖြတ်လာတဦး ရိုက်ကူးထားတဲ့ ဗွီဒီယိုဖိုင်မှာလည်း သံတမန်ဟာ အမျိုးသမီးရှိရာ မြစ်လယ်ကို ရေကူးသွားခဲ့ပြီး သူမကို ဆွဲခေါ်ကာ ကမ်းခြေဘက်ကို ပြန်ပါလာတာကိုလည်း မြင်တွေ့ရပါတယ်။  “အမျိုးသမီးလေးဟာ မကြာခင်မှာ တင်သတိပြန်ရကာ အသက်ပြန်ရှုနိုင်ခဲ့ပါတယ်။ ကယ်ဆယ်ပေးခဲ့မှုအတွက်  ကျေးဇူးတင်ပါတယ်” လို့ ဒေသခံတာဝန်ရှိသူများကို ကိုးကားပြီး  Xinhua သတင်းမှာ ဖော်ပြပါတယ်။  သံအမတ်အီလစ်ဆန်ရဲ့လုပ်ရပ်ဟာ တရုတ်နိုင်ငံသားတွေကြားမှာ တော်တော်လေး ရေပန်းစားသွားခဲ့ပြီး ဒီလိုမွန်မြတ်တဲ့လုပ်ရပ်အတွက် အားလုံးက ဂုဏ်ယူနေကြတယ်လို့ ဗြိတိန်သံရုံးက ထုတ်ပြန်ပါတယ်။  တရုတ်-ဗြိတိန်ဆက်ဆံရေးဟာ ဟောင်ကောင်ကိစ္စနဲ့ပတ်သက်လို့ မကြာသေးခင်လမှာ တင်းမာမှုတွေ ပေါ်ပေါက်ခဲ့ပါတယ်။
1 year Ago
More News
Up