ကယ်ဆယ်ရေးစခန်း

September 28, 2020

မြစ်ကြီးနား၌ လူဦးရေ ၁၀၀၀ ကျော်ရေဘေးသင့်၊ ကယ်ဆယ်ရေးစခန်း ၆ ခု ဖွင့်လှစ်

ကချင်ပြည်နယ်၊ မြစ်ကြီးနားမြို့မှာ ဧရာဝတီမြစ်ရေ စိုးရိမ်ရေအမှတ်နားရောက်ရှိနေပြီး မြေနိမ့်ပိုင်းရပ်ကွက်တွေမှာ လူနေအိမ်တွေရေနစ်မြုပ်ခဲ့တဲ့အတွက် စက်တင်ဘာ ၂၇ ရက်က ယာယီရေဘေးကယ်ဆယ်ရေးစခန်း ၆ ခုဖွင့်လှစ်ခဲ့ရပါတယ်။  မြစ်ရေကြီးတဲ့အတွက် ယာယီကယ်ဆယ်ရေးစခန်းတွေကို ခေတ္တပြောင်းရွှေ့​နေထိုင်ရတဲ့ အိမ်ထောင်စုပေါင်း ၂၆၃ စု လူဦးရေ ၁၀၇၂ ယောက်ရှိတယ်လို့  မြစ်ကြီးနားမြို့နယ်အုပ်ချုပ်ရေးမှူး ဦးသန်းဝင်းက ပြောပါတယ်။ မြစ်ကြီးနားမြို့မှာ ဧရာဝတီမြစ်ရေဟာ စက်တင်ဘာ ၂၇ ရက် ညမှာ ၁၁၀၄ စင်တီမီတာ အထိ အမြင့်ဆုံးတက်ခဲ့ပြီး ၂၈ ရက် နေ့လည်မှာတော့ ၉၉၃ စင်တီမီတာအထိ ပြန်လည်ကျဆင်း နေပြီလို့ ကချင်ပြည်နယ်မိုးဇလဌာနကသတင်းထုတ်ပြန်ပါတယ်။ အောင်ဇေရန်အောင် ဘိုးဘွားရိပ်သာ၊ ပြည်နယ်ကြံ့ခိုင်ရေးရုံး ၊ ရပ်ကွက်အတွင်းက နီးစပ်ရာ ဘုန်းကြီးကျောင်းတွေနဲ့ အမကကျောင်းတွေမှာ ယာယီကယ်ဆယ်ရေးစခန်းတွေ ဖွင့်ထားပြီး ရေဘေးသင့်ဒေသခံတွေ သွားရောက်ခိုလှုံနေကြပါတယ်။ မြစ်ကြီးနားမြို့မှာ စက်တင်ဘာ ၂၆ ရက်မနက်စပြီး မိုးအဆက်မပြတ်ရွာသွန်းကာ ဧရာဝတီမြစ်ရေ စတင်ဝင်ရောက်လာတာဖြစ်ပြီး မြေနိမ့်ပိုင်းရပ်ကွက်တွေဖြစ်တဲ့ ကြက်ပေါင်ခြံ၊ လယ်ကုန်း၊ ရမ်ပူနဲ့ မြို့သစ်ကြီးရပ်ကွက်က နေအိမ်တချို့ ရေဝင်ရောက်လာပြီး  စက်တင်ဘာ ၂၇ ညပိုင်းမှာ ရေပြန်ကြသွားတယ်လို့သိရပါတယ်။ အမှတ် ၄ နယ်မြေမှူးက "ရေတက်တုန်းက အိမ်ထဲအထိရေရောက်တယ်။  လူတွေ အိမ်ပေါ်ထပ် တက်နေရတယ်။ ည ၈ နာရီလောက်က စပြီး တဖြည်းဖြည်းနဲ့ ရေကတော့ ကျ သွားတယ်”လို့ ပြောပါတယ်။ မြို့သစ်ကြီးရပ်ကွက်မှာတော့ စက်တင်ဘာ ၂၇ ရက်ညနေပိုင်းက အုပ်ချုပ်ရေးမှူးရုံး အပါအဝင် မြေနိမ့်ပိုင်းမှာဆောက်လုပ်ထားတဲ့ အိမ်တွေထဲရေဝင်လာပြီး အိမ်ထောင်စု ၉၇ စု နဲ့ လူဦးရေ ၄၂၄ ဦးတို့ဟာ နီးစပ်ရာ စာသင်ကျောင်းတွေ၊ ဘုန်းကြီးကျောင်း၊ ဘိုးဘွားရိပ်သာနဲ့ ပြည်နယ်ရုံးတွေမှာ ယာယီခိုလှုံခဲ့ကြရပါတယ်။ ယာယီရွှေ့ပြောင်း လာတဲ့ ရေဘေးသင့် မိသားစုတွေကို ကချင်ပြည်နယ်အစိုးရအဖွဲ့ လူမှုရေးဝန်ကြီး၊ ပြည်နယ် သဘာဝဘေးအန္တရာယ် စီမံခန့်ခွဲမှုဦးစီးဌာနနဲ့ အထွေထွေ အုပ်ချုပ်ရေးဦးစီးဌာနတို့က သောက်သုံးရေ၊ စားရိက္ခာ၊  mask တွေပေးအပ်ခဲ့သလို လူတစ်ဦးလျှင် ကျပ် ၂၁၀၀ကျပ်နှုန်းနဲ့  ၇ရက်စာ ဝေငှပေးခဲ့ကြောင်း အထွေထွေအုပ်ချုပ်ရေးဦးစီးဌာနက သိရပါတယ်။ သတင်း- မီးမီး/ ထူးထူး
1 year Ago

August 5, 2020

အမရပူရမြို့နယ်က ရေဘေးရှောင်များ အိမ်ပြန်  

မန္တလေးတိုင်း၊ အမရပူရမြို့နယ်မှာ တာရိုးကျိုးပေါက်ခဲ့လို့ ရေဘေးရှောင်ခဲ့သူတွေအားလုံး လက်ရှိမှာ ရေပြန်ကျလို့ ကယ်ဆယ်ရေးစခန်းတွေကနေ သူတို့နေအိမ်တွေကို ပြန်နေကြပြီလို့  မြို့နယ်အုပ်ချုပ်ရေးမှူးက ပြောပါတယ်။ အမရပူရမြို့နယ် စစ်ကိုင်း-မန္တလေး ကမ်းနားလမ်း ရွှေခဲရေဆိုးထုတ်စက်ရုံအနီးမှာ ဇူလိုင် ၁၉ ရက်ညက တာရိုးကျိုးပေါက်တာကြောင့် ဧရာဝတီမြစ်ရေဟာ လူနေရပ်ကွက်တွေထဲ ဝင်ရောက်ခဲ့ပြီး လူပေါင်း ၁၄၀၀၀ လောက် ရေလွတ်ရာမှာ နေရာပြောင်းရွှေ့ နေထိုင်ခဲ့ရပါတယ်။ ရေဘေးသင့်သူတွေနေထိုင်ဖို့ ရေဘေးရှောင်စခန်း ၃၀ လောက်မှာ စီစဉ်နေရာချထားခဲ့ပြီး အခုအခါ ရေပြန်ကျပြီဖြစ်တာကြောင့် နဂိုနေအိမ်တွေမှာ ပြန်နေကြပြီဖြစ်ပါတယ်။ အမရပူရမြို့နယ် အထွေထွေအုပ်ချုပ်ရေးဦးစီးဌာန အုပ်ချုပ်ရေးမှူး ဦးဖေသက်ထွန်းက “နေအိမ်တွေမှာ ပြန်နေတဲ့အခါ ရာအိမ်မှူး ဆယ်အိမ်မှူးတွေနဲ့ပေါင်းပြီး သန့်ရှင်းရေးလုပ်ဖို့ ဆောင်ရွက်ပေးတာတွေ လျှပ်စစ်မီးဆင်တာတွေ လုပ်ပေးတယ်”လို့ ပြောပါတယ်။ ရေဘေးသင့်တွေအတွက် လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာန၊ မန္တလေးတိုင်းဒေသကြီးအစိုးရအဖွဲ့ တို့က ကူညီထောက်ပံ့တာတွေလုပ်တဲ့အပြင် အလှူရှင်တွေကလည်း ကူညီတာတွေ လုပ်ဆောင်ခဲ့ကြပါတယ်။   အခုအခါ ကျိုးပေါက်သွားတဲ့ တာရိုးကို စနစ်တကျပြန်ပိတ်နိုင်ခဲ့ပြီး ရေတွေကို စုတ်ထုတ်တာ တွေလည်း လုပ်ဆောင်နေတယ်လို့ မန္တလေးမြို့တော်စည်ပင်သာယာရေးကော်မတီဝင် ဦးကျော်ဆန်းမြင့်က ပြောပါတယ်။ တာရိုးကျိုးခဲ့တဲ့အတွက် ယာဉ်တွေဖြတ်သန်းသွားလာလို့ မရတော့ဘဲ မြို့တွင်းလမ်းကနေ ဖြတ်ရတာကြောင့် ယာဉ်ကြောကြပ်တာတွေဖြစ်ပြီး ယာဉ်တွေဖြတ်သန်းသွားလာနိုင်ဖို့အတွက် အမြန်ဆုံး လုပ်ဆောင်နေတယ်လို့ သိရပါတယ်။  သတင်း - နိုင်လင်းဦး
1 year Ago
Up