ကယားပြည်နယ်လွှတ်တော်

February 10, 2021

တတိယအကြိမ် ကယားပြည်နယ်လွှတ်တော် ခေါ်ယူကျင်းပ

တတိယအကြိမ် ကယားပြည်နယ်လွှတ်တော် ပထမပုံမှန်အစည်းအဝေးကို  ၂၀၂၀ ရွေးကောက်ပွဲအနိုင်ရ အန်အယ်ဒီပါတီကိုယ်စားလှယ်တွေနဲ့ အနိုင်ရ ကယားပြည်နယ် ဒီမိုကရက်တစ်ပါတီကိုယ်စားလှယ်တွေ ပူးပေါင်းပြီး ဖေဖော်ဝါရီ ၉ ရက်နေ့က ခေါ်ယူခဲ့ပါတယ်။ 

လွှတ်တော်အစည်းအဝေးကို အန်အယ်ဒီပါတီကိုယ်စားလှယ် ၉ ဦးနဲ့ ကယားပြည်နယ်ဒီမိုကရက်တစ်ပါတီ KySDP ကိုယ်စားလှယ် ၃ ဦး စုစုပေါင်း  ၁၁ ဦးတို့က တက်ရောက်ခဲ့ပါတယ်။ 

ဖရူဆိုမြို့နယ်အမှတ် ၁မှာ အနိုင်ရခဲ့တဲ့ ကယားပြည်နယ် ဒီမိုကရက်တစ်ပါတီကိုယ်စားလှယ်ဦးသဲရယ်က “ ကျနော်တို့ လွှတ်တော်ရုံးမှာမဟုတ်ဘဲနဲ့ တခြား တနေရာမှာ လူတွေ့ပြီးတော့ ကျနော်တို့ နည်းဥပဒေအရ ကျနော်တို့ ဆောင်ရွက်ထားတဲ့ ကိစ္စဖြစ်တယ်။ ကျနော်တို့မနေ့က ၉ ရက်နေ့မှာပဲ ကျနော်တို့ ကိုယ်စားလှယ်တချို့တွေနဲ့ ကျနော်တို့တွေ့ပြီးတော့ ခေါ်လိုက်တာပေါ့နော်။ ဘာမှထူးထူးထွေထွေ ဆောင်ရွက်တာတော့မရှိဘူး။ ဒါပေမဲ့ အစည်းအဝေးအထမြောက်တဲ့ အစီအစဉ်ပဲ ကျနော်တို့ လုပ်ထားတာရှိပါတယ်။” လို့ ပြောပါတယ်။

ဒါ့အပြင် လွှတ်တော်ကိုယ်စားလှယ်ကတိသစ္စာပြုတာတွေကို လုပ်ဆောင်တာရှိပေမယ့် ၂၀၀၈ ဖွဲ့စည်းပုံအခြေခံဥပဒေအတိုင်း လုပ်ဆောင်တာဟုတ်ဘဲ တခြားနည်းလမ်းနဲ့ လုပ်ဆောင်ခဲ့တယ်လို့ ပြောပါတယ်။ 

“အဲဒါတွေတော့ ကျနော်တို့လုပ်ထားတာတွေရှိတယ်။ ဒါပေမဲ့ ကျနော်တို့ လက်ရှိ ၂၀၀၈ အောက်ကဟာနဲ့ ကျနော်တို့ မယူဘဲနဲ့ တခြားနည်းလမ်းနဲ့ ကျနော်တို့ ကိုယ်ဟာကိုယ် လုပ်နေတဲ့အနေအထားမျိုးပဲ ရှိပါတယ်။ နောက်ပိုင်းကျလို့ရှိရင်တော့ ကျနော်တို့ဘာလုပ်မလဲဆိုတာ ဆင်စဉ်းစားရမှာပေါ့နော်။ ”

ပုံမှန်အနေအထားအရ ကယားပြည်နယ်လွှတ်တော်မှာ ရွေးကောက်ခံ ကိုယ်စားလှယ် ၁၅ ဦး၊ တပ်မတော်သား ကိုယ်စားလှယ် ၅ ဦးပေါင်း ၂၀ ဦးရှိပြီး အခု ကိုယ်စားလှယ် ၁၁ ဦး တက်ရောက်ခဲ့တဲ့အတွက် အစည်းအဝေး အထမြောက်ကြောင်း အတည်ပြု ဆုံးဖြတ်ခဲ့ပါတယ်။

4 months Ago

February 8, 2021

CDM လှုပ်ရှားမှု စတင်ကြောင်း ကယားပြည်နယ်လွှတ်တော်ရုံးဝန်ထမ်းများ ကြေညာ

ပြည်သူကတင်မြှောက်တဲ့ ပြည်သူ့အစိုးရနဲ့ နိုင်ငံ့တာဝန်တွေ ထမ်းဆောင်လိုတဲ့အတွက် ဒီကနေ့ ဖေဖော်ဝါရီလ ၈ ရက်နေ့ကစပြီး အာဏာဖီဆန်ရေးလှုပ်ရှားမှု (CDM) စတင်ကြောင်း ကယားပြည်နယ် လွှတ်တော်ရုံးဝန်ထမ်းများက ထုတ်ပြန်ကြေညာလိုက်ပါတယ်။

“ပြည်သူ့အသံ လွှတ်တော်အသံ၊ ပြည်သူ့ဆန္ဒလွှတ်တော်ဆန္ဒ၊ ပြည်သူတို့ မျှော်လင့်ချက် လွှတ်တော်က ဖော်ဆောင်ရွက်” ဆိုတဲ့ ဆောင်ပုဒ်နဲ့အညီ ကယားပြည်နယ်လွှတ်တော်ရုံးအနေနဲ့ အများပြည်သူရဲ့ ဆန္ဒနဲ့အညီ ရွေးကောက်တင်မြှောက်ထားတဲ့ ပြည်သူ့ကိုကယ်စားလှယ်ကိုသာ ပံ့ပိုးသွားမယ်လို့ ဆိုပါတယ်။

အများပြည်သူဆန္ဒမပါဘဲ အတင်းအဓမ္မအာဏာရ ယူဖွဲ့စည်းထားတဲ့ အာဏာရှင်စနစ်အစိုးရကို ကန့်ကွက်ကြောင်းနဲ့ ပြည်သူကတင်မြှောက်တဲ့ ပြည်သူ့အစိုးရနဲ့သာ နိုင်ငံ့တာဝန်တွေ ထမ်းဆောင်လိုတဲ့အတွက် အခုလို ကြေညာလိုက်တာပါ။

စစ်အာဏာရှင်စနစ် အပြီးတိုင် အဆုံးသတ်ပြီး ပြည်သူတို့ဆန္ဒအရ ရွေးချယ်တင်မြှောက်ထားတဲ့ အစိုးရ ပြန်လည်စတင်သည်အထိ မိမိတို့ရဲ့ဆန္ဒကို ငြိမ်းချမ်းစွာ ထုတ်ဖော်ပြီး ပြည်သူတို့ရဲ့ သဘောဆန္ဒနဲ့အတူ ရပ်တည်သွားမယ်လို့ ထုတ်ပြန်ထားပါတယ်။

ကယားပြည်နယ်လွိုင်ကော်၊ ဒီးမော့ဆို၊ ဖရူဆို၊ ဘောလခဲ၊ ဖားဆောင်းနဲ့ မယ်စဲမြို့နယ်က ပြည်သူ့ဆေးရုံ ကျန်းမာရေးဝန်ထမ်းတွေလည်း CDM ပြုလုပ်တဲ့အတွက် ဆေးရုံတွေ ပိတ်ထားရပြီး လူနာတချို့ကိုတော့ အပြင်ဆေးခန်းမှာ ဆရာဝန်တွေက ဆေးကုသပေးနေပါတယ်။

လွိုင်ကော်အထွေထွေအုပ်ချုပ်ရေးဌာန ဝန်ထမ်းတချို့ကလည်း CMD လှုပ်ရှားမှုမှာပါဝင်ပြီး ရုံးမတက်ဘဲ ဆန္ဒထုတ်ဖော်နေကြပါတယ်။ CDM ပါဝင်တဲ့ ဝန်ထမ်းတချို့လည်း ရုံးပြန်တက်ဖို့ လက်မှတ်ရေးထိုးဖို့ ဖိအားပေးခံရတာတွေ ရှိကြောင်း အမည်မဖော်လိုတဲ့ဝန်ထမ်းက ပြောပါတယ်။

ဒီကနေ့ ဖေဖော်ဝါရီ ၈ ရက်နေ့  မနက် ၈ နာရီကစပြီး  လွိုင်ကော်မြို့မှာ သောင်းနဲ့ချီတဲ့ ပြည်သူလူထုတွေဟာ စစ်ဏာရှင်ဆန့်ကျင်တဲ့ အနေနဲ့ မြို့ကိုပတ်ပြီး လမ်းလျှောက်ဆန္ဒပြခဲ့ကြပါတယ်။ အလားတူ ဒီးမော့ဆို၊ ဖရူဆို၊ ဖားဆောင်း၊ မယ်စဲ အစရှိတဲ့ မြို့တွေမှာလည်း ပြည်သူတွေက စစ်ဏာရှင်ဆန့်ကျင်ရေး လမ်းပေါ်ထွက် ဆန္ဒပြခဲ့ကြပါတယ်။

4 months Ago
More News
Up