ကယားပြည်နယ်

November 19, 2022

ကယားပြည်နယ်၌ စစ်ကောင်စီတပ် ပစ်ခတ်မှုကြောင့် ကလေးငယ် ၁ ဦး သေဆုံး၊ ပြည်သူ ၂၈ ဦး ဒဏ်ရာရ

ကယား(ကရင်နီ)ပြည်နယ်မှာ စစ်ကောင်စီတပ်သားတွေက အရပ်သားတွေ၊ စစ်ရှောင်တွေ နေထိုင်ရာ နေရာတွေကို လက်နက်ကြီးနဲ့ နေစဉ် ပစ်ခတ်နေတာကြောင့် သီတင်း နှစ်ပတ်အတွင်း ကလေးငယ် တယောက် အသက်ဆုံးရှုံးခဲ့ပြီး ပြည်သူ ၂၈ ယောက် ဒဏ်ရာ ရခဲ့တယ်လို့ ကရင်နီပြည်နယ်အတိုင်ပင်ခံကောင်စီ KSCC က ထုတ်ပြန်ပါတယ်။ 

စစ်ကောင်စီက လက်နက်ကြီးနဲ့ ပစ်ခတ်မှုကြောင့် နိုဝင်ဘာ ၁ ရက်မှ ၁၅ ရက်အထိ လွိုင်ကော်မြို့မှာ နေအိမ် ၃၈ လုံး ပျက်စီးကာ အရပ်သား  ၁၂ ယောက် ဒဏ်ရာရခဲ့သလို ဒီးမော့ဆို မှာ နေအိမ် ၁၃ လုံး ပျက်စီးပြီး အရပ်သား ၁ ယောက်သေဆုံး၊ ၈ ယောက် ထိခိုက်ဒဏ်ရာရတယ်လို့  ထုတ်ပြန်ချက်မှာ ဖော်ပြထားပါတယ်။

အလားတူ ဖရူဆိုမြို့မှာ နေအိမ် ၃ လုံးနဲ့ ဖယ်ခုံမြို့မှာ  နေအိမ် ၇ လုံး ပျက်စီးကာ ကလေးငယ်တွေ အပါအဝင် အရပ်သားပြည်သူ ၈ ယောက် ထိခိုက်ဒဏ်ရာရခဲ့တယ်လို့ သိရပါတယ်။ 

စစ်ကောင်စီတပ်ဟာ အရပ်သားတွေ၊ စစ်ရှောင်တွေ နေထိုင်ရာနေရာကို လက်နက်ကြီးနဲ့ ပစ်မှတ်ထား တိုက်ခိုက်နေတာဟာ လူ့အခွင့်အရေးကိုချိုးဖောက်၊ ရက်စက်ကြမ်းကြုတ်တဲ့ စစ်ရာဇဝတ်မှုတွေကို ကျူးလွန်နေတာဖြစ်တယ်လို့ ကရင်နီပြည်နယ် အတိုင်ပင်ခံကောင်စီ KSCC က အပြင်းအထန် ရှုတ်ချထားပါတယ်။

ဒါအပြင် နိုင်ငံတကာ သံတမန်တွေဟာလည်း စစ်ကောင်စီရဲ့ စစ်ရာဇဝတ်မှု ကျူးလွန်နေမှုတွေ လူ့အခွင့်အရေး ချိုးဖောက်မှုများကို နှုတ်ဆိတ်မနေဘဲ လူသားချင်းစာနာမှုနဲ့ ထိရောက်တဲ့ အရေးယူ ပိတ်ဆို့ ဒဏ်ခတ်မှုတွေကို လုပ်ဆောင်ဖို့ KSCC က တိုက်တွန်းထားပါတယ်။

1 week Ago

August 10, 2022

ဒီးမော့ဆိုတိုက်ပွဲတွင် စစ်ကောင်စီတပ်ဖွဲ့ဝင် ၁၅ ဦးထက်မနည်းသေဆုံး၊ လက်နက်ခဲယမ်းများ သိမ်းဆည်းရမိ

ကယား(ကရင်နီ)ပြည်နယ်၊ ဒီးမော့ဆိုမြို့နယ်မှာ စစ်ကောင်စီတပ်ဖွဲ့တွေနဲ့  ကရင်နီအမျိုးသား ကာကွယ်ရေးတပ် KNDF တပ်ရင်း -၉ တို့ကြား ဩဂုတ် ၁ ရက်စတင် တိုက်ပွဲတွေဖြစ်ပွားခဲ့ရာမှာ  စစ်ကောင်စီဘက်က ၁၅ ဦးထက်မနည်းသေဆုံးပြီး လက်နက်ခဲယမ်းတွေ သိမ်းဆည်းရမိတယ်လို့ KNDF က ဩဂုတ် ၁၀ ရက်မှာ ထုတ်ပြန်ပါတယ်။

ဒီးမောဆိုမြို့နယ် အရှ့ဘက်ခြမ်းမှာ စစ်ကောင်စီတပ်က အင်အားအလုံးအရင်းနဲ့  မြေပြင်ကရော လေကြောင်းကပါ ထိုးစစ်ဆင်တိုက်ခိုက်ခဲ့လို့  ကရင်နီအမျိုးသား ကာကွယ်ရေးတပ်ဖွဲ့ဝင်တွေကလည်း ထိရောက်စွာ ပြန်လည်ခုခံတိုက်ခိုက်ခဲ့တာကြောင့် စစ်ကောင်စီဘက်က ထိခိုက်သေဆုံးသူများပြားခဲ့တာလို့  KNDF တပ်ရင်း -၉  တာဝန်ရှိသူ တဦးက ပြောပါတယ်။

တိုက်ပွဲအပြီး ကရင်နီ အမျိုးသားကာကွယ်ရေးတပ် KNDF တပ်ရင်း -၉ က နယ်မြေရှင်းလင်းရေးလုပ်ရာမှာ စစ်ကောင်စီဘက်က လက်နက်ခဲယမ်းနဲ့ ဆေးဝါးပစ္စည်းတွေ၊ လက်ကိုင်ဖုန်းတွေ သိမ်းဆည်းရမိခဲ့ပါတယ်။

တိုက်ပွဲအတွင်း စစ်ကောင်စီဘက်က လက်နက်ကြီးနဲ့ ပစ်ခတ် တိုက်ခိုက်ခဲ့လို့ ကရင်နီအမျိုးသားကာကွယ်ရေး KNDF တပ်ရင်-၉ မှ ရဲဘော် ၃ ယောက် ဒဏ်ရာ ( မစိုးရိမ်) ရရှိခဲ့ပါတယ်။ 

ပြီးခဲ့တဲ့ ဇူလိုင် ၃၁ ရက် မနက် ၁၁ နာရီလောက်ကလည်း ဒီးမောဆိုမြို့နယ်အတွင်း စစ်ကောင်စီတပ်နဲ့ ကရင်နီအမျိုးသားကာကွယ်ရေးတပ် KNDF -တပ်ရင်း ၉ တို့ တိုက်ပွဲဖြစ်ပွားခဲ့ပြီး စစ်ကောင်စီတပ်က လက်နက်ကြီးတွေနဲ့ပစ်ခတ်လို့ လူနေအိမ်တချို့ ထိခိုက်ပျက်စီးသွားပြီး အမျိုးသမီးငယ်တယောက်  ထိခိုက်ဒဏ်ရာရသွားပါတယ်။

Photo-KNDF

4 months Ago
More News
Up