ကယား

October 20, 2021

ကယားတွင် ကိုဗစ်ကြောင့် သေဆုံးနှုန်းမြင့်တက်၊ စစ်ရှောင်စခန်းများ ဆေးဝါးအကူ အရေးပေါ် လိုအပ်

ကယားပြည်နယ်မှာ ကိုဗစ်-၁၉ ကြောင့် သေဆုံး သူ ၁၈၀ အထိမြင့်တက်လာပြီး စစ်ရှောင်စခန်းတွေမှာ ဆေးဝါးအကူအညီတွေ အရေးပေါ်လိုအပ်နေတယ်လို့ သိရပါတယ်။

ကယားပြည်နယ်မှာ ဇွန် ၂၉ ရက်ကနေ အောက်တိုဘာလ ၁၉ ရက်နေ့အထိ ကိုဗစ်-၁၉ အတည်ပြုလူနာ ၄၃၉၇ ဦးနဲ့ သေဆုံးသူ ၁၈၀ ဦးရှိပြီလို့ ပြည်နယ်ကျန်းမာရေးဌာနရဲ့ ဖော်ပြချက်အတွေအရ သိရပါတယ်။

ပိုးတွေ့ရှိသူတွေထဲမှာ လွိုင်ကော်မြို့က ၂၄၆၈ ဦး၊ ဒီးမော့ဆိုမြို့က ၇၂ ဦး၊  ဖရူဆိုမြို့က ၃၂ ဦး၊ ရှားတောမြို့က ၇ ဦး၊ ဘောလခဲမြို့ ၅၇၇ ဦး၊  ဖားဆောင်းမြို့က ၁၀၃၁ ဦး နဲ့ မယ်စဲမြို့က ၂၁၀ ဦး တို့ဖြစ်ပါတယ်။

သေဆုံးသူ ၁၈၀ ဦးမှာတော့ လွိုင်ကော်မြို့က ၁၅၇ ဦး နဲ့ အများဆုံးဖြစ်ပြီး ဖရူဆိုမြို့က ၁ ဦး၊ ဘောလခဲမြို့နယ်က ၄ ဦး၊ ဖားဆောင်းမြိုန့ယ်က ၁၄ ဦး နဲ့ မယ်စဲ့မြို့နယ်က ၄ ဦး ဖြစ်ကြောင်း ပြည်နယ်ကျန်းမာရေးဌာနရဲ့ ဖော်ပြချက်အရ သိရပါတယ်။

ဒီလိုပြည်နယ်ကျန်းမာရေးဌာနက အခုလို စားရင်းတွေ ဖော်ပြထားသလို  ပြည်နယ် ကျန်းမာရေးဌာနဆီ မရောက်နိုင်သေးတဲ့  ကျေးလက်ဒေသ စစ်ရှောင်စခန်းတွေမှာလည်း ကိုဗစ်ရောဂါ ကူးစက်မှုတွေဟာ စက်တင်ဘာလကုန်လောက်စပြီး မြင့်တက်နေတယ်လို့ စစ်ရှောင်တွေကို လိုက်လံကူညီနေတဲ့ စေတနာ့ဝန်ထမ်းတဦးက ပြောပါတယ်။

“ကူးစက်မှုကတော့ စစ်ရှောင်စခန်းတိုင်းမှာ၊ နောက်ရွာတိုင်းမှာ အခုက ပြန့်ကုန်ပြီ။ အခုက ကျူစင်တာမှာလည်း နေရာအလုံအလောက်မရှိဘူး။ နေရာမလုံလောက်တာအပြင် ဆရာဆရာမတွေရော၊ ဆေးဝါးကော မလုံလောက်ဘူး။ အခုက ဘယ်လိုလုပ်နေလဲဆိုတော့ သူတို့နေတဲ့ စရှောင်စခန်းထဲမှာပဲ အဲလိုနေခိုင်းပြီးတော့မှ မိုဘိုင်းပုံစံနဲ့ အဲလိုလှည့်ပြီးတော့မှ သွားကုပေးနေရတဲ့ အခြေအနေမျိုးဖြစ်နေတယ်။ ”

ဒီးမော့ဆိုမြို့နယ် အရှေ့ဘက်ခြမ်းမှာ ကျေးရွာနဲ့ စစ်ရှောင်စခန်းတိုင်းလိုလိုမှာ ကိုဗစ်-၁၉ ကူးစက်ပြန့်ပွားမှုတွေရှိနေပြီး စစ်ဆေးဖို့ Test Kits မလုံလောက်သလို တချို့တွေကလည်း ရောဂါ အစစ်အဆေး မခံကြတာတွေ ရှိနေပါတယ်။

ဒါ့အပြင် လက်ရှိတိုက်ပွဲဖြစ်နေရတဲ့အနေအထားမှာ စစ်ရှောင်စခန်းက လူနာတွေကို ဆေးရုံဆေးခန်းပို့ဖို့ လမ်းကြောင်းအဆင်မပြေမှုတွေ ရှိနေသလို အစားအစာနဲ့ဆေးဝါးလုံလောက်မှု မရှိဖြစ်နေတဲ့ အနေအထားမှာ ရှိနေတယ်လို့ ဆိုပါတယ်။

“အခု ကျနော်နေတဲ့ ဒီးမော့ဆို အရှေ့ချမ်းမှာ ကျနော်သိသလောက်ဆိုရင်တော့  ကိုဗစ်လူနာ ၅၀၀ နဲ့ ၁၀၀၀ ကြားမှာ ရှိပြီးသားပဲ။ ကျနော်တို့ အကုန်မစစ်နိုင်ဘူးလေ။ မစစ်နိုင်ဘူးဆိုတာက ပထမတချက်က Test kits မရှိဘူး၊ မလုံလောက်ဘူး။ ဒုတိယတချက်က ဒီဖျားနေတဲ့ လူတွေကိုယ်နိုက်က မစစ်ချင်ဘူး၊ အစစ်မခံဘူး။ အဲဒါမျိုးလူတွေလည်း ခပ်များများရယ်။ အခုက ကုသဖို့ သောက်ဆေးတောင်မှ မနည်းလိုက်ရှာရတယ်။ ကျနော်တို့ ပစ္စည်းကိရိယာတွေက မလုံလောက်ဘူးလေ။ အများကြီးပဲ test kits မရှိတာတွေရယ်၊ စေတနာ့ဝန်ထမ်းတွေသုံးတဲ့ mask ၊ hand Gel၊ PPE တို့ အစုံပဲ။ လိုအပ်တဲ့ အထွေထွေဟာတွေ မလုံလောက်ဘူး။ ကာကွယ်ဆေးဆိုရင် ပိုဝေးတာပေါ့။”

စစ်ရှောင်စခန်းတွေမှာ ဒီလိုကျန်းမာရေးအတွက် အသုံးပြုဖို့ ဆေးဝါးတွေ အရေးတကြီး လိုအပ်နေသလိုပဲ နေ့စဉ်စားဝတ်နေရေးအတွက် အစားသောက်တွေလည်း လိုအပ်နေပါတယ်။

အခုနောက်ပိုင်း အကူအညီတွေ လျော့နည်းသွားတဲ့အတွက်လည်း စစ်ဘေးရှောင်ပြည်သူတွေ စားဝတ်နေရေး၊ ကပ်ရောဂါကူးစက်မှုနဲ့ ကျန်းမာရေး အခက်အခဲတွေနဲ့ ကြုံတွေ့နေရပါတယ်။

ဒီးမာ့ဆိုမြို့နယ် ပြည်သူ့ကာကွယ်ရေးတပ်ရဲ့ ထုတ်ပြန်ချက်အရ လက်ရှိ ရာသီဥတုပြောင်းလဲမှုကြောင့် ရာသီတုပ်ကွေးနဲ့ ဝမ်းပျက်ဝမ်းလျော ရောဂါတွေ ခံစားနေကြရသလို ကိုဗစ်သံသရှိလူနာတွေ တွေ့ရသလို သက်ကြီးရွယ်အို၊ ကလေးသူငယ်နဲ့ ကိုယ်ဝန်ဆောင်မိခင်တွေမှာလည်ေ ဆေးဝါးတွေ အဓိက လိုအပ်နေတယ်လို့ အောက်တိုဘာ ၁၉ ရက်နေ့က ထုတ်ပြန်ထားပါတယ်။

အလားတူပဲ ဖရူဆိုမြို့နယ်ဘက်က ကျေးရွာတွေနဲ့ စစ်ရှောင်စခန်းတွေမှာလည်း ကိုဗစ်ကူး-၁၉ ကူးစက်မှုတွေ ဖြစ်ပွားနေပါတယ်။ 

လူဦးရေ ၃ သိန်းလောက်သာရှိတဲ့ ကယားပြည်နယ်မှာ  ကိုဗစ်-၁၉ ရောဂါ စတင်ပြန့်ပွားချိန်ကစပြီး ဇန်နဝါရီ ၃၁ ရက်နေ့အထိ ကယားပြည်နယ်မှာ ပိုးတွေ့လူနာ ၁၁၂ ဦးရှိခဲ့ပြီး အာဏာသိမ်းပြီးနောက် တတိယလှိုင်းကာလ ဇွန် ၂၉ ရက်ကနေ အောက်တိုဘာ ၁၉  ရက်နေ့အထိ  ကိုဗစ်တည်ပြုလူနာ ၄၀၀၀ နီးပါးနဲ့ သေဆုံးသူ ၁၈၀ အထိ မြင့်တက်လာတာ ဖြစ်ပါတယ်။

23 hours Ago

October 15, 2021

စစ်အာဏာသိမ်းပြီးနောက် ကယားတွင် စစ်ကောင်စီတပ်အများစုအပါအဝင်သေဆုံးသူ ၅၀၀ ခန့်ရှိ

စစ်အာဏာသိမ်းပြီးချိန်ကနေ အောက်တိုဘာ ၁၅ ရက်နေ့အထိ ကရင်နီ(ကယား) ပြည်နယ်မှာ စစ်ကောင်စီတပ်တွေနဲ့ အရပ်သားတွေအပါဝင် သေဆုံးသူပေါင်း ၄၇၆ ဦးရှိကြောင်း တိုးတက်သော ကရင်နီပြည်သူ့အင်အားစု (PKPF) က ဒီကနေ့ ထုတ်ပြန်ပါတယ်။

စစ်အာဏာသိမ်းပြီးနောက် မတ်လကနေ အောက်တိုဘာ ၁၅ ရက်အထိ ကရင်နီ(ကယား) ပြည်နယ်မှာ တိုက်ပွဲ ၉၁ ကြိမ်ဖြစ်ပွားခဲ့ စစ်ကောင်စီတပ်မှ ၃၂၅ ဦး သေဆုံးကာ ကရင်နီပူးပေါင်းလက်နက်ကိုင်တပ်ဘက်က ၃၀ ဦးသေဆုံးတယ်လို့ ဖော်ပြပါတယ်။  တိုက်ပွဲတွေကြောင့်  အရပ်သားသေဆုံးမှုဟာလည်း ၉၄ ဦးရှိကြောင်း ထုတ်ပြန်ထားပါတယ်။

အဆိုပါထုတ်ပြန်ချက်အရ ကရင်နီကယားပြည်နယ်မှာ အရပ်သားသေဆုံးမှုဟာ ဧပြီလက ၃ ဦး၊ မေလမှာ ၂၄ ဦး၊ ဇွန်လမှာ ၃၆ ဦး၊ ဇူလိုင်လမှာ ၄ ဦး၊ စက်တင်ဘာလမှာ ၁၉ ဦးနဲ့ အောက်တိုဘာမှာ ၇ ဦး သေဆုံးခဲ့တယ်လို့ အသေးစိတ်ဖော်ပြထားပါတယ်။

အလားတူ စစ်ကောင်စီနဲ့ ကရင်နီပူးပေါင်းတပ်တို့အကြား ဖြစ်ပွားခဲ့တဲ့တိုက်ပွဲကြောင့် စစ်ကောင်စီတပ်ဘက်က  မေလမှာ ၁၁၈ ဦး၊ ဇွန်လမှာ ၃၂ ဦး၊ ဇူလိုင်မှာ ၂၂ ဦး၊ ဩဂုတ်လ ၉၄ဦး၊ စက်တင်ဘာမှာ ၇၄ ဦးနဲ့ အခု အောက်တိုဘာလမှာ ၁၂ ဦး သေဆုံးခဲ့ကြောင်း ဆိုပါတယ်။

PKPFရဲ့ ပြောခွင့်ရသူတဦးကတော့ “ ဒီစစ်ကောင်စီ သေဆုံးတဲ့စာရင်းကို ကျနော်တို့ ဘယ်လိုရယူလဲဆိုရင် KNDF ရဲ့ထုတ်ပြန်ချက်အပေါ်နဲ့ မြို့နယ်အလိုက် PDF တွေရဲ့ထုတ်ပြန်ချက်အပေါ်မှာ ကျနော်တို့မေးမြန်းပြီးတော့ စာရင်းကောက်ပြီး ပြုစုထားတာပေါ့။” လို့ ပြောပါတယ်။ 

ကရင်နီ(ကယား) ပြည်နယ်မှာ စစ်အာဏာသိမ်းပြီးနောက် တနိုင်ငံလုံး ငြိမ်းချမ်းစွာ ဆန္ဒထုတ်ဖော်မှုနဲ့အတူ စစ်အာဏာရှင်ဆန့်ကျင်ဆန္ဒပြပွဲတွေ ဆက်တိုက်လုပ်ဆောင်လာခဲ့ပြီး မေလမှာ လက်နက်ကိုင် တိုက်ပွဲတွေ စတင်ဖြစ်ပွားခဲ့ပါတယ်။

ဒီကနေ့အချိန်ထိ ပြည်နယ်နဲ့ မြို့နယ်ဒေသတွေအလိုက် တိုက်ပွဲတွေ ဆက်လက်ဖြစ်ပွားနေပြီး ဒေသခံသိန်းနဲ့ချီ တောတောင်တွေထဲ ထွက်ပြေးတိမ်းရှောင်နေကြရသလို သူတို့ရဲ့နေအိမ်တွေ မီးရှို့ဖျက်ဆီးခံရတာ၊ လက်နက်ကြီးကျည် ထိမှန်ပျက်စီးတာတွေ ဆက်တိုက်ဖြစ်ပေါ်နေပါတယ်။

တောတောင်တွေထဲ ထွက်ပြေးတိမ်းရှောင်နေကြရတဲ့ စစ်ရှောင်တွေအနေနဲ့လည်း ကမ္ဘာ့ကပ်ရောဂါ ကိုဗစ်-၁၉ ကူးစက်ခံရမှုတွေရှိသလို တခြား ကျန်းမာရေးအခက်အခဲနဲ့ စားဝတ်နေရေး အခက်အခဲတွေ ရင်ဆိုင်ကြုံတွေ့နေကြရပါတယ်။

မေလကနေ ဒီကနေ့အထိ ကယားပြည်နယ်မှာ စစ်ဘေးရှောင် တသိန်းကျော်ရှိနေကြောင်း လူမှုကယ်ဆယ်ရေးအဖွဲ့တွေရဲ့စာရင်းအရ သိရပါတယ်။

ဓာတ်ပုံ- PKPF

6 days Ago
More News
Up