ကမ်းပါးပြို

October 3, 2021

တောင်ကုတ်မြို့တွင် ကမ်းပါးပြိုပြီး နေအိမ်အချို့ ပျက်စီး

ရခိုင်ပြည်နယ်၊ တောင်ကုတ်မြို့၊ ဂူတာပြင်ရပ်ကွက်မှာ အောက်တိုဘာ ၂ ရက် ညက မိုးကြီးကာ ချောင်းကမ်းပါးပြိုကျသွားခဲ့တာကြောင့်  နေအိမ် ၇ လုံး  ပျက်စီးသွားခဲ့တယ်လို့ ရခိုင်ပြည်နယ် မီးသတ်ဦးစီးဌာနက ထုတ်ပြန်ပါတယ်။ 

ကမ်းပါးပြိုကျတဲ့အတွက် လူနေအိမ် ၄ လုံး ပြိုကျပျက်စီးခဲ့သလို နေအိမ်တချို့လည်း အနည်းငယ်ပျက်စီးသွားတယ်လို့ ဒေသခံက ပြောပါတယ်။ 

နေအိမ်ပျက်စီးသွားတဲ့ ဒေသခံအမျိုးသား တဦးက “မနေ့က ည ၁၀ နာရီကျော်မှာ  မိုးတအားရွာတဲ့အခါနဂိုတုန်းကလုပ်ထားတဲ့ ကမ်းပါးနံရံတွေ ချောင်းရေတိုက်စားပြီးတော့ ပြိုကျတာ နေအိမ်တွေလည်း ပြိုကျသွားခဲ့တာပေါ့။  ကျနော် အိမ်ဆိုရင် အဆိုးဆုံးပါပဲ။ ကျနော်တို့ ခေါင်းရင်းက အိမ်နဲ့ခြေရင်းက အိမ်တွေ ပြိုကျသွားတယ်ပေါ့၊  ၄ အိမ်လောက်က ၆၀ ရာခိုင်နှုန်းလောက် ပျက်စီးသွားခဲ့တယ်။”လို့ပြောပါတယ်။

တချို့အိမ်တွေမှာ မြေကြီးတွေ အက်ကွဲသွားပြီး လူနေထိုင်လို့ မရတော့ကြောင်းနဲ့  စိုးရိမ်ရတဲ့ အနေအထား ဖြစ်သွားတယ်လို့လည်း ပြောပါတယ်။

အခုလို ချောင်းကမ်းပါးမြေထိန်းနံရံပြိုကျမှုကို မြို့နယ်မီးသတ်တပ်ဖွဲ့တွေက ကူညီ ကယ်ဆယ်ပေးခဲ့တာကြောင့် လူတွေ ထိခိုက်ဒဏ်ရာမရရှိဘဲ ဘေးလွတ်ရာ ရွှေ့ပြောင်းပေးနိုင်ခဲ့တယ်လို့ ရခိုင်ပြည်နယ် မီးသတ်ဦးစီးဌာနထုတ်ပြန်ချက်အရ သိရပါတယ်။

2 months Ago

December 24, 2020

ဖားကန့်တွင် ကျောက်မျက်လုပ်ကွက်ဟောင်း ကမ်းပါးပြိုကျမှုကြောင့် ၄ ဦးသေဆုံး

ကချင်ပြည်နယ်၊ မိုးညှင်းခရိုင်၊ ဖားကန့်မြို့နယ် မော်ဝမ်းလေး ကျေးရွာအနီးမှာ ဒီဇင်ဘာ ၂၃ ရက်နေ့ မွန်းလွဲ ၂ နာရီခွဲအချိန်က ကျောက်စိမ်းလုပ်ကွက်ဟောင်း ကမ်းပါးပြိုကျခဲ့တာကြောင့် တနိုင်တပိုင်ကျောက်စိမ်းတူးသူ ၄ ဦးသေဆုံးခဲ့ပြီး ၁ ဦးဒဏ်ရာရရှိခဲ့တယ်လို့ မော်ဝမ်းလေး ကျေးရွာအုပ်ချုပ်ရေးရုံးက သိရပါတယ်။ ကျောက်စိမ်းတောင်ကုမ္မဏီရဲ့ လုပ်ကွက်ဟောင်း ကမ်းပါးပြိုကျခဲ့တာဖြစ်ပြီး လုပ်ကွက်ကမ်းပါးပေါ်မှာ ကျောက်စိမ်းတူးဖော်နေသူ ၅ ဦး မြေစာရိုက်ချခံခဲ့ရတာလို့ မျက်မြင်တွေ့ရှိသူတွေက ပြောပါတယ်။  ပြိုကျမှု အနားရှိတဲ့ ကျင်းသား မောင်ဆိုင်းနော်က "သူတို့က အောက်ကတူးနေတဲ့အချိန် အပေါ်ကမ်းပါးက ကြံဘတ် (ပတ်ကြားအက်) ပဲ့ကျပြီး သူတို့အပေါ်ပြုတ်ကျတာ။ လူတွေ ဒလိမ့်ကောက်ကွေး အောက်လိမ့်သွားတာ။ အောက်ရေထဲပြုတ်ကျတာ သုံးယောက်တော့ တွေ့လိုက်တယ်။ တစ်ယောက်ကတော့ မသေဘူး။ နောက်တစ်ယောက်ကတော့အပေါ်မှာ မြေစာဖုံးနေတာဖြစ်မယ်၊ ရေထဲကျလာတာမတွေ့ရဘူး" လို့ သူမြင်ခဲ့ရတာကို ပြောပါတယ်။ အမြင့်ပေ ၃၅၀  လောက်က ပြိုကျခဲ့တာဖြစ်ပြီး သေဆုံးသူ ရုပ်အလောင်းတွေကို ချက်ချင်းရှာဖွေ ကယ်ဆယ်ဖို့ မဖြစ်နိုင်ဘူးလို့ မြေပြိုရာကို ရောက်ရှိနေသူ ကယ်ဆယ်ရေး အဖွဲ့တွေက ပြောပါတယ်။  ကယ်ဆယ်ရေးတာဝန်ရှိသူတဦးက "ပြုတ်ကျပြီး ရေထဲမြုပ်သွားပြီလေ၊ ရေကလည်း ပေပေါင်းရာနဲ့ချီ နက်တယ်။ ဘယ်သူမှလည်း ရေငုတ်မရှာရဲဘူး၊ ပုတ်ပြီး ရေပေါ်ပေါ်လာမှပဲ ဆယ်လို့ ရမယ်ဗျ" လို့ ပြောပါတယ်။ မြေပြိုကျမှုကြောင့် သေဆုံးသူတွေဟာ မော်ဝမ်းလေးကျေးရွာကဖြစ်ပြီး ဒဏ်ရာရခဲ့သူ ၁ ဦးကိုတော့ ဖားကန့်ဆေးရုံ ပို့ဆောင်ခဲ့တယ်လို့ တာဝန်ရှိသူတွေက ပြောပါတယ်။ ကချင်ပြည်နယ် ဖားကန့်ကျောက်စိမ်းတွင်းဒေသမှာ လုပ်ကွက်ကမ်းပါးပြိုကျမှုနဲ့ မြေပြိုမှုတွေ နှစ်စဉ် ဖြစ်ပေါ်နေခဲ့တာပါ။  အခု  ၂၀၂၀ ခုနှစ်အတွင်းမှာ ဖော်ပြပါဖြစ်စဉ်မျိုး ၃၂ ကြိမ်ဖြစ်ပွားခဲ့ပြီး လူပေါင်း ၂၀၀ ကျော် သေဆုံးခဲ့ပြီး ဖြစ်ပါတယ်။ ဒီဇင်ဘာလအတွင်းမှာပဲ အခုဖြစ်စဉ်အပါအဝင် ၃ ကြိမ်ဖြစ်ပွားခဲ့ပြီး ၈ ဦးသေဆုံးကာ ၃ ဦးဒဏ်ရာ အပြင်းအထန်ရခဲ့ပါတယ်။ ဇူလိုင်လ ၂ ရက်နေ့ကလည်း ဝေခါကျေးရွာအနီး ဧရာရတနာကျောက်စိမ်းလုပ်ကွက် ကမ်းပါးပြိုကျခဲ့မှုကြောင့် ကျောက်တူးသမား ၁၇၂ ယောက်သေဆုံးခဲ့ပြီး ၃၇ ဦးဒဏ်ရာရခဲ့ပါတယ်။  အဆိုပါဖြစ်စဉ် ဖြစ်ပွားပြီးနောက်ပိုင်း အစိုးရက ကျောက်စိမ်းတူးဖော်ရေး လုပ်ငန်းတွေကို ၂၀၂၁ ဇန်နဝါရီလကုန်ထိ ရပ်နားဖို့ အမိန့်ထုတ်ထားပါတယ်။  ဖားကန့်ဒေသဟာ ကိုဗသ်-၁၉ ကူးစက်မှုများပြားနေတာကြောင့် ကျန်းမာရေးဝန်ကြီးဌာနက Stay at Home အမိန့်ထုတ်ထားတာလည်း ဖြစ်ပါတယ်။ ဇော်မိုးထက် (ဖားကန့် )
12 months Ago
Up