ကမ်းနားလမ်း

June 19, 2022

ထားဝယ်မြို့ ကမ်းနားလမ်းတွင် စစ်ကောင်စီတပ်ဖွဲ့ဝင်များ မိုင်းခွဲတိုက်ခိုက်ခံရ

တနင်္သာရီတိုင်း၊ ထားဝယ်မြို့၊ ကမ်းနားလမ်းမှာ ဇွန်လ ၁၈ ရက် ညနေ ၄ နာရီလောက်က “လောင်းလုံးကိုထိရင် ထားဝယ်နဲ့ငြိမယ်” စားသားပါ ဘန်နာလာဖြုတ်တဲ့ စစ်ကောင်စီတပ်သားတွေ မိုင်းခွဲတိုက်ခိုက်ခံရပြီး စစ်ကောင်စီတပ်သားတယောက် ထိခိုက်ဒဏ်ရာရရှိခဲ့တယ်လို့ မြို့ခံတဦးက ပြောပါတယ်။

စစ်ကောင်စီကို နေ့စဉ်နဲ့အမျှ နည်းမျိုးစုံနဲ့တော်လှန်နေတဲ့ လောင်းလုံးမြို့နယ် ဒေသခံတွေကို စစ်ကောင်စီက အင်အားအလုံးအရင်းနဲ့ ဖမ်းဆီး သတ်ဖြတ်တာ၊ ပြည်သူ့နေအိမ်တွေကို မီးရှို့ဖျက်ဆီးပြီး PDF တွေကို တောနင်းရှာဖွေ နေချိန်မှာ အခုလို ဖိုင်းဖောက်ခွဲမှု ဖြစ်ခဲ့တာပါ။

Guerrilla Dawei (ထားဝယ်ပြောက်ကျားတပ်ဖွဲ့) က “လောင်းလုံးကိုထိရင် ထားဝယ်နဲ့ငြိမယ်” စာသားပါ ဘန်နာလာဖြုတ်တဲ့ စစ်ကောင်စီတပ်သားများကို အဝေးထိန်းမိုင်းဖြင့် ဖောက်ခွဲတိုက်ခိုက်ခဲ့တယ်လို့ အသိပေးကြေညာချက် ထုတ်ပြန်ထားပါတယ်။

မိုင်းခွဲတိုက်ခိုက်ခံရမှုကြောင့် ထိခိုက်ဒဏ်ရာရရှိခဲ့တဲ့ အရပ်ဝတ်ဝတ်ထားတဲ့ စစ်ကောင်စီတပ်သားကို အရေးပေါ်လူနာတင်ယာဉ်နဲ့ တင်ဆောင်သွားပြီး ဖြတ်သွားဖြတ်လာ ပြည်သူတွေကို စစ်ကောင်စီတပ်သားတွေက ဖမ်းဆီးစစ်ဆေးနေတယ်လို့ မျက်မြင်တွေ့ရှိသူတဦးက ပြောပါတယ်။

ထားဝယ်မြို့၊ ဗဟိုလမ်းဆုံမီးပွိုင့်ရှိ စစ်ကောင်စီက တပ်ဆင်ထားတဲ့ စောင့်ကြည့်ရေး CCTV ကင်မရာနှစ်လုံးကိုလည်း ထားဝယ်ပြောက်ကျားတပ်ဖွဲ့က ထပ်မံပစ်ခတ်ဖျက်ဆီးခဲ့တယ်လို့ ကြေညာချက်မှာ‌ ဖော်ပြထားပါတယ်။

အခုဖြစ်စဉ်တွေဟာ ရပ်ကွက်နေပြည်သူတွေနဲ့ လုံးဝမသက်ဆိုင်ဘဲ Guerrilla Dawei(ထားဝယ်ပြောက်ကျားတပ်ဖွဲ့) နဲ့သာ လုံးဝသက်ဆိုင်ကြောင်း အသိပေးထုတ်ပြန်ထားပါတယ်။

လောင်းလုံးမြို့နယ်ကို အခု ၃ ရက်အတွင်း စစ်ကောင်စီတပ်ဖွဲ့က ကြည်း၊ လေ၊ ရေ အင်အားအလုံးအရင်းနဲ့ အကြမ်းဖက်ဖိနှိပ်နေမှုကြောင့် အပြစ်မဲ့ပြည်သူ ၃ ဦး သေဆုံး၊ ၃ ဦး ပြင်းထန်ဒဏ်ရာရရှိကာ ၃၅ ဦးထက်မနည်း ဖမ်းဆီးခံထားရပြီး နေအိမ် ၃ ဆောင် မီးရှို့ခံထားရတယ်လို့ လောင်းလုံးမြို့နယ် ပြည်သူ့အုပ်ချုပ်ရေးအဖွဲ့ တာဝန်ရှိသူတဦးက ပြောပါတယ်။

6 months Ago

August 31, 2021

ညောင်ဦးမြို့ ကမ်းနားလမ်း နေအိမ်များ မြစ်ရေဝင်ရောက်

မန္တလေးတိုင်းဒေသကြီး ညောင်ဦးမြို့နယ် ပုဂံရှေးဟောင်းဒေသ ဧရာဝတီမြစ်ကမ်းဘေး ကမ်းနားလမ်းရှိ နေအိမ်များ သြဂုတ် ၃၀ ရက် ညနေပိုင်းက မြစ်ရေဝင်ရောက်နေတာကြောင့် ပြောင်းရွှေ့ဖို့ ပြင်ဆင်နေကြတယ်လို့ ညောင်ဦးမြို့နယ်မီးသတ်ဦးစီးဌာနက သိရပါတယ်။

ညောင်ဦးမြို့ရဲ့ ဧရာဝတီမြစ်ရေဟာ သြဂုတ် ၃၀ ရက် ညနေပိုင်းက ၂၁၀၈ စင်တီမီတာ ရောက်ရှိနေပြီး စိုးရိမ်ရေအမှတ် ရောက်ဖို့ ၆လက်မ (၁၂ စင်တီမီတာ) အလိုမှာ ရှိနေတာပါ။

လက်ရှိ ညောင်ဦးမြို့ အမှတ် ၁၊ ၂၊ ၄ ရပ်ကွက်တို့ရှိ ကမ်းနားလူနေအိမ် ၄၀ လောက် မြစ်ရေဝင်ရောက်နေတာလို့ ဒေသခံတဦးက ပြောပါတယ်။

“ဧရာဝတီမြစ်ရေကြီးချိန် ရေဝင်ရောက်လေ့ရှိတဲ့ ကမ်းနားလမ်းရှိ ရပ်ကွက်တွေနဲ့ အနိမ့်ပိုင်းရပ်ကွက်တွေမှာ ရေဝင်နေပါပြီ၊ လက်တစ်လောအခြေအနေမှာ စိုးရိမ်ဖွယ်မရှိသေးပါဘူး၊ မြစ်ရေဆက်လက်မြင့်တက်လာနိုင်တယ် ပြောတော့ ရွှေ့ပြောင်းဖို့ ပြင်ဆင်နေပြီ။”

အခုရက်ပိုင်းအတွင်း ရက်ဆက်မိုးရွာသွန်းမှုကြောင့် မြစ်ရေဆက်လက်မြှင့်တက်နိုင်ရာ နှစ်စဉ် ရေဝင်လေ့ရှိတဲ့ ရပ်ကွက်တွေမှာ မြို့နယ်မီးသတ်ဦးစီးဌာနမှ အသိပေးတာတွေ လုပ်ဆောင်ပေးနေပါတယ်။

မိုးလေဝသနှင့်ဇလဗေဒညွှန်ကြားမှုဦးစီးဌာနက ဧရာဝတီမြစ်ရေဟာ ညောင်ဦးမြို့ရဲ့ စိုးရိမ်ရေအမှတ်ကို နောက်နှစ်ရက်အတွင်း ရောက်ရှိနိုင်ကြောင်း ထုတ်ပြန်ထားပါတယ်။

ညောင်ဦးမြို့နယ်မှာ မီးဘေး၊ ရေဘေး၊ လေဘေး၊ ငလျင်ဘေးနဲ့ အခြားသော သဘာဝဘေးအန္တရာယ်များ ကျရောက်လာပါက ၀၆၁ ၂၄၆၀၁၉၁၊ အရေးပေါ်   ၁၉၁ နဲ့ ၀၉ ၄၀၂၇၅၃၈၉၆ တို့သို့ အချိန်မရွေး ဆက်သွယ်အကူအညီ တောင်းခံနိုင်တယ်လို့ သိရပါတယ်။

1 year Ago
More News
Up