ကမ္ဘာ့ရေနံဈေး ဆက်လက်ကျဆင်း၊ စတော့ဈေးကွက်တွင်လည်း ရှယ်ယာတန်ဖိုးကျ

January 21, 2016

ကမ္ဘာ့ရေနံဈေး ဆက်လက်ကျဆင်း၊ စတော့ဈေးကွက်တွင်လည်း ရှယ်ယာတန်ဖိုးကျ

ဇန်န၀ါရီ ၂၀ ရက်နေ့က ကမ္ဘာ့ရေနံဈေး ဆက်လက်ကျဆင်းခဲ့တဲ့အတွက် ကမ္ဘာ့ စတော့ဈေးကွက်တွေမှာလည်း ရှယ်ယာတန်ဖိုးတွေ ဆက်လက်ကျဆင်းခဲ့ပါတယ်။ ဝေါလ် စထရိ (Wall Street) စတော့ဈေးမှာ မနက်ပိုင်း ၃ ရာခိုင်နှုန်း ကျဆင်းခဲ့တာကနေ ဈေးပိတ်ချိန်မှာတော့ အနည်းငယ် ပြန်တက်ခဲ့ပါတယ်။ ဒေါင်းဂျုံးက ၁ ဒသမ ၅၆ ရာခိုင်နှုန်း၊ S&P 500 Index ကတော့ ၁ ဒသမ ၂ ရာခိုင်နှုန်း အကျဈေးနဲ့ ဈေးပိတ်ခဲ့ပါတယ်။ အဓိက စတော့ဈေးကွက်ကြီးဖြစ်တဲ့ ဥရောပ စတော့ဈေးကွက်ဟာလည်း ၁၅ လအတွင်း အနိမ့်ဆုံးဈေးကျသွားပါတယ်။ ရေနံဝယ်လိုအား ကျဆင်းလို့ ရေနံဈေးကျတာကနေ ကမ္ဘာ့စီးပွားရေးလည်း ဆက်လက်ကျဆင်းမယ့် လက္ခဏာ ဖြစ်နိုင်တဲ့အတွက် ငွေကြေးရင်းနှီးမြှုပ်နှံသူတွေက စိုးရိမ်ပူပန်နေကြတယ်၊ စတော့ရှယ်ယာ အ၀ယ်မရှိဘဲ ထုတ်ရောင်းတာချည်း များနေတယ်လို့ ကျွမ်းကျင်သူတွေက သုံးသပ်ပါတယ်။ ဇန်န၀ါရီ ၂၀ ရက်နေ့က အရှေ့အာရှ စတော့ဈေးကွက်တွေ အကျဈေးနဲ့ ပိတ်ခဲ့ပြီး ဥရောပနဲ့ အမေရိကန် စတော့ဈေးတွေလည်း ဆက်ပြီး ကျဆင်းခဲ့တာပါ။ စတော့ဈေးကွက် တော်တော်များများဟာ ပြီးခဲ့တဲ့လတွေအတွင်း အမြင့်ဆုံးရရှိခဲ့တဲ့ ဈေးကနေ ၂၀ ရာခိုင်နှုန်းကျော်အထိ ရှယ်ယာတန်ဖိုးတွေ ကျဆင်းခဲ့တာလည်း ဖြစ်ပါတယ်။ ဇန်န၀ါရီ ၂၀ ရက်နေ့မှာပဲ Brent ရေနံဈေးက ၅ ရာခိုင်နှုန်းနဲ့ အမေရိကန် ရေနံဈေးကတော့ ၇ ရာခိုင်နှုန်းလောက် ဈေးဆက်ကျခဲ့ပြီး ၂၀၀၃ ခုနှစ်နောက်ပိုင်း အနိမ့်ဆုံးဈေးကို ကျဆင်းခဲ့ပါတယ်။
6 years Ago
Up