ကမာရွတ်

November 24, 2022

ကမာရွတ်မြို့နယ်ရှိ TT Diamond စိန်ဆိုင် ဓားပြတိုက်ခံရပြီး ဆိုင်ဝန်ထမ်း ၂ ဦး ဒဏ်ရာရ

ရန်ကုန်မြို့၊ ကမာရွတ်မြို့နယ် အမှတ် ၁ ရပ်ကွက် ဗဟိုလမ်းမှာဖွင့်လှစ်ထားတဲ့ TT Diamond စိန်ဆိုင်မှာ နိုဝင်ဘာ ၂၄ ရက် နေ့လယ် ၁ နာရီလောက်က ဒုတိယအကြိမ် ဓားပြတိုက်ခံရပြီး ဆိုင်လုံခြုံရေးဝန်ထမ်းနှစ်ဦး ဒဏ်ရာရသွားတယ်လို့ ဆိုင်နဲ့နီးစပ်သူတဦးက ပြောပါတယ်။

“ဒီကနေ့ နေ့လယ် ၁ နာရီလောက်က ဖြစ်တာပါ။ ဆိုင်ထဲဝင်ဖို့လုပ်တာ ဆိုင်လုံခြုံရေးဝန်ထမ်းတွေက တားတဲ့အချိန်မှာ သေနတ်နဲ့ပစ်သွားတယ်။ လုံခြုံရေးနှစ်ဦး ဒဏ်ရာရသွားတယ်။”

အမည်မသိ လူသုံးဦးက အိမ်စီးကားပေါ်ကနေ ဆင်းလာပြီး TT Diamond ဆိုင်အတွင်း ဝင်ရောက်ဖို့လုပ်ချိန်မှာ ဆိုင်လုံခြုံရေးဝန်ထမ်းတွေက တားဆီးခဲ့ရာ လုယက်သူတွေက ဓားနဲ့ထိုး သေနတ်နဲ့ပစ်ခတ်တာကြောင့် ဝန်ထမ်းနှစ်ဦးအနက် တဦး ဝဲလက်ဖျံ ဓားဒဏ်ရာနဲ့ ကျန်တဦးမှာ ပေါင်ရင်းကျည်ထိမှန်ဒဏ်ရာ ရရှိခဲ့ပြီး ဒဏ်ရာရသူတွေကို လူနာတင်ကားနဲ့ ဆေးရုံပို့ဆောင်လိုက်တယ်လို့ ဆိုပါတယ်။

အဆိုပါဓားပြတိုက်မှုမှာ ဆိုင်ရှိပစ္စည်းတွေ မပါသွားဘူးလို့သိရပြီး လုယက်သူတွေဟာ စီးလာတဲ့ကားနဲ့ ဗဟိုလမ်းအတိုင်း လှိုင်မြို့နယ်ဘက်ကို မောင်းနှင်ထွက်ပြေးသွားတယ်လို့ သိရပါတယ်။

ဓားပြတိုက်မှုဖြစ်ပွားပြီးနောက် အဆိုပါ စိန်ရွှေရတနာဆိုင်ကို စစ်ကောင်စီတပ်ကား ၂ စီး၊ ရဲကား ၂ စီး၊ အင်အား ၂၀ ဝန်းကျင် ရောက်ရှိလာပြီး ဆိုင်အတွင်း မေးမြန်းစစ်ဆေးတာတွေ ပြုလုပ်ကာ ဗဟိုလမ်းမှာလည်း ပိတ်ဆို့စစ်ဆေးမှုတွေ ပြုလုပ်ခဲ့တယ်လို့ ဒေသခံတွေဆီက သိရပါတယ်။

ပြီးခဲ့တဲ့ ဩဂုတ် ၂၅ ရက်ကလည်း အဆိုပါ TT Diamond စိန်ဆိုင် လုယက်ခံခဲ့ရပြီး သိန်း ၁၀၀ ကျော်တန်ဖိုးရှိ ပလက်တီနမ်ဆွဲကြိုး အကုံး ၂၀ ပါသွားခဲ့ပါသေးတယ်။

7 days Ago

August 25, 2022

ကမာရွတ်ရှိ TT Diamond Jewellery စိန်ဆိုင် ဓားပြတိုက်ခံရ

ရန်ကုန်မြို့၊ ကမာရွတ်မြို့နယ်၊ ၁ ရပ်ကွက်၊ ဗဟိုလမ်း၊ အမှတ် ၂၀၂ ရှိ TT Diamond Jewellery စိန်ဆိုင်ကို ဒီနေ့ သြဂုတ် ၂၅ ရက် နေ့လယ်ပိုင်းက ဓားပြတိုက်မှုဖြစ်ခဲ့ပြီး သိန်း ၁၀၀ တန်ဖိုးရှိ ဆွဲကြိုးအကုံးနှစ်ဆယ် ပါသွားတယ်လို့ ရွှေဆိုင်နဲ့နီးစပ်သူတွေတွေက ပြောပါတယ်။

TT Diamond Jewellery စိန်ဆိုင်အတွင်း မတ်စ်ခ် အနီတပ်ထားတဲ့ လူငယ်နှစ်ယောက် ဝင်လာပြီး တယောက်က ပစ္စတိုသေနတ်၊ တယောက်က ဓားမြှောင်ကိုင်ဆောင်ကာ ခြိမ်းခြောက်ပြီး ပလက်တီနမ်ရွှေဆွဲကြိုး အကုံး ၂၀ ယူသွားခဲ့တာလို့ ဆိုပါတယ်။

“တဦးက သေနတ်နဲ့ချိန်ပြီး တဦးက ဓားမြှောင်နဲ့ထောက်ထားတာ၊ ဆွဲကြိုးအကုံး ၂၀  ပါသွားတယ်။ တကုံးကို သိန်း ၁၀၀ နီးပါးရှိတယ်။”

TT Diamond Jewellery စိန်ဆိုင် ဓားပြတိုက်ခံရတာ မှန်ကန်ပြီး သိန်း ၂,၀၀၀ နီးပါး ပါသွားတယ်လို့ အုပ်ချုပ်ရေးနဲ့နီးစပ်သူတယောက်က ပြောပါတယ်။

“သူတို့က ပစ်တာခတ်တာ မလုပ်ဘူး၊ ပစ္စည်းတွေယူပြီး ဆိုင်က ပြန်ထွက်ခါနီး မီးခိုးဗုံးနဲ့ပစ်တယ်။ အပြင်မှာ ဗုံးပုံစံထောင်သွားတယ်။”

လတ်တလောမှာ စစ်ကောင်စီတပ်တွေနဲ့ ရဲတွေဟာ ဗဟိုလမ်းမကြီးတလျှောက်မှာ လမ်းသွားလမ်းလာနဲ့ ကားတွေကို စစ်ဆေးနေတယ်လို့ ရပ်ကွက်နေသူတွေက ပြောပါတယ်။

3 months Ago
More News
Up