ကမာရွတ်

March 9, 2021

မဇ္ဈိမနှင့် ကမာရွတ်မီဒီယာရုံးတို့ကို စစ်တပ်နှင့်ရဲက အကြမ်းဖက် ဝင်ရောက်စီးနင်း

မဇ္ဈိမမီဒီယာရဲ့  ရန်ကုန်ရုံးကို  စစ်တပ်၊ ရဲ အင်အားအများအပြားနဲ့  မတ်လ ၉  ရက် ညနေ ၄ နာရီခွဲ ဝန်းကျင်က ဝင်ရောက်စီးနင်းခဲ့တယ်လို့  မဇ္ဈိမမီဒီယာက ထုတ်ပြန်ကြေညာပါတယ်။

မဇ္ဈိမသတင်းဌာနအနေနဲ့ အဆိုပါရုံးကို  စစ်အာဏာသိမ်းပြီးနောက်ပိုင်းမှာ အသုံးပြုခြင်းမရှိတော့ဘူးလို့လည်းဆိုပါတယ်။

သန်လျင် Star စီးတီးမှာရှိတဲ့ မဇ္စျိမသတင်းဌာနကို ရုံးခန်းကို ရဲနဲ့ စစ်တပ်ပါဝင်တဲ့ လက်နက်ကိုင်တပ်ဖွဲ့တွေက ကားအစီး​ရေ ၁၀ ​​ကျော် အင်အားအလုံးအရင်းနဲ့ ဝင်​ရောက် စီးနင်း ရှာ​ဖွေ​ခဲ့တာဖြစ်ပြီး သတင်းသမားတွေကတော့ ဖမ်းဆီးခံရခြင်းမရှိဘူးလို့ သိရပါတယ်။

ကမာရွတ်မီဒီယာရုံးခန်း

အလားတူ ကမာရွတ်မြို့နယ် စံရိပ်ငြိမ် ၆ လမ်းမှာရှိတဲ့ Kamayut Media ရုံးကိုလည်း ဒီကနေ့ မွန်းလွဲ ၁ နာရီလောက်က စစ်ကား ၇ စီးလောက်နဲ့ အကြမ်းဖက်ဝင်ရောက်ပြီး ရုံးတွင်း ရှိနေသူ ၂ ဦးကို ဖမ်းဆီးခေါ်ဆောင်သွားပါတယ်။

ရုံးထဲမှာ ၂ နာရီနီးပါး ဝင်ရောက်ရှာဖွေခဲ့ပြီး ရုံးပစ္စည်းတွေအတော်များများကို စစ်တပ်ကသိမ်းယူသွားတယ်လို့ ကမာရွတ်မီဒီယာက ပြောပါတယ်။ ဖမ်းဆီးခံရသူတွေနဲ့ ပတ်သတ်ပြီး လိုက်လံ စုံစမ်းနေတယ်လို့လည်း ပြောပါတယ်။

မနေ့ကလည်း Myanmar Now သတင်းဌာနကို ရဲနဲ့စစ်တပ်က ဝင်ရောက်စီးနင်းခဲ့ပါတယ်။ 

DVB ၊ Mizzima ၊ ခေတ်သစ်မီဒီယာ၊ Myanmar Now နဲ့ 7 Day  သတင်းမီဒီယာ  ၅ ခုကို ထုတ်ဝေခွင့်ရပ်ဆိုင်းကြောင်း အာဏာသိမ်းစစ်အုပ်စုရဲ့ ပြန်ကြားရေးဝန်ကြီးဌာနက မတ်လ ၈ ရက် နေ့စွဲနဲ့ ထုတ်ပြန်ကြေညာခဲ့ပါတယ်။

Photo- Mizzima

3 months Ago

March 2, 2021

ကမာရွတ်မြို့နယ်ထဲက လူငယ်တွေရဲ့ လမ်းပေါ်က တော်လှန်ရေး တီးဝိုင်းလေး

စစ်အာဏာရှင်စနစ်ကို ဆန့်ကျင်တဲ့ ဒီမိုကရေစီနဲ့ လွတ်လပ်မှုကိုလိုလားတဲ့ လူငယ်တချို့ဟာ ကမာရွတ်မြို့နယ်ထဲက ဆန္ဒပြသူတွေနဲ့အတူ တော်လှန်ရေး သီချင်းတွေ သီဆိုနေကြတာကို မြင်တွေ့ရပါတယ်။

ပလတ်စတစ်ပုံးတွေကို တီးခတ်ပြီး မြူးကြွတဲ့ အလိုမရှိ ဆိုတဲ့ သီချင်းကိုတော့ ထိုင်သပိတ်လုပ်နေသူအားလုံးကလည်း ဝိုင်းဆိုခဲ့ကြတဲ့ မြင်ကွင်းဟာ  မြင်ရကြားရသူတွေကို စိတ်ကြည်နူးခွန်အားဖြစ်စေပါတယ်။ 

အာဏာရှင်ကို မောင်းထုတ်တဲ့ သံပုံးတီးလှုပ်ရှားမှုကို ရေးစပ်ထားတဲ့ အလိုမရှိ သီချင်းက စစ်ချီတီးလုံးနဲ့ ဆင်တူတဲ့အတွက်လည်း   စိတ်ဓာတ်တက်ကြွစေပါတယ်။

“တယောက်တည်း ခံစားနေရမယ် အမေ့သားတွေ သမီးတွေလက်တွေပြ၊ ပုခုံးပေါ်ထမ်းတင်ထားတဲ့ အမေ့စကားတွေ နားထဲကြားနေရ၊ ဘယ်လိုပဲအခက်အခဲတွေရှိပါစေ အကုန်ဖြတ်ကျော်သွားမယ့် စိတ်ကိုထား၊ တယောက်ချင်းအကုန်ဝိုင်းတွန်းကြရင် ပိတ်ထားတဲ့ တံခါးများပွင့်မှာပါ။ သစ်တပင်ကောင်းမှ ငှက်တသောင်းလုံးနားလို့ရမှာပါ၊  ဟေ့ အမှန်တရားကို ရရင်ရ ပြန်မရင် အဆုံးထိသွားမှာပါ ၊ သံပုံးတွေရှေ့မှာချ တစ္ဆေတယောက်လို မောင်းထုတ်သွားမှာပါ  ၊ အနိုင်ရရင် က ချင်ကမယ် အနိုင်မရခင် သွေးတွေရဲနေမှ  ပိတ်ထားတဲ့နားတွေက အကုန်လုံးအော်ပြောမှကြားမှာပါ”။ 

“အာဏာရှင်မောင်းထုတ်ကြမယ် အလိုမရှိ အလိုမရှိ ၊ ပြည်သူတွေကန့်ကွက်ကြမယ် အလိုမရှိ မလိုမရှိ ၊ သံပုံးတွေ တို့အတူတီး အမှန်တရားအတွက် ရဲရင့်ဖို့လိုပြီ ၊ အာဏာရှင်မောင်းထုတ်ကြမယ် အလိုမရှိ အလိုမရှိ၊ ပြည်သူတွေကန့်ကွက်ကြမယ် အလိုမရှိ မလိုမရှိ၊ သံပုံးတွေတို့ အတူတီး အမှန်တရားအတွက် ရဲ့ရင့်ဖို့လိုပြီ  ဆန္ဒဖော်ထုတ်ကြမယ် အမှန်တရားဘက်မှာ ငါတို့ရပ်တည်ပြီ” 

ဒီသီချင်းဟာ ၂၀၂၁ စစ်အာဏာရှင်စနစ်ဆန့်ကျင်ရေးလူထုလှုပ်ရှားမှုအတွင်း လူငယ်တွေအကြားမှာ ဝိုင်းဖွဲ့သီဆိုမှုအများဆုံး တေးသီချင်းတပုဒ်ဖြစ်ပြီး ၈၈၈၈ လူထုအရေးတော်ပုံကာလက ထွက်ရှိခဲ့တဲ့  ကမ္ဘာမကြေဘူးသီချင်းနဲ့ အရေးကြီးပြီ တော်လှန်ရေး သီချင်းတွေဟာလည်း  သပိတ်စစ်ကြောင်းတွေနဲ့အတူ နေ့စဉ်လွင့်ပျံ့နေဆဲဖြစ်ပါတယ်။

4 months Ago
More News
Up