ကဘူးလ်မြို့

December 1, 2021

ကဘူးလ်မြို့တွင် လမ်းဘေးဗုံးပေါက်ကွဲပြီး လူ ၅ ဦးထက်မနည်း ဒဏ်ရာရ

အာဖဂန်နစ္စတန်နိုင်ငံရဲ့ မြို့တော်ကဘူးလ်က လမ်းဘေးမှာ ထောင်ထားတဲ့ ဗုံးတလုံး ပေါက်ကွဲလို့ လူ ၅ ယောက်ထက်မနည်း ဒဏ်ရာရခဲ့တယ်လို့ အာရီယာနာ ရုပ်သံနဲ့ မျက်မြင်သက်သေတွေက နိုဝင်ဘာ ၃၀ မှာ ပြောပါတယ်။

ဗုံးခွဲ တိုက်ခိုက်ရတဲ့ ပစ်မှတ်က တိုယိုတာ ဟိုင်းလပ်စ်ကားနဲ့ ဆင်တူတဲ့ နောက်ခန်းပွင့် ကားတစီး ဖြစ်ပုံရတယ်လို့ မျက်မြင်သက်သေတွေနဲ့ မီဒီယာက ဖော်ပြပေမဲ့ နောက်ထပ် အသေးစိတ် အချက်အလက်တွေနဲ့ တရားဝင် အတည်ပြုချက်တွေကိုတော့ မရသေးပါဘူး။

စီးပွားရေး အကျပ်အတည်း နက်ရှိုင်းလာနေတဲ့ နိုင်ငံကို ထိန်းချုပ်နေရလို့  တာလီဘန်အစိုးရမှာ  ဖိအားတွေ နဂိုတည်းက ရှိနေခဲ့ပါတယ်။တိုက်ခိုက်မှုတွေကြောင့် ဆယ်စုနှစ်ချီ စစ်ပွဲတွေအပြီးမှာ အာဖဂန် လုံခြုံရေး ပြန်ရနေပြီလို့ အခိုင်အမာ ပြောထားတဲ့ တာလီဘန် အစိုးရအပေါ် ဖိအားတွေ ပိုများလာခဲ့ပါတယ်။

1 hour Ago

November 3, 2021

အာဖဂန်နစ္စတန် ကဘူးလ်မြို့ရှိ စစ်ဆေးရုံ တိုက်ခိုက်ခံရပြီး လူ ၂၅ ဦးထက်မနည်း သေဆုံး

အာဖဂန်နစ္စတန်နိုင်ငံ မြို့တော်ကဘူးလ်ရဲ့ မြို့လယ်က နိုင်ငံ့အကြီးဆုံး စစ်ဆေးရုံကို နိုဝင်ဘာ ၂ ရက်က တိုက်ခိုက်ခံရလို့ လူ ၂၅ ယောက်ထက်မနည်း သေဆုံးပြီး လူ ၅၀ ကျော် ဒဏ်ရာရခဲ့ပါတယ်။

ခုတင် ၄၀၀ ဆံ့ ဆာဒါမိုဟမ်မဒ်ဒါဝတ်ခန်း ဆေးရုံဝင်ပေါက်မှာ အကြီးစားဖောက်ခွဲမှု ၂ ရပ် ဖြစ်အပြီး သေနတ်သမားတွေက ဆေးရုံကို တိုက်ခိုက်ခဲ့တာလို့ တာလီဘန် အရာရှိတွေက ပြောပါတယ်။

တိုက်ခိုက်သူ ၄ ယောက်ကို တာလီဘန် လုံခြုံရေးတပ်တွေက သတ်နိုင်ခဲ့ပြီး ၅ ယောက်မြောက် တိုက်ခိုက်သူကို အရှင်ဖမ်းမိခဲ့တယ်လို့ တာလီဘန် ပြောခွင့်ရက ပြောပါတယ်။

အနောက်နိုင်ငံတွေက ကျောထောက်နောက်ခံပေးထားတဲ့ အစိုးရကို ဩဂုတ်လမှာ တာလီဘန် တွေက လုံးဝ အနိုင်ရပြီးတည်းက နိုင်ငံတဝန်း တိုက်ခိုက် သတ်ဖြတ်မှု တိုးလာနေတာကြောင့် ဆယ်စုနှစ်ချီ စစ်ပွဲတွေအပြီးမှာ အာဖဂန်လုံခြုံရေး ပြန်ရအောင် လုပ်မယ် ဆိုတဲ့ တာလီဘန်တွေရဲ့ အခိုင်အမာ ကြေညာချက်ကို လှိုက်စားသလို ဖြစ်နေပါတယ်။

ဒီတိုက်ခိုက်မှုကို ဘယ်သူကမှ တာဝန်မခံသေးပေမယ့် အိုင်အက်စ် စစ်သွေးကြွတွေရဲ့ ရှုပ်ထွေးတဲ့ တိုက်ခိုက်မှုပုံစံ ဖြစ်နေတယ်လို့ ရိုက်တာသတင်းဌာနက ဖော်ပြပါတယ်။

အိုင်အက်စ်တွေရဲ့ ဗုံးခွဲမှု ကွင်းဆက်တွေဟာ တာလီဘန်တွေ ထိန်းချုပ်ထားတဲ့ အာဖဂန်နစ္စတန် အတွက် အကြီးဆုံး ခြိမ်းခြောက်မှု ဖြစ်နေတယ်လို့လည်း ရိုက်တာက ပြောပါတယ်။

4 weeks Ago
More News
Up